Tuesday, May 29, 2007

فلسفة الملابس

طيب .. ومادام الموضوع جاب بعضه .. ودا بالمناسبة مش كان قصدي خالص من البداية .. لأن كان كل قصدي هو تسجيل إعجابي بالأخت المنتقبة .. لكن يبدو إن الكلام اتخذ اتجاه آخر بعدما تدخلت المحجبات دفاعا عن ثباتهن أيضا أمام هجمات المعارضين لحجاب المرأة بكافة أشكاله ..

والكلام وصل بينا للحديث عن الزي المشروع وما يصح للمرأة أن ترتديه وما لا يصح .. ولأني أحاول الحفاظ على طابع المدونة الشخصي الذي يعبر عن آرائي الشخصية فحتكلم في نقطة بتلفت نظري كتير في فلسفة الملابس عند كل من الرجل والمرأة

وأحب أقول إني لا أهاجم أي من الأطراف لكن بسجل في المدونة مشاهدتي لما حولي وقد تكون مشاهدتي صحيحة أو خاطئة .. ولا تعبر عن توجه معين أو معاداة لأي من الرجل أو المرأة ..

الحقيقة كل ما اشوف حوليا الرجال على اختلاف مهنهم أو مستوياتهم الاجتماعية والثقافية .. أجدهم جميعاً قد توحد عندهم شكل الملابس إلى حد ما بحيث أصبح معتاد أن تجد في المكان الواحد أكثر من رجل لهم نفس الهيئة مع اختلاف الألوان

فتجد دائما الرجل العادي في غالب الأحوال تتلخص فلسفة ملبسه في كلمتين بنطلون وقميص .. وأحيان قد يزيد عليهم التي شيرت .. فدا كل ما يتعلق بملابس الرجل العادي مهما كان الوسط الذي ينتمي إليه الرجل أو الشاب فهو دائما يرتدي بنطلون وقميص .. أو بنطلون وتي شيرت

بطبيعة الحال تختلف الخامة من مستوى مادي لآخر وكذلك الألوان وطريقة الارتداء فمن الرجال من يفضل إخراج القميص خارج البنطلون ومنهم من يفضله إلى الداخل

لكن في النهاية فإن هذا كل ما يرتديه الرجل في الغالب ...

وأحيانا يزيد الرجل الجاكيت على ما سبق ليكون البدلة ... لكن في النهاية فلسفة ملابس غالب الرجل هي فعلا البنطلون والقميص .. وآدي صورة فيها أغنى رجل في العالم .. وشوفوا اللي لبسه هو والطقم اللي معاه


فلسفة الملابس عند الست مختلفة تماما .. ليس فقط في تعدد المسميات ولكن في إخراج هذه المسميات في صورة تجعل من الصعب .. بل من المستحيل أن تجد في نفس المكان سيدتين يتشابهان في ملابسهن ..
فملابس المرأة تعدت الفستان والتيير والبلوزة والجيب لتشمل البنطلون والبانتكور والبرمودا والتونيك والسلوبت والمينى سكيرت والدريل .. والباديهات بأنواعها (الكارينا مثلا ) وغيرها أسماء كتير .. (احب اشكر المصدر اللي ساعدني في التعرف على هذه المسميات)


حتى المتأمل في أشكال النقاب والحجاب ..فهناك أشكال للنقاب يسمح للمرأة ان تنتقي الشكل الذي يعجبها من بين أشكال مختلفة ..

أما عن أشكال الحجاب فحدث ولا حرج عن أنواع الحجاب المختلفة .. وآخره الموضة اللي مش عاجباني خالص اللي اسمها سبانيش

شاهد أيضا الشكل التالي للحجاب واضغط ع الصورة لترى الشكل الكامل لطريقة لف الطرحة بهذا الشكل العجيب .. يعني الموضوع طرق ونظريات

كم كبير جدا من المسميات والتعاريف اتعجب من استيعاب السيدات له .. واتعجب أكثر من حرصهن على تنوع فلسفة الملبس لديهن بحيث كل مسمى من هذه المسميات يصاحبه عشرات الطرق في الإخراج بالشكل الذي يضمن التفرد والتميز

وأحب اسجل برضه إعجابي الشديد بالملابس البسيطة والألوان الهادية الغير ملفتة .. هذه الفلسفة التي افتقدها كثيرا في ملابس المرأة في وقتنا الحالي

دكتور صلاح عبد الباقي أستاذ السلوك التنظيمي بجامعة الأسكندرية .. تكلم ذات مرة عن الإدراك ومتي يكون الإدراك في أقوى حالاته .. وذكر الآتي :

1- عندما يكون المدرك كبيرا
2- عندما يكون المدرك له صوت مميز
3- التناقض بين المدرك وما حوله
4- أن يكون المدرك جديدا غير مألوفا
5- أن يكون المدرك متحرك غير ثابت


وعقب في نهاية حديثه على هذه العوامل بقوله والكلام بالمعنى وليس بالنص : لذلك تجد أن كثير من النساء يكن حريصات أن يتوفر في ملبسهن وسلوكهن جميع هذه العوامل حتى يكن محط إدراك جميع من حولهن ..

فيظهرن أكبر قدر ممكن من جمالهن ولابد للحذاء من دبة مسموعة على الأرض ولابد لألوان الزي أن تكون مميزة ومختلفة وتصميم الملبس غير مألوف ولا معهود إضافة لأشكال براقة كاللمعة أو الحركة المستمرة في المكان أو الصوت العالي ..

دا رأي الدكتور صلاح واللي عايز يناقشه يقول لي وابعت له رقم الموبايل بتاعه

14 comments:

Ma 3lina said...

مش فاهمة حضرتك عاوز توصل لايه يعنى؟.؟

ايه المراة فاضية مثلا و مورهاش غير الموضة و اللبس مثلا ؟؟؟

هل تعدد انواع و اشكال الهدوم تدل على كدا؟؟

معلش يعنى فيه ولاد كتير بيقعدوا قدام المراية يسرحوا شعرهم و يضربوا جل الخ الخ

وعلى فكرة بقى زى ما فيه بانتكور للبنات فيه للولاد كمان غير الشورتات

وازا كان تنوع الملابس يرجع لطبيعة الانسان نفسه مش لولد ولا بنت

Anonymous said...

ياأخى بقالك فتره مستلم البنات
أيه الحكايه؟

لبس النساء لأنه سوق كبير قوى وبتحركه شركات عملاقة عايزه تكسب من وراه فلوس كتير
فطبعا لازم يبقى فيه موضه ومدارس ونظريات للبس
بس تانى اللبس برضه مش مقياس
الجوهر مش المظهر

طبعا مش معنى كده بقول ان احنا نهمل منظرنا انما اذا واحده عايزه تتشيك خلاص كويس

المهم انت جبت فى بالى قصة الناس اللى بتهاجم الحجاب هجوم شنيع وتقولك طيب ليه القران الكريم ماحددش لبس معين

على كل حال اللى ربنا هاديها هاتقتنع سواء بالحجاب او النقاب

المهم فكرة التدرج دى لازم نحطها فى الاعتبار
لما واحده مثلا كانت عارضه أزياء وأسلمت -ده مجرد مثل - مش مره واحده كده هاتروح لابسه النقاب
او الحجاب
ممكن تتدرج لحد ماالايمان يستقر فى قلبها
علشان كده مش بحب أعلق على اى نوع من الحجاب سواء كنت موافق عليه ولا لا

أهم حاجه البساطة
متفق معاك تماما

وكويس ان دكتور صلاح ماعممش وقال كثير
:)
دمت بخير
سلام

رفقة عمر said...

ماعلينا دى فطرة ربنا خلقنا عليها نحب ان نكون دايما فى نظهر حلو مش لازم علشان نلفت الانظار بس طبيعه داخليه علشان كدة تم تحديد شكل الحجاب الشرعى انه لا يكون زينه بس على الاقل يكون مهندم ولائق وبعدين اى حاجه تلبسها الفتاه بتليق عليها لكن الرجل مش معقوله يلبس فستان ولا جيب او ى شئ من ملابس المرأة هو حلو كدة فى القميص والبنطلون بس ياريت تكون الالوان متناسقه وماشيه مع الشوز
ولو عايز تعرف ان دى فطرة ربنا فطرنا عليها انظر الايه الكريمه فة صورة الزخرف
ام اتخذ ممايخلق بنات واصفاكم بالبنين واذا بشر احدهم بما ضرب للرحمن مثلا ظل وجهه مسودا وهو كظيم او من ينشؤا فى الحليه وهو فى الخصام غير مبين
تفسير الشعراوى من ينشؤا فى الحليه وهو فى الخصام غير مبين
ان الفتاه اصلا تربيتها ونشئتها ان اهلها ازاى يجعلوها حلوه وازاى يزينوها بالملابس والحلى ازاى بقى اللى تهتم بالزينه تقدر تجادل وازاى يكونوا هم ملائكه الرحمن
يعنى مش بادينا بجد حبنا للزينه والاهتمام بالمظهر بس طبعا انا معاك ان لازم مش يكون هناك مبالغه فى هذا الامر طبعا

ammola said...

معاااااااك فى كل حرف
بس ولامؤاخذة مش برضة الرجالة اللى بيقعدوا يفننوا ويصمموا فى ملابس الستات بما يتفق مع شهواتهم والست زى الباشا بتجرى وراهم بالمشواااااار علشان ترضيهم وهى مش دارية انها حتكون حاجة من اتنين يا اما مثيرة لشهواتهم والعياذ بالله يا اما فرجة ومجال للتريقةوالكلام ده للاسف مش بس بينطبق عالمتبرجات لاده عالحجاب الهشك بشك اللى مالى الدنيا.اووووووووووف الواحد اتخنق

Unknown said...

هييييييييييه دونيااااااااا

هنقول ايه بس

مش سايبنا فى حالنا ليه؟؟.. مش عارفة

مالك ومالنا؟؟ .. الله اعلم

فى محاكم او مشاكل ولا حاجة؟؟؟

:D

المهم زى ما الدكتورة والأستاذ حسن ما قالوا

الكلام فى الحاجات دى بالذات ماينفعش يتعمم

وفى رأيي ان الكلام ده نظرة بحتة للمظهر والذى لا يغنى عن الجوهر او المضمون بالنسبة للمرأة او الرجل

واعتقد كمان ان فلسفة الملابس هى انها تريح صاحبها وتعجبه .. بغض النظر عن إختياراته وهل هى عجبانا ولا لأ طالما انها ملابس مطابقة للمواصفات الشرعية ومافيهاش حاجة حرام

واكيد البساطة شئ مهم بس فى ناس طبيعتها مابتحبش تبقى بسيطة

والرد على الكلام ده بسيط جدااااا

هو ان كلنا بشر .. ناس .. مختلفين عن بعض تماماااااا

وابسط مثال على كدة إنت وسكتم
اصحاب وكل حاجة بس هو يقول شمال انت تقول يمين

وده معناه ان الواحد لازم يعرف ان فى إختلاف بين البشر سواء رجل او إمرأة فى الملابس او فى اى حاجة تانية .. ولازم يعرف ازاى يتعامل ويتعايش فى ظل الإختلاف ده

والله ولى التوفيق
سلام
:)

أمــانــى said...

ايه يا عم مفيش غير البنات هههههههههههههه
ده حقد ولا ايه مفيش حد مهتم بيكم هههههههههههههههه
تصدق بقى فى انواع من اللى قولت عليه انا معرفهاش ههههههه لانى طبيعى مش بأستخدها فبالتى مش هأسال عليه الا اذا كنت فاضية وناوية على غلاسة وأقرأ كل كلمة ههههههه
وايه الموديلات الخطيرة دى دى ما تكتب يا اخويا اسم الموقع ينوبك ثواب هههههههه
شوف بقى ما الدنيا كلها بتهتم بالستات والبنات ده مش ذنبنا يعنى حضرتك بتلاقى حفلات لعرض الازياء بالشى الفلاني وكل سنة فى موسم الشتا والصيف منافسة غير عادية على الانواع الجديدة والاشكال الجديدة بس اوعى حضرتك تفتكر الحاجات دى حلوه ابدآ لاننا بنلاقى صعوبة فى الاختيار لان طبعا اغلبه مش بيناسب كل البنات وخصوصآ المحجابات وكمان فى حاجة تانية لبس للنهار و لبس لليل ولبس للشغل ولبس للمقابلات واوعى كمان تنسى لامؤاخذة الجزمة بقى ماشية مع الطقم ولا لاء من حيث اللون والمنظر
ولازم حضرتك تعرف حاجة مهمة لازم الواحدة والواحد يكون على قدر من الشياكة فى كل شئ من طريقة كلام ولبس بس طبعآ كله فى الاطار الشرعى

وطبعا فى المقابل برضو فى رجالة مهوسة اوووووى بالموضة فى البس وقصات وهلم جر

البنت الشلبية said...

انا فهمت انت عايز تقول ايه ,,وهيا على ما اعتقد انك شايف من وجهة نظرك ان المرأة دى كائن محب للتغير عامة وبتحب تحس بوجودها فى المكان الى هيا فيه عكس الرجالة الى اه بتلبش وكل حاجة لكن متفرقش لو لقى كام واحد لابس زيه بس بأختلاف الالوان وده لان قالب ملبس الرجالة واحد تقريبا باختلاف الوانه ,,لكن المرأة تنوعت فى لبسها كتير وكمان فى طريقة لف الحجاب حتى كمان النقاب

بس ده يبرهن على حقيقة واحدة ان المرأة هتفضل مرأة سواء ملتزمة او غير ملتزمة ,,والحقيقة دى ان اى مرأه فى الدنيا بتحب تحس بوجودها فى اى مكان وان مفيش حد زيها حتى لو كانت منقبة والدليل على كده اختلاف اشكال النقاب مع انه فى الاخر نقاب وكمان الالوان بأختلاف درجتها

يا سيدى العزيز المرأة دى دايما كائن غامض وعمرك ما هتقدر تلاقى حقيقة واحدة تتفق عليها كل الستات وده لان طبيعة الستات متغيرة وانا مع انى بنوتة لكن بحمد ربنا ان رئيس الجمهورية راجل مش سيدة وده من رحمة ربنا بينا

تخيل كده لو كانت عندنا ريسة جموهرية ,,انا مبقللش من قدر المرأة طبعا لانى بنادى بحقوق المرأة طبعا لكن الاعتراف بالحق فضيلة

معلش طولت عليك بس تستحمل بقى انت الى فتحت النقاش ,,وانا بقى اكتر حاجة بحبها فى الدنيا انى اتناقش واقول رأيى

سلام

عصفور المدينة said...

فيه فرق يا هندسة بين تحليل الدوافع النفسي
وتحليلها وتحريمها الشرعي

زي دكتورة ما علينا ما بتقول وأكمل على كلامها هل هذه التدوينة مقدمة لموضوع قادم

زي مثلا شروط الحجاب الشرعي الصحيح
زي مثلا حرمة الضرب بالأرجل

موضوع لفت الانتباه ده مرض رجالي برضه وموجود عند كثير من الشباب يحب أن يلبس شيء متميز ملفت للنظر مش كل الشباب بيلبسوا قميص وبنطلون يمكن بعد ما يكبر ويعقل ويكرش وكدة يلبس قميص وبنطلون لكن نفس المرض موجود
وفيه شباب بيقعدوا يلبسوا وقت طويل ويغيروا الحاجة مع بعض (يع امراض) وولاد ناس والله

وممكن لو الحاجة انتشرت ما يلبسهاش

مسألة تنوع الملابس يرجع لطبيعة الإنسان نعم ولكن في ضوء الشرع

سكتم بكتم said...

هاهاهاهاهاه
البنات حيكلوك يامعلم
أما أنا فرحان فيك قوي
المره دي مش حعلق علي كلامك
بس ليا سؤال برئ
معلوماتي عنك أنك متعرفش من اللبس غير القميص والبنطلون وساعات كمان بتتلغبط فيهم

يطلع مين المصدر بتاعك ده يا خلبوص اللي قالك علي كل الأنواع ديه؟؟

Unknown said...

ههههههههههههههههههه

جاوب يا استاذ ما علينا جاوب

انت اللى جبته لنفسك

فى حاجة كمان عايزة اضفيها ماقولتهاش

ان المرأة معروف من بداية الخليقة انها كائن جميل

ودور فى الكون كدة على اى حاجة جميلة هتلاقيها مبهرة بألوانها واشكالها وتنويعاتها الكتيرة

ابسط مثال فى الورود مثلا
الوانها كتييييييرة جداااااااا
وكل ورزة ليها شكلها المميز عن الباقى خالص وليها ريحتها المختلفة والإحساس المختلف مع كل وردة
بنشوفها

فمابالك بقا بالإنسان المكرم على باقى المخلوقات وكمان الجزء الجميل فيه اللى هو المرأة؟؟

عصفور المدينة said...

على فكرة م حسن محمود وأنا وسكتم الرجالة الوحيدين في التعليقات هنا

محمد عبد الغفار said...

ضربه فى مقتل ولكنهن لا يعترفن

ونصيحه حول القناه على الرجاله

eldoctor said...

انت اتجننت .. تتكلم فى لبس الستات .. صحيح ...
اصلك لسه عازب ..
مسيرك تجوز .. و ابقى فكر تقول رايك فى اى حاجة فى اللبس .. او الاكل كده ...!!!

رفقة عمر said...

ربنا ينجحك يارب وفرحتنى ان الدراسه فى كليه تجارة حسسنى كدة انى كنت فى كليه مهمه
وبعدين ازاى تقول انك مش مهتم بالخطوة دى طالما انها خطوة لهدف اكبر فهى اكيد مهمه ربنا يوفقك اللهم امين وحب الشئ يحبك من فضلك حب هذه الشهادة علشان تراها يسيره وان شاء الله توصلك لهدفك الاكبر
بالنسبه لحفظى دة بيكون فضل من الله وسبحان الله لسه مش قادرة يمكن بسبب الظروف اللى مريت بيها مش عارفه اركز بس ربنا كريم وان شاء الله هاحاول
دعواتك