Monday, June 11, 2007

كائن اسمه منة

كذا مرة اجيب سيرة منة بنت خالي ولغاية دلوقتي ما تعرفوش عنها حاجة .. وعشان كده قلت احكي انهاردة حكاية صغيرة من حكاويها معايا ..
مبدئيا كده يمكن حضراتكم ما تصدقوش كلامي أو تقولوا إن ببالغ شوية أو إن البنية ذات الثمان أعوام ما كانتش قاصدة وإن الحكاية جت كده بظروفها .. وعشان كده انصح قبل الإطلاع على الحكاية قراءة مقال أختي رفقة عن شراسة الأطفال ..

أما الكائن الخرافي اللي اسمه منة فهو بعيد كل البعد عن الشراسة .. وإليكم إحدي حكاويه وانتوا احكموا بنفسكم

مقدمة
منة ساكنة في الشقة اللي تحتينا بالضبط ولما بكون في البيت بتقضي معظم الوقت معايا تاكل وتشرب وتلعب ع الكمبيوتر وتصحيني من النوم وتقومني من على شغلي عشان العب معاها ولازم تنادي عليا من البلكونة علشان اشاور لها وانا ماشي في الشارع وامبارح صممت إني اعمل لها فشار بنفسي ووقفت تتفرج عليا وانا بعمله وتغني اصفر يا اخضراني مين آساك عليا .. وبعد ما خلصت سابتني وسابت الفشار ونزلت بمنتهي برود الأعصاب .. إلخ إلخ إلخ

المهم خلينا في الحدوتة

المشهد الأول
بنت خالي التاني (لام) اللي هي تبقى بنت عم منة وعندها حوالي 20 سنة .. زارتني في أحد الأيام وطلبت إني اشرح لها بعض الحاجات على الكمبيوتر عشان عندها امتحان في المنحة وعايزة تراجع قبليه ..
وطبعا مفيش مجال للرفض فقبلت .. وقعدت معاها اشرح لها وقعدت منة معانا ساكتة تبص لنا وكل ما اسألها : مالك ؟ تقول: مفيش حاجة وتسكت وتبص لنا .. وبعد شوية نزلت بدون أي كلمة وقعدت يومين مش بتطلع تقعد معايا خالص ..

المشهد الثاني
ظهرت منة من جديد بعد غياب يومين .. وسألتها طبعا كنتي فين ؟ .. فقال لي إنها زعلانة مني
ليه يا منة
عشان لما جت (لام) سبتني وقعدت معاها
ما انتي عارف يا حبيبتي إنها عندها امتحان وكنت براجع لها حاجات .. وبعدين إنتي اللي نزلتي ما كنتي قاعدة معانا !!
هو انت حتتجوزها ؟؟
إيه ؟؟ مين ؟؟ فين ؟؟ ليه ؟؟ إيه الكلام ده ؟؟
لا أنا بسأل يعني .. ما تتجوزها دي طيبة ؟؟
لا مش حتجوزها ومالكيش دعوة بالكلام ده ..
واستمر الحال على كده .. كل كام يوم تسالني هو انت حتتجوز (لام)؟ وأنا اقول لأ ..

المشهد الثالث
بعد فترة تقريبا اسبوعين جت منة وقالت لي : شفت (لام) عملت إيه ؟؟!!
عملت إيه ؟ ..
عملت كذا وكذا وكذا .. إيه دا دي قلة أدب دي ..
بنت عيب كده .. إزاي تقولي على واحدة اكبر منك إنها قليلة الأدب .. هي سنك عشان تشتميها .. إذا كنتي بتقولي عليها هي قليلة الأدب فإنتي كده قليلة الأدب زيها وأكتر كمان عشان بتشتمي حد اكبر منك

المشهد الرابع
منة في زيارة لبنت عمها (لام) وقالت لها حسب ما بلغتني هي بنفسها .. شفتي ما علينا قال عليكي وعليا إيه .. بيقول عليا إني قليلة الأدب زيك ... يعني انا وانتي قلالات الأدب

المشهد الأخير
منة جاية تبلغني باللي حصل .. على فكرة (لام) بتقول لك شكرا على الكلمة اللي أنت قلتها عليها ..
كلمة إيه ؟؟
أنت عارف
لا مش عارف كلمة إيه ؟؟ هو إيه اللي حصل
حقول لك بس ما تخاصمنيش
ماشي قولي
راحت حكيتي لي على كل حاجة وإنها قالت كده لـ(لام) وإن (لام) زعلت جدا وحذفت اسمي من تليفونها وحلفت ما تيجي عندنا تاني ولا تكلمني تاني ..

المشكلة إني لما سمعت كده وبعد قليل من الإذبهلال ... انفجرت بالضحك

عادي بتحصل مش كده .. براءة أطفال !!

17 comments:

عصفور المدينة said...

هاهنا نرى الفرق بين المخ والعضلات
أقصد المكر وفي مقابلع عند رفقة الخبط والرزع
أقصد يعني
الجنس اللطيف
والجنس العنيف

Ma-3lina said...

ههههههههه

البنت عندها نظرة برده للموضوع
شافتك مهتم بتشرح و سايبها لوحدها فشكت

وحبت تنبهك ههههه الحق عليها


المهم فرحك على لام امتى ان شاء الله ؟؟

أمــانــى said...

هههههههههههههههههههه
ربنا يخليها ويحفظها يارب آمــــين
بص بقى اصل الاطفال لازم هتربى نفسك معاهم فى الاول قبل ما تربيهم ولازم تكون حريص معاهم فى الكلام اووووى
انا بقى العب معاهم اه احكى معاهم بالسياسة بس هههههههههه
لانهم كمان فكرهم عالى سبحان الله ربنا يخليها ويحفظها يـااااارب آمــــــــين

انا باحسهم بيعملوا طبخة جامدة اووووى بس حاسب اصلها مليانة بهارات
هههههههههههههههههههههههههههههه
بس ما قولتش هى ناوية على ايه
ههههههههههههههههههههههههههههههههههههههههههههههههههههه
بعد أذنك يا باشمهندس
أســتاذنا عصفور المدينة
شو تقصد
ممممممممممممممممممم
نريد توضيح
قصدك تقول ان كيدهن عظيم
:D
تحياتى لحضرتك

Mohamed A. Ghaffar said...

لم ارى فى كل ذلك الا شئ واحد

انها تتعود ببساطه وتلقائيه على نقل الكلام ، ولم يوقفها احد اعتباراً انها صغيره السن

وهو منزلق ينزلق اليه كل الكبار بكل اسف

رفقه عمر said...

ماشاء الله لا قوة الا بالله ربنا يبارك فيها بس كنا عايزين صورة ليها كمان
المهم دة يثبت ان كيدهن عظيم من الصغر يعنى شئ متاصل بالفطرة مش بالخبره
بجد عرفت تخلص من لام بكل سهوله وبكل برائه
هانحاول نتبع استراتيجيه منه دى لما نكون عايزنين نخلص من حد

رفقه عمر said...

ايوة نسيت اقولك ليا بنت اختى اللى هى اخت عمر
عندها 7 سنين عايزة تتجوز قبلى وبتزعل جدا لو سمعت انى ممكن اتجوز قبلها وممكن تبكى كمان

رفقه عمر said...
This comment has been removed by the author.
ammola said...

شوف مهما تحاول عمر دماغك ما حتجيب احنا بنفكر ازاى
يعنى انا ما طلعتش من القصه الا بسؤال واحد..(ايه حكاية لام) هه؟؟؟؟

shlapia said...

ههههههههه فعلا براءة الاطفال فى عينيها

انا كنت كده زمان لما كنت بحب اى حد كبير مكنتش بحبه يكلم اى بنوتة غيرى بس مكنتش بعمل مكايد كده ..كنت بعيط اوى بصوت عالى ههههههه

يلا المهم انت عامل ايه؟ واخبارك ابه

خمسة فضفضة said...

السلام عليكم ورحمة الله وبركاته


هههههههههههههههههه

جيل الانترنت ياسيدي ....الا هي الانترنت دخلت عندكوا ولا الرطوبه بتاكلها ....ههههههه

ربنا يخليلك منه وماتبقاش تزعلها تاني ، وسيبك من لام دي اللي مافيش وراه غير المشاكل ..ههههههه


تحياتي

BinO said...

أعتقد أني حنضم للأستاذة أمل في تساؤلها
أمتي الجواز أن شاء الله؟؟؟

إنـســانـة said...

ههههههههههههههه

إحساسى مايخيبش يا نااااااااس

هانضوم صوتنا كلنا مع بعض ونعمل مظاهرة هنا شعارها: الفرح إمتى؟؟؟؟؟

وهتعزمنا كلنا طبعا ولازمن تعزمنى انا وسولى وكاميكاز عشان ناكول الداتو( الجاتو يعنى ) ونصبر فى منة عشان ماتعيطش

:D

الصارم الحاسم said...

وأنا وأنا وأنا

امتى الجواز ان شاء الله
(:



بعيدا عن التهريج


منة عايزة تتظبط لان ده اتجاه غلط

لازم تصالح لام بغض النظر عن اي شئ


بس صالحها مرة واحدة ...وبس .....مش كل يوم ....ما شي يا اخويا
(:
(:

KaRiM said...

مش ممكـــــــــــــــــن...
أنا مقدرتش أمسك نفسى من كتر الضحك وأنا بقرأ البوست دى
:)

ربنا يخليهالك يا ما علينا ..

ومتنساش تعزمنا كلنا فى فرحك

;)

رينـــــــــــا said...

هههههههههههههههههههههههه
ههههههههههههههههههههههههه
ههههههههههههههههههههههههههه
مش قادرة
الله
دى لو بنتى اصلا
هموت فيها

يانهاااااااااااااااااااااار
تجنن
الله يكرمك سلملى عليها اوى اوى

semsem said...

براءة اطفال
:)

رفقه عمر said...

السلام عليكم ماعلينا
اولا انا فيه حاجه لا حظتها مش عارفه انا صحه ولا لا اولا مش رديت على تعليقى قلت عادى يمكن مش اخد باله
تانى حاجه كنت معتقده انك اول واحد تبارك ليا طبعا مش باركتلى قلت يبقى فيه حاجه مضايقك وطبعا علشان اتفقنا اننا اخوات قلت اسالك لعله يكون خير
واكيد زى م انت بتستفسر ان كنت زعلانه منك ولا لا انا برضه بستفسر بصراحه لانى لم اعهد منك دة وانا طبعا بقولك اذا كنت زعلانه او لا على العموم دى حريتك الشخصيه بس علشان
انا بعتبرك اخ ليا فعلا فكنت لازم اسالك
علشان لو تعليقى غير مرغوب فيه يبقى مش اعرض نفسى تانى للموقف دة
وعادى فى الاول والاخر احنا اخوات اذا كنت تعتبر اننا فعلا اخوات