Sunday, March 30, 2008

إضراب إيه ؟؟

اللي يشوف بلدنا يقول على طول إن الحكومة عارفة مصلحة الشعب كويس .. عارفاها أكتر من الشعب نفسه .. وعشان كده بتاخد القرارات نيابة عنه ومش بتاخد رأيه في أي حاجة .. حتى في الانتخابات .. الحكومة هي اللي بتختار له وتحدد له مين اللي يمثله .. ومش غريب إن اللي الحكومة بتختاره عشان يمثل الشعب هو نفسه اللي بعد كده يقف جنب الحكومة عشان تستمر في الحكم .. والحكومة في قراراتها عايزة الناس تمشي وراها مغمضين .. ما هو شعب - من وجهة نظرها - حديث عهد بالديمقراطية ... يحبوا - من الحبو - في ممارسة طقوسها.

القصد إن دا دور الحكومة في بلدنا تاخد قرارات باسم الشعب .. بتتكلم باسم الشعب .. والشعب لازم يمشي وراها .. مع إنها معهاش توكيل ولا تفويض منه .. وكل الحكاية إن اللي موجودين في الحكومة ورثوها من اللي قبليهم واللي قبليهم رثوها من اللي قبليهم لغاية ما توصل لانقلاب عسكري ..

يمكن النظام دا موجود في بلاد كتيرة من بلاد الأرض .. فيها سيف الحكومات متسلط على رقاب العباد

لكن في بلدنا حاجة أظرف .. مش بس الحكومة هي اللي بتقوم بالدور ده .. لا .. المعارضة كمان

المعارضة كمان عارفة مصلحة الناس وبتاخد قرارات نيابة عن الناس .. وطبعاً مش بتاخد رأيهم لأنها -أي المعارضة - هي نخبة النخب وصفوة الصفوة وخلاصة المفكرين والغيورين على مصلحة البلاد والعباد واللي فاهمين كل حاجة أكتر من الحكومة ومن الناس .. وكمان طبعا بتطلب من الناس إنهم يمشوا وراها .. مع إنها برضه معهاش توكيل من الناس ولا تفويض منهم .. تمام زيها زي الحكومة ..

كله بيحاول يمشي الناس وراه .. ومفيش حد بيحاول يكسب الناس في صفه .. كل واحد بيلعب لمصلحته ..

المعارضة بتطالب دلوقتي بإعلان يوم 6 إبريل يوم إضراب عام في مصر .. وبتطلب من الناس يقفلوا المحلات والعيادات والمستشفيات والمدارس ... إلخ إلخ إلخ

مين اللي أخد القرار ده ؟؟ وشاور مين قبل ما ياخده ؟؟ .. ونزل للناس في الشارع وخد رأيهم ولا هو عارف مصلحتنا ؟؟ .. طب الحكومة بتعمل استفتاءات وتزور نتايجها .. هل المعارضة بقى استغنت كمان عن الاستفتاءات المزورة .. طبعا مش حتعرف تعمل استفتاء .. بس على الأقل تستطلع رأي الناس .. هل اللي فكر في الإضراب عارف طبيعة المصريين ويعني ايه أكل العيش بالنسبة لهم .. ما هي الناس برضه عشان تشارك لازم الأول تقتنع بالشخصيات اللي أخدت القرار ويقتنع بالهدف من وراه .. إحنا مش بهايم .. كل فصيل عايز يمشينا وراه

اللي بيدعموا يوم الإضراب زي (العمل وكفاية والإخوان والكرامه والوسط ) مش هما دول نفسهم اللي بيشاركوا في مهازل الانتخابات رغم الدعوات الكتير اللي بتدعوا لمقاطعتها .. مش كده وبس دول كانوا ولا يزالوا بيطلبوا من الناس المشاركة كمان في انتخابات الحكومة اللي كلنا عارفين نتايجها قبل ما تتعمل .. يعني الجهات دي مش قادرة تضرب عن الممارسة الهزلية للعبة السياسية وبتدعم ديمقراطية الحكومة بتمثيل دور المعارضة فيها وفي نفس الوقت بتطلب من الناس إنهم يضربوا عن أكل عيشهم ويقفلوا محلاتهم وصيدلياتهم وعيادتهم !!!

طيب واحدة واحدة علينا .. ايه أولى .. ومين اللي يتعمل الأول .. منع الناس من السعي على أكل عيشها في وقت هما فيه ميقدروش يستغنوا عن مصادر دخلهم ولا منع الناس من مشاركة الحكومة في مسرحياتها قدام العالم ..

والغريب إن الدعوة مش موجهة للعاملين في قطاعات الحكومة بس .. دي الدعوة لشعب مصر كله .. يعني الناس تهجر اعمالها ومحالها عشان خاطرهم وبعد يومين العمال اللي وقفوا المصانع يلاقوا البهوات الصفوة والنخبة بتوع الدعوة للإضراب موجودين ومشاركين في انتخابات المحليات اللي اتزورت قبل ما تبتدي .. !!

لما الجهات دي تكون قدوة ومثل وتمتنع عن مشاركة الحكومة في مسرحياتها وتقول لأ مش حشارك .. ولما تكسب محبة الناس والتفاهم حواليها بتحقيق حاجة يحس بيها الناس .. ساعتها وساعتها بس تبقى تبتدي تقول للناس اعملوا أو ما تعملوش ... اضربوا أو ما تضربوش .. وساعتها الناس حتمشي وراهم مش لأنهم بهايم .. لأ .. لأنهم اقتنعوا بيهم وبقيادتهم

8 comments:

محمد عبد الغفار said...

براوه عليك

انت ضربت الإضراب حته ضربه مجتليش على بال اضربها وانا بضرب الإضراب خالص

احب الأفكار الجديده

فراشة said...

اولاً احب اقلك انى لما بلاقي اي كلام في السياسية مش بحب اتكلم مش لجهلي لاسمح الله بس عشان انا مخنوقه على الاخر من اللي بيحصل من حزب الديمقراطيه اللي مش ديموقراطى ومن المعارضه اللي مش بتعارض ومن المواصلات اللي عامله زى علب الكبريت ومن الاسعار اللي مولعه نارومن التجار اللي بيلعبوا بالناس كل يوم سعر وكل يوم رأى ومن ومن ومن يووووووووووووووووووه
كتيرلو قعدنا نعد مش هنخلص

عشان كده مش هتلاقي ردود على
البوست ده زى اللي قبله فاهمنى

ادينى في الهايف وانا احبك يا ناننس

وعجبي

http://kasperb4.blogspot.com/ said...

تسلم ايدك يا استاذ
وانا متأكد مليون ف المية ان محدش من الناس هيستجيب للهراء ده
محدش النهاردة من الموظفين هيفكر يقعد من شغله عشان يروح تاني يوم يلاقي مخصوم من مرتبه الغياب
لأن أكيد مدراء المصالح والهيئات بردو مش هيستجيبو للكلام ده

تهريج ف تهريج

واهو كله برتقال

وسلام مخصوص للإضراب

la3lahakhier said...

لا كدا محتاج قراءة تانية

mohand said...

يحالفك جانب كبير من الصواب

دمت بخير

جنـه said...

ماهو الحكومه والمعارضه مختلفين علي الحكم مش علي مصلحة الشعب يعني تلاقيهم اختلفوا علي كرسي في التقسيمه اللي بينهم بس تاكد ان مفيش حد هيسمع كلامهم لان شعبنا فاهم بس خايف

Ma 3lina said...

احم احم

انا شايفة ان لا ضرر ولا ضرار


يالا ما علينا

ma 3lina said...

محمد عبد الغفار
يعني تعليق احتار اشكرك عليه ازاي
:)
ربنا يجزيك خير

فراشة
والله وانا من زمان بطلت اكتب في السياسة .. بس انا ببعد والدهوات بالإضراب بتوصل لحد عندي .. مش راضيين يسبوني في حالي
أما مسألة الردود .. ضحكتيني والله
:))
بس مع أهميتها لي لأنها تقييم لأفكاري إلا إن الواحد اتعود على كده ..

آلام وآمال
مفيش حد حيستجيب واللي نظموه حيطلعوا يقولوا حاجة من اتنين
يإما يقولوا .. استجابة منقطعة النظير .. تمام زي الحكومة لما بتوصف الإقبال على الانتخابات
يإما يقولوا لك بس الحكومة بوظت الاضراب
مع العلم إن حتى الحكومة لو ما عملتش حاجة .. مفيش حاجة حتحصل

la3lahakhier
:)
يعني انتظر تعليق تاني ؟

mohand
جزاك الله خيرا .. دمت طيبا

جنـه
ههههه
اصلا مفيش تقسيمة .. كل حزب عايز يكوش على كل حاجة .. يعني فكرة التقسيم دي غير مطروحة ..
وشعبنا مش حيسمع الكلام لأنه لا يثق في أي حد فيهم .. كلهم شبه بعض

Ma 3lina
احم احم .. بس فيه ضرر يا دوك
وحضرتك حتشوفي بعد اليوم المحدد الأمور حتمشي في أي اتجاه