Saturday, April 05, 2008

التوقعات المرئية لليلة الإضراب

مانشيتات الصحف الحكومية:
- الجميع ينتظم في عمله والدراسة منتظمة في المدارس والجامعات
- نسبة الغياب في المصالح الحكومية لم تتجاوز النسبة الطبيعية
- الدكتور علي علي عوض يقر بفشل الإضراب
- إقرار قانون الحد الأدني للأجور

التلفزيون المصري :
رصدت عدسات التلفزيون المصري حركة المرور وقد افادت بعض المصادر في شرطة المرور بوجود اختناقات مرورية بسيطة وهي المعتادة في مثل هذا الوقت من اليوم نتيجة خروج الموظفين من أماكن عملهم

وأثناء جولة التلفزيون كان لنا هذا اللقاء ..
- إيه رأيك يا حاج في حركة الناس في الشوارع انهاردة ..
- والله انا بقول للعالم كله إن الحركة في الشارع عادية جدا والشعب المصري شعب واعي ومش ممكن يضر نفسه .. واحنا انهاردة بنقول لكل العالم إننا مش حنضرب .. والغلاء دا أزمة عالمية .. والحكومة بقيادة السيد الرئيس محمد حسني مبارك بتبذل أقصى جهدها واحنا بنشكر سيادته

الحكومة :
دعاوي الإضراب اللي طالب بيه البعض وساعد في انتشارها وسائل الكترونية حديثة كلها دعاوي زائفة لتحقيق مكاسب شخصية .. والحمد لله الشعب المصري الواعي قال كلمته واثبت أنه ملتف حوالين قيادته والحكومة بتعتبر فشل الإضراب بمثابة تجديد ثقة من الشعب في القيادة السياسية

صحف المعارضة :
- الشعب المصري يقول كلمته .. إضراب كامل ونتائج مبشرة برغم تهديدات الحكومة
- الشلل يصيب كافة مرافق الدولة .. المصريين لم يخرجوا من بيوتهم
- الأمن المركزي يفرق بالقوة مظاهرات شارك فيها عشرات الآلاف في طنطا والأسكندرية
- فضيحة جديدة الداخلية تجبر المواطنين على الذهاب لأعمالهم وتهددهم بالاعتقال
- الدكتور علي علي عوض يشيد بإيجابية المصريين .. ويعد الحكومة بإضراب يستمر عدة أيام إن لم تستجب الحكومة لمطالب المعارضة
- الحكومة تتكبد خسائر بالمليارات جراء الإضراب
- عم محمود تغيب عن عمله لمرض ابنته فاعتقلته أمن الدولة بتهمة التحريض على الإضراب

كفاية :
وقفة بالشموع أمام ضريح السيدة تضامنا مع ضحايا يوم الأحد


15 comments:

Ma 3lina said...

كابتن كابتن

بلاش احباط ينوبك ثواب يعنى خلينا نعيش اللحظة و تخيل كدا ان الناس فعلا اضربت عن العمل و الدنيا كلها توقفت


و ان الحكومة استجابت لمطالب الشعب و قرروا يواجهوا الغلاء و يرفعوا المرتبات و بالمرة كمان قدموا استقالتهم هما و الريس علشان الشعب هوا اللى ينتخب الرئيس القادم و يختار حكومة نضيفة بنفسه

اه دنيا

ammola said...

عندك نظرةمستقبلية
:)

رفقة عمر said...

ايه دة هو الاضراب حصل خلاص
تقريبا دة نفس السيناريو اللى هايكون نتيجه للاضراب
شكلك كدة بتروح عند عارفين
وقالولك على اللى هايحصل

خمسة فضفضة said...

السلام عليكم ورحمة الله وبركاته

هو مين الدكتور علي علي عوض ؟؟؟؟
:-)


ربنا يستر

مناجاة said...

بسم الله ماشاء الله
والله ماخليت نفسنا في حاجة
ده ولا توقعات الثانوية العامة
احييك بجد
:)

المستنصر بالله said...

ايه دة
دة انت جبت من الاخر
شكلك كدة اشتركت فى اضراب قبل كدة

مجداوية said...

ههههههههههههه
أضحك الله سنك
انت قارى كويس جدا
بس ناقص حاجة
الذى دعا الى الاضراب اتضح انه هارب من مستشفى الأمراض العقليةومضطرب نفسيا وبيجرى ورا عربيات الرش


وقفة الشموع دى تقليد اوروبى احنا نقرا الفاتحة ونوزع قُرَص

آلام وآمال said...

الدكتور على على عوض ده من النوع اللي معاهم معاهم عليهم عليهم
هههههههه

لا بجد توقعات جامدة
وانا بردو حاسس كده بالظبط
واليوم هيعدي زي اي يوم عادي

محمد عبد الغفار said...

ولكن كلنا فى قرارة انفسنا نعرف الحقيقة

فراشة said...

في ناس لسه بتسأل مين الاستاذ الفاضل على على عوض
احب اقولهم ان ده اول واحد رأس البلد دي شي حاههههههههههههههههههه

mohand said...

ههههههههههههههههههههههههههه











حدث بالفعل

كريم said...

مفتكرش إن فيه ولا توقع من توقعاتك أخطأ
!!!
:)
تحياتي لرئيس الكونترول
:)

شريف طلال said...

ههههههههههههههه
ده انت مكشوف عنك الحجاب واللهى
ممكن تقرألى الكف لو سمحت
تحياتى

آلام وآمال said...

لالالا
اسمحي احييك لتالت مرة على توقعاتك

فكرتني بتوقعات ليلة الامتحان
الواحد كان بيحفظ الاسئلة والأجوبة ويصبح يلاقيها في ورقة الامتحان
:D

ma_3alina said...

Ma 3lina
والله يا دكتورة مش قصدي احباط
بالعكس دا انا نفسي يحصل اللي حضرتك بتقولي عليه ده ... بس انا وانتي والحكومة والمعارضة والمضربين واللي مش مضربين

عارفين انه مش حيحصل بالطريقة دي ابدا

ammola
هههههههه
تشكرات يا فندم

رفقة عمر
لا والله ربنا يحفظنا من الشرك والمشركين
:)
وياريت برضه تطمنينا على صحة الوالدة

خمسة فضفضة
عليكم السلام ورحمة الله وبركاته
الدكتور علي علي عوض دا واحد فاهم انه فاهم كل حاجة وغيره مش فاهم اي حاجة
دا الخبير الأمني والاستراتيجي المحلل السياسي والمراسل الصحفي والناقد للاوضاع الشاعر الفنان المؤرخ والمعارض الوطني القومي
دا الفلتة الفذ العبقري .. اربعة دكتوراة من امريكا وبريطانيا وروسيا والمانيا وخمسة ما جستير من الهند والسند وبلاد تركب الأفيال ومقالات في كبريات مجلات العالم الخارجي والداخلي

ها

حضرتك عرفتيه ولا نقول كمان

مناجاة
ربنا يخليك
أي خدمة
:))

المستنصر بالله
هههههه
لا والله .. هو كان فيه اضرابات قبل كده??
احنا اول ناس في تاريخ مصر اللي بنحاول نهد المعبد على راسنا

مجداوية
ههههههه
عندك حق .. وكان فيه حاجة كمان نسيتها .. شيخ الأزهر اللي حيطلع يقول إن الإضراب عمل آثم شرعاً
مش عارف الحاجات دي فاتت عليا ازاي
:)

آلام وآمال
للاسف معداش زي اي يوم عادي ..
عدى كواحد من اسوأ أيام مصر ..
الدكتور علي علي عوض عرفته للدكتورة فضفضة
ربنا يخليك يا فندم .. لك مني خالص التحية

محمد عبد الغفار
الحقيقة واضحة ولكن يتم تجاهلها من الجميع

فراشة
قولي ليهم يا فندم .. في حد في الدنيا ميعرفش الدكتور علي علي عوض

mohand
للاسف حدث بالفعل
:(

كريم
هههههه
اقول ايه بس
على رأي الدور القديم
هم يبكي وهم يضحك

شريف طلال
وماله اقرا الكف .. اهي حاجة تأكل عيش برضه في البلد دي
بس حقول ايه .. قدامك سكة سفر ؟؟
طب ما كلنا قدامنا سكة سفر