Friday, December 29, 2006

إلى حجاج بيت الله الحرام



يا سائرين إلى البيت العتيق لقد . . . . سرتم جسومًا وسرنا نحن أرواحا
إنما أقمنا على عذر وقد رحلــــوا . . . . ومن أقـــــام على عذر كمن راحا


كود لوضع التكبيرات على المواقع من موقع إسلام واي
<embed type='audio/x-pn-realaudio-plugin' src='http://www.islamway.com/eid.rpm' width='55' height='25' type='audio/x-pn-realplayer-plugin' controls='PlayButton' autostart='true'>

Monday, December 25, 2006

لا مكان للشعر

كنت بفكر إني أكتب بوست جديد عن أجمل وأروع قصيدة حب بالنسبة لي ..
لكن دنيا كهذه لا يعرف الإنسان فيها راحة البال ولا يعرف إنه يتكلم عن الحب والشعر ...
وانا أجهز أفكاري للبوست أشاهد فيلم Syriana إنتاج عام [2005] فكانت الصدمة اللي جعلتني أغير موضوع البوست .. لأنه فيلم عنصري جداً وفيه تصوير مهين للمسلمين عموماً والعرب بصفة خاصة والخليجيين بصفة أخص جداً ... يصور الفيلم المسلمين يعيشون حالة من الضياع والفوضى وبكثير من العنجهية يصور الفيلم كيف تتدخل الإدارة الأمريكية عن طريق الجواسيس و منظمات التحرير ومؤسسات الاقتصاد لتنظيم حياة بلاد الإسلام .. اتحرق دمي وقررت أعرض تفاصيل الفيلم بالكامل ... خصوصاً إني ما سمعت عن دولة مسلمة ولا عربية ولا خليجية أنكرت الفيلم طبعاً خايفين إن الأمريكان يقولوا عليهم ضد حرية الفن وحرية الإبداع .. لكن أمريكا لا تخاف مننا لما تأمر بحذف حلقات من مسلسل فارس بلا جواد لأنه يمس إسرائيل .. هم عندهم فن وإحنا عندنا جبن .. ولا حتى دولة احتجت ولا شجبت .. حتى الاحتجاجات عديمة النفع بطلنا نعملها ... لما كنا بنحتج ونشجب نزار قباني قال على العرب إنهم أموات .. طيب كيف الحال دلوقت وهما حتى مش بيحتجوا ؟؟!!!
المهم برضه حرقة الدم ظلت متواصلة ومستمرة فيظهر موضوع تالت يخليني أغير موضوع البوست ...
وهو بشرى ظهور كلب أمريكي جديد في المنطقة هو المدعو زيناوي رئيس أثيوبيا بعد سماعي خطابه بإعلان الحرب على الصومال ووصفى له بالكلب ليس لأنه يحمل صفات الكلب الطيبة من وفاء وتضحية ولكن لأنه يحمل صفة الكلب السيئة وهي التبعية لمن يطعمه .. زي بلير كده وزي غيره كتير
زيناوي والصومال ... بوتين والشيشان ... مشرف وأفغانستان .. اسرائيل والفلسطنيين ... الشيعة والعراقيين السنة
دويتهات متصلة مستمرة العضو الأول فيها دايماً كلب أمريكي والعضو الثاني مسلمين غلابة
زي ما كانت أفغانستان تائهة بعد خروج الاحتلال السوفيتي وعمت الفوضى أرجاء البلاد حتى جاءت طالبان فأعادت الاستقرار لأفغانستان فهاجت أمريكا عليها بجنودها وجنود التابعين لها لأنها دولة الفوضى العظمي تريد تنشر فكر الفوضى في جميع أنحاء العالم ..
الصومال أيضاً اللي بقالها سنين تائهة غير معروف لها حكومة وتعاني من الفوضى والفقر إلى أن جاءت المحاكم الإسلامية لتعيد الاستقرار للدولة لكن كيف ودولة الفوضى لا ترضى بهذا وبضوء أخضر من السيد يخرج الكلب المسعور مظهراً الولاء لسيده والإخلاص لمن يطعمه على بلد من أفقر البلاد في العالم لمجرد أن الحكومة الجديد تحمل وصف ( إسلامية )
دي كانت الرحلة من قصيدة حب كنت أود نشرها في هذه المساحة إلى حرقة الدم والكلام عن الحرب والقتل ...
ينفع هنا نقول ما علينا ؟؟؟!!!

Tuesday, December 12, 2006

بيتزا .. بيتزا



هل تستطيع أن تخمن إيه اللي في الصورة ؟؟؟

إنها بيتزا صنعتها أمي ..

فأمي تصر على أن تصنع لنا بيتزا .. تلك الأكلة الغربية الشهيرة ..

ومع كونها لا تجيد عملها (والصورة خير برهان ولك أن تتخيل الطعم !!) إلا أنها تصر على خبزها لنا ... ورغم أننا في بيتنا لا نحب البيتزا على الإطلاق إلا أنها مصممة أنها تعملها لنا على اعتبار أنها أدرى بمصلحتنا ...

وبعد أن خبزتها أمي لا يجرؤ أحد أن يقول إن دي مش بيتزا ولا يقول إن طعمها وحش أو إن إحنا مش بنحبها أو إنها مش مناسبة لنا .. الكل لازم ياكل وهو ساكت واللي يتكلم يبقى مش بيفهم حاجة ...

يظهر أن أمي متأثرة بأفكار العلمانيين ومدعي الثقافة في مصر

Wednesday, December 06, 2006

كيف تكون مشهورا

نظراً للحالة الصعبة التي يمر بها شباب هذه الأيام أولاد وبنات .. حيث أصبحت أبواب الحياة مغلقة أمامهم وهم يجرون وراء الدنيا جري الحمير الهاربة من الأسد الضارية وأصبح حال الواحد منهم حسرة وندامة وطبعاً الكلام عن الشباب المصري الغلبان مش اللي طلع لقى أبوه رئيس من 25 سنة .

الكلام للشباب المصري الغلبان اللي مش لاقي شغل محترم يكفل له حياة كريمة رغم إنه معاه مؤهل جامعي ويعرف كذا لغة. ومش عارف يتجوز مع إنه مؤدب وابن حلال ومالوش في الخبص ولا في اللي بالي بالك، واللي بيتفرج على ناس أقل منه في التعليم وفي الدين وفي الأصل والأدب بس كسبوا ألوف الألوفات وبيطلعوا في الفضائيات ويركبوا احسن العربيات وبتلف حواليهم البنات.

وإلى الشابات المصريات الغلبانات المحترمات المحتشمات اللي مش عارفة تعمل إيه وهي بتكبر في السن ومفيش حد عليه القيمة اتقدم لها عشان يجوزها وابوها وامها قلقانين عليها ..

إليكم جميعاً نقدم بعض طرق الشهرة والعبور .. اذا اتبعت واحد من هذه الطرق فأكيد حتصبح مشهور وتنزل عليك الأموال زي الرز .. والمعجبين يقفوا قدامك طابور

طرق لا تشترط مهارات خاصة يعني ممكن أي حد يقوم بها .. فلن أقول مثلاً العب كرة قدم عشان تاخد مكافآت بالملايين لأن كرة القدم تتطلب مجهود .. كما إنها لن تبرز إلا بكونك موهوب فعلاً في اللعب .. وتستمر معك خلال فترة واحدة من عمرك .. شبابك فقط.
طريقتنا يا بيه لا تتطلب مؤهلات خاصة ولا تفكير .. ولا تقافة ولا مجهود .. ولا عمر معين .. فهي مفتوحة للجميع

قرب .. قرب ... قرب ...

لو كنت شاب

قدامك طريقين

الطريق الأول : طريق الثقافة على الطريقة المصرية

1– تؤيد أي حاجة تحت مسمى حقوق المرأة .. أي حاجة .. واخد بالك .. يقولوا الست تبقى قاضي وكيل نيابة ... أنت معاهم ... يقولوا حقها تتجوز 4 .. وتاخد زي أخوها في الميراث .. معاهم برضه ... خليك ناصح

2– تبحث عن أي حاجة في الدين (صحابة ، حجاب ، شفاعة ، عذاب قبر .... أي حاجة ) وتبدأ في مهاجمته على الفور ... خلي بالك لازم تختار حاجة تكون ثابتة عند الناس وما يكونش حد اتكلم فيها قبل كده ... سارع قبل أن يسبقك إليه غيرك.

3– لما تتكلم حط كلمتين من نو عية بلوريتاريا أو شوفاني .. طبعاً بالإضافة إلى أصولي راديكالي ويميني متطرف اللي حتقولهم طبعاً لأي حد يقول لك عيب كده ما يصحش .. ولو زود قول عليه وهابي عميل ... أصول الكار عشان يقولوا عليك مثقف.

4– ممكن لو ناوي تاخد خط الشعر أو الرواية يأما تشتم في الدين وتعمل إسقاط على رموزه أو رواية جنسية تتكلم فيها عن الشواذ وساعتها حتاخد جائزة نوبل)

الطريق الثاني : طريق الفن على الطريقة المصرية

1– تغني كلام فارغ وهجايص وعنب عنب وما تنساش تصبغ شعرك وتعمل نيولوك

2– لة حتمثل أفلام .. الأدوار اللي حتختارها خلي فيها يإما دور واحد بدقن ولابس جلابية بيضة وتخليه إنسان متوحش كئيب عدواني بيقول حاجة وبيعمل حاجة تانية وعينه زايغة وبتاع ستات أو نصاب وحرامي ... يإما شيخ أزهري وتنزل فيه تريأة ومألسة ومهزاة ومسخرة ... ولو حد سألك ليه اخترت الأدوار دي قول (دي رسالتي ... دور الفنان في نقد الأوضاع الخاطئة في المجتمع) .. قولها كده ومش حتخسر .. صدقني

3– حاول تظهر في برامج من نوعية هالة شو وتقول إن أفلامك أو أغانيك توصف تاريخ مصر

لو كنت بنت الموضوع أسهل بكتير

فيه طريقين برضه

الطريق الأول : طريق الثقافة على الطريقة المصرية

1– ممنوع الحجاب منعاً باتا ، عشان يعترفوا بيكي كمثقفة لازم تخلعي الحجاب .. عشان عند بتوع الثقافة المصرية .. الحجاب ردة إلى الوراء.

2– أي حد يقول إحنا مع قضايا المرأة تمشي وراه .. وحاولي تبتكري في المجال .. يعني اخترعي ... مثلاً امشي ورا حق المرأة في التحرش بالرجل .. حق المرأة في رفض الطلاق .. حق المرأة في نهب فلوس الزوج خصوصاً الشقة ... وهاجمي الدين وقولي إنه ظلم المرأة ..

3– هاجمي موضوع الزواج وجلوس المرأة في بيتها وارفضي الختان وهاجمي المجتمع وكل كلمتين قولي ذكوري (مجتمع ذكوري .. فكر ذكوري ... تاريخ ذكوري ... ) كرريها كتير جداً لغاية ما تزهقي اللي قدامك.

الطريق الثاني : طريق الفن على الطريقة المصرية

1– كل ما تتزنقي اقلعي .. وكل ما تقلعي اكتر فرصتك في الشهرة تكتر

2– غني على واحدة ونص ولا تنسي الرقص والمياعة وقلت الأدب من نوعية (آه أه آه)

3– ممكن تلبسي الحجاب وتقلعيه تاني وتلبسيه وترجعي تقلعيه وهكذا ... وأنت لابساه زودي جرعة قلة الأدب في النقطة 2 للتعويض

4- أنت فنانة يعني اللي يقول لك عليه المخرج تنفذيه ... بوس ماشي .. حضن ماشي .. رقص ماشي ... سرير وخلافه وإيه يعني .. وكله طبعاً لخدمة الموقف الدرامي ..

عام للجميع ..

لو حتمشي ولد أو بنت في طريق الثقافة لا تنس إنك تعمل بلوج وتدخل بالبلوج بتاعك في كل حتة وتعلق على كل كبيرة وصغيرة عشان الناس كلها تعرفك

ولا تنس أيضاً أن تنضم / تنضمي لحركة كفاية أو الحزب الوطني

ولما توصل أو توصلي ابقى افتكرونا

كل يغدو فبائع نفسه فمعتقها أو موبقها

ربنا يوفق الجميع ويجعله عامر