Thursday, May 31, 2007

نظرية المدرسة السرية

وبعدين في الجو الملبد بالغيوم ده ??!! .. يا جماعة انا مش مستلم الستات ولا حاجة ولا مضطهدهم .. بس هو الكلام بيجيب بعضه ..

الدنيا حر فقلت كلمتين من نفسي .. قلت الله يكون في عون المنتقبات ... قوم إخواتنا المحجبات جندوا الأخ سكتم بكتم - رده الله إلى بيته سالما غانما - عشان يتحدث باسمهن ويدافع عن ثباتهن هن كمان ..
قوووم إيييييه .. قعد الأخ سكتم يتكلم معايا عن النقاب والحجاب
قوووم إيييييييه .. افتكرت آآني بجى موضوع التكلف الزيادة عند الستات في موضوع اللبس والشياكة
يعني المواضيع هيا اللي بتجيب بعضها مش أكتر .. لا انا مستلم الستات ولا انا ليا أغراض خفية ولا حاجة

والله انا خايف واحدة تطلع زي الناشط المسيحي عدلي أبادير كده لما قال إن النظام المصري الكافر بيخطط بالتعاون مع الإخوان المسلمين لإخلاء منطقة الشرق الأوسط من المسيحيين بتمويل وهابي سعودي .. - أي والله قال كده - .. خايف واحدة تطلع برده وتقولي لي إني بتمول من بلاد الواق الواق لإخلاء المنطقة من الستات .. ساعتها اروح ورا الشمس

وللعلم حبب إلي النساء .. لكن الكلام هو اللي بيجيب بعضه مش أكتر .. وبعدين في البوست الأخير لم أذكر رأي في المشاهدة وإنما سجلتها بس دون ذكر أي رأي شخصي فيها .. العجيب إن كتير من المدونات هما اللي حللوا المشاهدة ..

الدكتورة ما علينا افتكرت إني اقصد السبب إن المراة فاضية وما وراهاش غير الموضة .. باشمهندس حسن محمود والأفوكاتو أماني بنت الجنوب شايفين السوق هي السبب في كده .. أختي رفقة شايفة إنها فطرة داخل كل ست .. الأخت أمولا بتقول الرجالة هما السبب .. الآنسة إنسانة شايفة إنة سنة الاختلاف هي السبب .. شلبية هانم شايفة غموض المرأة وحبها للتغيير هو السبب .. باشمهندس عصفور المدينة شايف إن طبيعة الإنسان هي اللي بتحدد مش النوع

الجميع حلل المشاهدة إلا العبد لله .. ذكرتها واكتفيت بذكرها مع رأي لدكتور سلوك تنظيمي دون إبداء أي وجهة نظر شخصية ..

وصدقوني الموضوع ما فيهوش هجوم .. لكن الكلام هو اللي بيجيب بعضه .. يعني مثلا ..

في تعليقات حضراتكم الطيبة كان فيه تعليق لشلبية هانم .. قالت فيه إن كل الستات ملتزمات أو غير ملتزمات كلهن ليهم نفس الطبع ...

لما قريت التعليق دا افتكرت نظرية افتراضية كنت حطيتها من زماااان .. ما احنا اتفقنا إن ليا نظريات .. يعني التعليق هو اللي فكرني .. والمواضيع بيجيب موضوع .. وتعليق شلبية هانم هو اللي فكرني بنظرية اسمها نظرية المدرسة السرية اللي مش حقدر احكي لكم عليه طبعا أحسن تقولوا عليا مستلم المرأة ولا حقدر أقول لكم إني كنت بتندر بالنظرية دي على تشابه كتير من طباع الستات - إلا ما رحم ربي - على اختلاف ثقافتهم ومستواهم المادي والتعليمي .. وكنت مش بصدق هذه النظرية طبعاً .. هي مجرد تخيل افتراضي لتمثيل الواقع ... لكن برضه في وقت كان بيني وبين إني أصدقها شعرة صغيرة ..

فمعلش بعد الاتهامات دي الموجهة لشخصي مش حقدر احكي النظرية ولا اقول خلاصتها ولا اقول إنها بتفترض إن كل النساء في كل انحاء العالم بيدخلوا المدرسة السرية دي بمجرد بلوغهم سن معينة ومفيش حد يعرف عن المدرسة حاجة خالص غير النساء فقط وهو السر الوحيد اللي استطاعت المراة حمله .. وجوا المدرسة بيتعلموا فيها كل حاجة ابتداء من امتى وإزاي تعيط وانتهاء بالطريقة المثلى لتعبئة الزوج في أكياس بلاستيك .. وأهم أهداف المدرسة استمرار سيطرة المرأة على كوكب الأرض بالتحكم في الكائنات الأخرى وعلى رأسهم بالرجل .. وكل الستات على اختلاف مشاربهم وتوجهاتهم أعضاء في هذه المدرسة وبيقوموا بدورهم فيها بشكل تكاملي .. يعني الست المطالبة بحقوق المرأة بتكمل دور زوجة وأخت كل واحد فينا .. رغم إنهم ما قبلوش بعض ولا يعرفوا بعض .. ويمكن بيظهروا البعض العداوة كمان

ولأن المدرسة واحدة والمدرسين نفس المدرسين .. فعشان كده طباع الستات كلها واحدة .. طبعا الفانتزيا دي مش حقيقية ومش حقدر أقول إن برتوكولات حكماء بنات حواء اتسربت ليا وانا اعرفها ... برغم إن عندي أمثلة كتيرة لتشابه طباع الستات رغم اختلاف الزمان والمكان ..

لكن أصلا مش حقدر افتح بقى ولا اقول النظرية ولا اعرفكم بيها خاااااالص عشان ما حدش يزعل مني

والحمد لله الدكتور سكتم غايب اسبوعين فمش حيعرف يشعلل المواضيع .. أصله رايح شرم الشيخ .. طبعاً لو موجود حيقول شغل يا جماعة وحقعد في المستشفى مش حخرج منها إلخ إلخ .. قال يعني حد بيروح شرم عشان شغل .. وقال إيه مفيش نت هناك ومش حيعرف يدخل يرد على الناس في مدونته .. لما نشوف .. يالا ربنا يرجعه لبيته بالسلامة .. ومن هنا من إمبراطورية أرض الرغي .. حنبعت له رسالة نقول له فيها : خلي بالك من بنات شرم يا رأفت .. ابعد عنهم .. مصر عايزاك يا رأفت .. ابعد عن أي واحدة اسمها استر بولونسكي يا رأفت .. أو جوجو يا جمعة ..

وبالنسبة ليا فخلاص حعمل بنصيحة الاستاذ محمد عبد الغفار واتكلم في أي حاجة تانية .. دا الواحد لما جاب في سيرة الإخوان والحزب الوطني وكفاية وحسني مبارك .. كان الموضوع أهدى من كده بكتير ..

أمري لله نحول المحطة .. وسلموا لي كتير .. على حرية التعبير .. بس ياريت برضه تقنعوا الأخت طعمة إنها تحول المحطة

12 comments:

إنـســانـة said...

هههههههههههههههههههههه

بقا تعليق شلبية هانم هو اللى فكرك بردو

وبعدين ايه مش هتحكلينا حاجة عن النظرية دى ماهى اتشرحت خلاص

وزى ما حضرتك شايف ان النساء كلهن طبع واحد فمحدش ابدا يقدر ينكر ان الرجال هما كمان كدة .. واكتر من كدة

يلا خلينا فى حالنا وربنا يكرم الجميع

سلااااااااااام

Mohamed A. Ghaffar said...

عارف لو كنت اتكلمت فى حكايه المدرسه السريه وقلت اللى ات قلته ده كت بقيت عدو المرأة رسمى

وبعدين كل الأخوات فهمو الصح انت اللى لا مؤخذه مبتفهمش نفسك ومكنتش عارف قصدك هما عارفين اكتر

وكمان عاوز تقول ان الفضفضه اللى بتعملها طعمه هجوم على الراجل زى هجومك على الستات ، عاوز تغلط واحده ست بتكشف بموضوعيه عيوب الرجاله ، هو عشان انت فكرك زكورى هتفتكر ان كل الستات اللطيفه الظريفه الغلبانه المظلومه فكرها انثوى

لا لا لا لا راجع نفسك يبنى وكل عيش

ولكل الأخوات خلاص وعد منى ماعلينا عقل وعرف ان الله حق وشعار مدونته من هنا ورايح هيكون فالتسقط الرجاله ولتحيا الستات

رفقه عمر said...

السلام عليكم ماعلينا
اخبار الامتحانات ايه ربنا يوفقك يارب مع انى مش عارفه امتحانات ايه بالظبط

shlapia said...

هههههههههه انا مش هتكلم كتير ,,بس استحالة ان تتشابه طباع النساء ,,بالذات النساء ممكن الرجالة اه لان نمط حياتهم تقريبا واحد وحتى لو لقيت حد مختلف بيبقى قليل اوى اوى

لكن طباع النساء عامة مختلفة فى امور كتيرة اوى فكرية وظاهرية

المهم بقى انت عامل ايه ,,وياترى المحطة الجاية هتتكلم فى ايه ّّ

فى انتظار مزيد من المواضيع النارية

REEMOO said...

أنا اكتفيت البوستات اللى فاتت بالفرجه بدون التدخل فى الحوار
بس المره دى فى كلمه بصراحه واقفه فى الزور
انت شايف ان كل الستات زى بعض وطبعهن واحد
وده غلط لان مش كل الستات بتتعامل بنفس الطريقه
وممكن أوى الحاجه اللى ترضينى مترضيش غيرى
لكن التشابهه فى الراجل اساسى
فكل الرجاله ليها أسلوب واحد فى التعامل بينفع معاهم كلهم
وكل الستات عارفين كده وعارفين ان مفاتيح الراجل بتبقى فى شويه حاجات معروفه ولو اتنفذت مع اى راجل بيرضى
لكن دايما المرأه هى اللغز المحير اللى حير الرجل
وده باعتراف رجال كتير محدش قدر يفهم المرأه عايزه ايه
لان طباع كل ست بتختلف عن التانيه ومفيش عامل مشترك يربط ما بينهم علشان كده صعب انك تحط نظريه واحد تنطبق على كل الستات

نصيحه أخيره
أنت داخل برجلك فى طريق عدو المرأه يادوب تلحق نفسك لان سمعت ان حزب المرأه البلوجر بدأ يفكر جديا فى حطك فى البلاك ليست وشن حرب على نظرياتك
:)))

تحياتى

أمــانــى said...

انا بقى برضو هأضحك زى اختى انســانة وهاطولها شوية ليه بقى هاقول بس بعد ما اضحك
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
على فكرة بأضحك عليك لانك شكلك شوفت نوعية واحدة من الستات وسياتك عامل تعمل نظريات وحوارات وهلم جر ما انا وقلتك قولى عليها وانا اشوف شغلى معاها واريحك يابنى لانك كده بـدأت حياتك تاخد منحدر خطير ألحق عالج نفسك احسن تطلع صحيح مــــاعلـــينا
على فكرة نظريتك وكلام الاخت شلبية مش هنقول غلط ولا هنقول صح
لان استحالة تكون النساء كلهم واحد والرجالة كلهم واحد ده للتوضيح
سبحان من خلق وصور فى الاشكال يبقى مش هيغير فى الطباع لالالالالالالا يا باشمهندز بالزين مش بالسين كده لانى بقى متغاظة متسألش ليه
وكمان فرحانة فيك اديها باعتك فى اول حوار هههههههههههههههه
والله اهم شئ ازاى الواحد يخاف ربنا علشان حاله ينلصح فى كــل شـــئ
اه صــح عايزة اقول حاجة مهمة
ايوا كل الناس متهمة بينا ســـبحان الله حتى رب العزة فى سورة اسمها النســاء ومن اكبر السور والرسول وصى علينا
يبقى اهمد شوية احسن يصيبك دعوة وليه ساعة مغربية
هههههههههههههههههههههههههههههههههههههههههههههههههههههههههههههههههههههههههههههه
وسلميلى على اللى مزعلك ومش قادر تاخد حقك منهم وبتاخده من البنات كلهم
تــحيــــاتى يا مــــاعلـــــينا
:D

Sharm said...

هو عدلي ابادير قال كده فعلا ؟؟

الراجل ده بكره كل يوم اكتر من اللى قبله

رينـــــــــــا said...

هههههههههههههههههههه
هو انت لسه مروحتش
دا انت روحت ومحدش سمى عليييييييييك

سلملى على بلاد الواق الواق
ههههههههههههههههههههههه
ضحكتنى موت

shlapia said...

انا هفهمك قصدى من حتة كل النساء واحد ملتزمات او غير ملتزمات ومش هتقدر تلاقى حقيقة واحدة يتفقول عليها

مثال صغير اوى

انا داخلة محل ملابس عايزة اشترى بلوزة

مش هقدر ادخل لصاحب المحل اقوله عايزة بلوزة وده لان اه اسمها بلوزة لكن الاشكال مختلفة وكتيييييييييرة اوى ,, وعلى اختلاف تفصيلتها ولونها وشكلها الا انها اسمها فى الاخر بلوزة!!!

يعنى المرأة هيا المرأة فى الاحساس بالذات لكن كل امرأة ليها طابعها الخاص

يارب تكون وصلت

ammola said...

بطلوا خناق بأه
انا نظريتى ان يا اما كل الرجاله وحشين والستات حلوين
يا اما كل الستات وحشين بس الرجاله باه حلوين
ايه اللى بيحصل فى الاخر؟ بطلوا يعرفوا بعض اويحبوا بعض ويتجوزوا؟لالالالالا يبقى خلاص ..سيبوهم بأه هما يخلصوا على بعض -قصدى يتصرفوا مع بعض وريحوا دماغكم

Ma-3lina said...

ههههههه انا فى الاخر اصلى حاولت امسك اعصابى بس معرفتش فا قلت اهدى الاول
علشان فيه حاجات كانت هطير و كدا مش عاوزين اصابات ايام الامتحانات باه

المهم كفاية تخبيط فى البنات و اتقى ربنا و شوفلك موضوع تانى

و ماا علينااااااا

لحظة said...

تعليق خارج السياق وان كان في الموضوع
اخونا ما علينا
اسفة برده ان دي اول مرة ازور مدونتك وباعتذر ان كنت ضايقتك بس انا قلت ارجع ارد عليك عندك في بيتك
اولا:الزي مش مناسب لايامنا دي وانت ما تقدرش تروح شغلك كده وفيه ناس بتتخانق في الشغل عشان المظهر
ثانيا:قلت انه كمان الملابس المقطعة والواقعة واللي عليها رسومات وكلمات مسيئة كمان منتقده
ثالثا:فيه حاجة اسمها المظهر العام مادام الملابس مش بتخالف الشرع والدين ما البسهاش ايه؟
ايه مشكلتكم في البدلة والقميص والبنطلون؟
وما تقولليش مخالفة للكفار لان الرسول صلى الله عليه وسلم لما لبس القميص والبرده هل كانوا الكفار في وقته ما بيلبسوهاش؟ كان بيلبس الملابس المتاحة في عصره وما عملش زي موحد للمسلمين هو بس حبب لهم البياض؟
رابعا: انت عارف وانا عارفة اللبس ده بيفكرنا كلنا بمين وللاسف الوحش خد الكويس في سكته وللاسف فيه ناس كتير اساءت لهذا المظهر وادت عنه انطباع وحش جدا للي لابسينه فليه ما يكونش اقتدائي بسلوكي واعمالي مادام ما خالفتش في مظهري اوامر ربي؟
انا باضايق من المظهر مش من السلوك
ومش من الانسان اللي لابس كده لاني ما اتعاملتش معاه عشان احكم عليه
خامسا : انا ما اعترضتش على المصحف انا نفسي مصحفي في شنطتي ودايما بافتحة واقرا فيف في المترو والمواصلات بس ما ينفعش اقرا وانا ماشي في الشارع جنب العربيات زي ما شفت بعض الناس ده حتى يبقى فين التدبر والتركيز هنا؟
شادسا : السواك مرضاة للرب والتخلف بس هو اللي يمتنع عن حاجة بسيطة زي دي ترضي عنه ربنا لكن انت قلت بنفسك زي ما انا قلت انه قبل الصلاة وقراءة القرآن مش وسط الناس في الشارع او قاعد باتكلم معاهم اقوم اطلع استاك

كل ده مبالغة في مظهرية ما اعتقدش ابدا ان الرسول عليه الصلاة والسلام امرنا بيها
هو حد يطول يطبق سنه رسوله وياخد عليها قد كدة حسنات وينال بيها شفاعته؟ لكن لكل شيئ اصول ولكل وقت اذان ولكل مقام مقال

ارجو ان دي تكون معرفة خير بيننا
ومقدمه للمزيد من التواصل في الخير واسفة عشان طولت كل ده سامحني