Monday, May 19, 2008

تاج الأحلام

تاج الأحلام دا وصلني من العائشة في الأحلام رفقة عمر جزاها الله خيرا واللي بعد إذنها اقتبست اسم البوست من عندها .. بصراحة التاج صدمني .. الواحد بالتاجات دي بيعرف حاجات عن نفسه أول مرة يعرفها .. خصوصا السؤال الأول اللي بيسأل عن أحلامي في الماضي واللي حقيقة حيرني جدا .. مش عارف الواحد معندوش احلام ولا إيه

عموما أتا قعدت عصرت دماغي واجمع حلم من هنا على حلم من هنا لغاية ما عملت التاج وإليكموه بالتفصيل ..

السؤال الأول .. أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

خمسة كتير قوي .. انا مش لاقي بصراحة .. كفاية تلاتة المرة دي ويبقى لكم حلمين عندي .. أو خدوا بيهم شوية رغي على شوية حواديت .. براحتكم يعني

أول حلم .. كان إني ادخل الفنية العسكرية واكون ظبوطة .. بعد ثانوية عامة خالي قال لك اكلمك اللوا فلان .. وعمي قال لي يعرف المقدم علان .. قلت لهم : لااااااا .. أنا ادخل بمجهودي ومحدش يكلم لي حد .. ودخلت وكان مجموعي في الثانوية 94% .. وكان صف الظباط مستغربين اني داخل العسكرية اصلا .. واحد منهم قعد يقول لي : يا بني حرام عليك تعمل في نفسك كده .. دا بدل ما تاخدلك بنت تروح تتفسح معاها عايز تدخل الجيش .. المهم في الآخر ما قبلتش .. انا وقتها زعلت ورحت للبديل بتاعي .. كلية الهندسة .. وتعدي أيام وسنين وحياتي تتغير تماما .. لكن جوايا برضه كان فيه أسف على الكلية اللي معرفتش ادخلها .. وسبحان الله بعد ما دخلت الجيش كمجند لمدة 12 شهر اتغيرت فكرتي تماما .. ساعتها بس عرفت النعمة اللي ربنا أنعم عليا بيها وأد ايه فضله عليا كبير كان إنه حفظني من الجيش واللي بيحصل فيه .. الحمد لله حمدا كثيرا اني ما بقتش ظابط وبقت حياتي كلها كده ..

تاني حلم .. كان لما دخلت هندسة .. كان نفسي ادخل قسم مدني وكنت على طول مخطط لنفسي كده وكنت بقول اني يإما ادخل فنية عسكرية واكون ميكانيكي يإما هندسة قسم مدني .. هندسة بالنسبة لي كانت يعني مدني وبس .. بس اللي حصل اني دخلت إعدادي هندسة وجبت مجموع كبير وحلو كده .. وقسم مدني كان وقتها بياخد مجموع قليل (قسم الشعب زي ما كانوا بيقولوا عليه وقتها) .. زمايلي قعدوا يقولوا لي : ازاي .. وخسارة مجموعك .. ما تضيعهوش .. ادخل كهربا .. وبصراحة الزن على الودان أمر من السحر .. وانا ساعتها ما اعرفش ازاي استسلمت لكده ودخلت كهربا .. الحمد لله على كل حال .. بس اظن مع رجوعي بالزمن لورا كان زماني عدلت رغباتي وخليت اول رغبة : قسم مدني ..

تالت حلم .. هو حلم طفولي شوية .. لأني كنت بحلم وأنا صغير إني أكون رئيس جمهورية .. اظن الحلم دا فضل معايا لغاية تالتة ثانوي ولا حاجة .. ما اعرفش هو اتوقف امتى بالظبط .. يمكن لما عرفت النهي عن طلب الإمارة .. يمكن لما الحياة بدأت تبان قدامي على حقيقتها وعرفت إني كنت غلطان لما كنت فاكر إنه الواحد ممكن يترقى في مصر بالمجهود والصبر والعلم ويوصل لأعلى المناصب .. عموما الحمد لله إن الأفكار السودا دي راحت من دماغي .. انا فعلا مش حمل اني اشيل ذنوب الناس دي كلها ..


السؤال التاني .. أذكر خمس أحلام على الاقل ..تخص مستقبلك

أول حلم .. إني أكمل دراستي في المجال اللي انا بحبه .. واخد دكتوراة في نظم المعلومات وابقى عقبال أملتكم كده استشاري قد الدنيا في نظم المعلومات يشار إليه بالصوباع .. ايييه اوعدنا يارب .. هو مشوار طويل جدا .. بس واحدة واحدة وربنا إن شاء الله ييسر لي موضوع الدراسة دا بس ادعو لي احسن انا كسلان جدا .. والامتحانات قربت

تاني حلم إني اتجوز الأميرة اللي بتمناها .. هي .. شهرزاد .. ست بجد .. أميرة .. الدينة الخلوقة .. انسانة تفهمني وافهمها وكل واحد مننا ياخد التاني زي ما هو بعيوبه ومميزاته .. يداري العيوب ويحاول يصلحها ويحمد ربنا على المميزات .. البشوشة المحبة لجوزها .. الواثقة فيه .. الودودة الولودة الطيبة الحنونة الرقيقة .. بيتها جنتي في الأرض .. محافظة على مالي وعيالي .. محترمة لي ولأهلي .. تاخد بإيدي للجنة .. جميلة من غير كبر .. هي أحسن مني دينا وخلقا لكن لأنها هي من هي فعمرها ما حتحسسني بكده ..

تالت حلم .. إني اثبت حفظ القرآن في صدري .. وبلاش نتكلم في النقطة دي اكتر من كده عشان شكلي وحش جدا .. وممكن نحشر مع الحلم دا .. زيادة جرعة العلم الشرعي .. نفسي ازيد بجد فيها والله المستعان

رابع حلم .. إن ربنا سبحانه وتعالى يفتح على احد ابنائي ويكون قائد للأمة وربنا يفتح على ايده الخير للناس ويكون سبب بفضل الله في قيام الدين وتحكيم شرع الله وعودة عزة أمة الإسلام ..

خامس حلم .. إنه يكون معايا فلوس كتير .. أنا بصراحة شدبدة مش حهلكه في الخير ولا حاجة .. عشان مش ابقى كذاب .. برضه حتمتع بيه ومن حولي .. وبعد كده اعمل حاجات كتيرة في دماغي ..


السؤال الثالث .. أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن

أول شخص .. واحدة .. هو مش حكاية انها تكون موجودة من زمن .. بس نفسي تكون موجودة على طول .. هي انسانة دخلت حياتي وانا بحاول ادخل حياتها .. هي مش زي أي واحدة ممكن تعرفها .. كل كلمة صغيرة بتقولها بتخليني مبهور بيها .. مبهور دي كلمة كبيرة على فكرة .. بس انا ممكن اعجب بناس كتير .. بس اني انبهر بحد دي صعبة شوية .. هي بقا فعلا غير عادية خلتني مبهور ومستغرب من وجودها اصلا .. ابسط كلمة ممكن توصفها إنها من زمن جميل غير زماننا ده .. زي ما تكون من عصر تاني ركبت آلة الزمن وجت لنا هنا .. لؤلؤة في محارتها مخرجتش منها .. بريئة ومحتفظة بجمال وتألق غير عادي غير مختلط بغبار الناس وعوادم السيارات .. كل حدوتة من حواديتها بتقربني منها اكتر .. هي تستحق الأفضل .. هي اكتر من عرفت من النساء اللي تستحق الأفضل .. تتستحق واحد فعلا يسعدها .. وأظنه حيكون الأسعد بين رجال العالم .. لو كنت رجل وبتقرا كلامي فما تحاولش تتخيلها ولا تقارنها بواحدة ست انت شفتها وثق في كلامي هي حاجة تانية .. انا مش عارف لو ليا قصة معاها ممكن تنتهي ازاي ولا حتى عارف ممكن تبتدي إزاي .. خصوصا ان فيه حاجز ومشكلة كبيرة تفصل بيني وبينها وازاي مع وجود الحاجز ده ح اقدر أسعدها .. بس عموما الأيام حتقول لي على كل حاجة ..

تاني شخص هو خالتي .. وطبعا دي موجودة من زمن أكيد يعني .. بس انا اقصد إنها تكون اقرب لي من كده .. لأنها ورغم انها موجودة من زمن إلا انها عايشة طول عمري في ليبيا .. ومش بشوفها غير كل فترة طويلة ولأيام معدودة .. انا بحبها جدا .. وهي الوحيدة اللي اتمنيت تكون أمي مكان أمي .. ربنا يخليها ويديها طولة العمر .. المفروض انها حتستقر في مصر بعد ما أولادها الأربعة اتجوزوا .. وقعدت فعلا في مصر .. لكن دلوقتي راحت تزورهم لمدة شهر .. المفروض الشهر قرب يخلص وترجع وتستقر بقا .. الخوف انهم يأثروا عليها ويخلوها تقعد معاهم .

السؤال الرابع .. اذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا

لا دا بقا صعب جدا .. لكن عموما أي داعية وشيخ - مش من الشيوخ اياهم طبعا - لما بيموت انا بزعل جدا وبتمني يكون موجود في حياة مش بس أولادي .. لا والأجيال الجاية كلها .. لأني بفكر إن الشيخ دا لما كان موجود وحواليا كنت ممكن اروح واسأله .. وكان صورة ليا وقدوة حية اقتدي بيها .. وإن اي حاجة جديدة بتجد في حياتنا هو حبخرج ويقول لنا رأيه واجتهاده فيها .. فبكون مطمئن .. بخاف جدا من ان ابني يحاول يلتزم فيدور على حد يساعده وما يلاقيش القدوة اللي تساعده .. او انه ما يلاقيش أصحاب العلم فيتخذ رؤوسا جهالاً


اضيف سؤال كمان للتاج .. فيه حد نفسك إنه يختفي من حياتك ؟
آه .. اليومين دول فيه مدون كده نفسي انه يختفي من عالم التدوين .. يارب يرزقه بسفرية كده لدولة ويقبض 100 الف يورو في الشهر .. انا بدعي له اهو بالخير .. بس يارب تكون الدولة دي مفيهاش نت ولا تليفونات أصلا ..

آميييييييين

:)

التاج أمرره لكل من إنسانة وطعمة ود. ماعلينا


17 comments:

إنـســـانـة said...

لا حول ولا قوة الا بالله .. ده انا كنت لسة حرقع بالزغروطة واقول الحمد لله التاج ماجاليش ألاقيك ملبسهولى فى وشى كدة

ينفع؟؟

يلا وانا حلاقيها من مين ولا مين .. مش كفاية كوكو والبهدلة والشحططة اللى مشحططهالى

الله يسامحك يا حنفى

:(

رفقة عمر said...

طبعا اسهل حلم انت حلمته حلم الرئيس بس انت بقى المسئوليه امام الله تنازلت عن هذا الحلم
ربنا يحقق لك كل احلامك ويرزقك بالزوجه الصالحه اللهم امين يارب العالمين
وتكون الانسانه اللى على الكرسى الهزاز
امييين

مجداوية said...

السلام عليكم

مهندس كهربا
منور يا هندزة


وكله مهندسسسسسسسس
زى استيفان روستى
هههههههههه
والله اجابات ولا الدكتور النفسانى اللى مقعدك على شيزلونج وعمال تقول التاج ده فعلا خطير
ربنا يكرمها اختنا جنى صاحبة التاج

نفسى أعرف مين هذه الانسانة الرائعة التى ندر وجودها فى هذا العصر وكونك تعجي بها كده تبقى هى فعلا انسانة غيرعادية لأنك مميز جدا أخونا ابراهيم وهى شهادة حق ولو طال شهادتى ليها واسطة يعنى أنا تحت أمرك بس متبطرش على الواسطة زى الكلية الفنية أنا حادخلك الجيش برضه وبكرة تقول مجداوية قالت ,,أشكرك عميق الشكر انك الوحيد اللى أخد باله فى مدونتى من الزهور ومن العنوان
ده شغل أختك المتواضع العاشقة لعصفور الجنة والزهور عموما وهى مجسمة ومستعدة أهدى لك واحدة لو عاجباك تعلقها فى بيتك مع أميرة الأحلام وست الستات قول يا رب بس انت أؤمر
ويا رب تفرح وتتهنى انت وهى وأحباءك وخالتك وشيوخك ويبعد عنك هذا المدون الى كوكب زحل حيث الغبار والعواصف الزحلية من غير نت ولا تليفون
وربك قادر على كل شىء
بس انت قول يا رب

عصفور المدينة said...

ربنا يحقق لك أحلامك في طاعته

وبعدين انا مضايقك ولاحاجة تدعي لي دعوة حلوة كدة؟

Sally said...

ما شاء الله زاد جمال التاج بإجابتك
وخصوصا الأحلام اللى نفسك تحققها
ربنا يحققلك كل أحلامك ويرزقك بالعمل الصالح وبالزوجة الصالحة وبالذرية الصالحة وبكل الخير
اللهم آمين

دمت بخير أخى
سالى

ammola said...

عارف حضرتك
انا جالى التاج ده ولما لقيت انى مش حاعرف اقول اللى جوايا اعتذرت عنه
يعنى أنا باحسد كل اللى قدروا يعملوه
بالنسبة سيادتك لمسألة ظبوطة دى...لو يعنى لسه مصمم عندك القاعدة...مش الباشمهندس أرهابى أدالدنيا برضة؟؟
وبعدين الحمد لله انك مابقيتش رئيس جمهورية..يعنى رأفة بمصر والمصريين
:)
بالنسبة حضرتك لحلم الدكتوراة فأنا رأيى ان ده مش حلم..دى حاجة لو عندك ارادة حتعملها بأمر الله..بس المشكلة بأه فى الكسل
أماشهرزاد..الاميرة ست الستات فربنا يبعت قادر على كل شىء
وبعدين ايه حكاية فلوس كتير دى...ماكنتش عارفة ان حضرتك كده خالص..يا ساتر
:)
بالنسبة للانسانة اللى من زمن أخر ومافيش زيها فى الدنيا...كلامك عنها فوق الوصف وباتمنى انك تلاقى سعادتك المفقودة معاها وبالنسبة للمشاكل والحواجز اعتقد انسانة بالوصف ده ما ينفعش اصلا انت او هى تستلموا لاى مشاكل او حواجز لان رايى اننا اللى بنصنع الحواجز واحنا برضة اللى نقدر نشيلها..تحس انه كلام مسلسلات صح؟
:)
السؤال الاخرانى ده حضرتك جايبه من برة المنهج مخصوص علشان تبعت الراجل فى رحلة بلا عودة لجزيرة اللا نت ولا تليفون...اكيد قتلك قتيل
:)

المستنصر بالله said...

احلامك قريبه من احلامى
كان نفسك تبقى ظابط جيش وانا كان نفسى اكون ظابط شرطه بس ربنا ستر
اجاباتى كتير قريبه من اجاباتك
ربنا يحقق لك احلامك

أمــانــى said...

الســــــــلام عليكم
طب اعلق على ايه ولا ايه
طب الحمدلله حضرتك ما طلعتش ظبوطة ده علشان الناس الحلوة اللى لسه بتحاول تدخل الباب يعنى حضرتك كنت هتكون ابو تكشيرة جنان والله اعلم رايهم ساعتها هيكون ايه احمد ربك بقى

يا سلام بقى لو حضرتك كنت رئيس الجمهورية والجرايد كلها تكتب عن حضرتك كنت زمان علقت لحضرتك يافطة عندنا يعنى لوزم المدح والحركات ياسلام كان هيكون لينا سند فى البلد دى
يلا ما علينا

وايه بقى الانسانة دى هى من كوكب تانى ولا ايه ياااااااااساتر مشلفط البنات قصدها ليه كده يا هنـدســة :) دنيا ربنا يســعدك ياااااااااارب آمــــــــــــين ويحققلك احـــــــــلامك ياااااااارب آمـــــــين ونسمــع قريبــا اخبار حلوة ياااااااااااااارب آمــــــــــــــــــين
واوعى حضرتك تنسى ان الله مع الصابرين اذا صبروا
طب حضرتك اطبعلها البوست وابعتها بالبريد علشان تشوف وتعرف مين ورا الباب وعامل ايه وحالته ايه

ربنا يكرمك ياااارب يا باشمهندس

هو حضرتك بقيت شرير كده ليه عايز تبعت مدون الصحرا ياااساتر
:D
مين المدون ده قول حضرتك سـرك فى بير
:D
تحياتى لحضرتك

سكوت هنصوت said...

ندعوكم لحضور حفل توقيع كتاب مدونات مصرية للجيب بمكتبة عمر بوك ستور بشارع طلعت حرب بوسط البلد يوم الخميس القادم الموافق 22 من مايو 2008 من الساعة السادسة وحتى منتصف الليل

Anonymous said...

طب ما تخليك جامد كده وراجل قد كلمتك ومبتخافش وعندك من الشجاعة انك تقولنا مين المدون ده

Salwa said...

ربنا يحقق لك كل أحلامك
ويرزقك بكل الخير

خالص تحيااااااااااتي

ma_3alina said...

إنـســـانـة
حنفي ؟؟؟ مين حنفي ده ؟؟
:)
يالا بقا جاوبي التاج انتي بقالك فترة طويلة مش بتجاوبي تاجات .. أهو حتى البحر يعرف احلامك .. ويبقا عملنا فيكوا جميلة
:)
انا ممكن اساعدك في رحلة البحث عن كوكو .. بس حتدفعي كام

رفقة عمر
هههه .. أيوا انا مش حمل اللي بيدعوا على رئيس الجمهورية في كل صلاة وفي كل مجلس .. الواحد بيتحرق دمه لو واحد بس قال عليه كلمة وحشة .. ايش حال بقا لو كل الناس قالوا عليه كلام وحش
ربنا يخليكي يارفقة .. ويرزقك من الخير كله عاجله وآجله


مجداوية
وعليكم السلام ورحمة الله وبركاته
اهو دا اللي انا اخدته من الكهربا .. كل اللي يقابلني يقول لي منور
:))
والله يا حاجة مجداوية الخصلة دي فيا من ساعة ما دونت .. لما يجي تاج بفتح ع البحري ولساني مش بيسكت
:D
ربنا يخليك يا ست الكل على شهادتك .. وياريت هي تقبل الوسايط .. كنت جبت لها كل الناس الطيبين والمدونين الأفاضل اللي زي حضرتك عشان يتوسطوا لي عندها .. بس يالا ما علينا

على فكرة الزهور جميلة جدا واكيد الكل اخد باله .. بس المعارك الطاحنة عند حضرتك خلت الناس مش مركزة مع الزهور ... انا بقا لما صدقت ومتمسك بالعرض بتاع حضرتك وعايز اعلق واحدة من فنك دا في بيتي إن شاء الله

بالنسبة لدعواتك بقا .. حقول طبعا ياااااارب
:)

عصفور المدينة
اهلا اهلا يا باشمهندس
الحمد لله على السلامة
إذا كنت بدعي كده للي بيضايقوني أمال اللي بحبهم حدعي لهم ازاي ؟؟
ربنا يرفع درجاتك دايما يا هندسة في الدنيا والآخرة

Sally
ربنا يخليكي ويبارك فيكي .. جزاكي الله خيرا على الدعاء

ammola
لا والله يا ست أمولة .. الواحد لما بيصدق يطلع اللي جواه ..
عايزة توديني القاعدة .. ههههه .. وماله .. واهو ابقى ابعت لصاحبنا عقد عمل من هناك
وبعدين ماله لما اكون رئيس جمهورية .. يعني حكون اسوأ من حسني مبارك .. مفيش حد اصلا اسوأ منه

والله يا ست أمولة كل الاحلام عشان تتحقق عايزة إرادة .. وظروف مناسبة لتحقيق الحلم ..
بس حضرتك فهمتي موضوع الفلوس غلط خالص
:)

كلامك عن أميرتي مش كلام مسلسلات .. وانا اصلا بكره كلام المسلسلات .. لكن كلامك دا مقتنع بيه .. .. فعلا انا وهي ممكن نتغلب على كل المشاكل .. طبعا لو احنا عايزين .. ولواحنا فعلا فعلا بنحب بعض
ولو إن ساعات المحبين هما اللي بيزرعوا المشاكل بينهم وبإيديهم ... تفتكري دا حب ؟؟

السؤال الأخير .. هو ما قتليش قتيل ,, بس عايز يقتلني انا شخصياً
:)


المستنصر بالله
يا هندسة انا اتشرف بتشابه أحلامنا
فعلا انا شفت إجابات حضرتك .. قريبة كتير من بعض .. سبحان الله
ربنا يحقق لنا ججميعا كل أحلامنا


أمــانــى
وعليكم السلام ورحمة الله وبركاته
علقي براحتك خالص يا حضرت الأفوكاتوا
ههههههه .. لو كان كده يبقى صح الحمد لله اني مش بقيت ظبوطة
وحتعلقي لي يافطة كمان .. نحن نبايع ونؤيد .. ههههه
لا والله مش مشلفط الستات ولا حاجة .. الستات كويسين وميت فل وعشرة ..
فكرة حلوة حكاية ابعته ليها دي ... احاول كده واقول لك ع النتيجة
:))
المدون هو
.
.
المدون هو
.
.
يالا بقا ما علينا
:)

Anonymous
:)
في الغالب التعليقات من نوعية تعليقك دي بتجاهلها .. لكن فعلا تعليقك المميز خلاني ما اقدرش .. واحد يخجل من التعريف بنفسه بيطالب واحد تاني بإنه يكشف عن اسم واحد تالت
:))
رااااائع
انا هنا مضطر استخدم الرد الكلاسيكي في هذه المواقف

احم احم .. بسم الله الرحمن الرحيم

ياريت لو عندك الشجاعة الكافية تعرفنا بنفسك

بالنسبة للمدون .. جادوه مني ليك .. اعتبر انك انت المدون ده .. ابسط ياعم حتقبض ميت الف دولار كل شهر
بس على شرط مش حتقبضهم غير لما تقضي تسعين سنة خدمة في الشغل .. عشان تقبضهم كلهم مرة واحدة .. ولو أنت مت قبل ما تخلص المدة .. قول يا رب .. حيروحوا عليك

والوظيفة تيجي ومالكش حق رفضها .. يعني يا تروح يا تروح
ومفيش حاجة بعيدة عن ربنا


Salwa
ربنا يخليكي اختنا الكريمة ويبارك فيكي ويرزقك من الخير كله

عـلا - من غـزة said...


سلامو عليكو
كنت بتجول في الريدر وقلت اعدي واقرأ
لكن عنجد اجاباتك على هالتاج مستفزة ولازم اعلق :)
هو في حد لسه بيحلم كدة اليومين دول :)
والسؤال الاهم .. هو في حد بيحب كدة اليومين دول :D
موضوعك بتاع الباب والبنت الي قاعدة ورا الباب يعني عنجد وجعلي قلبي
انما مش رح اكون شريرة وهاتمنالك انها تفتح الباب وتدخّلك بقى ..
:)
تحياتي الخالصة

ma_3alina said...

عـلا - من غـزة
لا والله ما قصدت وجع القلب .. بس ترى انتي اتوجع قلبك من مجرد الحكاية أمال اللي عايش الحكاية يحصل له ايه
:)
ربنا يخليكي واشكرك على الكلام الجميل .. واسعدني مرورك وتعليقك

مجداوية said...

السلام عليكم

اقولك اخى الكريم على حل أسهل ولك كل الحق فيه فالاعتراف بالحق فضيلة
احذف التعليق بتاعى ومعلش ساعات الفهلوة بتخرج عن النص

أنا بجد بأعتذر بشدة وحقك عليا وأرجو ان تسامحنى وتعيد الى تصالحى مع نفسى بالافراج عن التعليقات وحذف تعليقى
وأوعدك يا هندزة انى حاقفل باب الفهلوة والحاسة السادسة اللى طلعت حاسة تايوانى مضروبة
تقفيل كوم الدكة كمان

ممكن ؟؟؟

مجداوية said...

السلام عليكم

الله الله
الله
حتزعلنى من نفسى كتير يا هندزة ادينى أمارة ان كلامى وصلك أو انك قبلت اعتذارى أو أى حاجة يعنى
شاور كده ولا اعمل أيتها حاجة تخلى الواحد يرجع يصالح نفسه
هى مش ناقصة يا هندزة أنا محنوقة من كل حاجة متبقاش انت والحكومة عليا الله لا يسيأك
رد علينا خلى نسمة الهوا نحس بيها بدل هذا الجو الخانق وكتمة النفس

مجداوية said...

السلام عليكم

ربنا يهون عليك ويفرج كربك وردد اخى الكريم

لا اله الا انت سبحانك انى كنت من الظالمين


وجزاك الله خيرا على سرعة استجابتك وردك على ريحت قلبى ربنا يريح قلبك وينولك كل ما تتمنى
اللهم آمين