Friday, June 13, 2008

مش حتكلم عليها

اكيد الكل زهق مني .. كل بوستاتي بتكلم عليها .. 3 بوستات ورا بعض بتكلم عليها .. هي وبس .. فانا قلت اعتذر للكل .. وانهاردة اتكلم في أي مواضيع تانية من باب التغيير والتعويض عن البوستات الخاصة جدا اللي فاتت اللي بتعبر عن مشاعري ..

ها نتكلم عن ايه ؟؟؟

شفتوا اوباما اخيرا فاز بترشيح الديمقراطي . شيء متوقع .. المنافسة اصلا كانت متقاربة لأن طبيعة اطرافها متساوية مش في القوة لا في الضعف ومش بيلاقوا قبول عند الشعب الأمريكي اللي مش بيحب لا ان واحد من اصول افريقية يحكمه او واحدة ست تحكمه .. وماكين في حالة فوز أيا من كلينتون او اوباما مرتاح ع الاخر لأنه ضامن ان منافسه الديمقراطي أيا كان حيفشل قدامه ... وسقوط المرشحة الست في سباق الرياسة من المنافسة التمهيدية تاكيد اكتر على ان الشعب الامريكي زيه زي معظم شعوب الارض اللي لا تفضل تولي المرأة لمنصب القيادة .. لا على مستوى الفرد ولا على مستوى الأمة ويتساوى في كده شعوب العالم التالت والاول .. وما فوز بعض النساء بمناصب قيادية في بعض الدول إلا لاعتمادها على ميزة غير موجودة عند الرجال .. ألا وهي كونها ست وبتيتغل الدعاية بتاعة رشحوني وادعموا قضية المرأة .. وهو عامل بعيد كل البعد عن الكفاءة والقدرة على القيادة .. لكن ان تقودني امراة فدا امر دائما مرفوض عندي مثلي مثل صديقي الأمريكي .. إلا طبعا لو كانت هي .. هي فقط .. لو كانت هي الوضع يختلف تماما .. هي الوحيدة اللي اسلم لها كل مفاتيح قيادتي .. هي الوحيدة اللي بالاضافة لعواطفها التي كبوصلة حقيقية توجهها نحو الخير لها أيضا عقل منير يرشدها إن اظلمت الطرق .. يعني هي سواء قادها الاحساس أو العقل والمنطق موفقة الى الحق والصواب .. مش كده تستحق تكون قائـ .... ايه ده .. احنا مش قلنا مش حنتكلم عليها ....

اسف اسف .. خلينا نتكلم طيب في موضوع تاني

الشغل دا بقا حاجة مزعجة جدا .. طب اديني اهو داخل على 3 شهور في الشغل الجديد والحقيقة اني بحب المكان والشغل .. بس برضه لسه كل انواع الشغل بتثبت لي النظرية اللي بتقول ان احنا بنتقاضى مرتباتنا 90% منها مقابل حرقة الدم و 10% مقابل الانتاج والمجهود ... وساعات 100% مقابل حرقة دم .. يعني شغلانة كتير مننا مش مهندس ولا محاسب ولادكتور .. شغلاتنا كلنا محروق دمنا .. الاستاذ فلان الفلان المحروق دمه في شركة كذا كذا .. وعلى هذا الاساس يتقاضى مرتبه .. ولو فكر يتمرد ويرفض حرقة الدم .. اكيد بيبقى بيمضي اوراق استقالته أو اقالته من عمله .. بس الحمد لله اظن اني بدأت اتأقلم مع طبيعة الشغل في مصر واتقبل الصداع اللي بيحصل كل يوم واسلوب اني اعود للبيت محمل بالوان من الاستفزازات والمشاكل والاحباطات .. بس احسن ما في الموضوع اني عندما اعود محمل بكل هذه الشرور أسارع للبيت عشان أجدها في انتظاري والمح فيها اشتياقها لي واسمع كلماتها العذبة المميزة فيزول عني كل سوء .. تكلمني وانا اسمع واستزيدها من حديث شهرزاد الذي لا يمل .. حتى اذا ما انتهت منه غردت لفيروز بهمسات في اذني كي انام كالطفل الصغير وقد زال عنه كل ما يؤلمه ...

عارف عارف اني بتكلم عليها برضه .. خلاص حسكت .. وحشوف موضوع تاني

يقولوا مصر حتلعب مع مالاوي يوم السبت .. وقبلها لاعبنا جيبوتي والكونغو وغلبناهم ... الغريب ان في كل مرة في تصفيات كاس العالم احس ان سكتنا خضرا والفرق اللي معانا فرق سهلة وظريفة وحتدينا البطاقة على طول .. واذ فجأة الاقينا بره وجورج ويا يلعب في الدفاع ويطلع مرة واحدة من اخر ملعبه وياخد الملعب كله لغابة الجون بتاعنا ومحدش عارف يوقفه ويدخل فينا جون ويرجع ونطلع من كاس العالم على ايد ليبريا .. اللي مليانة حرب اهلية واللي محدش يعرف هيا فينا ع الخريطة ممكن يكون الوضع مختلف المرة دي ويوصل المنتخب لكاس العالم .. ولو إن حماس الناس المبالغ فيه للكورة واستبدالهم مباريات الكورة بمصطلحات عسكرية محضة بتخلي الواحد شاكك في احقيتهم انه يفرحوا بوصول منتخب بلادهم لبطولات مهمة ..

ان شاء الله مصر تكسب .. بس ياريت الواد اللي اسمع عمرو ذكي دا ميجبش اجوان .. عشان هي اصلا زملكاوية ولما سي بتاع دا بيجيب اجوان بتبقى فرحانة اوي ان زملكاوي جاب الجون لمصر .. بحس ان حد غيري هو الي قادر يفرحها ويسعدها ... مع إن دي المفروض تبقى وظيفتي انا وبس .. وسعادتها دي هي اللي حتخـ .... ايه ده برضه اتكلمت عليها ؟؟؟

معلش يا جماعة .. مش متعود بس .. معلش نغير الموضوع

اخيرا خلصت امتحانات .. الحقيقة الامتحانات جاية سهلة خالص .. بس للي ذاكر .. انا كنت بدخل الامتحان من غير ما افتح كتاب .. يعني كنت بدخل المادة ومعرفش هي اصلا بتتكلم عن ايه .. وطبعا النتيجة متوقعة ومعروفة .. انا مش مشغول فعلا بالنتيجة السنة دي ومستعد للسنة الجاية ولو ان كان نفسي ان انتهي من الدبلومة السنة دي واوفر سنة من عمري .. لكن مع القاعدة اللي حاططها لنفسي اني امشي في طريقي بالراحة وعلى مهلي .. فمفيش مشكلة من اني استنى سنة كمان بدل ما اوتر علاقتي بنفسي وادمر اعصابي .. اوحش ما في الموضوع اني اخشى من نظرتها ليا بعد النتيجة .. اكيد حتبص لي على اني الطالب الفاشل .. ياترى حتتفهم اني ...

اوك نغير الموضوع .. أخر محاولة


الشوارع بقت فظيعة بجد .. البلد في الصيف بتبقى جحيم ومجرد نزولك الشاعر معناه حرقة دم وعكننة .. ستات ماشية على حل شعرها ورجالة بقرون كتيرة ماشية جنبها كل وظيفتها إنه بتشرف عليها اثناء عرضها لجسدها امام الناس .. ستات شكلهم وحش جدا جايين من كفر ابو طشت فاكرين نفسهم سياح وقاعدين على كافتريا بيشيشوا وكل طشت قاعد جنبها سعيد والناس بتتفرج على المدام وهي بتشيش .. لبحر مقفول .. فكرة اني اتمشى او اقعد عليه انتهت من حوالي شهر .. وحستنى لغاية فك الحصار عشان اقدر اتمشى عليه تاني .. يعني قدامي لغاية ما بعد العيد .. قبل كده ما افتكرش .. مع اني الفترة دي محتاج اروح للبحر جدا واكلمه واقول له رسالتي عشان يبلغها ليها .. بس الحواجز اللي بيني وبينه هي نفسها الحواجز اللي بيني وبينها .. كتل بشرية وزمنية بيننا .. وحضطر اكتفي بالرسائل اللي بيوصلها القمر ليها .. يمكن في يوم تبص بالليل ليه وتسأله عليا ويجاوبها القمر باللي في قلبي من ناحيتها

أنا اسف لكل من يقرأ .. مش قادر ما اتكلمش عنها .. كل الكلام يقودني في الاخر إليها


12 comments:

mo'men mohamed said...

أجمل موضوع هو الأول

وألذ واحد الخاص بالإمتحانات

انا كمان حاطط القاعدة دى لنفسى و مريح بالى على الآخر
جزاكم الله كل خير

بس سؤال بسيط
هى مين دى اللى انت بتكلم عنها 1!!!!
السلام عليكم

عصفور المدينة said...

أنا زهقت بجد

3aSef said...

ههههههه والله انك تحفه
عجبني جدا البوست
بالرغم من كل التقلبات
:))))))))

Unknown said...

ماينفعش ما تتكلمش عليها فعلا .. لسبب بسيط جدا وهو إنها عزلت من دنيتها وسكنت روحك وكيانك وتفكيرك وحياتك كلها

ماتقولش مش حتكلم عنها لان غصب عنك حتتكلم .. ما تقولش مش حفكر فيها تانى لان غصب عنك حتفكر .. ما تقولش انا كويس وكله تمام من غيرها لان غصب عنك فى حاجة بتوعجك من غيرها

رغم انى مش من المؤمنين بالحب لكن اعتقد كدة ان اللى انت فيه ده اسمه حب .. بس للأسف مش عارفة اللى فى حالتك دول يداوهم إزاى او ايه اللى ممكن يريحهم ويخليهم يرجعوا زى الأول

يمكن النسيان

الحياة

الناس

الزمن

الوقت

الأيام

الصبح والليل وكله بيعدى


نفسى والله أفيدك وانصحك زى ما ياما نصحتك قبل كدة وياما نصحتنى .. بس بجد مش عارفة اقولك ايه

أدعيلك؟

حاضر حدعيلك .. ربنا يصلح حالك وبالك ويرزقك حسنة الدنيا وحسنة الآخرة اللهم آمين


وما تنساش تدعيلى انت كمان بالله عليك

سلام عليكم

ma 3lina said...

mo'men mohamed
لا لا لا يا دكتور ما تحملنيش مسؤلية الغلط
:))
القاعدة بتاعت الامتحانات ما ينفعش تطبق غير بعد البكالوريوس
:))
جزانا الله وإياكم بكل خير ..

واللي بتكلم عليها هي فتاة أحلامى وشريكة عمري وتوأم روحي

شرفتني يا دكتور بالزيارة

عصفور المدينة
هههههه
ليه بس كده يا باشمهندس
معلش بقا .. تعجب من حبي لها ؟؟

على رأي شكوكو .. الحب بهدلة
:)

طيب اقول لحضرتك حاجة .. استحملني لغاية البوست الجاي .. وان شاء الله حمسك نفسي جامد ومش حتكلم عليها .. وحتكلم على حاجة تهمك نوعا ما .. يعني البوست الجاي اهداء لحضرتك مخصوص عشان اصالحك وما تزهقش مني تاني

3asef
اهلين باهل الغالية فلسطين
معلش بقا تقلبات محب
:)
شرفتني يا فندم

إنـســـانـة
عليكم السلام ورحمة الله وبركاته

ايوا فعلا .. انتي عرفتي ازاي انها سكنت روحي وكياني وتفكيري وحياتي

هو الصب تفضحه عيون وينم عن وجده شئونه ؟؟؟

:)

لو كان كده يبقا أكيد فيه حب وإلا مكنش ظهر عليا ؟؟

وانتي سميتي حالتي إنها حالة حب .. وعلى فكرة دا مش حب قديم من الماضي بحاول اعالجه وانساه .. لا انتي كده فهمتيني غلط .. دا حب للحاضر وللمستقبل عايزه يعيش ويستمر ويكبر .. عشان انا دلوقتي مقتنع تماما إن الماضي لازم ننساه ولازم نفكر من جديد عشان الحب حوالينا في كل مكان مستخبي ومحتاج ان احنا نشحن كل طاقتنا عشان ندور عليه بدل ما نضيع طاقتنا دي في التفكير في الماضي .. واول شرط عشان نلاقي الحب ان احنا نكون مؤمنين بوجوده

البحث عن الحب مثل التنجيم عن الذهب ولو قلنا انه مش موجود مش حنلاقيه ولو لاقناها حيبقى اكننا لقينا حتة دهب وعاملناها على انها زلطة .. عشان مش مؤمنين بوجود الذهب .. لازم يا ياسمين تؤمني بوجود الحب بمعناه الكبير وبمعناه الخاص قوي .. لو عايزة تلاقيه فعلا ..

دي نصحيتي ليكي .. لو لسه بتاخدي بنصيحتي

:)

ادعي لي يا ياسمين .. وانا حدعيلك وحدعي لنفسي ولكل الناس الطيبة اللي زيك انهم ما يخسروش روحهم وهما بيدوروا على اللي يسكن روحهم وكيانهم وتفكيرهم وحياتهم

دي دعوتي للحب .. مش حب الافلام ولا المراهقين ولا التنطيط في الجناين وع الكورنيش من ورا الاهل .. دي دعوة حب وقور عفيف متزن في إطار شرعي ورسمي .. مش مستخبي زي الحرامية .. لان الحب الحقيقي مش ممكن نعرف نخبيه .. وانا لما بكتب هنا بكتب في كراستي مشاعري وارجو ان الجميع يتفهم كده ويراجع المرات اللي اتكلمت فيها على هدفي من التدوين

التجارب اتعملت يا إنسانة عشان نتعلم منها في المرات اللي جاية .. مش عشان نبطل نجرب

حنتظر إني اشوف في مدونتك وفي تعليقاتك ياسمين الإنسانة اللي عهدناها

رزقني الله واياكم الخير

kochia said...

انا عجبني البوست ده جدا
وضحكت كمان اوي
الحب مش بهدلة اوي ولا حاجة
ساعات بحس انه رقي في المشاعر وسممو في الاحاسيس والوصول الي نقطة مرهفة لا يستطيع احد اخر ان يصل اليها

تحياتي لك ... ولها

Ma 3lina said...

فى جملة فى ردك على انسانة قتلتنى

مزقتنى اربا

بس يالا ما علينااااا


تحياتى و ربنا يتمم على خير

رفقة عمر said...

ماعلينا
شكرا على لسؤالك عنى انا الحمد لله بقيت احسن
شوفت ردك على ياسمين
مش انا قولتلك ان الحب موجود بس انت لسه مش لاقيت الشريك المناسب ليك الحمدلله انك لاقيته ربنا يفرحكم ببعض اللهم امين

Anonymous said...

يا عم اتكلم زى ما انت عايز .. كلامك حلو والله .
(:

ربنا يتمم بخير يا صديقي

ammola said...

الحقيقة كلام حضرتك شوقنى انى اتعرف على هذه الانسانة الفوق رائعة
أن تستحوذ عليك بهذا القدر؟
اقولك لك حاجة خارج السياق بس ما تزعلش
انا لما كنت باقرا كلامك عن خطيبتك السابقة وانك كنت بتتألم أوى بعدها قلت انك صعب حتعرف ترتبط تانى أو حتاخد وقت
بس الحقيقة انت بتذهلنى ويبدو اننا احيانا ما نبالغ فى رد فعلنا تجاه فقد شخص معين ...حتى اذا ما مر بنا الوقت اكتشفنا اننا كنا نعيش وهما نحن صانعوه وأن الامر ايسر مما ظننا
بدليل انك حينما صادفت الحب الحقيقى اوسعت له كل قلبك وأتحفتنا بكلماتك التى تذوب حبا أنا على يقين من أنها أهل له لاننى احسبنى قد عرفت عنك بعض الشىء من خلال مدونتك
اتمنى الا اكون قد تطفلت عليك واقحمت نفسى فيما لايعنينى
بس انت عارف ..انا دايما باقول اللى باحس بيه
وكلامك خلانى احس بشحنات اسطورية من الحب انت تحسها لهذه الانسانة
ربنا يبارك فيها وفيك ويبارك لكما ويجمع بينكما فى خير عاجلا وليس آجلا
ماتقول آآآمين
:)

مجداوية said...

السلام عليكم
والله أخى الكريم مفيش مانع تتكلم عليها طالما بتتكلم عن الدنيا

معتقدش تقدر تفصلها عن دنيتك ولا تفصل دنيتك عنها لأنك الآن لم تعد تعرف من هى دنيتك هى أم الدنيا !!1

ايه ده خلتنى أشعر وأمسك ربابة

الدنيا بتصبح أحلى عندما تجد من يشاركك ما تشعر وما ترى وان شاء الله ربنا يجمع بينكما لتعيشا الدنيا بكل الخير وتكونا اسرة مسلمة حقة وتصلحوا فى الأرض
فجدد نيتك مع نفسك واجعل كل ما تشعر تجاهها لله ولارضاء الله وستجد الله ييسر لك الأمر
ويجمعك بها عن قريب

وسلام الله عليك ورحمته وبركاته

ma 3lina said...

kochia
ربنا يخليكي يا فندم وأسعندني إن البوست عجبك .. ويكفي اني استطعت لأن ارسم ضحكة على وجه أحد زواري
تحياتي

Dr. Ma 3lina
يا دكتور حضرتك اللي بتقدمي الدوا للناس وتوصفيه ليهم .. لو الجملة مزقتك فأكيد انتي عارفة العلاج
تحياتي لحضرتك ..

رفقة عمر
ربنا يخليكي يا رفقة .. اسأل الله عز وجل أن يتمم لكي على خير أنتي أيضا .. اللهم آمين

ahmed
يا هلا ياهلا مبرمجنا الحر
اتكلم ازاي بس دي الناس حتضربني
:)
اخيرا لقيت حد يشجعني اني اتكلم
ربنا يخليكي لينا يا هندسة
;)

ammola
حضرتك عايزة تعرفيها .. عايزة تعرفي هذه الإنسان الفوق رائعة
هي حاضرة وغائبة .. بجواري ولكن يفصلني عنها الحواجز والأميال
هي أنا قبل وبعد وأثناء .. وأنا بدونها لست أنا
اما عن كلامي عن خطيبتي السابقة فألم التجربة دفعني لأكتب ما كتبت وقتها خاصة مع قصة خداع عشتها وقتها كشفت لي الأيام الحقيقة .. لم يكن فقداني للشخصية بذاتها سبب الألم بقدر الألم الحاصل من التجربة برمتها
اما الآن فحبيبتي الغائبة أهل بلا شك لمساحتي كلها .. كل يوم انظف المكان وارش الماء وانتظرها على الباب ..
نعم هي من علمتني كيف أحبها .. ومن جعلتني اخرج هذا الغيض من الفيض والذي اعتبرتيه شحنات اسطورية فماذا لو رأيت كل ما بالداخل ..

وأؤمن على دعائك فأقول آمين آمين آمين .. أ.

:)
مجداوية
وعليكم السلام ورحمة الله وبركاته
اسعدني تعليقك أختنا الطيبة .. برغم حزني لما ظننته إشارة منك إلي في بوستك الأخير
حسبي أني أوضحت أكثر من مرة هدفي من التدوين
اسألك الدعاء لأخيك بالهداية وبالخير .. ومبارك نجاح نسمة وعقبال الدكتوراة
:)