Sunday, June 29, 2008

طرائف محاضري الأي تي

هذه المواقف حدثت معي أومع زملاء لي في مجال المحاضرات والتدريس ....

باشمهندس انت قلت لنا نفتح قائمة File ونقول open عشان نفتح فايل جديد .. انا روحت البيت وفتحت قائمة File وقعدت اقول Open Open وبرضه مفيش حاجة اتفتحت .. دا درس للباشمهندس عشان بعد كده يختار ألفاظه بعناية وما يقولش قول open ويقول اختار open

المحاضر للمتدرب الذي مسك الماوس ووضعها على الشاشة : حضرتك بتعمل ايه ؟؟ .. فرد عليه المتدرب : هو مش أنت قلت حطوا الماوس على قائمة File ؟؟!! ودا درس تاني للمحاضر عشان يفكر الف مرة قبل ما يقول كلمة زي (حط الماوس على ..) دي

هو لو انا عملت Static Member داخل class وناديت عليه من جوا الـ Class من Non-Satatic Method وعملت object من الـ Class دي ومن الـ Object ناديت على الـ Non-Static Method هل الـ Static Constructor حيتنفذ ولا لأ ؟؟ .. دا سؤال من نوعية اسئلة التعذيب بالكهربا وجلد الذات .. حرام عليك يا بني بتعمل فينا كده ليه ؟؟!!

هو ايه الفرق بين الـ Void والـ Array ... حسبي الله ونعم الوكيل

هو ليه القوسين في آخر الـ C# Method مدورين () ومش مربعين [] .. معلش ظروفهم كده

باشمهندس .. انا عملت الكود زي ما انت كاتب بالظبط وبيطلع ايرورز .. تبقى المشكلة فين ؟ .. أكيد مش فيك وأكيد مش في الكود وأكيد مش فيا .. غالبا المشكلة في مايكروزفت

هي مش الـ Metod مش بتـ Return حاجة ... إيه لازمة الـ Void بقا ؟؟؟!! الله يسامحهم اللي عملوا الـ Void

الطالب : هي الـ HTMLControls عاملة زي الـ abstract Class ..
المحاضر : نعم ؟؟؟!! ..
الطالب : آآقصدي الـ Interface ..
المحاضر : افندم ؟؟؟!! ..
الطالب : لا لا ولا حاجة

الطالب خريج الجامعة المصرية لمحاضر البرمجيات .. ايه ده هو كله فهم فهم مفيش حاجة حفظ ؟؟!! .. معلش تعال كمان يومين اكون جهزت لك حاجة تتحفظ

طالب آخر لنفس المحاضر : أفففف .. أنا زهقت من التفكير !!! والمحاضر في ذهنه :: XXXX التعليم واللي جابوا التعليم


22 comments:

عصفور المدينة said...

أضحك الله سنك

السؤال بتاع الستاتيك كونستركتور ده هل المطلوب ناخده على محمل الجد
؟؟

منهم لله اللي اخترعوا
void
ما كانت تبقى هي الأصل وخلاص

ذكرتني أول ما طلعت الماوس
ما كانش فيه برامج بتدعمها
المهم جبنا برنامج بيعرض صورة قلب بيتحرك ودخل زميل قال دي إيه دي قلنا له جهاز قياس النبض
وخليناه يمسك الماوس وعرضنا صورة القلب اللي بيتحرك

عصفور المدينة said...

خد يا باشمهندس الإضافة دي
https://addons.mozilla.org/en-US/firefox/addon/1419

IE tab
كنت باستخدمها بس مش كانت شغالة مع 3
الآن تعمل
بعد ما تنزلها حتلاقي أيكون بتاعة فايرفوكس تحت في الستاتس بار
دوس عليها تقلب إكسبلورر

وبعدين لا تستعجل على إصدار تلاتة لسة نازل بقاله كام يوم الإضافات أصبحت مدعومة يوما بعد يوم

kochia said...

انا ضحكت بجد
والحكاية دي انا شفتها بعيني لما كنت باخد كورس
بس انا كان عندي خلفية جيدة جدا لكن كان معايا ناس اول مرة يشوفوا كمبيوتر من عي بعد 50 سم
وفعلا لما كان المستر بيشرح حاجة وبيقول دوس مثلا او اعمل كليك او كذا كان فيه ناس بتسيب الماوس وتمد ايدها علي الشاشة
كنت فاكرة انهم بيهرجوا لكن طلعوا مش فاهمين
ناس كتير مروا بالمراحل دي بس فيه ناس مش بيعملوا العقل
مووضوع ظريف اوي

تحياتي

مجداوية said...

السلام عليكم

أممممممممممم
نقدر نقول انك لسه واخد على خاطرك من يوم الفهلوة بتاعتى ومن يومها مشوفتش حضرتك أو بمعنى أصح لم تظهر نفسك بتعليق ولا سألت علينا ولا باركت لنسمة
أمممممممممممم

تفتكر يا باشمهندس أدوس على اسم مدونة ما علينا وأسألها فيه ايه متهيألى حترد عليا مش زى الفايل اللى مش راضى يفتح لوحده

انت بتدرس لمين بالظبط !!!!!؟؟؟
مش ده موضوعنا رغم انه ضحكنى وأنا مليش نفس أضحك

على العموم أنا أتمنى انك تكون بخير وفى قمة السعادة وملاحظة ان الكلام عن الصعايدة الفلاحين الهنود دول مش مخليك تتكلم عنها,,محاولة جيدة

وشكرا ليك يا هندزة

بنات افكارى said...

السلام عليكم

اسعد الله قلبك يافندم
اول تعليق لي ولكن ليست اول زيارة
معلش الامتحانات وسنينها وحضرتك فكرتني
بكورس الاي سي دي ال كنت المفروض امتحن على طول طلع فى دماغي اشوف نظام المحاضرات المبدئية دي جايز استفيد واستمريت لاني بروح اضحك وفقط صراحة وكمان لان معظمها بنات والمحاضر باله الحمد لله مش طويل يادوب اقصر من صباع رجله الصغير معذرة يعني فانا بساعد البنات شوية ومرة كان بيشرح فى طرق عمل شورت كت وجه على اخر طريقة وراسهم والف سيف مش فاهمينها وهو يعيد ويزيد وفى الاخر قال يخرب بيت اللي اخترع الشورت كت واللي بدعه انا غلطان هي مش فى المنهج اصلا بس قولت اقولهالكم بالمرة هو قال كدا وهما استلموه من هنا ولما هي مش فى المنهج بتوجع قلبنا بيها ليه قالهم والله غلطان ودا درس للمحاضر علشان مايخرجش برا المنهج الناس من الاخر مش عايزة تتعلم عايزين شهادة المهم ان المحاضر قالهم عايزكم قبل ماتمشو كل مرة تفكروني قبل ماجيلكم اكون واخد دوا الضغط مش بقول لحضرتك باله قصير
بس كمان الناس معذورة فيهم اللي ربنا مادالوش الامكانيات زي اي حد وفيهم اللي محتاج الكلام ببساطة وفيهم كبار سن حتى خريجي الجامعة عايزين صنفرة معلش طولت على حضرتك بس موضوع جميل وربنا يجعل عملكم فى ميزانكم حسناتكم ان شاء الله

السلام عليكم

Ma 3lina said...

ههههههههههههه

لا بجد مش ممكن دول شكلهم عمرهم متهاملوا مع الكمبيوتر قبل كدا

انا كنت فاكرة المبرمجين جهابزة مش زى اللى مش عارف يمسك الموس ده

أمــانــى said...

ممكن بعد اذن حضرتك اضحك
ههههههههههههههههههههههههههه
ههههههههههههههههههههههههههه
هههههههههههههههههههههههههههه
ههههههههههههههههههههههههههه
اصل المشكلة ان الطالب المصرى متعود على الحفظ وكل شئ عنده حفظ علشان كده مساكين ومش قادرين يفكروا حتى لو لحظة
انا بقى كنت بشوف العجب فى دورس
network
فأكيد طبعا فى الاكواد هيكون الموضوع اصعب لانهم عايزين كل حاجة يشوفها ازاى اممممممممممممممم
معرفش

رفقة عمر said...

ازاى دول بياخدوا دورات برمجه او اى تى ومش عارفين الف باء الكمبيوتر
بجد مواقف مضحكه جدا وصعبانين عليا كمان موقفهم محرج قوى
انا لما اكون مش عارفه حاجه باسكت خالص ومش باحب ابين جهلى واستنى لما اعرفها من غير سؤال

علا من غزة said...

ههههههههه

والله فكرتني بالمآسي الي كنت بشوفها السنة الي فاتت
كنت بعطي كورس مبادئ حاسوب لطالبات من كلية التربية
وكانو سنة رابعة خلاص عايزين يتخرجو .. مش حمل اي معلومات برا المنهج خااالص :D
زائد انه مش لازمهم اساسا فب شغلهم كمربيات الاجيال ههههههه

وكان في منهم زي العينات دي كدة عمرها ما شافت كمبيوتر الا في التلفزيون :D
طبعا التعامل مع الماوس كان مأسااااة
وانهم يستوعبوا ان الاخطاء لو حصلت مش هاتخلي الكمبيوتر ينفجر :D

انا كنت يادوب بديهم الوورد والاكسل وانظمة العد ومكونات الكمبيوتر
ههههههههه

كنت بعملهم حواديت وتشبيهات ومقارنات عشان يفهموا

ايييييييه

ايام

مرت عليا مواقف مضحكة بس مش قادرة افتكر

ممممم

هابقى اجي تاني لو افتكرت

تحياتي :)

عروسة ننوسة said...

البوست ظريف جدا .....ضحكتنى

مجداوية said...

السلام عليكم

أنا قرت الآن فقط ردك على تعليقى الأخير عندك فى البوست اللى قبل اللى فات
يا نهاااااااااااااااااااار
بقى فاكر ان كلامى عليك !!!!!
تعرف يا هندزة الفقرة دى زعلت كام واحد وواحدة منى !!!! كل واحد وواحدة افتكر انى بأقصده ووالله شهيد على انى ما قصدت أى مدونة أو مدون أتزاور معهم أبدا لأن معنى ده انى أكون منافقة ليكم والنفاق جبن والجبن من صفات الكاذب وأنا لا أكذب أبدا ولا أخاف من بشر على وجه الأررض وان كنت أعنيك لقلت لك أولا وأعتقد انى فى تعليقاتى لا أمنع خيرا سواء بنقد مدح أو ذم لأنى على يقين أن من يهدى الى عيوبى يحب لى الخير أكثر ممن يخفيها عنى بحجة أن لا أغضب وما أحبه لنفسى أفعله مع غيرى

أخى الكريم
مدونتك من المدونات المحترمة وتعليقاتك وأرائك فى منتهى الحكمة والتعقل أنا تحدثت عن مستوى معين لم أدخل مدوناتهم الا مرة ولم أعلق حتى لتفاهة المحتوى وحتى المشاعر لا يجيدون التعبير عنها لأن اللغة ركيكة والأخطاء الاملائية واللغوية لا يقع بها تلميذ فى ابتدائى وهم مسلمون هذا ما عنيته فى هذه الفقرة ولأنى ما قصدت الا هذا وضحت أكثر ولم أزلها لقناعتى بما كتبت ولأننى لا أقصد أبدا أحدا منكم والا كنت تواصلت مع أحد منكم

يعنى قرأت البوست !!!!
يعنى عرفت ان نسمة نجحت !!!!
يعنى كنت واخد على خاطرك !!!!
وبتبارك لى هنا
مقبولة منك يا باشمهندس ابراهيم
عذرك أنك لا تعرفنى جيدا
فأنا حاسامحك المرة دى
لكن المرة الجاية لالالااااااااااا منننكنننننن

عدم وجود اسمك فى التعليقات أفقد الموضوع كثير من مصداقيته
وصدق أو لا تصدق

وبعدين أنا بأنفخ فى الزبادى بقالى شهر مش كفاية عقاب
الله يسامحك يا باشمهندس خلتنى أزعل من نفسى بعد العمر ده كله بس فعلا مفيش حد كبير على العلام العلم يعنى
واتعلمت انى ابطل فهلوة بس بينى وبينك كانت ماشية فله وبتصيب بنسبة 99وتسعة من عشرة زى انتخابات الحكومة بس مش بالتزوير
بالفهلوة وأدينا بطلناها

طيب رغينا كتير كفاية كده عشان لسانك حصانك

وسلام الله عليك ورحمته وبركاته

مجداوية said...

عروستى ؟؟؟؟

بص عايزنى أشغل الفهلوة روح مدونتى وشوف التعليق اللى ..... وقولى الفهلوة المرة دى صح ولا لأ
وكمان خد بالك من التوقيت !!! بالثانية !!!! صح ولا
أعتزل الفهلوة والفن كمان؟؟؟

مجداوية said...

هييييييييييييي
ربنا يفرح قلبك يا رب

بس هو فيه مانع ؟

المستنصر بالله said...

هههههههههههه
بجد مواقف وطرئف فعلا
ضحكتنى
جزاك الله خيرا

مع تحياتى

أميرة محمد محمد محمد said...

مش تتريق لو سمحت لاني ممكن اكون من هؤلاء العباقره حيث ان معلوماتي في الكمبيوتر لا تزيد عن معلومات طفل رضيع
ربنا يصبرك يا بشمهندس

ammola said...

كيف حال حضرتك يا باشمهندس

أتمنى تكون بأفضل حال وأهنأ بال

عارف

شكلى كده محتاجة محاضرات برمجة

:)

موناليزا said...

كان الله فى عون جميع المدرسين فى مختلف مجالاتهم

Anonymous said...

لن ادعي العلم لاني مليش في ا لبرمجة ولا اعرف ايه هو الvoid االلي خانق الكل دا
و فيه سؤال بتاع الكلاس دا بردوا مش مجمعاه

عذرا لكن مجملا لذيذ ... و خاصة بتاع هو كله فهم فهم و تفكير مفيش حفظ !!!! هو كله ضرب ضرب مفيش شتيمه !!!!

هههههههههههههههههه

اغلب الناس دماغها صدت علي فكرة بجد مش تهريج

اضحك الله سنك :)

مجداوية said...

السلام عليكم
يا باشمهندز

يا باشمهندز

هو مفيش حد هنا ولا ايه ؟؟
هو صحيح اللى أنا فهمته ده ولا الفهلوة رجعلتى تانى ؟؟

شهر بحاله وفى الآخر معرفش الا صدفة

الله
مش كنت لسه بتقولى

....
يا اهل الدار

على وزن

؟؟؟

dina said...

هههههههههه
يا ذكريات ايام الكورسات بتاعة الارراى و الكلاس و الحاجات دى
ربنا يوفقك
تحياتى

ma 3lina said...

عصفور المدينة
جزاك الله خيرا يا باشمهندس

سؤال الستاتيك كونستراكتور ممكن يتاخد على محمل الجد والجواب انه بغض النظر عن اللفة الطويلة دي الستاتيك كونستراكتور حيتنفذ بمجرد ما اعمل اوبجيكت من الكلاس بغض النظر عن اي حاجة تانية

حكاية الماوس دي تحفة بجد .. ضحكتني جدا .. اضحك الله سنك يا باشمهندس
بالنسبة للفايرفوكس .. احم احم .. مش قادر .. مش قادر
:))

kochia
هههههههههههههههه
كان بيدوس بإيده ..
:))
بس الحمد لله ان حضرتك اخدتي الكورس وفيه خلفية .. ولو ان مذكرات نتاوي بتاعة حضرتك برضه بتقول كلام كتير
:)
جزاكي الله خيرا على الزيارة والتعليق

مجداوية
وعليكم السلام ورحمة الله وبركاته
شرفتني وبتشرفيني دايما والله .. ربنا يخليكي للمدونين اللي زي حالاتي كده وتفرحيهم دايما بتعليقك
بدرس لطلبة منحة وزارة الاتصالات
بس بصراحة برافوا عليكي ان حضرتك عرفتي اني بحاول مش اتكلم عنها .. وكمان اني مش عارف ما اتكلمش عنها
مفيش حد خد باله من كده إلا حضرتك
:))

بنات افكارى
وعليكم السلام ورحمة الله وبركاته
يا فندم تعليق حضرتك وزيارتك اسعدني جدا .. ومبارك انتهاء الامتحانات وعقبال النتيجة بإذن الله
جزاكي الله خيرا على مساعدة المحاضر .. نفسي يبقى فيه من حضرتك كده كتير .. ساعتها المحاضرين حيبقى بالهم طويل جدا جدا
:)

Ma 3lina
ما هو دول مش مبرمجين دول تحت التدريب والاختبار
وطبعا المبرمجين اللي بجد جهابذة

أمــانــى
طبعا طبعا .. حضرتك تضحكي كما تشائي .. والمدونة مدونة حضرتك
اه والله الموضوع عجيب ... الله المستعان
شرفتيني يا فندم .. واي زملكاوي بيدخل بقا بيسعدني دلوقتي
:))

رفقة عمر
هما المشكلة انهم مش بيبذلوا المجهود كفاية .. لو بذلوا المجهود دا مش حيقعوا في المشاكل دي
بس برضه ليه بتسكتي خالص .. لما تكوني مش عارفة حاجة اسألي بس في هدوء .. معظم المواقف دي بتتم في العلن

بصورة صاحبها زي ما يكون قاصد يحرج نفسه

عـلا - من غـزة
ايه ده
فين الحكايات والمواقف ؟؟
عموما عندك حق المحاضرين دول بييشوفوا مواقف عجب وخصوصا لما يكون المتلقي مش حابب الموضوع
شرفتيني يا فندم بالزيارة والتعليق

عروسة ننوسة
أهلا وسهلا بحضرتك .. شرفتيني يا فندم

المستنصر بالله
جزانا الله وإياكم
اضحك الله سنك وانعم عليك بكل الخير
تحياتي إلك
:)

أميرة محمد محمد محمد
أهلا يا دكتورة
ليه بس معلومات طفل ما شاء الله مدونتك مليانة تصميمات وصور .. مين اللي حطها يعني .. هو فيه طفل يعرف يعمل كده
:)

ammola
انا بخير حال والحمد لله
عارفة
أنا تحت أمرك
....
وبيكفي
:)

موناليزا
اللهم آمييييين
:)

شمس الدين
وأضحك الله سنك يا دكتورة
طيب وبعدين في الناس اللي دماغها صدت دول وخصوصا لما يكونوا خريجي الجامعة وقبل ما يدخلوا المنحة اتعمل لهم 3

امتحانات وهم افضل النتائج فيها .. وبعد دا كله مش عايزين يفكروا

dina
ربنا يخليكي يا فندم ومرحبا بزيارتك وتعليقك

Lyssandra said...

هههههههههههههه

تدوينة لذيذه جدا


كل سنة وحضرتك طيب
ورمضان كريم


Lyssandra