مش حتكلم عليها

اكيد الكل زهق مني .. كل بوستاتي بتكلم عليها .. 3 بوستات ورا بعض بتكلم عليها .. هي وبس .. فانا قلت اعتذر للكل .. وانهاردة اتكلم في أي مواضيع تانية من باب التغيير والتعويض عن البوستات الخاصة جدا اللي فاتت اللي بتعبر عن مشاعري .. ها نتكلم عن ايه ؟؟؟ شفتوا اوباما اخيرا فاز بترشيح الديمقراطي . شيء متوقع .. المنافسة اصلا كانت متقاربة لأن طبيعة اطرافها متساوية مش في القوة لا في الضعف ومش بيلاقوا قبول عند الشعب الأمريكي اللي مش بيحب لا ان واحد من اصول افريقية يحكمه او واحدة ست تحكمه .. وماكين في حالة فوز أيا من كلينتون او اوباما مرتاح ع الاخر لأنه ضامن ان منافسه الديمقراطي أيا كان حيفشل قدامه ... وسقوط المرشحة الست في سباق الرياسة من المنافسة التمهيدية تاكيد اكتر على ان الشعب الامريكي زيه زي معظم شعوب الارض اللي لا تفضل تولي المرأة لمنصب القيادة .. لا على مستوى الفرد ولا على مستوى الأمة ويتساوى في كده شعوب العالم التالت والاول .. وما فوز بعض النساء بمناصب قيادية في بعض الدول إلا لاعتمادها على ميزة غير موجودة عند الرجال .. ألا وهي كونها ست وبتيتغل الدعاية بتاعة رشحوني وادعموا قضية المرأة .. وهو عامل بعيد كل البعد عن الكفاءة والقدرة على القيادة .. لكن ان تقودني امراة فدا امر دائما مرفوض عندي مثلي مثل صديقي الأمريكي .. إلا طبعا لو كانت هي .. هي فقط .. لو كانت هي الوضع يختلف تماما .. هي الوحيدة اللي اسلم لها كل مفاتيح قيادتي .. هي الوحيدة اللي بالاضافة لعواطفها التي كبوصلة حقيقية توجهها نحو الخير لها أيضا عقل منير يرشدها إن اظلمت الطرق .. يعني هي سواء قادها الاحساس أو العقل والمنطق موفقة الى الحق والصواب .. مش كده تستحق تكون قائـ .... ايه ده .. احنا مش قلنا مش حنتكلم عليها .... اسف اسف .. خلينا نتكلم طيب في موضوع تاني الشغل دا بقا حاجة مزعجة جدا .. طب اديني اهو داخل على 3 شهور في الشغل الجديد والحقيقة اني بحب المكان والشغل .. بس برضه لسه كل انواع الشغل بتثبت لي النظرية اللي بتقول ان احنا بنتقاضى مرتباتنا 90% منها مقابل حرقة الدم و 10% مقابل الانتاج والمجهود ... وساعات 100% مقابل حرقة دم .. يعني شغلانة كتير مننا مش مهندس ولا محاسب ولادكتور .. شغلاتنا كلنا محروق دمنا .. الاستاذ فلان الفلان المحروق دمه في شركة كذا كذا .. وعلى هذا الاساس يتقاضى مرتبه .. ولو فكر يتمرد ويرفض حرقة الدم .. اكيد بيبقى بيمضي اوراق استقالته أو اقالته من عمله .. بس الحمد لله اظن اني بدأت اتأقلم مع طبيعة الشغل في مصر واتقبل الصداع اللي بيحصل كل يوم واسلوب اني اعود للبيت محمل بالوان من الاستفزازات والمشاكل والاحباطات .. بس احسن ما في الموضوع اني عندما اعود محمل بكل هذه الشرور أسارع للبيت عشان أجدها في انتظاري والمح فيها اشتياقها لي واسمع كلماتها العذبة المميزة فيزول عني كل سوء .. تكلمني وانا اسمع واستزيدها من حديث شهرزاد الذي لا يمل .. حتى اذا ما انتهت منه غردت لفيروز بهمسات في اذني كي انام كالطفل الصغير وقد زال عنه كل ما يؤلمه ... عارف عارف اني بتكلم عليها برضه .. خلاص حسكت .. وحشوف موضوع تاني يقولوا مصر حتلعب مع مالاوي يوم السبت .. وقبلها لاعبنا جيبوتي والكونغو وغلبناهم ... الغريب ان في كل مرة في تصفيات كاس العالم احس ان سكتنا خضرا والفرق اللي معانا فرق سهلة وظريفة وحتدينا البطاقة على طول .. واذ فجأة الاقينا بره وجورج ويا يلعب في الدفاع ويطلع مرة واحدة من اخر ملعبه وياخد الملعب كله لغابة الجون بتاعنا ومحدش عارف يوقفه ويدخل فينا جون ويرجع ونطلع من كاس العالم على ايد ليبريا .. اللي مليانة حرب اهلية واللي محدش يعرف هيا فينا ع الخريطة ممكن يكون الوضع مختلف المرة دي ويوصل المنتخب لكاس العالم .. ولو إن حماس الناس المبالغ فيه للكورة واستبدالهم مباريات الكورة بمصطلحات عسكرية محضة بتخلي الواحد شاكك في احقيتهم انه يفرحوا بوصول منتخب بلادهم لبطولات مهمة .. ان شاء الله مصر تكسب .. بس ياريت الواد اللي اسمع عمرو ذكي دا ميجبش اجوان .. عشان هي اصلا زملكاوية ولما سي بتاع دا بيجيب اجوان بتبقى فرحانة اوي ان زملكاوي جاب الجون لمصر .. بحس ان حد غيري هو الي قادر يفرحها ويسعدها ... مع إن دي المفروض تبقى وظيفتي انا وبس .. وسعادتها دي هي اللي حتخـ .... ايه ده برضه اتكلمت عليها ؟؟؟ معلش يا جماعة .. مش متعود بس .. معلش نغير الموضوع اخيرا خلصت امتحانات .. الحقيقة الامتحانات جاية سهلة خالص .. بس للي ذاكر .. انا كنت بدخل الامتحان من غير ما افتح كتاب .. يعني كنت بدخل المادة ومعرفش هي اصلا بتتكلم عن ايه .. وطبعا النتيجة متوقعة ومعروفة .. انا مش مشغول فعلا بالنتيجة السنة دي ومستعد للسنة الجاية ولو ان كان نفسي ان انتهي من الدبلومة السنة دي واوفر سنة من عمري .. لكن مع القاعدة اللي حاططها لنفسي اني امشي في طريقي بالراحة وعلى مهلي .. فمفيش مشكلة من اني استنى سنة كمان بدل ما اوتر علاقتي بنفسي وادمر اعصابي .. اوحش ما في الموضوع اني اخشى من نظرتها ليا بعد النتيجة .. اكيد حتبص لي على اني الطالب الفاشل .. ياترى حتتفهم اني ... اوك نغير الموضوع .. أخر محاولة الشوارع بقت فظيعة بجد .. البلد في الصيف بتبقى جحيم ومجرد نزولك الشاعر معناه حرقة دم وعكننة .. ستات ماشية على حل شعرها ورجالة بقرون كتيرة ماشية جنبها كل وظيفتها إنه بتشرف عليها اثناء عرضها لجسدها امام الناس .. ستات شكلهم وحش جدا جايين من كفر ابو طشت فاكرين نفسهم سياح وقاعدين على كافتريا بيشيشوا وكل طشت قاعد جنبها سعيد والناس بتتفرج على المدام وهي بتشيش .. لبحر مقفول .. فكرة اني اتمشى او اقعد عليه انتهت من حوالي شهر .. وحستنى لغاية فك الحصار عشان اقدر اتمشى عليه تاني .. يعني قدامي لغاية ما بعد العيد .. قبل كده ما افتكرش .. مع اني الفترة دي محتاج اروح للبحر جدا واكلمه واقول له رسالتي عشان يبلغها ليها .. بس الحواجز اللي بيني وبينه هي نفسها الحواجز اللي بيني وبينها .. كتل بشرية وزمنية بيننا .. وحضطر اكتفي بالرسائل اللي بيوصلها القمر ليها .. يمكن في يوم تبص بالليل ليه وتسأله عليا ويجاوبها القمر باللي في قلبي من ناحيتها أنا اسف لكل من يقرأ .. مش قادر ما اتكلمش عنها .. كل الكلام يقودني في الاخر إليها