Saturday, December 22, 2007

صحافة قومية صفرا

الحقيقة اني مش بجيب جرايد اديلي اهو ردح من الزمن .. مش مقاطعة لا سمح الله لكن توفيرا للميزانية المهدرة على اوراق في ظل تلاشي كل الفوائد منها مثل مسح الإزاز لأن الإزاز مش بيتمسح عندي أو لف الأكل عشان الحبر المسموم اللي بيتكتب بيه في الجرايد .. أو حتى عملها مفارش .. عشان الجرايد الموجودة بالفعل قايمة بالواجب وزيادة ..

وعشان حكم التربية وخلافه فساعات الواحد بيحن كده ويقول لما يجيب جرنان كده يشوف الناس دي وصلوا لإيه .. ولأني مش من هواة الصحف المستقلة - قال يعني هي مستقلة بجد - وكمان مش بحب المعارضة - قال يعني هي معارضة بجد - فماليش غير الصحف الحكومية الموقرة .. فأخدت بعضي واشتريت اخبار اليوم الصادرة اليوم ..

وبرغم المواضيع الثابتة اللي كنت متأكد إني حلاقيها واللي مش ممكن تتغير مهما غيروا رؤساء التحرير ورؤساء مجالس الإدارات واللي بتنقل لنا أهمية الريس واهتمام زعماء العالم بمقابلته وشحتفتهم إنهم ياخدوا معاد من سيادته يستفيدوا من حكمته وخبرته

ومقالات اللي بتكشف لنا ازاي ان سيادته بيعاني مع الوزرا لأنهم مش بيطبقوا سياسته الحكيمة وبيلاعبوه .. منهم لله الوحشين

وأخبار الست حرمه الجوهرة المصونة والدرة المكنونة .. نابغة الزمان ودرة العصر والآوان واللي بتتهافت المؤسسات العالمية لتكريمها وبتزحف جامعات العالم على تكريمها واعطائها درجات الدكتوراة بدون أي مقاااااااااااابل .. كده لله في لله ..

وأكيد طبعا شوية أخبار عن العيشة المزهزهة والحياة الوردي من نوعية استثمارات بقيمة 629 مليون دولار و67 ألف .. شوفت الدقة والتركيبة الغريبة للرقم ؟؟!!

ولا التطوير اللي بتشوفه البلد وشوفوا منظر السراير في مستشفى حكومي

ولا دول العالم اللي حتموت على العمالة المصرية وإحنا متعنطزين ومش راضيين نبعت لهم إكمن فرص الحياة افضل في مصر .. وما يغركوش اللي ماتوا في البحر وهما بيحاولوا يطفشوا من البلد .. دول قلة مندسة في وسط الجماهير ..







وشهادات طوب الأرض ان مصر لسه محتفظة بمكانتها ودورها القيادي

وتجميل دور رجال الشرطة على لسان ابطال افلام تتناول جرائم الشرطة في حق المواطنين

ومتابعة دور النوم في العسل والتخدير بإظهار ما يسمى الوحدة الوطنية في شكل مباركة من قس للمسلمين في عيدهم والتأكيد على النقاط المشتركة بين أتباع الديانتين ..

كل اللي فات دا متوقع ومنتظر .. لكن اللي استغربت له بجد هو المستوى الزبالة اللي وصلت ليه جريدة قومية رسمية حكومية زي أخبار اليوم .. قال وانا اللي كنت فاكر إن ابراهيم سعدة كان بيضر بسمعة الجريدة ولكن يظهر ان الأحوال تسير من سيء إلى أسوأ .. فالجريدة الآن باتت اقرب للصحف الصفراء والإثارة .. ولوكانت اخبار اليوم صحيفة مستقلة تبحث عن المبيعات لكان هذا لها عذر اتفقنا معها فيه أو اختلفنا .. لكن جريدة بحجم أخبار اليوم تضمن توزيعها وهي صحيفة رسمية ما الذي يدفعها لمستوى تنهار فيه القيم ويصبح معظم أخبارها عن الخيانات الزوجية وكأنها الظاهرة السائدة لنساء المحروسة









ورأي الفنانات في الحب

وتفاصيل فيلم العلاقة المثلية بين الفنانتين على الموبيلات

وخبر تعاقد هيفاء وهبي للترويج لشركة خمر فرنسية

بالإضافة للهجوم على إحدى المسرحيات لأنها تتوجه بالمسرح نحو الأسلمة لأنها تخلو من الرقصات والغناء والنساء ..

حتى الكاريكاتير .. ممكن وانت بتقلب الجرنان تجد كاريكاتير مثل هذا يجعل من الصحفية صحيفة للكبار فقط

لتختم الجريدة صفحاتها بمقال ناري يشن فيه كاتبه المتوتر جام غضبه على النقاب والمنتقبات ويتهمهم بكل ما جادت به قريحته من أنواع التضليل والتسفيه والإرهاب وينسب له كل نقيصة ويلصق بهم من المساوئ كل خصيصة

كانت الجرايد القومية قبل كده بتقتصر على الكذب وبس .. دلوقتي بقى الموضوع كذب وكلام فارغ وقلة أدب كمان .. وجنيه وربع في الهوا

8 comments:

خمسة فضفضة said...

السلام عليكم ورحمة اله وبركاته

كل سنة وانت طيب يا باشمهندس

ارجع اقول دي اخرة اللي ما يسمعش كلمه ماما تقولها....
:-D

انت اللي غلطان برضو
حد قالك تقل عقلك وتشتري جرايد من اصله ، ومالاقيتش غير الجرايد الحكوميه وكمااااااااااااااااان اخبار اليوم

يلاا عوضك علي ربنا في الجنيه وربع

..هههه

سلام

عصفور المدينة said...

سبحانك ربي
تغيب عن الجرايد مهما تغيب ترجع تلاقي نفس التركيبة هو يظهر لعبة مكعبات بيلعبوها زي الأفلام
مجموعة من الاصطمبات وتوافيق وتباديل بينها

Bella said...

يعني اقول ايه بس ؟؟
اقول لك تستاهل لانك جبت اخبار اليوم
حرام لساني مش مطاوعني

يااخي العزيز الجرايد القومية في عهد رؤساء التحرير السابقين كانت صفراء

الآن اصبحت مثل اعلان شاي ليبتون الذي تختار فيه لون الشاي حسب لون الكرافتة فيصير ثقيلا لو احببت

يعني لونها بالبلدي اصبح برتقالي محمر

كل مالايام تمر وفي عهد ممتاز القط لم يحدث اي تعديل سوى من سيئ لاسوء بخلاف زيادة جرعة المسخرة عن طريقة كاريكاتيرات المدعو عمرو فهمي

خلاص اخبار اليوم من سوء الوضع الذي وصلت له صار لزاما عليها ان تقيم نصب تذكاري لابراهيم سعدة حتى يتذكره الناس بالخير لان عهده على ماكان فيه من مصائب رحمة مقارنة بهذه الايام الغبراء

الحمد لله ربنا تاب على من زمان وانقطعت عن قراءتها حتى من النت

ارحم صحتك يااخي وبطل تقرا المصايب دي

الصحة تاج على رؤوس الاصحاء لايعرفه الا من يقرأ الجرايد القومية الصفراء

هههههههههههه

تنفع شعار حملة قومية لمقاطعة صحف الحكومة المسماة زورا بالصحف القومية

Ma 3lina said...

جنيه و ربع ده غلى اوى

انا اخر عهدى بالجرنان كان ابو 50 قرشا ههههه

يالا ما عليناا

على فكرة حضرتك بتتلكك اكيد فيه مواضيع تانية كويسة

برخم بس

هيا غلطتك صراحة حد يجيب اخبار اليوم او الاهرام او الجمهورية كلهم سواء يعنى

يالا معلش راحت عليك الفلوس و ربنا يعوضك ان شاء الله

ملحوظة: يا ريت تبعتلى الجرنان علشان بحب المع زجاج اوضتى بيه بينضف كويس و الزجاج بيبرق كده

mohand said...

السلام عليكم

غلطان طبعا

انت مين قالك اصلا تشتري الجرنان
يا راجل ربنا يخلي لنا النت

بقراء الجرنان من غير ولا مليم
ولا يستفيدوا من ورايا
عالم قلة

امال لو اشتريت بقي الاهرام
كركركركركر
دا انت كنت انتحرت
تحياتي

ma 3lina said...

خمسة فضفضة
وعليكم السلام ورحمة الله وبركاته
وحضرتك بخير يا دكتورة .. خلاص حرمت وحسمع كلام ماما بعد كده .. بس هو انا قلت البوست عشان كده بس أنا عايزكم تلموا لي الجنيه وربع بقا
:D

عصفور المدينة
حسيت بكده لما كنت بقول إن جمهورية سمير رجب هي أكثر الجرائد نفاقا ودلوقتي لقيت أخبار فاضل والقط هي الأسوأ .. يعني تبادل ادوار وزيادة عليه إن التمثيل بقا اسوأ

Bella
عاااااااااااا
بلاش تأنبوني بقا
اصل كنت حنزل ويندوز عند واحد وقلت اشتريه اقراه عقبال ما الويندوز ينزل
حلوة حكاية النصب دي .. أهو اللي يعدي عليه يرميه بسبع حصوات عشان غيره يعتبر
ههههههههه
ومعاكي في الحملة .. بس الحملات كترت أوي أوي أوي

DR. Ma 3lina
أهلا اهلا أهلا بست الدكتورة
فيه مواضيع كويسة إيه بس .. الجرنان عندي شوفيه بنفسك .. الأخبار الكويسة لا تتعلق بمصر إطلاقا .. يعني اخبار مصر يإما مسخرة يإما كذب ونفاق
شوفيه بنفسك وبعد كده خديه لمعي بيه إزاز الأوضة .. بس هاتي تمنه .. جنيه ونص بس

mohand
وعليكم السلام ورحمة الله وبركاته
طبعا أنا غلطان والغلط راكبني من ساسي لراسي
:D
والله يا عمو قلت اجرب عقبال ما الويندوز ينزل .. عاااااا
انا كمان بشوف الأخبار من النت بس قلت نشوف الدنيا بقت عاملة ازاااااااااي .. بس خلاااص توبة من دي النوبة
:))

محمد عبد الغفار said...

ايه ده!!!! هى بقت بجنيه وربع

ma 3lina said...

Mohamed A. Ghaffar
أخبار اليوم بجنيه وربع تصور حضرتك .. وياريت بفايدة
:)