Sunday, March 23, 2008

نظرية المركون .. الجزء الأول

هو :لسه برضه مش عايزة تصالحي أشرف ??
هي :مش فكرة أصالحه .. هو الموضوع كله مش مريحني .. عارف يا كريم أنا وأشرف مخطوبين بقالنا سنة .. بس هو بيحبني بقاله تلات سنين
هو :طب ليه ما بتتجوزوش ؟؟
هي :مش عارفة ... حاسة إني احتمال أقابل شخص تاني
هو :شخص تاني ؟؟!! .. طب وأشرف ؟؟!!
هي :أشرف ما هو موجود .. يعني حيروح فين .. بس أنا نفسي اقابل حد تاني .. يعني .. واهي لو ضلمت قوي بقا أشرف موجود


الحوار من فيلم عربي

25 comments:

همسات دافئه said...

ههههههه
أهو متخزن يمكن سعره يغلى بعد كام سنه نكسب فيه قرشين حلوين


أعتقد ان الولاد هم الى بيعملوا كده بس كونها وصلت للبنات فده تقدم رهيب
تحياتى
شيماء:)

mohand said...

نظريه غبيه

واسلوب غبي


وطبيعه غبيه


سلام يا عم انا اتخنقت

إيمان الحسيني said...

قمة الحماقة والغَبا إللي في الدنيا
والجملة دي باوصف بيها إللي كل واحدة وواحد قابلين على نفسهم إنهم يكونوا مركونين
ده حتى ممكت يعِتّوا

يجيلهم عِتّة يعني :)

Ma 3lina said...

و الله البنت دى جامدة عندها نظرة و تخطيط للمستقبل

اهو لو مجاش حد اشرف موجود هيروح فين و بعدين

اصل الرجالة قليلين فهيا حاجزة و احد و لو لقيت حاجة احسن ميضرش

عصفور فى اليد خير من عشرة فى الشارع هههههههههههه

Anonymous said...

المشهد دة فكرنى بمشهد زيه فى "الحاسة السابعة" .. بس على فكرة هو للأسف واضح ان أشرف ماحبهاش بجد وبصدق .. ولو كان أشرف حبها بجد وبصدق كانت
.
.
.
.
.
كانت ركنته وهى مطمنة أكتر لغاية ما تلاقى مستر أفضل
LOL

محمد عبد الرحمن said...

هذه النوعية موجودة ويالها من صدمة أخلاقية أن تتضع قيمة نفس عند صاحبها فيرضى لإنسانيته الهوان إلى درجة أنه يفتعل العاطفة
إن أدنى الحيوانات رقيا فى السلوك لم تبلغ هذا الإنحدار ولا زالت عندها من الأنفة الفطرية ما يجعلها تأبى ما تكره صراحة بلا مواربة ولا يحملها على قبوله أى مستوى ضغط مهما عظم وهال

http://kasperb4.blogspot.com/ said...

ده لو أشرف اتجوزها
تبقى والدته داعية عليه

محمد عبد الغفار said...

أشرف يستاهل

فراشة said...

ليه هوه اشرف ده كيس جوافة ؟
بس والله يستاهل عشان مش عارف الشخصيه اللي قدامه
بس تعالي ناخد الجانب من ناحية البنت يعنى تفكيرها وصلها لكده ازاى
" بغض النظر عن انها بتستهتر بمشاعر الاخ اشرف " ده لو عنده دم من الاساس
الا انها بتمثل فئة كبيرة من البنات
وده يخلينا نسال ايه مشكلة البنت دى بتعمل كده ليه؟
انا رائى انها مؤمنة بالحب اللي بيظهر في الافلام العربي
طبعا هتستغربوا من التحليل ده
بس استنوا شويه .....
ايوه هيه رومانسيه بس برضه واقعيه عقلها اختار الاخ اشرف لانه انسان مناسب للزواج
وقلبها رافضه
متهيألي مشكلتها هنا هيه الاختيار ما بين القلب والعقل
فيلسوفه ياخواتى
ايه ده ايه الحكم دى
المهم
هوه ده كان قصد الفيلم
والله اعلم

ملحوظة :
اخينا اشرف ده بقي عاوز يضرب لانه ارتبط بواحده وهوه مش متأكد من حقيقة مشاعرها ناحيتة

وعجبي
صاحبة مدونة يوميات موظفة استقبال

ammola said...

انا مش معاكم
المشكلة مش فى اشرف لانها اكيد مثبتاه كويس ومشتغلاه تمام...احنا نروح نقوله انها راكناه ونشوف حيعمل ايه
اما الانسة دى...فبعد ما تتجوز حتفضل برضة مستنية تقابل شخص تانى..واهو يبقى جوزها موجود حيروح فين يعنى ؟؟
تصدق اتخنقت بجد
ياللا ...سلام

la3lahakhier said...

اهى دى اللى يستاهلها اشرف

مجداوية said...

معلش أنا حاستخدم تشبيه تبع بتوع الكاوتش ,واشرف ده بيسموه استبن لكن بيحصل ان الاستبن من كتر الركنة بيهوى وبيبقى محتاج هوا فيه نوعيه لما بتلاقى الاستبن قرب يهوى تجرى وتديله هوا وفيه نوعية بتنسى ولما تحتاج الاستبن ده بتلاقيه مينفعش ,,ايه رأيك بالتشبيه الميكانيكى ده !!! نتكلم بلغة المدونين بقى ونسيبنا من بلية والاسطى ,, اشرف ده يستاهل يكون كده عشان قبل على نفسه يكون بديل أو استبن حتقولى هو مخدوع حاقولك الصدق بيبان والخداع له علامات بس ده لا يمنع انه فى النهاية الناس بتاجر بعواطفها والمعايير بقت مختلفة ,,بالمناسبة تشبيه الاستبن ده حصل معايا بس استبن بجد مش بنى آدم يعنى اصلى نسيت أشيك عليه وكان موقف حلو اوى اوى اوى ,,بس مش عارفين نشكر حضرتك ازاى على تعطفك بالكام سطر دول بعد الغيبة الطويلة ,وايه الكرم ده !! وما قل ودل

خمسة فضفضة said...

السلام عليكم ورحمة الله وبركاته

علي فكره اشرف لو كان فضل موافق علي الحال ده كان يبقي يستاهل
بس لو انت كملت الفيلم هاتلاقيه رفض كده ورمالها الدبله في وشها ومشي وهي اللي رجعت اتندمت واتحسرت عليه في الآخر

Anonymous said...

هي إيه المشكلة
مرة كنت راكب مشروع و طلع واحد أول و كان فيه وحدة راكبة ورايا من البنات بتوع الحجبا و البنطال الضيق نادت عليه
و أعدوا جنب بعض و نظام إنت فينك وحشتني
و عاملة إيه دلوقت و مصاحبةاللي فهمته
إنها مخطوبة و أعدة تتكلم مع واحد صاحبها و رايحة تقابل خطابها و فيه تلاتة تانين كانت بتحبهم
تقريبا بلغة بتوع الكاوتش مبقتش بس استبن بقى محل عجل

Anonymous said...

الحمد لله ان اشرف موجود
البت كان زمانها متشحططة
مع السلامة

MR.TITO said...

الحقوا يا جمااااااااااااعة


أشرف ماااااااات


رااااح الاحتياطى ..يالهوووووى


يلا .. عنسى بقى..هههههه

Unknown said...

اسمها
"الحوارمن مهزلة عربيه"
............
في الحقيقه
يحدث اكثر من ذلك
صدقني
؟؟؟!!!!

المجاهدة said...

للاسف ان فيه للاسف من النماذج دي :s

ربنا يهديهم و يهدي اللي زي اشرف يدورله على حد احسن!

البنت الشلبية said...

ده فيلم عربى جديد بقى

وعامة نظرية مش فى محلها

عصفور فى اليد خير من الف ع الشجرة

ولازم الواحدة تحاجى على طيرها لحسن غيرها تلوف عليه

عقبال ما الاقى طيرى انا كمان

===============
ازيك يا بشمهندز
اخبارك ايه؟
اتمنى انك تكون بخير وبسعادة ابدية

Anonymous said...

احبه لانه بستحق ان احبه
ذهبت بعيدا ولكن رجعت اليه
اخذتني الدنيا ولكن رجعت لاني احبه
عرفته بالحب عدت بالحب
هل تحبه هل تسمعه ,الك قلب
ان كان لك قلب ستسمع
حتما ستسمع ,
الم يان للذين امنوا ان تخشع قلوبهم لذكر الله وما نزل من الحق ولا يكونوا كالذين اوتوا الكتاب من قبل فطال عليهم الامد فقست قلوبهم وكثير منهم فاسقون
اياك ان تذهب اياك ان تمضي ارجع فقط ,ارجع فحسب ,ارجع ان كنت تحب
ارجع قبل ان يأتي يوم ولاتستطيع الرجوع ,
الك اله سواه الك رب غيره ,ماهذه الدنيا ومن فيها ومن عليها ,
يا حسرتى على ما فرطت في جنب الله وان كنت لمن الساخرين
يا حسرتى على ما فرطت في جنب الله وان كنت لمن الساخرين
يا حسرتى على ما فرطت في جنب الله وان كنت لمن الساخرين
العائد الي النور

مجداوية said...

انت فين يا هندزة لعل المانع خير

الراقـــص مع الذئـــــاب said...

السلام عليكم

ازيك يا هندسة
بس اشرف يستاهل...معلش بقي هو يستاهل
خليه علي الرف بقي لغاية لما حد يجي يشيله

ma 3lina said...

همسات دافئه
الخوف إنه يكمكم من التخزين ويبوظ .. ساعتها لا حينوبها لا عنب الشام ولا بلح اليمن
ومعلش بقا .. الولاد مش بيعملوا كده خاااالص .. دي تقاليد أنثوية عريقة
:)

mohand
ههههههههههههههه
هدي أعصابك يا باشا وروق دمك

طـعـمـة
هههههههه .. ايوا طبعا عارف العتة

أول تعليق يحمل اشرف الذنب

Ma 3lina
قال يعني البنت دي جامدة والبنات التانين مش جامدانين
ما هو كلهن بيفكرن بالطريقة ديا
وإن كيدهن عظيم
مش بهزر بتكلم جد .. كله كده

_أحمد_
هههههههه ..
آه ويبقى كده كتر خيرها الغلبانة انها مستحملاه مع انه شاغل الرف المركون عليه

تاني تعليق يحمل اشرف الذنب

طال الليل
اممم ... قصدك إن الستات إدنى من أدنى المخلوقات .. اممم
يا عم انا ماليش دعوة .. معلش ما اعرفكش
;)
وجهة نظرك وانت حر فيها وحر في اللي حيجرالك
وبعدين الكلام ده ما يتقالش في العلن كده .. دا بيننا وبين بعض
:D
واشرف على فكرة ما يعرفش حاجة .. هو ليه اللي قدامه وما يعرفش الخطة
ضحية يعني

محمد عبد الغفار
أشرف غلباااااان

تالت تعليق يحمل اشرف الذنب

فراشة
أولا صعب جدا فهم وتحليل شخصية المرأة .. يمكن يكون مستحيل كمان ... ودا لأن المرأة بتتغير طبيعتها مع تغير مكان عقرب الثواني في الساعة .. وعليه فأشرف مش كيس جوافة ولا حاجة .. لأنه غالبا بيبقى مش عارف الخطة .. وليه الظاهر اللي قدامه
بس عجبني شهادتك إن الست هانم بتمثل فئة كبيرة من البنات .. ربنا يخليكي لنصرة قضية الرجل
ولو ان تحليلك يعني بيحاول يلتمس لها عذر ... معلش بقا .. ما لهاش أي عذر

رابع تعليق يحمل أشرف الذنب

ammola
الله أكبر .. جاء الحق وزهق الباطل
أيوا كده يا ست أمولا هانم .. قولي لهم ..
اشرف فعلا مخدوع وضحية ودا مش عيب فيه إذا كان اللي بيخدع ماهر في المكر والخديعة
وتاريخ البشرية بيقول إن مفيش رجل سلم من كيد المرأة
فالمشكلة مش في اشرف .. المشكلة في الست هانم

la3lahakhier
لا .. اشرف يستاهل واحدة احسن منها
هو يعني عشان آمن لها يبقى يستاهلها
:(

خامس تعليق يحمل أشرف الذنب

مجداوية
والله كنت محتار اسمي الموضوع إيه
نطرية المركون ولا الاستبن ولا الوويتينج ..
اصلها برضه سايبة اشرف على الويتينج ومستنية تليفون تاني .. واول ما يجي التليفون بتجري عليه وتعلق اشرف
ولو مفيش تليفون أهو اشرف موجود
والله عايز اكتب .. بس ربنا لا يوريكي مشاكل توضيب الشقة
أنا اكتب الآن تحت نيران مطارق العمال
عااااااااااااا

سادس تعليق يحمل أشرف الذنب

جزاكي الله خيرا على السؤال

خمسة فضفضة
وعليكم السلام ورحمة الله وبركاته
احنا مالنا بأشرف واللي عمله .. خلينا في السفيرة عزيزة دي اللي فاكرة اسلوبها دا حق ليها مكتسب
وسؤالي كام بنت مش بتفكر كده ؟؟

أبو زياد
ههههههههههه
بس يابني .. سمعة البنات كده في خطر
وأنت لازم يعني ترمي ودنك
بعد كده الواحد يقلق لما يقابل فردة كاوتش .. قصدي واحدة ست

السيد مجهول معروف المجهول
غلبانة البنية .. مش كده
ههههههههه
سابع تعليق يحمل أشرف الذنب

MR.TITO
ههههههههه
لااااا . ما تلاقيها عندها اتنين تلاتة استبن

أنا إنسان
صدقني وانا اتطلع لمعرفة ما يحدث .. من باب النصح والتحذير .. حتى أخذ حذري
ولو ان مفيش حاجة بتنفع معاهم

المجاهدة
ربنا يهديهم ويهدينا
إيه الغيبة الطويلة دي
:)
شرفتيني بالزيارة والتعليق

البنت الشلبية
ربنا يخليكي يا شلبية هانم
ليه بتقولي الفيلم جديد ؟ .. على اساس يعني إن التفكير ده تفكير عصري جدا مش كده
ههههههه

Anonymous
جزاكم الله خيرا

الراقص مع الذئاب
وعليكم السلام ورحمة الله وبركاته
حتى أنت يا ح الظابط بتقول أشرف .. ما حد يرمي البت دي بطوبة ولا يفتح لها نافوخها بدل ما الكل نازل ضرب في اشرف

ثامن واحد يحمل الذنب على أشرف

سارة درويش said...

على فكرة بنات كتير بيعملوها ووالله ساعات ولاد كمان

هنقول ايه عارف العيب على مين ؟؟ على اشرف اللى سايب نفسه يبقى فردة احتياطى ..

إيمان الحسيني said...

أخي الكريم ما علينا
صراحة تعليقك ده أحزني جدا
(قال يعني البنت دي جامدة والبنات التانين مش جامدانين
ما هو كلهن بيفكرن بالطريقة ديا
وإن كيدهن عظيم
مش بهزر بتكلم جد .. كله كده)

واحدة كانت قاعدة في بيت أبوها لا بيها ولا عليها
لقيت عريس جاي يتقدم
وفضل لمدة شهر داخل خارج
وفي وسط الكلام اشتكى من إنه متعود كل سنة يطلع عمرة رمضان
وفي السنة دي أبوه حلف عليه إنه مش هيطلع غير لما يكون مرتبط وخاطب
البنت وافقت عليه على أساس إنه ملتزم وبيصلي الخمس فروض في الجامع وبيطلع عمرة رمضان كل سنة
الولد أخد موافقة البنت
وراح بلغها لأبوه
وطلع عمرة رمضان
وآدي وش الضيف من سنتين

تفتكر ده يبقى راجل من الأساس ؟!!!!
الله المستعان