Monday, October 22, 2007

عن المسلسلات المصرية أتحدث

كل عام وأنتم بخير ..

في العيد وبعد الحظر الكامل على التلفزيون خلال شهر رمضان .. أخدت جولة كده على التلفزيون ووقفت عند مسلسل مليان طرابيش فتوقفت لأني ظنيت إنه ممكن يكون مسلسل الملك فاروق اللي عمال اسمع عنه من أول رمضان ..

وطلع هو فعلا مسلسل الملك فاروق .. في اليوم التالي وبقدر الله اتفرجت على الحلقتين الأخيرتين من المسلسل ..

الأجزاء اللي شفتها من المسلسل خلتني افكر في حاجات كتيرة ..

أول حاجة إت المسلسل شذ عن نظام المسلسلات المصرية فالمسلسلات المصرية هي أسوأ انواع الإعلانات وهي اسوأ من اعلانات مساحيق الغسيل واعلانات فودافون اللي بتملا الشاشة لحظة لعب الفاول في الماتشات المهمة .. فهي دعاية للحكومات والأنظمة القائمة .. وهي عبارة عن كبسولات هلوسة بطلوا ينتجوها في العالم كله إلا في مصر .. وهي اشبه ببرامج الأطفال الموجهة لتعليم الطفل ازاي يغسل ايديه قبل الأكل وسنانه بعد الأكل ويشرب اللبن قبل ما ينام .. وسميت مسلسل لأنها سلسلة من الاستخفاف بعقول المصريين وحملهم على الاستسلام لقناعات وتوجيهات حكامهم.

أسوأ ما في الأفلام والمسلسلات المصرية أنها تظن وتحاول تقنعك أنها بتعالج قضية برغم إنها تعرضها من وجهة نظر وحيدة .. وهي وجهة نظر المؤلف وهي وجهة معدلة تخضع لمقص الرقيب ... يعني وجهة النظر اللي بيعرضها المسلسل عبارة عن وجهة نظر فرد واحد غالبا تصاعد اسمه لأنه يكتب ما يوافق هوى السادة ووجهة نظره هذه معدلة بمنهج النظام الحاكم ثم يوضع كل هذا في كبسول ليتعاطاه المتفرج وهو مخدر أمام التلفزيون ..
وبرغم إن أسلوب الكتابة الموجهة دا أظنه اختفى من كل دول العالم - أراه اختفى حتى من الدول العربية - إما لانتقال هذه الدول للحريات أو لافتضاح اسلوبه لدى الناس .. وهو دائما ما بيفكرني بفترة عبد الناصر حيث لا مصدر إلا الإعلام الحكومي القائم على تعظيم صورة الرئيس .. أما الآن فلا معنى إلا الغيبوية لمن استمر على هذا النهج .. فمصادر الإعلام الحكومي هي آخر ما يتلقى عنه كل من له القدرة على التفكير ..

وفي الغالب فإن هذه الأعمال لا تضع حلا للمشاكل يصطدم مع الجهات النافذة والعليا في الدولة فلن يقترح مسلسل قضية رأي عام مثلا حلا واحدا من ضمن الحلول لمواجهة حوادث الاغتصاب يتضمن منع إثارة الشباب في الشوارع وتجريم أفلام الخلاعة والعري خاصة وأن الممثلة الرئيسية في المسلسل هي واحدة من رائدات العري في السينما المصرية

بل العكس فالمسلسلات المصرية بتقلب ساعات القضية وتصور لك زي معظم مسلسلات رمضان هذا العام إن ضباط الشرطة هم ضحايا فيديوهات التعذيب الملفقة وأن السادة ضباط الشرطة هم ملائكة تسير على الأرض تحفها النجوم والنسور ...

عشان كده أوقات كثيرة بيكون الفيلم والمسلسل الأجنبي افضل من المصري .. فالأجنبي يركز على جانب واضح .. التشويق أو الرعب أو الرومانسية أو الكوميديا أو حتى الحواديت المسلية بدون هدف التي تكون من واقع الحياة الموجهة في فترة الظهيرة لربات البيوت ويكون الهدف هو تسلية المتفرج ب 200 أو 300 حلقة بحواديت الناس دون تلقينه أو اعطاؤه حقنة (اغسل رجليك قبل ما تنام)

طبعا تأكدت أن مسلسل الملك فاروق ليس مصريا فقد رفض التلفزيون المصري انتاجه وهو من انتاج MBC

وكان طبيعي أن رائد الكتابة الموجهة للتلفزيون المصري عكاشة يهاجم المسلسل ويتهم الدولة السعودية أنها وراء المسلسل للدعاية للملكية

والخلاصة أن مسلسل الملك فاروق وإن قام بتأليفه كاتبة مصرية وتمثيل معظم ادواره مصريون إلا أن المسلسل ليس مصريا ولا يستثني من قاعدة المسلسلات المصرية لتظل القاعدة كما هي : المسلسلات المصرية = قصص سطحية + نفاق + أطماع .. وإن أي إنسان يحترم عقله لا يمكن أن يدير مؤشر المحطة على مسلسل انتاج مصري ...

17 comments:

عصفور المدينة said...

هو المسلسل مقصود بيه نفس التمثيلية ده أنا حسبته الشخص اللي بيتفرج


أي إنسان يحترم عقله لا يمكن أن يدير مؤشر المحطة على مسلسل انتاج الاتحاد الاشتراكي

Mohamed A. Ghaffar said...

نظراً لما زكرت فأنى توقفت عن متابعه المسلسلات من سنوات فى رمضان وغير رمضان

اخر مسلسل شفته كان على ما اظن الضوء الشارد او الرجل الأخر والأخير تابعته معاداً

ومن كثره ما اثير حوله احاول الأن ان اتابع الملك فاروق معاداً على قناه قطر وارجوا الا اندم

الباحث عن الحقيقة said...

وإن أي إنسان يحترم عقله لا يمكن أن يدير مؤشر المحطة على مسلسل انتاج مصري
تمام يا فندم علم وجارى التنفيذ

رفقة عمر said...

عارف طبعا انى بحب التاريخ جدا وكت حابه اعيش زمااااااااان قوى
ايام كدة الناس كانت بتنقى الفاظها والتلفزيون والدش مش كان موجود ومش شاغل الناس عن بعضها والناس كانت بتحب تزو بعضها علشان طبعا مش فيه حاجه يتسلوا بيها غير التزوار ودة كان شئ جميل قوى
وطبعا المسلسل كثر من رائع وعرفنا حاجات مش كنا نعرفها
بس سؤال بيقولوا عصر الملك كان كله رشوه وفساد
طيب دلوقتى فيه ايه
كانوا بيقولوا انه طاغيه وديكتاتور مع انى شايفه ان الحكومه هى اللى كانت بتعمل كل حاجه وكان هو اللى بيسمع كلامها
كانوا بيقولوا عليه بتاع ستات
طيب ليه عبد الحكيم عامر اتجوز ممثله
وكانوا قريبين قوى من الممثلين وكنت ام كلثوم مقربه جدا لجمال عبد الناصر
هو كان مقامر واكيد دة شئ يعيبه
بس تفتكر اللى بيحكمونا دلوقتى مش مقامرين
وحاجه كمان غيظانى
طيب هو محمد نجيب كان كمان فاسد وديكتاتوور علشان كدة عزلوه لغايه قرب لما توفى كانوا معزول عن الناس كلهم
وليه جردوا الناس من اموالهم
هو دة من شرع ربنا او ربنا قال كدة
طيب الفلاح لما اخد الارض عمل بيها ايه
ولا حاجه ولا حصلنا دوله صناعيه ولا حصلنا دوله زراعيه
احنا مش عارفين احنا ايه
ربنا خلق الدنيا فيها طبقات
علشان يسخر بعضنا لبعض
للازم يكون هناك الفلاح والصانع والغنى والفقير
لان تفتكر لو الدنيا كلها غنيه
تفتكر هاتلاقى زبال يجى يشيل الزياله
تفتكر فيه سباك وغيرة وغيره
انا كنت عايزة اكتب بوست اعبر فيه عن غيظى من اللى حصل
بس قلت لن يفيد الكلام اللى حصل حصل
ولا ينفع البكاء على الاطلال
اسفه طولت عليك
اعذرنى

عــلا said...

هو انا تابعت المسلسل من أوله، و الصراحة شفت فيه تناول جديد و جرئ لحياة الملك فاروق اللي احنا ما نعرفهاش، و خصوصا حتة انه كان عميل للانجليز دي اللي أصحاب انقلاب يوليو دخلوها في دماغنا، بالعكس تماما، الملك كان بيكره الانجليز جدا و نفسه يخلص من سيطرتهم على مجريات الأمور بشكل واضح، و الدليل على كده حادثة محاصرة الانجليز لقصر عابدين بالدبابات عشان يجبروه على الانصياع لأوامرهم.. متهيألي دي مش حركة تقوم بها جهة مع عميل لها.

سكينة said...

تأثيره واضح من اسمه مسلسل يعني يسلسلك مكانك ويعطلك عن شغلك وطبعا يسلسل تفكيرك ليتماشى مع تفكير المؤلف والمخرج اللي عايز كده
:)
المسلسلات كانت زمان أيام رفاعة الطهطاوي وطه حسين وكنا عيال وفاضين

آلام وآمال said...

ددي تالت تدوينة النهادرة بفضل الله اقراها عن مسلسل الملك فاروق
واضح انه مسلسل فعلا قوي وعشان كده محدش اهتم بيه في الإعلام المصري
وخاصة اني مسمعتش عنه كتير زي مثلا سعد الدالي او قضية فشر عام

أمــانــى said...

مين الملك فاروق ده
انا شوفت بقى بعض حلقات من بعض المسلسلات وكل ما اتفرج اعمل خناقة فى القعدة ويقوليلى قومى وبلاش تتفرجى
الاعــلام المصرى والعربى كـله فاشــل ومفيش حد قادر فيهم يقول كلمة حــق
عليهم ربـنـــــا وحسبنا الله ونعم الوكــيل

إنـســـانـة said...

انا فعلا تابعت مسلسلات كتيرة جدا بس اكتر مسلسل يمكن إحترامه هو الملك فاروق .. عشان كدة حرصت انى اشوفه فى الإعادة لانى مشوفتوش فى رمضان كويس

المسلسل بجد رائع والجميل انك بتشوف ازاى بلادنا كانت دستورية بمعنى الكلمة وازاى الشعب كان له كلمة وإزاى البرلمان كان بيراقب الملك فعلا مش هو والرئيس حاجة واحدة زى دلوقتى

بجد المسلسل بيحسسنى قد ايه احنا حالنا وحش اوى دلوقتى

خمسة فضفضة said...

السلام عليكم ورحمة الله وبركاته

الحمد لله الذي عافانا مما ابتلي به كثيرا من خلقه
مش بتابع اي مسلسل الا اذا كان في ميعاد الاكل ويكون التليفيزيون شغال بالصدفه ، او مثلا يكون مسلسل اتقال عليه انه حلو زي الملك فاروق كده اتابعه في الاعاده

اما اني اقعد 45 حلقه اتابع مسلسل ممل نهايته معروفه مسبقا ماقدرش ،
ومش عارفه الناس بيطيقوا كده ازاي

واكتر مشاهد بقي بتبقي مستفزه لما بيبقي الظباط ملايكه والانظمه الحاكمه ياسلام ولا كده في الاحلام

تخيل في مسلسل حماده عزو ظابط امن الدوله اتوقف 3 شهور قابله للتجديد واتحرم من الترقيه كل ده بسبب شكوي بسيطه علي ورقه من الزباله كتبتها فيه اخته وابوه ، ياسلام ولا محاكمات عسكريه ولا اي حاجه بس كده تحقيق اداري ، دا يا عيني عليه عماد الكبير لحد دلوقتي متشحطط بين المحاكم ومش عارف ياخد حقه مع ان كل ادلة الادانه واضحه والحادثه متسجله فيديو كمان

قمة الاستخفاف بعقول المشاهدين

ربنا يهدي

تحياتي

أميرة محمد محمد محمد said...

عوده جميله يا باشمهندس
حمدلله علي السلامه
اكتر حاجه هتشلني ان رمضان اتقلب شهر المسلسلات مش شهر العباده
حسبنا الله ونعم الوكيل في المسئول عن تغييب الناس بالشكل ده

ammola said...

يعنى احنا بعد كده نقرر المسلسلات على الولاد فى المدارس علشان يعرفوا تاريخهم؟
حد يقدر يقوللى الثورة كانت كده واللا انقلاب؟فاروق كان حلو واللا كخة؟عندنا الحقيقة دايما ضايعة وبالتالى الواحد مش عارف ينتمى مع انه حيمووووت وينتمى.ولو قرينا التاريخ اللى كتبه الناس بتوع بره عننا تلاقى نظرية المؤامرة فى وشك ويقولك حاسب ده حيلعب فى تاريخك.قال يعنى احنا اللى مظبطين التاريخ اوى

البنت الشلبية said...

عندك حق والله
انا فعلا كتير بحس ان المسلسلات المصرية ليها توجهات معينة عشان ترضى السادة وطموحات السادة
مع انى مشوفتش المسلسل ده لكنى بحترم كاتبته لانى بحترم اى رأى حر وحر هنا مش معناه انه بيتكلم وخلاص لا
حر هنا معناها انه رأى خالى من النفاق والطمع
بجد وحشتنى بوستاتك الحلوة دى
سلام

ma_3alina said...

عصفور المدينة
لا يا باشمهندس دوكها المتسلسل
:)
ربنا يفك أسرانا وأسرى المسلمين .. اللهم آمين

Mohamed A. Ghaffar
توقفك عن متابعة مسلسلات الاتحاج الاشتراكي كما قال الباشمهندس عصفور شهادة في حقك .. ومتابعتك للمسلسل أظنها لن تسبب لك الندم .. وأرجو إن تابعت أو توقفت عنها أن نعرف رأيك

الباحث عن الحقيقة
لا لا لا .. اوعى تتعود على علم وجاري التنفيذ دي .. دا أنت داخل على جواز .. ولازم تتعود على دبح القطط
:D

رفقة عمر
كيف حالك يا استاذة رفقة .. منورة المدونة
السبب في كل الحاجات اللي قلتي عليها هو الكذب .. الكذب اللي مش ممكن يكون في مسلم أبدا .. واللي في الحاكم بيكون اسمه خيانة عظمى .. كل الأفعال اللي ذكرتيها لأن اللي اتسبب فيها كان كاذب بيخدع نفسه وأهله واللي حواليه بيخدعوه وبيكذبوا عليه .. دائرة مغلقة من الكذب

عــلا
اسعدني جدا استخدامك واستخدام كثيرين الآن لكلمة انقلاب يوليو 52 بدلا من وصف الثورة .. ومن استنتاجك يمكن التأكد أنه ومهما كان الكذب اللي بيمارسه الحكام .. فلا يمكن خداع التاريخ .. شرفتيني بالزيارة والتعليق

سكينة
كده حضرتك متفقة مع الباشمهندس عصفور .. والله يا استاذة سكينة مش عارف أن حاسس إن برضه رفاعة الطهطاوي وطه حسين لم يكونوا حيادين في عرضهم .. ودا على فكرة موضوع البوست القادم بمشيئة الله .. فكما إن فاروق كان يعرض من قبل بصورة مشوهة سلبية فأيضا هذه المسلسلات عرضت صورة مشوهة ولكن في الاتجاه الآخر ..

آلام وآمال
أنا سمعت عنه كتير .. واللي اعرفه انه الإعلام المصري لا يجرؤ على تناول شخصية الملك بمثل هذا الأسلوب .. والمدونات اللي اتكلمت على فاروق كثيرة جدا

أمــانــى
يا ستي عليهم ربنا وماله محدش اعترض .. بس المسلسل دا بالذات ممكن يكون فيه معلومة جديدة جو جديد .. اهدي بس كده وروقي .. نجيب لمون ..

إنـســـانـة
أهلا أهلا أهلا بالست إنسانة هانم .. منورة المدونة والله .. كويس إن وصل لك الإحساس ده بحالنا .. مش المسلسلات المصرية إياها .. إلا كل حاجة فيها تمام ياريس ..

خمسة فضفضة
وعليكم السلام ورحمة الله وبركاته .. عندك حق والله أنا مش عارف الناس اللي بتتابع المسلسلات الطويلة دي بتصبر إزاي ... دا حضرتك لما نزلتي القصة بتاعة زمان دي على كذا مرة الواحد كان حيشد في شعره .. دول بيجيلهم صبر ازاي مش عارف .. وخصوصا على الاستخفاف اللي زي ما حضرتك ذكرتيه برضه .. لكن حنقول إيه .. الحمد لله الذي عافانا .. كذلك كنا من قبل فمن الله علينا

أميرة محمد محمد محمد
الله يا سلمك يا ست الدكتورة .. رمضان بينقلب شهر المسلسلات للي عايز .. لكن فيه ناس بيلفو التلفزيون بملاية سرير ويربطوه بحبل غسيل خلال شهر رمضان
:D
وزي ما حضرتك عارفه كل يغدو فبائع نفسه فمعتقها أو موبقها ..

ammola
يا مرحب يا مرحب بأصحاب المدونات .. أي والله عندك حق ونقرر عليهم المسلسلات الأجنبية اللي من انتاج الدول العربية عشان نعرف تاريخنا .. والكذب دا اللي حيخلي أجيال بعد كده تقرا تاريخنا من الغرب لأنه لا يثق في اللي بيكتبوا التاريخ عندنا وتلاقي جيل طالع زي ما ذكرت ربة السيف والقلم عن شخص راسلته بيقول إن فلسطين أرض يهودية والعرب احتلوها .. فأخذ تاريخه من الغرب بسبب هؤلاء .. فحسبنا الله ونعم الوكيل

البنت الشلبية
يا أهلا بيكي يا شلبية هانم .. وانا كمشاهد عايز إيه غير حد يفيدني بمعلومة أو حدوتة هادفة .. يعني احنا مش ضدهم وخلاص أنا عايز حاجة تفدني .. لكن للأسف هما مش بيقدموا لي كده .. فليا الحق بعد كده إني لا اتابعهم وادعو لمقاطعتهم ..

مدونة تحت العشرين said...

سمعت كلام كتير جداً عن مسلسلات رمضان
بس الحمد لله إحنا مقاطعين المسلسلات من فترة طويلة وخاصة لو في رمضان أولاً مضيعة للوقت ثانياً فيها ما يغضب الله ثالثاً لازم نستغل شهر سلسلة الشياطين ونبعد عن المسلسلات
سمعت كتير عن مسلسل الملك فاروق بس متفرجتش عليه
يمكن أشوفه بعد كدة لأنه أكيد هيتعاد

بس حقيقي أنا متلخبطة من كتر الكلام اللى قرأته في الجراي عن فاروق
هو إيه اللي صح
هي الثورة كانت كويسة
ولا وحشة
مفيدة و لا مضرة
الملكية ولا الجمهورية
ناصر ولا فاروق

مش عارفة ليه من وأنا في 6 إبتدائي لما أخدنا درس الثورة كنت متعاطفة أوي مع فاروق يمكن عشان طردوه


بس أنا متأكدة إنه لو اللى بيحكم البلد خايف عليها و بيحبها كانت أحولنا هتكون أفضل من كدة بكتير

فرنسا جمهورية و بريطانيا مملكة

أخيراً
أنا ممكن أقبل بإن أحمد فاروق يحكمني
لاكن هخاف على نفسي لو جيمي حكمني

لكِ الله يا مصر

رفقة عمر said...

تخيل كنت لسه داخه ااقولك انت فين مش بتعلق ليه
من فضلك ماعلينا ارجع تححمس تانى ورجع امبراطوريه الرغى علشان انا كمان اتحمس
احنا متفقين هانبطل تتدوين سوا زى ما بداناه سوا
مش ينفع كدة لازم تتحمس تانى زى الاول
ربنا يوفقك اللهم امين
وبعدين مين استاذه رفقه دى
انا تلميذه وباتعلم مش استاذه
استغفر الله العظيم
سامحه يارب

ma_3alina said...

مدونة تحت العشرين
وبعدين بقا هو حضرتك كل يومين تغيري اسم المدونة .. طيب يا ستي زي بعضه خليكي مشحطاطانا كده ..
كويس إنك مش متابعة .. دا حتى متابعة المسلسلات دي تجيب المرض .. اهو برضه تحافظي على صحتك ..
وإن كان على رأيي ملكية ولا جمهورية .. فأنا اختار ملكية ملكية ملكية

رفقة عمر
طبعا يارفقة مع بعض ومع اني شايف التالت بتاعنا مش بيكتب ولا بيعلق وولا حس ولا خبر .. لكني موجود زنزلت بوست على طول أهو ..
وطبعا حضرتك أستاذة ..
:)