Monday, February 09, 2015

معهوش تذكرة




أول ما نبدي القول نحكي على عنترة
شجاع وقيمة وسيما وبين الرجال سكرة
وعبلة زينة البنات ملفوفة متدورة
لكن ملوش فيها بخت علشان معهوش تذكرة

والتانية راضي بحالي والحالة متدهورة
ونازلة يوم عن يوم وساكت على اللي جرى
وكمان قليل الأصل بيقول عليا جعان
وهو الجعان يتقتل علشان معهوش تذكرة ؟!

أنا الصوت اللي طالع مخنوق من الحنجرة
أنا الفكرة اللي طلت وضحكت على المسخرة
أنا اللي دايما متهم في نهاية المجزرة
أنا البنت اللي رفعت شعار على المسطرة
أنا الواد اللي مات علشان معهوش تذكرة