Saturday, June 09, 2007

التااااج عليكوااا حق

التاج دا وصلني من أطيب مدونة .. بنت جنوب مصر الأفوكاتو أماني .. شكرا يا حضرة الأفوكاتو وتاجاتك على راسنا من فوووق ونجاوب عليها بزيادة الرغي حبتين كمان ..
وصلني برضه من رفقة عمر ربنا يفرج عنها وترجع لنا زي الأول وأحسن كمان يااارب

انت مين؟
مواطن مصري مسلم

مين أكتر ست أشخاص بتحبهم؟
برضه حعتبر المقصود في السؤال هم الأشخاص اللي التقيت بيهم مش سؤال مطلق وعليه فحتكون الإجابة كالتالي :
منة بنت خالي .. خالتي المقيمة في ليبيا .. والدي والدتي .. الشيخ أحمد .. الدكتور سكتم بكتم والباشمهندس (وس) ..
كده سبعة يالا واحد من عندي زيادة
برضه حعتبر الحب المقصود في السؤال نوع معين من الحب مصرح بالحديث عنه .. أما الحب اللي من النوع التاني فاحتفظ بالستة لنفسي ...

انت سعيد؟
طبقاً لنظرية الترمس في السعادة .. ودي طبعاً نظرية من نظرياتي وتنص على إن السعادة هي توافق الظروف والوسائل والوسط والمحيط الخارجي مع الأهداف والمبادئ والقيم الشخصية .. فأنا كده غير سعيد في الإجمال .. لكن طبعا الحمد لله على كل حال .. لأنه سبحانه بيمن علينا ما بين وقت والتاني بألوان من السعادة بشعر فيها إنه حيزت لي الدنيا وما فيها .. ولولا هذه اللحظات ما احتملنا .. فالحمد لله أولا وآخرا

لو اجتمعت أنا وحسني مبارك في غرفة واحدة؟
حيبقى حوار هادئ جدا أحاول أوصل له فيه النصيحة واشرح له المعاناة اللي بيواجهها شعب مصر في ظل حكمه وأنه حينال أكثر بكثير مما ينال الآن لو إنه أقام العدل .. ولن يخلو الحوار من مداعبات الذي يكسوها الاحترام فطبعا حخاطبه بسيادة الرئيس وحضرتك وفخامتك .. أظن الحال ده حيستمر لمدة 3 دقائق بعد كده مش حقدر امسك أعصابي أكتر من كده ولا مؤاخذة حقلع اللي في رجلي ... وأنتوا عارفين الباقي

لو معاك مليون و نص جنيه تعمل بيهم ايه؟
حتجوز بيهم واعمل مشروع صغير على قدي كده .. فيه حاجة نفسي اعملها من زمان لو ربنا من عليا بمبلغ كبير من اللي عدد الأصفار فيه يتجاوز الستة .. نفسي اوزع على كل واحد بيصلى الفجر في مسجدنا .. نقول مثلا 20 ألف جنيه لكل واحد .. هما حوالي اربعين واحد .. يعني 800 ألف جنيه ويتبقى لي 700 .. اممممم .. طيب كفاية كل واحد ياخد 15 ألف .. ههههه

بتحب مصر؟
الحقيقة سؤال في منتهى الغربنة ... بحبها أكتر مما تتخيلوا

بتحب البنات؟
جدا جدا .. يمكن قلت قبل كده في بوست سابق إني من مكان مصري عريق في تفضيل البنات على الولاد على عكس ما يقال على غالب أهل مصر

انت مسلم؟
الحمد لله

ليه؟
لما بسمع إن الله تعالى أو الرسول صلى الله عليه وسلم أمر بكذا أو نهى عن كذا .. ما بدورش على مخرج من الأمر أو النهي .. بنفذ فورا قدر استطاعتي لغاية ما يظهر المخرج براحته .. لو ظهر كان بها لو ما ظهرش .. فانا زي ما أنا .. ومهما كان الأمر شاق والنهي عن حاجة بحبها فبمتثل للأمر قدر الاستطاعة واسأل ربنا يسامحني على ما كان مني من ذلل

مين أكتر شخصية متقدرش تستغنى عنها في حياتك؟ و ليه؟
أمي .. معلش يمكن تقولوا إني منفعي أو بتاع مصلحتي .. بس أنا بحاول أجاوب بصراحة .. والدتي محور حياتي .. من أول الفطار اللي بتحضره ليا وهدومي اللي بتكويها لي .. أنا من الناس الخايبة اللي ما بتعرفش تشتري أي حاجة ولا تعمل لنفسها أي حاجة .. والدتي هي اللي بتشتري لي كل حاجة .. وبتعمل لي كل حاجة .. ربنا يخليها لي يارب .. ويخلي كل الأمهات

ايه أكتر موقف محرج تعرضت ليه؟ و اتصرفت ازاى ؟
والله المواقف المحرجة كتير حفتكر إيه ولا إيه .. بس ححكي لكم موقف محرج من أيام الجيش .. هو موقف طويل فاستحملوني شوية ..

وأنا في الجيش كان كل يوم من أيام الاسبوع فيه مجموعة معينة من التدريبات لازم تتعمل .. وكان يوم السبت مخصص لمجموعة من التمارين عبارة عن تسلق مواسير وحبال وسلالم وحاجات غريبة كده .. وأنا من اصحاب الأوزان الثقيلة وما ينفعش الكلام ده معايا .. لكن كنت بحاول والعملية ماشية .. بس كان فيه تمرين كان غير كل التمارين .. كانوا سلمين ارتفاع 4 متر ومربوط ما بينهم حبل طول حوالي 4 متر في آخر درجة بينهم والسلمين واقفين على الأرض بواسطة مجموعة من العساكر .. يعني السلم مش ثابت .. والمفروض إن العسكري مننا يطلع على سلم وبعد كده يمسك الحبل بإيده ويرفع رجله على الحبل بشكل رجل على رجل ويسحب بإيده وظهره للأرض ووشه للسما لغاية ما يوصل الناحية التانية من السلم وينزل .. وكان قوة اللواء كلها حاضرة .. عساكر وظباط وقادة

أنا طبعا شفت الكلام ده وقلت على جثتي وقعدت اتهرب واستخبى في وسط الناس والزحمة واعيد التمارين التانية لغاية ما الساعة دي بتاعة تمارين الصباح تعدي على خير .. وعمال ارجع ورا كل واحد واستخبى زي اسماعيل ياسين في البحرية لما كان حينط في المية

بس على مين .. بعد ما الناس خلصت كلها كل التمارين والكل واقف يتفرج .. رئيس أركان اللواء قعد ينادي .. حد ما عملش التمرين ده .. وانا ولا كأني هنا .. حد ما عملش التمرين ده .. وأنا مفيش .. لقيته شاور عليا وللاسف كنت معروف ليه .. العسكري بتااااااااع سريييييييية المهندسييييييييين .. تمااااااام يا فنننننندم .. دا أنا بقول .. أنت ما عملتش التمرين يا عسكري اطلع .. رحت جري بالخطوة السريعة ورحت ع السلم الأولاني .. طبعا الرجالة اللي ماسكين السلم أو ما شافوني وشهم جاب ألوان .. وأنا مالي ورحت طالع ومتشعلق وسحبت سحبت سحبت لغاية ما وصلت نص الحبل .. طبع الرجالة اللي تحت بقت عيال والسلمين مالوا على جوا والحبل نزل لتحت ليكون حرف V أمثل أنا اسفل نقطة فيه .. وطبعا مستحيل إني اعرف اطلع النص الباقي لأن النزول اسهل من الطلوع إضافة إلى أن دراعي كان باظ اصلا .. رحت منادي .. بعد إذنك يا فندم حنزل .. وحنزل دي معناها إني حرمي نفسي على المراتب اللي تحت من ارتفاع 4 متر ,, وهو أبدا إياك تنزل يا عسكري لو نزلت 15 يوم جزا .. وأنا متشعلق في الهوا ومش عارف اكمل ولا عارف انزل ولواء كامل من الجيش المصري بجميع قياداته بيتفرج عليا .. انزل يا فندم .. وهو يقول : إياك يا عسكري .. آخر ما زهقت رحت منزل رجلي من ع الحبل وبقيت متشعلق بإيدي بس ورجلي مدلدلة وابص له .. واقول يمكن يتعاطف .. انزل يا فندم .. لو نزلت يا عسكري 15 يوم .. فضلت متشعلق كده برهة من الوقت مروا كأنهم 17 سنة .. وفي الآخر رميت نفسي وقلت اللي يحصل يحصل .. بعد ما نزلت لقيته عمال يضحك .. ابن الـ .. الناس الطيبة

إيه الأمنية اللى بتدعى دايما ربنا انه يحققها ليك؟
بدعي كتير ونفسي ربنا يستجب إني أدخل الجنة بغير سابقة عذاب لا في القبر ولا في الحشر ولا بعد الحساب ..
يارب يحققها لي ولكل المسلمين ياااارب

نمرر التاج لمين ؟
أخيرا جت اللحظة اللي كنت مستنيها ... أمرره لمبرمج حر طبعا .. في عملية انتقام لعمليات مشابهة سابقة .. واللي مشعارف هو غطسان فين
وأمرره للدكتورة ما علينا لو فضيت يعني .. أنا عارف إنها بتجري على كوم لحم ومش فاضية
وللآنسة إنسانة بعد ما تخلص امتحاناتها
ولشلبية هانم لما ترجع من المصيف
ولأحمد سمير باشا نخرجه شوية من جو المواضيع النارية بتاعته
وللدكتور فضفضة ولو إن شهر ستة لسه ما خلصش .. بس لو فضيت يعني

14 comments:

Ma-3lina said...

ارغى ارغى مهو مش فلوسك

اقعد عشر دقايق اقرا بوست ليه يعنى الوقت من ذهب

ياااا ربى على الرغى

المهم دا موضوع محرج ؟؟؟ايه الاحراج اللى فيه ؟؟؟

ما عليناا

بس اجابتك على حسنى دى جامدة بجد فى الاول قلت ايه الادب و الاحترام ده و بعدين فهمت ههههه

اه على التدبيسة انا لسه عاملة تاج هيا شغلانة باه

طيب


ماشى



حااااااااضر

Ma-3lina said...

أيوة مش فاضية شغالة 24 ساعة اصل ظروف المعيشة بقت صعبة

يالا ماا عليناااا

هبقى احاول افضى نفسى كدا بتاع دقيقتين اعمل التاج على السريع

david santos said...

Thanks for you work and have a good weekend

KaRiM said...

بدعي كتير ونفسي ربنا يستجب إني أدخل الجنة بغير سابقة عذاب لا في القبر ولا في الحشر ولا بعد الحساب .. ..

آمين
:)

أمــانــى said...

كل شئ له نظريات عندك هههههههههههههههههه
مرة التوازى والتوالى ومرة مدرسة مش عارفه ايه ودلوقتى الترمس ممممممم
متكونش حضرتك قريب آل فيثاغورث هو اسمه كده ولا لاء اصل زى ما حضرتك عارف محبة اوووى للهندسة ههههههههههههههههههههههههه

ههههههههه عارف فكرتنى بفليم عبود على الحدود هههههههههههههههههههههههههههههه

ربنــا يدخلك الجنة بلا سابقة عذاب اللهم آمـــــــــين

Mohamed A. Ghaffar said...

احلى حاجه فى التاج ده انك مبعتهوليش

رينـــــــــــا said...

السلام عليكم
هههههههههههههههههههههههههههههههه
ههههههههههههههههههههههههههههههه
لا اجاباتك جامدة جدا
بس تعالى هنا هو انت بتحب مامتك علشان كدا بس
وش متغاظ

عجبتنى اوى اجابه انت ليه مسلم
ماشاء الله عليك
ربنا يثبتك وينجينا وينجيك يارب

بس على رأى امانى ايه حكايه النظريات معاك
هى الهندسه مقصرة عليك للدرجه دى يعينى
هههههههههههههههههههههههه
الموقف المحرج دى فقرى اوى
هههههههههههههههههههههههههه
لا بجد دمك خفيف:D

رفقه عمر said...

انا كنت بصراحه محتاجه اضحك وضحكت على الموقف المحرج جدا كويس ان كان فيه مراتب والا كانت حكايه
وطبعا طبيعى هاتعمل كدة مع مبارك لانه لوحدة عايزين نعرف لو كان معاه الحرس بتاعه كنت هاتعمل ايه
رزقنا الله واياك الجنه وجميع المسلمين الجنه بغير حساب ولا سايقه عذاب

ammola said...

ممكن لما ربنا يديك المليون ونص تبقى تقوللى من غير تسييح انت بتصلى الفجر فين؟

إنـســانـة said...

عايزة اقولك انى مبطلتش ضحك من اول التاج لأخره

خصوصا على نظرية الترمس دى هههههههههههههه ربنا يكون فى عونك يا منة تلاقى دماغها ورمت من ناس معينة .. واخد بالك يا حسنين؟

جيت فى اخر التاج واتغظت موووت عشان بعتهووولى ... ربنا يسامحك يا حسنين

بتصلى الفجر فين صحيح ياحسنين؟؟؟؟

عصفور المدينة said...

جميلة نظرية السعادة أظن عمرك ما حتكون سعيد غير لحظات خاطفة
حلو موقف الجيش
أنا بقة كان فيه تمرين ورحت طالع من وسط التمرين قاعد ع الرصيف قعدوا يضربوا فيا لما زهقوا سابوني نمت
جم ناس شالوني فكروني مغمي علي صحيت لقيت نفسي متشال وعليها وزوغت بقية اليوم

BinO said...

الحمد لله نفدت من التاج
:)
طلعنا مختلفين في حاجة
انت من الأوزان الثقيلة

منة الله said...

ما علينا

ادعوك للمشاركة في استفتاء

اكثر 10 مدونات تاثيرا في قرائها

و احب ان اخبرك ان مدونتك تم ترشيحها فعلا

اليك الرابط

http://www.6ef.blogspot.com/

shlapia said...

لما انت مبتعرفش تعمل اى حاجة امال
لما هتتجوز هتعمل ايه !! مين هيطبخ ومين هيربى العيال!! ههههههه

وانا لسه مروحتش المصيف ده فى اول يوليو ان شاء الله