Thursday, January 31, 2008

الوصلة ضربت يا مينز

والله زمان يا دايل آب

يعني إيه كابل مدفون في البحر وضرب .. هو النت دا كابلات ممدودة في الأرض ولا في البحر .. هي مش الاتصالات في العالم بتتم عن طريق الأقمار الصناعية ولا أنا غلطان .. وإذا كانت مش بتتم عن طريق الأقمار الصناعية .. أومال الأفراح اللي بتتعمل دي على القمر الصناعي للاتصالات إيه لازمتها ؟؟

وبعدين حتى لو احنا واخدين وصلة نت من سيبر في أوربا حناخد من البحر ليه ؟ احنا لو لفينا الكابل من ناحية اسيا كده من نواحي تركيا وسوريا والأردن حيبقى ارخص واوفر من لو حطينا في البحر كابل ..

يعني شبكة الكهربا اللي حفينا عشان نربطها بالشبكة الأوربية لفيناها من فوووووق عشان التكلفة ومحطيناش أي حاجة في البحر إلا اللي الحتة اللي واصلة بيننا وبين الأردن خليناها في خليج العقبة عشان ما نعديهاش جوا ارض فلسطين المحتلة .. طيب وكان لزمته ايه اللفة دي كلها ما كنا مدينا وصلة كده في البحر لغاية اليونان وريحنا الأدموغي .. بدل ما تيجي سمكة معدية في الحر وتضرب لنا الكابل .. لكن عشان التكلفة لفينا خطوط الكهربا كل اللفة دي
طيب إيه بقا الكابل اللي في البحر دا اللي ضرب ؟؟؟ وامتى مدوه ؟؟ .. دا كل ما بيعملوا طوبة يقعدوا يعملوا فرح عليها وإنهم اللي جابوا الديب من ديله .. يعني مدوه في البحر كده من غير لا حس ولا خبر .. وحتى لو مدوه .. دا النت يا عالم ما كملش عشر سنين .. يعني عشر سنين ويضرب كده ؟؟؟؟

طيب هو احنا مادين الكابل دا لغاية فين .. اليونان مثلا .. واليونان متوصلة برومانيا ورومانيا بايطاليا وايطاليا بفرنسا وفرنسا بانجلترا .. طب وبعدين .. انجلترا مادة كابل برضه في المحيط الأطلسي وموصلاه لأمريكا ولا إيه ؟؟؟

طيب الكابل الممدود لينا ده ممدود لينا واحنا بندي للدول اللي جنبنا .. ليبيا والسودان وتشاد واثيوبيا وبقية افريقيا ؟؟؟ وساعتها بقا يبقى المفروض كل الدول دي النت قاطع عندهم ولا فيه كابل ممدود لينا لوحدينا وكابل تاني ممدود لليبيا وواحد تاني لتونس ..

شوية ويقولوا إن فيه حد مشغل النت كت على المصريين ..

ياريت اللي فاهم حاجة يفهمني ....

=================================================
تحديث : تعليق الباشمهندس الصارم
=================================================

شوف انا مش شغال في الحتة دي بالذات لكن اقدر اقولك ياباشمهندس...عشان تعدي وصلة الانترنت للبلد كلها - الحسابات بالتيرابايت - في الأقمار الصناعية بالسعة دي - لاحظ انك بتتكلم عن خط داتا رئيسي داخل للبلد كلها - ده مكلف جدا جدا غير انه غير عملي وكابلات الالياف الضوئية اكثر كفاءة واعتمادية وده مؤكد....الاقمار الصناعية تستخدم لاغراض خاصة وضرورية وليس عامة ارخص وأأمن انك تعديها في البحر وليس البر ..الكابلات الكهربائية تختلف هنا لانها ليس بحساسية كابلات الالياف الضوئية ...والعالم كله شغال كده ....لكن العكس انك تعدي الكابلات الكهربائية بقى في البحر هيكون كده اغلى واقل فاعلية في حالة الكابلات الكهربية على حد علمي - وانت اللي تقدر تقول هنا ..انك في حالة كابلات الجهد العالي الكهربية ممكن تاخد في الطريق وصلات لمحطات تغذية المدن ودي نقطة تانية لمرو الكابلات الكهربية على الارض وليس البحر

اصل الحكاية انك عندك شبكة داخلية دي ممكن تعديها في الارض براحتك اذا كانت الياف ضوئية او انها تكون ميكروويف وده الأأمن جوه البلد..ومصر عندها بنية اساسية في الـ tgransmission عالية فعلا..تستخدم لكل من التليفونات بانواعها والداتا

وعشان كده مثلا موقع مثل مصراوي او الشركات صاحبة السيرفرات اللي بتقع داخل مصر لم تنقطع فيها الخدمة- مصراوي مثلا شغال على طول ...لكن معظم السيرفرات اللي بنتعامل معاها هي خارج مصر للاتصالات بالعالم الخارجي محتاج تعدي على gateways لكل من الاتصالات الصوتية او الداتا على حد علمي ان ال gtaways الاساسية بتاعة مصر في فرنسا والامارات ويمكن ايطاليا ايضا لا تذكر تحديدا الاتصالات بتيجي اولا على الـ gateway ومنه بتتوزع على سنترال كل منطقة - عن طريق الالياف ضوئية او ميكروويف - ومنه توصل للمشتركين

المشكلة دلوقت ان الكابل البحري اللي مطلعك على فرنسا اتقطع

الكابل مش ضرب...صعب جدا وشبه مستحيل ان الكابلات البحرية دي تضرب وخاصة في فترة قصيرة كده ...الكابل اتقطع

الغريب في الموضوع ان هما مش كابل واحد ...هما كابلين المسافة بينهم كيلومتر كامل على الاقل يعملان load-sharing على الارجح..وفي حالة انقطع احداهما فان الاخر يتحمل الخدمة بأكلمها...وعلى حسب ضغط الخدمة هنا ومدى فراغ القنوات تكون الكفاءة في هذه الحالة ...والكابلات بتكون على اعماق بعيدةجدا... ومحاطة بـ"مواسير" خاصة للحماية على هذه الاعماق ولكن ليست مدفونة في ارض قاع البحر ..لانك ان دفنتها في قاع البحر..يبقى اما تيجي تدفن كابل بحري في قاع الاطلنطي مثلا محتاج توصل لعمق 7 كيلومتر ..وقاع الهادي 10 كيلومتر وده مستحييييييييل حتى الآن على حد علمي ايضا

ولهذا العمق- في البحر وليس ارض البحر - فان التصليح يتم عن طريق ربوتات لانه لا بشري سيتحمل الضغط على هذا العمق ...ولهذا فان الموضوع هيطول ..عشان تشحن الكابلات وتجيب الروبوت والمهندسين وتعمل العملية دي على الأقل اسبوع...الوزير لم يبالغ

ازاي بقى الكابلين معا يتقطعوا هو ده الغريب..واشمعنى الداتا هي اللي قطعت ..والحمد لله الاتصالات التليفونية الدولية لم تنقطع هي الأخرى

دلوقت هما هيحولوا الخدمة كلها تقريبا على الخط التاني اللي ماشي في البحر الاحمر ..وارجع لنقطة الـ load-sharing عشان تقدر تحسب تقريبا كفاءة الخدمة المتوقعة حتى يتم التصليح

تقدر تجيب خريطة للكابلات البحرية من على موقع شركة الكاتل على الانترنت على ما اظن ..وهي اكبر شركة متخصصة في الكابلات البحرية

وهي ليست اول مرة تحدث..ان تتضرر الكابلات البحرية...حدثت منذ عدة سنوات في ليبيا ...وفي الجزائر ابان زلزال 2003..وفي باكستان وشبه القارة الهندية واسيا الوسطى قبل وابان زلزال 2005

النهادرة وقعوا عقد كابل بحري جديد بسعة اكبر مع شركة الكاتل ..وهيشارك مع الكابلات اللي هتتصلح ان شاء الله لاعطاء سعة اكبر...لعل وعسى


ولولا الحادثة في الغالب ماكنتش سمعت عن موضوع الكابل الجديد ده- معلش اصل مهندسين الاتصالات بيشتغلوا في صمت في البلد دي...احم احم....شكرا شكرا
(:

Friday, January 25, 2008

الدعاء لدفع البلاء

جاء في سنن ابن ماجة : حَدَّثَنَا عَلِيُّ بْنُ مُحَمَّدٍ حَدَّثَنَا وَكِيعٌ عَنْ سُفْيَانَ عَنْ عَبْدِ اللَّهِ بْنِ عِيسَى عَنْ عَبْدِ اللَّهِ بْنِ أَبِي الْجَعْدِ عَنْ ثَوْبَانَ قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : لَا يَزِيدُ فِي الْعُمْرِ إِلَّا الْبِرُّ وَلَا يَرُدُّ الْقَدَرَ إِلَّا الدُّعَاءُ وَإِنَّ الرَّجُلَ لَيُحْرَمُ الرِّزْقَ بِخَطِيئَةٍ يَعْمَلُهَا

والدعاء من قدر الله كما جاء في سنن الترمذي قال : حَدَّثَنَا ابْنُ أَبِي عُمَرَ حَدَّثَنَا سُفْيَانُ عَنْ الزُّهْرِيِّ عَنْ أَبِي خُزَامَةَ عَنْ أَبِيهِ قَالَ : سَأَلْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ فَقُلْتُ يَا رَسُولَ اللَّهِ أَرَأَيْتَ رُقًى نَسْتَرْقِيهَا وَدَوَاءً نَتَدَاوَى بِهِ وَتُقَاةً نَتَّقِيهَا هَلْ تَرُدُّ مِنْ قَدَرِ اللَّهِ شَيْئًا قَالَ : هِيَ مِنْ قَدَرِ اللَّهِ

وأعجب ممن يأسف لحال المسلمين المستضعفين ويلقي بالتبعة على من بيده أوراق اللعبة من الساسة ثم لا يجتهد هو نفسه في زيادة العبادة والدعاء إلى الله والتضرع إليه لكشف البلوى عن المسلمين ودفع الضر عنهم وقد علم أن أقل ما يمكن بذله نصرة لإخوانه هو الدعاء لهم والاجتهاد وزيادة العبادة

ويذكرني حال هؤلاء بخبر عبد الملك ابن مروان لما جاءته الشكاوى من الأقطار يخبرونه بظلم الحجاج لهم فصعد المنبر وقال لهم قولة وافقت الحق .. قال لهم جاءتني الشكوى من أميرنا .. تريدوننا كأبي بكر وعمر ؟؟!! .. كونوا لنا كأتباع أبي بكر وعمر نكن لكم كأبي بكر وعمر


الخطيب : الشيخ أحمد شحاتة الألفي

Thursday, January 24, 2008

النداهة

شعور جميل إنك تغرق في الاسف والأسى على نفسك والحسرة عليها وأن تحيا في دور الضحية وتتعايش معه معايشة كاملة .. فيصبح الأكل معاناة لك وتتهرب من مقابلة الآخرين .. تنغلق على نفسك .. تتذكر كلمات الأغاني التي سمعتها قديما وهي تتحدث عن الفراق وألمه .. وتضع نفسك مكان ممثلي الأفلام العربية القديمة وهم يهيمون في الشوارع أسفا على ما فات .. فعلا شعور جميل جدا .. خاصة عندما تكتب عنه ..

شعور يجذبك لهذه اللذة وكأنها النداهة تسحبك بعيدا عن الحياة .. تستمع من خلال هذا الشعور لحكايات المعزيين عن فلانة اللي تركت فلان وابدله الله خيرا منها .. وتستمتع بهذا الكم الكبير من الحكايات وتتسائل لماذا لم اسمع هذه الحكايات من قبل ..

وأظرف ما يقال .. هو حديث البعض أنهم كانوا يعلمون علم اليقين ان الأمور ستنتهي بهذا الشكل وأن هذا أمر طبيعي وأنهم أخفوا علي هذا لما رأوا من اقبالي على الأمر وتعامي عن ما بدا لهم مثل نور النهار .. هل هذا ما يسمى بالكوميديا السودا ؟؟

شعور باللذة والمتعة بهذا الحال يسحبك ويأخذك من كل ما يجري حولك .. من غضب من لازال يشعر نصرة لإخوانه في غزة .. ومن صرخات من لا يملك إلا التهليل لقرار البرلمان الأوربي ومن صيحات المتابعين لمباريات كأس الأمم الأفريقية يأخذك من هذا كله إلى عالم ليلي خاص ساكن هادئ لا يوجد فيه غيرك أنت والنداهة حيث تلتهمك بسعادة .. والسعادة لك طبعا وأنت تُلتهم ..

ملحوظة : أكتب عن النداهة لتعلم أني يقظ لها أدرك حبائل الشر في صوتها متيقظ لا يغيبني صوتها الناعم .. أجاريها لا غفلة ولكن لاتسلى بيها في مساحتي الحرة وقبل وصولنا للبحر ستتلفت فلن تجدني جوارها ...

Friday, January 18, 2008

زي انهاردة مات فرعون

زي انهاردة من كام ألف سنة كده لم فرعون جيشه وحرسه وقرر إنه يضرب ضربته ويقضي على أي حد يخالف كلمته

زي انهاردة قال كفاية عليهم كده أنا صبرت كتير عليهم دول عايزين يعبدوا غيري ويسبحوا بحمد غيري ويذكروا غيري بفضله ونعمته

زي انهاردة لم العسكر الحرامية والكلاب المفترية

زي انهاردة قال له الحاشية والملأ الظالم اطلع عليهم واوعى تسيبهم دول لو سبتهم حياخدوا عرشك وسلطانك ويخربوا الأرض عليك وعلى أهلك

زي انهاردة اختار موسى وأتباعه إن الأرض مش مهم والوطن مش مهم والحياة مش مهمة .. المهم الدين وهربوا عشان يحافظوا عليه

زي انهاردة موسى والمؤمنين تركوا دنيتهم وهجروا أوطانهم وهربوا عشان يحافظوا على دينهم

زي انهاردة فئة قليلة مؤمنة وشها للبحر ووراها جيش إمبراطور الأرض وفرعون الدنيا

زي انهاردة وقف الناس الطيبين قدام البحر وقالوا مفيش مفر

زي انهاردة قال موسى .. كلا إن معي ربي سيهدين

زي انهاردة حصلت المعجزة وظهر المخرج اللي كان قدام عنيهم .. لكن مين يشوف

زي انهاردة انفلق البحر ونجا موسى وقومه

زي انهاردة مات فرعون .. مات الملك وزال ملكه وضاع سلطانه وجيشه وجنده .. مات اللي كان فاكر إنه صح والكل غلط وإنه مالك الدنيا والأنهار بتجري من تحته فمات تحتها ولو كان يملكها ما كنتش قتلته ..

زي انهاردة فاق فرعون من غيبوبته على الحقيقة اللي كان مش مصدقها .. إنه ولا حاجة وإنه حيموت وحيضيع كل اللي ظلم وقتل وسرق وسجن عشان يحافظ عليه ..

زي انهاردة اتخلى عن فرعون كل اللي حواليه وسابوه يغرق في البحر وحيد مش عارف يعمل حاجة غير إنه يحس بطعم الهزيمة المرة وهو بيشوف الشرذمة القليلة تنجو وإنه مش قادر يعمل لها حاجة ولا يوصل لها ومش قادر يتغلب على شوية مياه حواليه رغم إنه كان مفهمينه إنه إله وإنه يقول للشيء كن فيكون ورغم كده مقدرش غير إنه يردد كلمات سمع الفئة المؤمنة بتقولها له وكان بيرفضها .. وحتى الكلمات تكاد لا تخرج من فمه وهو يقول .. آمنت أنه لا إله إلا الذي آمنت به بنو إسرائيل


آلآنَ وَقَدْ عَصَيْتَ قَبْلُ وَكُنتَ مِنَ الْمُفْسِدِينَ ???!!!

فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ آيَةً

وَإِنَّ كَثِيرًا مِّنَ النَّاسِ عَنْ آيَاتِنَا لَغَافِلُونَ


Monday, January 07, 2008

حدث في قسم الحسابات

صاحبنا دخل قسم الحسابات في شركة الاستثمار العقاري بحي المنتزة محافظة الاسكندرية .. قوم إييييه وهو قاعد .. دخل المدير التنفيذي للشركة وطلب حوالي الف وخمسميت جنيه من مدير الحسابات - الاستاذ هشام - عشان مهندس من الحي موجود بره

المدير التنفيذي : استاذي .. عايزين الف وخمسميت جنيه شهرية مهندس الحي .. هو الحقيقة مكسوف جدا وبيعتذر إنه جاي قبل معاده بيوم .. وبيتأسف وبيقول معلش عشان دخلة عيد وكده يعني ..

أ. هشام : لا مفيش حاجة .. والتفت نحو أحد الموظفين .. جهز يا فلان اذن صرف إكرامية بالمبلغ وسلمه للباشمهندس

بعد انصراف المدير التنفيذي

صاحبنا : يعني يا أستاذ هشام مش عيب شركة كبيرة كده زي شركتكم ومشروع كبير زي مشروعكم وتبقوا مش مخلصين أوراقه وتحطوا نفسكم في الموقف ده وتضطروا تدفعوا الرشاوي كده

أ. هشام : ومين قال يا باشمهندس إن احنا مش مخلصين أوراقنا .. كل أوراق المشروع خالصة .. والتراخيص كلها طالعة ومفيش أي مشاكل ..

صاحبنا : أمال يعني المهندس دا جاي كده رغم إن كل أوراقكم سليمة

أ. هشام : أيوا ودا مش واحد بس في الحي .. دا واحد من خمسة من حي المنتزة بيجوا كل شهر بياخدوا شهرية ثابتة معروفة ما بين خمسمية والف وخمسمية جنيه

صاحبنا : كل شهر في ميعاد ثابت كأنه شغال في الشركة ؟؟!!! يعني مش مرة وخلاص .. والأوراق سليمة ؟؟؟!!

أ. هشام : آه .. ما هي لو الأوراق مش سليمة مكنش حد منهم رضي بمبلغ صغير كده كل شهر وكان أخد كل شهر شيء وشويات .. بس احنا بنعمل الاوراق عشان نقلل شهرياتهم .. مش عشان هما بياخدوا بس من المخالف

صاحبنا بسذاجة : طيب ما تشتكوهم ... يعني اصحاب الشركة اللي هما من كبار رجال الأعمال .. معندهمش اتصالات ومعارف يقدروا يمنعوا بيها الرشاوي اللي بيتكلفوها دي كل شهر

اصوات ضحكات مكتومة ونظرات الموظفين لبعض من تعليق صاحبنا

أ. هشام : نشتكي مين ولمين يا باشمهندس أنت مش في البلد ولا إيه ..

صاحبنا وقد جرفه الحماس : يعني إيه مش في البلد ؟؟!! .. اشتكوهم لرئيس الحي .. للمحافظ ..

أ. هشام : يا باشمهندس .. دي منظومة والمهندس اللي بياخد بيدي لمديره .. وكله عارف وساكت عشان بياكل .. الموظف بياخد من الناس والمدير بياخد من الموظفين ورئيس الحي بياخد من المديرين وتفضل كده وانت ماشي لغاية ما توصل لرئيس الجمهورية .. عايز تشتكي .. اشتكي لأمريكا بقا لو تقدر .. وبرضه مش حتعمل لك حاجة ..

صاحبنا : وهو المحافظ عبد السلام المحجوب كان في وقت ما كان ماسك مقدرش يمنع الفساد ده

أ. هشام : كان فيه فساد برضه طبعا .. وهو ما يقدرش يوقف كده .. وكل اللي حاول يعمله .. إنه يخلي جزء من الرشاوي دي يروح للدولة .. مش كله لكروش الموظفين .. عشان كده خلا رجال الأعمال يساهموا في تطوير المدينة

صاحبنا وكأن المال ماله : خلاص ما تدفعلهومش .. هما يقدروا يعملوا إيه يعني .. مش أوراقكم سليمة .. خايفين من إيه ؟

أ. هشام : لا .. يقدروا يعملوا كتير .. حيتلكك لك على أي حاجة ومش حتقدر تشتغل لغاية ما تثبت ان التلكيكة دي مش صح .. فيوقف لك الشغل تلات أربع أيام ما تقدرش تشتغل فيهم لغاية ما تثبت .. وأول ما تثبت .. يطلع لك حاجة تانية .. وهكذا .. ويوقف لك الشغل وكله بالقانون ...

صاحبنا مذبهلا : الموظف دا يوقف شغل الشركة ؟؟

أ. هشام : الموظف دا يوقف قرار محافظ .. المحافظ بيمضي قرارات بشرط إن اللوائح تسمح .. وممكن الموظف يقول إن اللوائح لا تسمح ويعطل قرار محافظ .. يا باشمهندس .. حي المنتزة دا اسمه حي الكويت .. لأن اللي بيشتغل فيه أو في أي حي بيجيب فلوس أكتر من اللي بيسافر يشتغل بره .. هي دي بلدنا يا باشمهندس وهي دي القوانين واللي عايز يعيش لازم يمشي حسب القوانين دي ..

صاحبنا ... خرج