ألا تستحم يا رجل

هو بعينه بغباوته بوشه العكر نفس الشخص اللي بيقول أيام مبارك كانت كلها فساد بس كنا عايشين في آمان (غيبوبة)، واللي قال: ما تسيبوه يقعد الست شهور، واللي برضه قال: إيه اللي وداها هناك ؟؟! هو ذات نفسه ذات الشخص اللي قال عايزين استقرار وعجلة إنتاج وخلينا جنب الحيط (زي الكيكي بالظبط)، وهو اللي بيقول: الله يخرب بيت النت والفيس بوظ البلد ومصر بتتحرق، ومرسي فاشل والغاز بيروح غزة، والبلد ما ينفعهاش إلا راجل عسكري (بقالها 60 سنة بيحكمها عسكري). وهو نفسه اللي بيتفرج على القاهرة اليوم ووائل الإبراشي وتوفيق عكاشة عشان يتسلى، وهو نفسه اللي صدق وردد إن في التحرير علاقات كاملة وقال رابعة فيها أسلحة شفتها بعنيا والأخوان رموا العيال من فوق السطوح ومرسي موت الأخوان في الاتحادية وغنى للسيسي تسلم الأيادي. وهو نفسه اللي بيجمع الصلوات على بعض وبيزور الجامع في المواسم، وبيتكلم عن الوسطية والاعتدال والتشدد، وهو اللي قال البلد دخلها سلاح كتير والحدود مش متأمنة وانتخب السيسي المسؤول عن تأمين الحدود رئيس وقال له كمل جميلك، وبيحب عبد الناصر وبيقول السادات ذكي وداهية، وهو نفسه اللي بيقول الإخوان وطالبان وداعش والنصرة والقاعدة وحماس وقطر وإيران وتركيا والجهاد كلهم إرهابيين، والمسيحين أخواتنا واليهود مش كلهم صهاينة. وهو نفسه اللي بيقول إسامة بن لادن صناعة أمريكية، والصلاة على النبي مؤامرة أخوانية، وبيتكلم عن الوطنية وهو من يومه متوطن على التزويغ في المدرسة والجيش والشغل، وهو نفسه اللي بيقرا القرآن بقاله سنين ولسه لغاية انهاردة ما يعرفش ولا حاول يعرف يعني إيه الله الصمد اللي ما بيقراش غيرها في كل ركعة. وهو نفسه اللي بيمتثل للقانون أكتر من الشريعة، ويهتم بالمم أكتر من الكرامة ويقدس ثبات الحدود السياسية أكتر من ثبات الدين، وبيعظم للقضاء والداخلية والجيش وبيقول الحزب الوطني كان فيه ناس شرفا .... أهو دا بقا نفسه اللي دلوقتي بيقول إن حماس بتستفز إسرائيل وحتولع المنطقة وحتجرجرنا لحرب، ويارب إسرائيل تأدبهم وقتلوا العساكر ولازم نقفل المعبر. يعني آآ .. مش عا .. يعني بجد .. أقول .. أفففف .. ألا تستحم يا رجل !!!!!

دولة الزومبي

لما يكون حكام الدولة جبناء ومهزوزين وعارفين إنهم فشلة تسلطوا بالزور والغش، وعارفين إنه لن تدوم لهم كراسيهم، وأتباعهم ما بين منتفع ونفس مريضة، حيخافوا من خيالهم وحيزرعوا الخوف في قلوب أتباعهم ... حتكون قنوات وصحف المعارضة محرضين وخطر على الأمن القومي حيكون تظاهرات كام شخص تخريب وخطر على الأمن القومي حيكون رفع أربع صوابع علامة ماسونية وخطر على الأمن القومي حيكون التصوير في أي مكان ممنوع وخطر على الأمن القومي حيكون رفع بنت اربعاتشر لمسطرة رابعة خطر على الأمن القومي حيكون طلبة الجامعة فشلة وخطر على الأمن القومي حيكون مسلسل بيتكلم عن الشرطة خطر على الأمن القومي حيكون اضراب العمال خطر على الأمن القومي حيكون الفيسبوك وتويتر خطر على الأمن القومي حيكون مشروع تخرج لطالب هندسة خطر على الأمن القومي حتكون لعبة أطفال في المطار خطر على الأمن القومي حتكون كل الدول المجاورة مهما صغرت - ما عدا الصهاينة - بتهدد الأمن القومي حتكون اللحية في الشرطة والجيش خطر على الأمن القومي حيكون اعتلاء المنابر جريمة وخطر على الأمن القومي حيكون الاعتكاف في رمضان خطر على الأمن القومي وحيكون ملصق الصلاة على النبي مؤامرة وخطر على الأمن القومي كل شوية حيهددك ويقول لك الفوضى وحنبقى زي سوريا والعراق حتتقفل الميادين والشوارع بالدبابات حيكون تعليم وتثقيف الشعب مغامرة حيكون معارضة قيادات الجيش خيانة حيكون التعليق على أحكام القضاء جريمة حيكون المطالبة بتطهير الشرطة عمالة حتكون الحرية بدعة ومجرد الكلام مخاطرة وبعد كده بمنتهى البجاحة يقول لك إحنا جامدين ووطنين وماسكين البلد !!! ... طب وهي فين البلد ؟؟ .. أنت يا فاشل حولتها لمستعمرة زومبي أقران لأتباعك، كل دا عشان تعرف تمسكها حسب إمكانياتك المفقودة وقدراتك المحدودة.

كل واشكر

دا فيديو بتاريخ 9 يوليو 2013 من مظاهرات ضد السيسي والانقلاب العسكري والقرارات القمعية والثورة المضادة ومخططها في 30 يونيو وما بعدها .... كل الناس اللي في الفيديو دول سواء كانوا إخوان أو غير إخوان كانوا ضد السيسي وضد مبارك وضد عصابة اللصوص اللي بتحكمنا من سنين طويلة .. كانوا ضد الانقلاب العسكري، كانوا ضد حكم جنرالات أمريكا الفاشلين، كانوا ضد خدعة 30 يونيو اللي استدرج نظام مبارك ليها بقية ثوار يناير من كارهي الأخوان بسبب وبدون سبب، واتحالف معاهم. وبعد ما وقعهم في الأخوان وخلاهم يرسموا صورة للأخوان إنهم الخطر الأعظم وإن السيسي ورجالته حماة الفضيلة ورعاة الثورة لبسهم العمة وقرطسهم ومنعهم من الكتابة والظهور وخلاهم ثوار كارتون أخرهم بوست ع الفيس ... يا ترى عددهم دلوقتي وبعد سنة بقا أكبر من اللي في الفيديو ؟؟ وفيه ناس فاقت بعد ما شافت القتل، والخراب، والدم، والاعتقالات، وبراءات نظام مبارك، وفرحة الصهاينة بزوال ثورة يناير وعهد الحريات، ودعمهم للسيسي، وأحكام الإعدام التفصيل، وعودة النهب والسرقة والحرامية !!! ولا يا ترى العدد قل بعد ما ناس كتير من اللي في الفيديو اتقتلت، واتخطفت، واستخبت في بيوتها وخافت ترفع صوتها تاني، أو سابت البلد وطفشت بعد يأس في صلاح البلد وخوف من تلفيق تهم تودي لأحكام بالاعدام على المئات ؟؟! مش مهم .. المهم واللي متأكد منه إن العدد دا اللي كان في منطقة واحدة في محافظة واحدة .. غضبهم وقتها غير غضبهم دلوقتي ... غضبهم كان عشان حبهم للاسلام وللبلد وخوفهم من الخراب اللي بيحصل دلوقتي، واللي كان واضح جدا إنه حيحصل إلا على قلوب امتلأت بالكراهية والحقد والكبر ومظنة واحتكار الفهم والاعتزاز بالنفس وإن كانت على باطل، لكن دلوقتي غضب الناس دي اتحول لتار ودم وبكاء وحرقة ودعاء في جوف الليل على كل اللي شارك في المهزلة ودعمها ودافع عنها، بتعمد لمصلحة، أو بجهل وغباء، أو بكبر وحقد. اتجاهلهم .. اعمل نفسك مش شايفهم ... ما تجيبش سيرتهم خالص كأنهم أشباح مش موجودين ... اتكلم عن المستقبل وتداول السلطة وانتخابات مجلس الشعب .. والبناء والتنمية والخطط ... والتحرش، والثانوية العامة، والأسعار، ورفع سعر البنزين، والغاء الدعم، والغاء الانتخابات في الجامعة، ومخالفة الدستور، وعلاء الأسواني ومسلسل اتمنع وزيادة أسعار ..... ولما تتكلم عن السيسي البطل قول شعر وامدحه أو ذمه واشتمه زي ما أنت عايز .. ولما تحصل حاجة كويسة في البلد قول أي كلام عن قد إيه دي خطوة كويسة ونأمل أي حاجة في أي حتة ... ولما تحصل حاجة وحشة .. هاجم واحزئ جامد وقول منك لله يا مرسي، انت السبب وبعدها وطي صوتك وطالب بحمدينك وبرادعيك وجبهة انقاذك .. وقول أنا مش ندمان على مشاركتي تلات أربع ساعات في 30 يونيو لكن الناس دي ....... أعمل نفسك مش شايفهم، عيش في شرنقتك الثورية وغضبك التفصيل بما يسمح لك به إعلام ثورة يوليو 52 المجيدة أن تعيشه وتناقشه وتعارضه ... عيش جو إنك ثائر ووظني ومخلص وفاهم وإن فيه دولة وفيه سياسة وحزب حاكم ومعارضة ... غمي عنيك عنهم .. كل واشكر واشرب واتفسح وجعجع وفضي دماغك بكلمتين تقول لهم هنا ولا هناك لغاية ما يستدعوك ويستغلوك تاني عشان تواجههم .. بس على فكرة وللعلم ... دول مش أشباح دول مصريين وموجودين وكتير.