Saturday, April 09, 2011

تاج الثورة

طبعا نذكر التاج يا ست مجداوية وإليك إجابتي ...

هل توقعت ثورة 25 يناير؟
لا .. نيفير .. أبسيليوتلي

وهل كنت من ثوار ميدان ( التحرير _ الكنبة _ الكمبيوتر _ حدد الميدان الآخر الخاص بك )
محرمتش نفسي من دقائق اتابع ما آلت ايه أحداث المعركة من أرض الميدان بشارعنا العامر ودقائق في محطة الرمل [ واللي بالمناسبة كان فيه أفضل إحساس مريت بيه طوال فترة الثورة من أولها إلى الآن وكان يوم 29 يناير ] وكمان سويعات كده في ميدان القائد ابراهيم .. معظم الوقت أمام ميدان التلفزيون وميدان الانترنت

مالم تنجح الثورة في تحقيقه هو ......( اختار شيئا واحدا)
تغيير أخلاقنا في تعاملتنا مع بعض .. الحق يقال إن بعضنا تغيرت أخلاقه للأحسن وبعضنا تغيرت للاحسن مؤقتا ثم عادت كما كانت وبعضنا أخرجت الثورة أسوأ ما فيه.

أكثر شىء فرحك في هذه الثورة هو .........( اختار شيئا واحدا )
إن كل شيء مهما كان ممكن يحصل إذا أراد ربنا .. آية من آيات قدرة الله شفتها بعنيا

الشخصية التي أعجبتك خلال الثورة ........
صفوت حجازي

الشخصية التي احتقرتها بسبب الثورة .......
عمرو أديب

أطرف ما سمعته خلال الثورة ؟ ( تعليق _ نكتة _ حدث _ أخرى )
رابطة نجاري مصر يسألون الاسطة مبارك عن نوع الغراء الذي يستخدمه
دا لو كان عفريت كان طلع
وتعليقات الراجل اللي ورا عمر سليمان



القناة التي تابعت من خلالها أحداث الثورة هي ..............
الجزيرة - العربية - البي بي سي

الجريدة التي كنت تقرأها لتتابع الثورة هي ........
مكنتش متابع لأي جريدة .. بس تابعت شوية المصري اليوم والاهرام

الكاتب المفضل خلال الثورة هو ..........
فهمي هويدي

المذيع (المذيعة) المفضل خلال الثورة هو .........
لا يوجد

كلمة تقولها لشهداء وجرحى 25 يناير ........
حقول ايه بس .. طوقوا مصر كلها بدين كبير أوي .. الناس دي على راسي من فوق .. مش حثبت لهم شهادة ولكن اثبت لهم بطولة وشجاعة .. وفعلا بعض الموت يصنع الحياة .. اقولهم أنتم كسرتك أصنام كتيرة والحمد لله إن المجهود ما راحش هدر

متقولش إيه إدتنا مصر وقول حندي إيه لمصر .. عندك حاجة تديها لمصر ؟
آه .. عندي .. ليه ؟؟

من سترشح لرئاسة الجمهورية ؟ ولماذا ؟
مفيش لغاية دلوقتي شخصية مقنعة .. والمفاضلة بين المرشحين حتى الان - دا لو مفيش غيرهم إلى النهاية - محصورة بين البسطويسي ومجدي حسين وخيار عدم المشاركة

لو أصبحت رئيسا لمصر ما هي أول ثلاث قرارات لك ؟
قرار رقم واحد بتشكيل لجنة تصحيح مسار مؤسسات الدولة لتتماشى مع الهوية الإسلامية
قرار رقم اتنين بتشكيل لجنة من كبار علماء مصر لتطوير مناهج التعليم
قرار رقم تلاتة بتشكيل لجنة بحث سبل توسيع رقعة الأراضي الزراعية عشان تكون ثلاث او اربع اضعاف الحالية


لو أعطوك نصيبك من المليارات المسروقة ,ما توقعك أن يكون نصيبك منها وماذا ستفعل بهذا المال ؟
أظن المريرات دي مش حيوزعوها على الناس يعني .. غالبا حتتعمل صناديق وبوكسات وحاجات من دي .. لكن لو عطوني نفحة أكيد حشبرق نفسي واللي حواليا طبعا

وامرر التاج إلى

محمد عبد الغفار
عصفور المدينة
طعمة
بنت الجنوب
أمولة