Tuesday, May 15, 2007

الحب ع التوازي والحب ع التوالي

ومادمنا اتكلمنا على الحب وبما إني مهندس كهرباء قوى متقاعد .... وعلى فكرة متقاعد مش يعني عديت ستين سنة ولا حاجة .. لا .. يعني نفدت بجلدي من المجال المغناطيسي لقسم كهرباء قول كده من سنة تانية في الكلية واخدت قرار إني أحصل ع الشهادة وادور لي على مجال تاني غير الكهرباء وقد كان .. بس المشكلة إني ساعات ....

إيه ده ؟ إيه ده ؟!! ... أنا كنت حتكلم ع الحب التوالي والحب التوازي إيه اللي دخلنا في حكايتي مع الكهرباء ..

طيب نرجع تاني ..

بقول إن دراستي الأصلية للكهرباء لسه برضه مأثرة عليا وساعات بتأثر على نظرياتي التهييسية .. آيوه ليا نظريات .. فيه حاجة ؟؟!! .. حد عنده اعتراض

وحكاية الحب ع التوالي وع التوازي دي واحدة منها .. ليه بقى ؟؟ .. اقول لحضرتك .. لأني دايماً بحس إن الراجل بيحب ع التوازي والست بتحب ع التوالي .. إزاي .. ؟؟ أقول لحضرتك

عارف نظرية التوصيل ع التوازي لو عندك مصدر كهرباء فأنت ممكن توصله لكذا لمبة بالشكل ده

وكده الكهرباء حتطلع من المصدر وتتوزع على اللمبات في نفس الوقت بحيث كل لمية تاخد قد ما تحتاج

ولو حصل ولمبة فصلت فدا مش حيأثر بالسلب على بقية اللمبات .. لأنها حتفضل شغالة برضه .. مش بتكلم عن تأثر المصدر .. لأ .. انا بتكلم عن اللمبات لأنها شغالة ومنورة في جميع الحالات دون النظر لبقية التوصيلات

الطريقة التانية للتوصيل إنك ممكن توصل المصدر باللمبة الأولانية وبعد كده تطلع من اللمبة الأولانية تودي للتانية ومن بعديها للتالتة وهكذا .. يعني ساعتها الكهرباء حتروح للمصدر الأول وبعد كده الباقي بيروح للمصدر التاني وهكذا ولو فصلت لمبة الشحنة مش بتكمل وتقف على كده والدايرة الكهربية بتتقطع

دا قصدي بحب الراجل اللي ع التوازي وحب الست اللي ع التوالي

فمن جهة الرجل (اللي حبه ع التوازي) لو اعتبرنا إن حب الراجل هو مصدر الكهرباء والستات هي اللمبات
فالراجل وارد إنه يحب أكتر من واحدة وفي نفس الوقت .. بقول وارد .. ممكن يعني مش شرط .. تقدر تقول كده إن عاطفته القوية موزعة بشكل أفقي .. ومش حيكون بيخدع ولا واحدة فيهم .. بالعكس .. هو صادق في مشاعره القوية دي معاهن كلهن .. وفعلاً بيحبهن كلهن في نفس الوقت ومشاعره متوجهة للكل في نفس الوقت ..
ولو واحدة ست من اللي هو بيحبهم خدعته او أهانته أو عملت فيه أي حاجة وحشة (يعني حصل انقطاع بينهم) .. فحبه للبقية مش بيقل ولا بيتهز بالعكس دا بيزيد .. لأنه بيعرف قيمتهن وساعتها حيزيد حبه ليهم

أما من جهة الست (اللي حبها ع التوالي) لو اعتبرنا إن حب الست هو مصدر الشحنة الكهربية والرجالة هما اللمبات
فالست بتحب راجل واحد بس في الوقت الواحد .... وما ينفعهاش إنها تحب كذا واحد في نفس الوقت .. يعني عاطفتها القوية مركزة بشكل رأسي .. فبتوجه للواحد اللي بتحبه كل مشاعرها ولو حالت الظروف بينها وبينه مثلاً .. ومرت الأيام وانتقلت لقصة حب تانية فبتوجه للراجل دا مشاعرها كاملة برضه ولكن مشاعر غالباً بتكون أقل من المرة السابقة ....
أما بقى لو خدعها أو أهانها أو عمل معاها فصل بارد من فصول الرجالة الرذلين إياها (ودا الانقطاع) .. فالدايرة بتتقطع ونظرتها للحب والرجالة بتختلف تماماً .. بتتحول لروتين اجتماعي خالي من أي مشاعر .. وبتفقد جزء كبير من مشاعرها وعواطفها مع الجل التالي في حياتها .. عشان كده دايماً يقولوا إن أول رجل في حياة الست بيكون فكرتها عن الرجالة طول عمرها

هو دا قصدي بالحب ع التوالي والتوازي ..

كل اللي قلت لهم الكلام ده رجالة وستات أنكروه وقالوا احنا مش كده وبعض الرجال قالوا إحنا بالعكس بنحب ع التوالي ... أنا بيني وبين نفسي ضحكت لأن اللي سألتهم هما اللي ينطبق عليهم بالضبط الكلام اللي فات ده وإنكارهم مخالف تماما لتصرفاتهم

آه بالمناسبة قبل ما انسى .. الكلام السابق دا يثبت إن الحب كهربا .. مش زي الإشاعة اللي مطلعها الكيميائيين .. إن الحب كيميا .. لااااا .. الحب كهربا
سلام بقى عشان حفصل

16 comments:

أمــانــى said...

الســــــلام عليكم
لاول مرة وحصريا على مدونة الباشمهندس مــاعلينا اول تعليق هيه هيه

ندخل بقى على النظرية اللى ان شاء الله السنة الجاية هيدرسو الثانوية العامة ههههه

هو فعلا كده وانا أؤكد كلامك يا باشمهندس ممكن الرجل يحب اكتر من واحدة فى وقت اما الست صعب جدا سبحان الله

اقولك خلى بالك احسن المحولات عندك تضرب بفعل الحرارة والضغط
ســلامى للمهندسين اللى الصيف يلا ما علينا ههههههههههه

:D

رفقة عمر said...

بصراحه نظريه الحب على التوازى دى اكتر حاجه مش حلوة فى الرجاله لان زى ما هو عايز الانسانه اللى بيحبها تكون له لوحدة هو ليه مش يكون لها لوحدها الرسول كان يحب السيدة خديجه جدا ولم يتزوج عليها ابدا
وبعد وفاتها تزوج لضرورة فى زواجه تزوج لكنه لم يحب بعد خديجه سوى السيدة عائشه وزوجاته كانوا يعلمون بذلك بدليل تركه فى لحظاته الاخيرة عند السيدة عائشه رضى الله عنها
وكان دائما يقول
اللهم هذا قسمى فيما املك (فى العدل بينهم فى الحقوق) فلا تلومنى فيما لا املك فى حبه للسيده عائشه رضى الله عنها
مش كل رجل بقى يبرر انه مشاعره فياضه وقويه ولازم تتوزع على نساء العالم اللى بيحب بجد بيحب مرة واحدة بس دة اذا لم يفرقهم القدر
ممكن يرجع يحب تانى بس مش عشرة فى نفس الوقت دة شئ مستحيل
ربنا قال وما كان لرجلا من قلبين فى جوفه لازم اللى بيعمل كدة يعرف انه مش بيحب دة شئ تانى خالص غير الحب

رفقة عمر said...

ايوة اشكرك ونسيت اسالك انهى صورة بالظبط اللى حلوة اصل انا غيرت صور كتير مش مقتنعه باى واحدة وانا لسه متعلمه احط صورة مع البروفيل من امانى ربنا يكرمها ومحتارة بجد وهى بتتواصل معايا ويتعلق ليا على كل صورة ولسه برضه مش مقتنعه شكلى هافضل فى الاخر من غير صور خالص
بجد تقصد انهى واحدة اللى حلوة وليه الصورة بتظهر صغيرة ممكن اكبرها اكتر من كدة

Anonymous said...

هي النظرية صح بتنطبق على الرجال والنساء بس سيبك من موضوع الحب ده موضوع وهمي
خلينا نتكلم في الحياة الزوجية
الراجل ممكن يفصل المواضيع عن بعضها يعني التقصير فيجانب مايهدش بقية الحاجات الكويسة
أما الست فممكن تلغي كل حاجة عشان حاجة واحدة
لو أحسنت إلى إحداهن....
وده نتيجة إن تفكيرها تعميمي

رينـــــــــــا said...

ليه كدا يابنى
دا انا اتلغبطت جدا
وحاسه انى فى البطاطا
مكنا فاهمين كويس
لازم تخترع النظريه دى:P

هو كل واحد بيدرس حاجة ياحرام بتأثر عليه بالشكل دا

انا بهزر
لا بجد نظريه صح جدا
وتدل انك ماشاء الله فاهم كويس النفسيه للمرأة والرجل عامله ازاى فى الحب


بس ربنا يستر والاسلاك متضربش فى بعض
احلى حاجة ان طلع الحب كهربا
رغم انى بخاف من اكهربا مووووووووووت
يووووووووووو
بطلى رغى بئا
ياله سلام

أبو عمر - الصارم الحاسم said...

دا انت السلوك ضربت خالص
(:


نفهم من كده ان سيادتك الآن في حالة حب على التوازي

khaled said...

انا اؤيدك فى الكلام ده
همه الرجالة طفشوا من شوية؟

ammola said...

كلا مك صح
بس تفتكر بعيد عن الكهربا
مين حيبقى عواطفه مركزة واقوى
الراجل اللى بيوزع على الجيران
واللا الست اللى مركزة فى واحد بس

Unknown said...

احم احم

مين طفا النور؟؟؟

Anonymous said...

فيه رأي بيقول إن الراجل بيبقى عايز يبقى الرجل الأول في حياة اللي يعرفها
و علشان هي عارفة و متأكده و واثقة من إنه عارف كثير غيرها بتبقى عايزة تبقى آخر واحدة في حياته

Anonymous said...

السلااااااااام عليكم

كيف حالكم يابشمهندس ؟؟

مش عارف أشكرك ازاى على أصالتك وانك فاكرنى على الرغم من انى كنت ناوى ابعد وامشى واسيب التدوين
والتعليق
بس حقيقى فى ناس زى خضرتك كده والأخت رفقة عمر -العائشة فى الاحلام والأخت شمس وكل اللى سألوا خالونى اغير رأيى وارجع تانى
ده بقى ياسيدى التيار المتردد
:)
وحشتنى ياابراهيم باشا
وبعدين ياعمى انا مهندس اتصالات مش ميكانيكا
والحب بقى اتصالات مش كهرباء
:)
لا بجد الحب كيمياء ياسيدى
انت عايز تزعل الصيادلة والكيميائين مننا ولا ايه؟

على كل حال حب على التوالى او التوازى المهم يكون فيه حب

ودمت بكل خير أخى العزيز
سلام

خمسة فضفضة said...

السلام عليكم ورحمة الله وبركاته

طيب يا باشمهندس وايه رايك في الحب اللي عامل زي لمض الافراح اللي واحده بتولع والتانيه تطفي ،......هههههه

ياتري ده بينطبق علي الستات ولا الرجاله ..؟؟؟؟

Ma 3lina said...

عليك حبة نظريات تودى اللومان
النظرية دى بالذات تؤرقنى اوى

اولا لانى بحب الفيزياء جدا و كانت المسائل بتاعة الدوائر الكهربائية دى مزااج كدا مع كوباية الشاى

ثانيا النظرية دى تحطم كل مبادىء الاخلاص فى الحب و عدم الخيانة

يا ريته بيحب اتنين لا ممكن يوصلو لاربعة طيب ازااااااااااااااااااى

بيجيب وقت منين ؟؟ ازاى يبقى قاعد يحب فى واحدة و بعد ساعة يبقى عنده ميعاد مع واحدة تانية؟؟؟

طيب اخرة الحب ايه مع دوول كلهم هيتجوزهم كلهم هوا اصلا لاقى يتجوز واحدة علشان الهلمة دى كلها

انا بقى من وجهة نظرى دا مش حب ممكن يكون اعجاب بصفات معينة فقط لا غير لكن حب لاكتر من واحدة مينفعش

برده فيه نظرية تقولك الراجل بيحب علشان الحب نفسه يعنى الحالة نفسها مش اكتر

اما البنات بقى فبتحب الشخص اللى تكمل معاه بقية حياته

بجد النظرية دى صعب اتخيلها بس برده بتفسر حاجات كتير

اما بقى موضوع الحب كهربا فا انا اعترض و اشجب الحب كيميا و الكيمى كيمى كااااااا

BinO said...

بسم الله الرحمن الرحيم
جميل التفسير اللي أنت فسرته
وممكن أضيف عليه جزء ممكمل للنظرية
أن أنت ممكن تشتري مشترك فيه أربع فتحات
ممكن توصله بجهاز واحد
وممكن توصله بأتنين أو بأربعة
في كل الأحوال لن يتأثر لأنه أتصمم علي كده
قادر علي التعامل مع كل هذه الظروف
الجهز نفسه اللي مينفعش يتوصل بأكثر من مصدر ومالوش غير فيشة واحدة
لأنه أتصمم علي كده

وهو كله كهربا
وأوعي ربع يضرب

AHMED SAMIR said...

المحكمة اتنورت يا فندم
فعلا نظرية جامدة والله فكرتني بالفيزيا والتوصيل الكهربائي والحاجات دي
مش عارف ليه بحس ان الحياة كلها موصلة على بعضها الحب ليه علاقة بالكيمياء والفيزياء والتاريخ له علاقة بالاحياء
تحياتي واحتراماتي

eldoctor said...

توازى و توالى ..؟؟؟؟
حيرتنى يابنى
على العموم بعد ما تتجوز و ربنا يرزقك بالاولاد الكهرباء حاتفصل .. عندك ...
اسألنى انا