أول الكلام

بسم الله والحمد لله والصلاة والسلام على رسول الله أهلا بك أيها القارىء العزيز ... ربما تكون أول من يدخل إلى مدونتي هذه لأنها حديثة عهد وجديدة في إنشائها .. والحقيقة إن فكرتها أخذت وقت طويل جداً حتى خرجت المدونة إلى النور .. كنت قد رأيت مدونات الآخرين وقلت لنفسي اشمعنى انا ما يكون لي مدونة تكون باب للفضفضة وأقول اللي في نفسي واحلم براحتى .. يعني مدونتي تبقى زي ما بيقولوا رسالة إلى الفراغ .. من حقي ... يعني هما اللي بيكتبوا للفراغ أحسن مني ... دا كل الناس دخلت في اللعبة وماشية تكلم الفراغ دلوقت .. فشمرت الأكمام وحجزت الاسم .. ما علينا وما علينا دي كلمة محمود عبد العزيز في فيلم سيداتي آنساتي وكان بيقول إنها مش مجرد كلمة .. دي فلسفة ومن غير مبالغة هي بالنسبة لنا إحنا المصريين دي فلسفة فعلاً .. وهي كلمة دارجة جداً على ألسنتنا لما يقف عقلنا عن منطقة أي حالة .. يعني لما نحاول نفكر في أمر ما ونجد انه بكل الطرق المنطقية وأوجه التفكير السليم ما كان ينبغي إنه يحصل .. فبنسأل طب حصل ليه وإزاي ؟؟ فتصبح اسئلة لا إجابة لها .. ونقف أمام بعض مخشبين .. فيكسر السكون ما بيننا واحد منا بيقول .. ما علينا .. عشان الحياة تستمر .. ما هو لو وقفنا عند كل حاجة ودورنا لها على سبب مش حنخلص .. وبإذن الله حتكون المواضيع الأساسية اللي حتكلم عنها في المدونة كالتالي حالنا :: وتكون على اللي بيجرى حوالينا * مقالات :: مقالات عجبتني لآخرين * أدب :: مش معقول اعمل مدونة ما يكون فيها باب ثابت للشعروالأدب * أفلام :: والحواديت لازم نتكلم شوية عن الحواديت * فتاة :: طلباتي في فتاة الأحلام .. وهي حاجات كتيرة جداً وصعبة جداً لكن مين عارف * المدونة : بوستات خاصة بالمدونة * بحيث يبقى كل بوست مكتوب في اوله موضوع البوست فادع لي بالتوفيق