التااااج عليكوااا حق

التاج دا وصلني من أطيب مدونة .. بنت جنوب مصر الأفوكاتو أماني .. شكرا يا حضرة الأفوكاتو وتاجاتك على راسنا من فوووق ونجاوب عليها بزيادة الرغي حبتين كمان .. وصلني برضه من رفقة عمر ربنا يفرج عنها وترجع لنا زي الأول وأحسن كمان يااارب انت مين؟ مواطن مصري مسلم مين أكتر ست أشخاص بتحبهم؟ برضه حعتبر المقصود في السؤال هم الأشخاص اللي التقيت بيهم مش سؤال مطلق وعليه فحتكون الإجابة كالتالي : منة بنت خالي .. خالتي المقيمة في ليبيا .. والدي والدتي .. الشيخ أحمد .. الدكتور سكتم بكتم والباشمهندس (وس) .. كده سبعة يالا واحد من عندي زيادة برضه حعتبر الحب المقصود في السؤال نوع معين من الحب مصرح بالحديث عنه .. أما الحب اللي من النوع التاني فاحتفظ بالستة لنفسي ... انت سعيد؟ طبقاً لنظرية الترمس في السعادة .. ودي طبعاً نظرية من نظرياتي وتنص على إن السعادة هي توافق الظروف والوسائل والوسط والمحيط الخارجي مع الأهداف والمبادئ والقيم الشخصية .. فأنا كده غير سعيد في الإجمال .. لكن طبعا الحمد لله على كل حال .. لأنه سبحانه بيمن علينا ما بين وقت والتاني بألوان من السعادة بشعر فيها إنه حيزت لي الدنيا وما فيها .. ولولا هذه اللحظات ما احتملنا .. فالحمد لله أولا وآخرا لو اجتمعت أنا وحسني مبارك في غرفة واحدة؟ حيبقى حوار هادئ جدا أحاول أوصل له فيه النصيحة واشرح له المعاناة اللي بيواجهها شعب مصر في ظل حكمه وأنه حينال أكثر بكثير مما ينال الآن لو إنه أقام العدل .. ولن يخلو الحوار من مداعبات الذي يكسوها الاحترام فطبعا حخاطبه بسيادة الرئيس وحضرتك وفخامتك .. أظن الحال ده حيستمر لمدة 3 دقائق بعد كده مش حقدر امسك أعصابي أكتر من كده ولا مؤاخذة حقلع اللي في رجلي ... وأنتوا عارفين الباقي لو معاك مليون و نص جنيه تعمل بيهم ايه؟ حتجوز بيهم واعمل مشروع صغير على قدي كده .. فيه حاجة نفسي اعملها من زمان لو ربنا من عليا بمبلغ كبير من اللي عدد الأصفار فيه يتجاوز الستة .. نفسي اوزع على كل واحد بيصلى الفجر في مسجدنا .. نقول مثلا 20 ألف جنيه لكل واحد .. هما حوالي اربعين واحد .. يعني 800 ألف جنيه ويتبقى لي 700 .. اممممم .. طيب كفاية كل واحد ياخد 15 ألف .. ههههه بتحب مصر؟ الحقيقة سؤال في منتهى الغربنة ... بحبها أكتر مما تتخيلوا بتحب البنات؟ جدا جدا .. يمكن قلت قبل كده في بوست سابق إني من مكان مصري عريق في تفضيل البنات على الولاد على عكس ما يقال على غالب أهل مصر انت مسلم؟ الحمد لله ليه؟ لما بسمع إن الله تعالى أو الرسول صلى الله عليه وسلم أمر بكذا أو نهى عن كذا .. ما بدورش على مخرج من الأمر أو النهي .. بنفذ فورا قدر استطاعتي لغاية ما يظهر المخرج براحته .. لو ظهر كان بها لو ما ظهرش .. فانا زي ما أنا .. ومهما كان الأمر شاق والنهي عن حاجة بحبها فبمتثل للأمر قدر الاستطاعة واسأل ربنا يسامحني على ما كان مني من ذلل مين أكتر شخصية متقدرش تستغنى عنها في حياتك؟ و ليه؟ أمي .. معلش يمكن تقولوا إني منفعي أو بتاع مصلحتي .. بس أنا بحاول أجاوب بصراحة .. والدتي محور حياتي .. من أول الفطار اللي بتحضره ليا وهدومي اللي بتكويها لي .. أنا من الناس الخايبة اللي ما بتعرفش تشتري أي حاجة ولا تعمل لنفسها أي حاجة .. والدتي هي اللي بتشتري لي كل حاجة .. وبتعمل لي كل حاجة .. ربنا يخليها لي يارب .. ويخلي كل الأمهات ايه أكتر موقف محرج تعرضت ليه؟ و اتصرفت ازاى ؟ والله المواقف المحرجة كتير حفتكر إيه ولا إيه .. بس ححكي لكم موقف محرج من أيام الجيش .. هو موقف طويل فاستحملوني شوية .. وأنا في الجيش كان كل يوم من أيام الاسبوع فيه مجموعة معينة من التدريبات لازم تتعمل .. وكان يوم السبت مخصص لمجموعة من التمارين عبارة عن تسلق مواسير وحبال وسلالم وحاجات غريبة كده .. وأنا من اصحاب الأوزان الثقيلة وما ينفعش الكلام ده معايا .. لكن كنت بحاول والعملية ماشية .. بس كان فيه تمرين كان غير كل التمارين .. كانوا سلمين ارتفاع 4 متر ومربوط ما بينهم حبل طول حوالي 4 متر في آخر درجة بينهم والسلمين واقفين على الأرض بواسطة مجموعة من العساكر .. يعني السلم مش ثابت .. والمفروض إن العسكري مننا يطلع على سلم وبعد كده يمسك الحبل بإيده ويرفع رجله على الحبل بشكل رجل على رجل ويسحب بإيده وظهره للأرض ووشه للسما لغاية ما يوصل الناحية التانية من السلم وينزل .. وكان قوة اللواء كلها حاضرة .. عساكر وظباط وقادة أنا طبعا شفت الكلام ده وقلت على جثتي وقعدت اتهرب واستخبى في وسط الناس والزحمة واعيد التمارين التانية لغاية ما الساعة دي بتاعة تمارين الصباح تعدي على خير .. وعمال ارجع ورا كل واحد واستخبى زي اسماعيل ياسين في البحرية لما كان حينط في المية بس على مين .. بعد ما الناس خلصت كلها كل التمارين والكل واقف يتفرج .. رئيس أركان اللواء قعد ينادي .. حد ما عملش التمرين ده .. وانا ولا كأني هنا .. حد ما عملش التمرين ده .. وأنا مفيش .. لقيته شاور عليا وللاسف كنت معروف ليه .. العسكري بتااااااااع سريييييييية المهندسييييييييين .. تمااااااام يا فنننننندم .. دا أنا بقول .. أنت ما عملتش التمرين يا عسكري اطلع .. رحت جري بالخطوة السريعة ورحت ع السلم الأولاني .. طبعا الرجالة اللي ماسكين السلم أو ما شافوني وشهم جاب ألوان .. وأنا مالي ورحت طالع ومتشعلق وسحبت سحبت سحبت لغاية ما وصلت نص الحبل .. طبع الرجالة اللي تحت بقت عيال والسلمين مالوا على جوا والحبل نزل لتحت ليكون حرف V أمثل أنا اسفل نقطة فيه .. وطبعا مستحيل إني اعرف اطلع النص الباقي لأن النزول اسهل من الطلوع إضافة إلى أن دراعي كان باظ اصلا .. رحت منادي .. بعد إذنك يا فندم حنزل .. وحنزل دي معناها إني حرمي نفسي على المراتب اللي تحت من ارتفاع 4 متر ,, وهو أبدا إياك تنزل يا عسكري لو نزلت 15 يوم جزا .. وأنا متشعلق في الهوا ومش عارف اكمل ولا عارف انزل ولواء كامل من الجيش المصري بجميع قياداته بيتفرج عليا .. انزل يا فندم .. وهو يقول : إياك يا عسكري .. آخر ما زهقت رحت منزل رجلي من ع الحبل وبقيت متشعلق بإيدي بس ورجلي مدلدلة وابص له .. واقول يمكن يتعاطف .. انزل يا فندم .. لو نزلت يا عسكري 15 يوم .. فضلت متشعلق كده برهة من الوقت مروا كأنهم 17 سنة .. وفي الآخر رميت نفسي وقلت اللي يحصل يحصل .. بعد ما نزلت لقيته عمال يضحك .. ابن الـ .. الناس الطيبة إيه الأمنية اللى بتدعى دايما ربنا انه يحققها ليك؟ بدعي كتير ونفسي ربنا يستجب إني أدخل الجنة بغير سابقة عذاب لا في القبر ولا في الحشر ولا بعد الحساب .. يارب يحققها لي ولكل المسلمين ياااارب نمرر التاج لمين ؟ أخيرا جت اللحظة اللي كنت مستنيها ... أمرره لمبرمج حر طبعا .. في عملية انتقام لعمليات مشابهة سابقة .. واللي مشعارف هو غطسان فين وأمرره للدكتورة ما علينا لو فضيت يعني .. أنا عارف إنها بتجري على كوم لحم ومش فاضية وللآنسة إنسانة بعد ما تخلص امتحاناتها ولشلبية هانم لما ترجع من المصيف ولأحمد سمير باشا نخرجه شوية من جو المواضيع النارية بتاعته وللدكتور فضفضة ولو إن شهر ستة لسه ما خلصش .. بس لو فضيت يعني

يا تاجاااتك يا أحمد

تاج ظريف وصل لنا عن طريق منبع التاجات أحمد بيه المبرمج الحر .. وطبعاً لازم نرد عليه وإلا تبقى عيبة في حق إمبراطورية أرض الرغي ... التاجات عندنا ما تتأخرش كل ده أحب شخص لقلبك في الدنيا؟ الحقيقة الحقيقة .. أحب شخص ليا هو منة بنت خالي ذات ال 8 سنوات هي أحب وأقرب شخص قابلته لقلبي .. حاسس بتأنيب الضمير إني مش بقول والدي ولا والدتي .. بس هي دي الحقيقة .. إن شاء الله ح احكي كتير عنها .. او اعمل لها مدونة خاصة بيها وهي تحكي لكم حكاويها انسان مستعد تضحي بحياتك – ركز فى كلمة حياتك – عشانه؟ أي حد بحبه .. الحقيقة ما عرفش وقت الجد إيه اللي حيحصل .. بس مبدئياً .. كل واحد بحبه عندي استعداد أضحي بحياتي عشانه انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟ حفترض إن المطلوب شخص من اللي انا قابلتهم في الحقيقة مش سمعت عنهم مجرد سماع .... وإلا فاللي بكرههم بالسماع كتييييير جدا منهم اللي عايش ومنهم اللي ميت بس من اللي قابلتهم شخصيا واتعرفت عليهم وكرهتهم من كل قلبي .. الشاويس أنور والعياذ بالله ودا شخص عرفته في الجيش .. عبارة عن شر محض .. يمكن ما تصدقوش إن فيه شر محض وتقولوا كل واحد جواه خير .. بس طوال فترة معرفتي بيه .. ما شفتش منه خير قط .. بيصحى من النوم يسب الدين .. بيسرق حتى المية والأكل .. بيرتشي ويكذب .. مش بيصلي ولا حتى الجمعة .. طول ما هو موجود يوقع الناس في بعض وبسببه حصلت مشاكل كبيرة جدا في الوحدة وكان كلها هو المحرك ليها من خلف الكواليس وكان بيستمتع بكده اكبر استمتاع وكان بيفتخر بإنه وقع الناس في بعضها وإنه كان السبب في هذه المشاكل خواف جدا يخاف من خياله .. جبان للغاية ... كسووول .. مغرور ومدعي .. بذيء للغاية .. خاين للأمانة .. كل الصفات دي مش بفتري عليه وكل اللي اتعامل معاه عن قرب يعرف عنه كده .. المرة الوحيدة اللي شفت إنسانيته .. كانت لما دخلت عليه المكتب ولقيت الناس ملمومة حواليه بيواسوه وهو بيعيط .. فسألت إيه الحكاية .. قالوا ابنه تعبان ولأنه بياخد جزا حجز ورا جزا فمش عارف ينزل اجازة ... وطبعا تعرف بعد كده إنه لا ابنه تعبان ولا حاجة وكانت تمثيلية عشان القائد ينزله أجازة ... الحمد لله كان بيتجنبني قبل ما انا اتجنبه وإلا كان حصل اللي مذكور في التاج ... ما هو اسم اجمل كتاب كتبه بشر قراته ومحتفظ به حتي الان؟ لافتات احمد مطر ودواوينه ... تقدر تقول المجموعة الكاملة لأحمد مطر هي عندي أجمل كتاب كتبه بشر ... اسم كتاب كتبه بشر برضة- انت متعلق بيه وبتقرأه كل فترة؟ كتير برجع لكتاب بحر الدموع للامام ابن الجوزي أقرأ فيه شوية ... بحس براحة غريبة من أسلوب الوعظ البلاغي بتاعه اهم جهاز منزلى انت متعلق بيه او بتستخدمه كتير؟ الحقيقة الغسالة مرتبط بيها عاطفيا جدا ... جررررر اقول إيه ؟؟ .. الكمبيوتر طبعا مكان تحس بالراحة عندما تدخله؟ مسجد الإمام البخاري حدانا في البلد. شىء تحس بالراحة النفسية عندما تنظر اليه؟ البحر وأي جنينة وخضرا. مكان تحس فيه بالحنين الى شىء لا تدرى ماهو و ذكريات جارفة الى لاشىء؟ الشارع اللي فيه المعهد اللي أخدت فيه المراجعة النهائية لمادة الفيزياء في ثانوي ... كل ما امشي في الشارع ده اشعر بالحنين والذكريات الغير محددة اجمل مدينة زرتها داخل مصر ؟ ما زرتش مدن كتير في مصر .. بس المدن اللي رحتها يخلوني أقول مفيش أجمل من مديني أجمل مكان طبيعي رأيته داخل مصر ؟ سماء الصحراء الغربية اللي قضيت فيها جيشي كان جمالها غير عادي .. برغم القبح اللي كان موجود على الأرض بسبب أفعال البشر .. لكن كانت السما جميلة جدا جدا جدا .. وكأن الله عز وجل بيعوضنا إحنا المطحونين الغلابة عن اللي كنا بنشوفه .. شفت في مرة في أول الصيف السحاب زي القطن الأبيض .. على طبقتين ... سحابتين فوق بعض وكل طبقة سرعتها مختلفة عن التانية .. لما شفت المنظر قعدت متنح للسما .. عمري ما شفت المنظر ده في أي مكان غير هناك ... وبالليل بقى السما صافية جدا .. لدرجة إني كنت بشوف كمية نجوم غير طبيعية .. عدد وهمي ولا الشهب اللي ورا بعض .. حاجة رهيييييييييبة شخصية كارتونية بتحبها بطوط وتوم وجيري نوع هاتفك المحمول؟ تليفون الشعب .. نوكيا 1100 سرعة بروسيسور جهازك؟ الديسكتوب 2.4 واللابتوب 1.8 حجم ذاكرة –هارد- جهازك؟ الديسكتوب 80 جيجا واللابتوب 40 جيجا المساحة التى تشغلها المواد الاسلامية على جهازك؟ لو حسبت موسوعة هارون يحيي والأناشيد وأفلام الكارتون الإسلامية يبقى الإجمالي 8 جيجا تقريبا .. أهم هدف انت واضعه لحياتك الآن؟ في هذه اللحظة ... عايز اتجوز. مواصفات فتاة الأحلام بالنسبة لك؟ والله ممكن ترجع لبوست الأميرة من الأمارة .. وقبل كده متدينة بس تدينها مش بمعنى إنها بتحب الإسلام وبس .. لا ... أتمنى إنها تكون بتتنفس الإسلام .. على رأي واحد صاحبي إنها تكون صاحبة رؤية .. متفهمة .. صبورة .. قابلة للتغيير مش جامدة .. عاطفية .. رقيقة .. صف ما يأتى: شعورك لما بتسمع كلمة مصر ؟ يجعل صدره ضيقا حرجا كأنما يصعد في السماء شعورك لما بتسمع كلام عن اليهود؟ اليهود في حد ذاتهم بفتكر يهود المدينة في عهد النبي عليه السلام والسلام ... لكن لو المقصود الصهاينة فالشعور غل وغيظ مالوش حد شعورك لما بتشوف ظابط شرطة؟ بحاول اقنع نفسي إن فيه منهم ناس كويسة ومحترمة شعورك لما بتشوف الكناس العجوز فى الطريق؟ بزعل من نفسي إني مش بشكر ربنا كفاية على نعمه عليا .. وفيه ساعات بتمنى إني أكون مكانه واشعر بالرضا والطمأنينة والسلام اللي بحس إنه هو شاعر بيهم افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟ والله حيث إنني أصلا منهم يعني شبه الشاب ده .. فدا يخليني أشعر بمشاعر إيجابية تجاهه .. يعني أخ ليا .. يعني هييييييييييه .. أنا ماشي أهو .. بالمناسبة لما شفت السؤال دا عند أحمد مبرمج حر .. لاحظت إني بقالي مدة طويلة مش بخرج في الهيئة المذكورة في السؤال وكل لبسي بقى بنطلون وقميص .. حتى الدروس كنت بروحها أفندي .. فقلت لا بقى ما بدهاش .. فيوم السبت اللي فات موعد الدرس الاسبوعي اللي بحضره رحت ضارب الطقم التمام ورحت بيه الدرس ... هههههههه ... الشيخ استغرب جدا لما شافني باليونيفورم ؟؟؟ قالي مالك إيه اللي حصل ؟؟ .. احساس يراودك فى اشارة مرور مغلقة بسبب مسئول كبير؟ بتضايق جدا .. نمرر لمين ؟؟ طبعا للناس الحلوين رفقة طبعا .. بما إنها هي اللي اعطت اشارة الانطلاق لهذا البوست .. وعلى فكرة يا رفقة انا علقت عندك قبل ما اشوف سؤالك .. بينو .. حيقول لي مشغول وعنده مشروع جديد وخلافه .. حقول له ماليش دعوة .. التاج يتجاوب عليه خاااااااااااااالد الفنان .. موضوع الفوتوشوب اتكرر مع اللينكس .. فالتاج دا اقل واجب اعمله مع حضرتك .. سي محمد عبد الغفار .. فيه ناس تانية بعتوا له التاج ولسه ما جاوبش .. بنت الجنوب أماني الأفوكاتو الزمالكوية .. ياريت والله تجاوبي ع التاج ومش عايز اسمع سيرة الماتش الواد سكتم اللي مش عايز ينزل حاجة جديدة .. جاوب يابني من سكات

السلطانية تاني

تاج جديد من مبرمج حر .. وأسرع رد على تاج مني .. مش كنا هدينا اللعب يا باشمهندس وقلنا كفاية تاجات .. اعتبر ده يعني إلغاء لتفاهم إبريل ومعاهدة الشات بوكس ؟؟ .. لو كده يبقى خد بالك على نفسك ؟؟!!! section 1 last beverage? Tea in 50 with Milk ِlast phone call ? Shi7' Ahmed last instant message ? You , Not You but You last cd played ? Anasheed last time u cried ? From a long long time , Maybe 20 Hours last text message ? Yesterday Section 2 - Have You Evers dated someone twice? No hv u evers been cheated on ? No kissed someone & regretted it? No lost some one special? Yes been depressd ? Yes been drunk and threw up? إيه يا عم الأسئلة دي No Section 3 - List 3 Favorite Colors Blue, Black, White Section 4 - This month have you Made a new friend? No Fallen out of love? No Laughed until you cried? No Met someone who changed your life? Yes Found out who your true friends were? No , I know them Is there something you want to tell someone? Yes Would you kiss anyone on your top friends? No How many people on your top friends do you know in real life? Most of them How many kids do you want to have? many .. many .. many , I hope Do you have any pets ? No Do you wanna change your name? No , Some One Wants to do What did you do for your last birthday? Nothing , it was the fourth day in My Army Srevice days, By the Way My last Birthday was from 3 years ago , Ha Ha Ha , It is the truth What time did you wake up today? 4.20 am What were you doing at midnight last night? out with My best friend Name something you CANNOT wait for? Meet My Love Last time you saw your father? 2 days ago What is one thing you wish you could change about your life? be more Controled by Myself What are you listening to right now? Birds Have you ever talked to Tom? مين توم ده ؟؟ Have you ever talked about someone behind their back? Yes, I am sorry What’s the last piece of clothing you borrowed from anyone? Never Who’s getting on your nerves right now? SokTom BokTom Most visited webpage? Google Coke or Pepsi ? Neither مقاطع Mac or PC? PC التاج دا نمرره لمين ؟؟ مش عارف الناس كلها بتدعي عليا بسببك يا أحمد .. طيب نقول من بابا وماما وتيتا للحاج بينو بمناسبة سلامة الوصول وألف حمد لله ع السلامة ومن العاملين في مجلس المدينة للدكتورة فضفضة وبنقولك ربنا يخليكي يا دكتورة والفنان الكبير اللي مصر كلها بتحبه ربنا يديله الصحة الاستاذ الدكتور الفنان حسن .. آآآه قصدي خالد وللبني آدم اللي ما يتسماش سكتم بكتم اللي حفضحه عن قريب واعمل له جرسة بجلاجل وبهذوها المناسبة السعيدة احب اهدي تاج القيادة اللي فات للاستاذ محمد عبد الغفار .. هو متأخر شوبة .. بس بعد مراجعة قوانين التاجات لقيت مفيش مادة تمنع تمرير تاج متأخر شوية

التاج التاني على التوالي

الدكتور الطيبة جداً جداً ما علينا .. قامت مشكورة بتوجيه تاج للعبد لله .. هو أقرب لمقلب من كونه تاج .. بس بما إنها الأستاذة فأنا لازم اسمع الكلام وأجاوب .. هو عبارة عن اختبار سمات شخصية .. مين أنت في الزعماء What Famous Leader Are You? ومع إني زعيم مستقل وما احبش على رأي محمد صبحي الناس تقول عليا بقلد حد لكني قلت اعمل التيست وأشوف مين من الزعماء .. واخدين بالكم .. مين من الزعماء هو اللي يشبه لي ؟؟ المهم ما كدبتش خبر ودخلت ع الرابط لقيته تست كنت عملته قبل كده وكنت طلعت فيه اشبه حاجة غريبة .. قلت أكيد ساعتها ما جاوبتش صح .. فرحت مختار أكبر عدد من الأسئلة .. 45 سؤال طلعوا عنيا .. وجاوبت عليهم وفي الآخر لقيت نفسي شخصية تانية .. لقيت نفسي ومش عارف إزاي شبه .. قلت وماله بس أجرب مرة كمان على أقل عدد اسئلة .. 9 اسئلة .. ونشوف .. فلقيت نفسي شبه ... قلت لاااااا .. التيست دا أي كلام بقى أنا التلاتة دول !!! .. طيب إزاي ؟؟ .. وبعد التقصي لقيت التيست بيدي تسع شخصيات مفيش غيرهم غاندي - تريزا - كلينتون - جيفارا - إينشتاين - هتلر - كنيدي - صدام - لينكلون هما دول وبس .. وفين بقيت العالم ؟؟ .. مش عارف وبعدين أقول لكم على حاجة بلا تيست بلا بتاع .. لو عايزين تعرفوا أنا بحس إنه اشبه مين من الزعماء .. فانا بحس إنه شبه ... قصدي هو اللي يشبه لي .. أقول لكم ... ماااااااااااعلينا عشان كده التاج قبل ما امرره لازم اعدل فيه .. واخليه : قل لنا أنت بتشعر إنك تشبه لمين من زعماء القرن العشرين .. وليه ؟ أمرره لمين ؟ والله التاج دا ذو طبيعة خاصة فمعلش يا بينو .. كنت ناوي ما امررلكش تاج تاني بس التاج دا لازم يعدي عليك ميمو كمان عارف إنها مش بتحب التاجات بس التاج دا زي ما قولنا ذو طبيعة خاصة .. وهو كدا كدا اتوجه لها قبل كده بموجب مرسوم من جهات ملكية أخري .. يعني أنا بس بفكرها .. معلش يادكتور التاج دا برضه محتاجين حضرتك تجاوب عليه والصارم الحاسم لازم نعرف شخصيته .. قبل ما نرسمك كبير للقعدة وياريت الأفوكاتو أماني كمان تجاوب لنا مشكورة عليه

تاجون

التاجات دي شي ظريف جداً .. خصوصاً لو كان سؤالين ع السريع كده مش نوعية التاجات الطوييييلة اللي بتبقى عاملة زي استجوابات حسين باشا أو امتحانات الجغرافيا .. زي التاج إياه اللي مررته ........... أقول لكم .. مااااااعلينا المهم مبرمجنا الحر مرر لي التاج التالي 3 أسئلة عن أيام الدراسة .. هل كنت طالب شاطر فى المدرسة ؟ في المدرسة .. آه كنت شاطر ومتفوق وممتاز ومفيش زيي .. هو يعني حد حيدور ورايا .. الحقيقة إني كنت فعلاً أيام المدرسة شاطر ... والحمد لله السؤال ما جابش سيرة الكلية ايه كانت احب مادة و اكره مادة ليك فى المدرسة و الكلية؟ في المدرسة .. أحب مادة كانت الرياضيات ثم الرياضيات ثم الرياضيات .. وعلى فكرة دا مش حب دا عشق .. متعة .. لذة .. تحدي .. لو كانت الرياضيات امرأة كنت طاردتها طول عمري وطلبت إيدها .. كل مسألة في أي فرع من فروع الرياضيات كانت تحدي بالنسبة لي .. يأما اكسبها يإما تكسبني .. وفي الحالتين بستمتع بالتحدي .. في إعدادية جبت 59 من 60 وزعلت جداً ساعتها .. وفي ثانوية جبت فوووووووول مارك ... ودخلت مستوى رفيع رياضيات برضه وجبت 7.5 من 10 .. ودي درجة مش بطالة خصوصاً إني ما فتحتهاش إلا ليلة الامتحان آه نسيت أقول حاجة .. في الكلية شلتها مرتين .. مرة في سنة أولى ومرة في سنة تانية .. بس برضه بحبها بكره مادة الجغرافيا .. مالي أنا ومال تشتهر البرازيل بإنتاج البن .. وتتميز المكسيك بجوها اللي مش عارف إيه .. وعلل وجود الغابات الاستوائية في أثيوبيا ... إيه ده ؟؟ ... ولغاية دلوقت مش بحب الشيء دا أبداً .. في الكلية صعب افتكر كنت بحب إيه وبكره إيه لسببين .. الأول إني مش فاكر أسماء المواد اللي كنت باخدها إيه أصلاً والثاني لأني أحيان كتير بشك إن دخلت كلية من أساسه كنت عايز تتطلع ايه وأنت صغير ؟ حاجات كتير .. الأول ظابط في الجيش .. وبعد كده كنت أكثر تحديداً .. ظابط مهندس ميكانيكي .. وأخيرا مهندس مدني إنشاءات .. والحمد لله ولا حاجة من دول حصلت .. اللي حصل إني بقيت مهلوس كهوبا ضغط عالي .. آه يا دماغي .. حسبي الله ونعم الوكيل التاج عايز امرره لناس كتيرة .. بس حمرره المرة دي فقط لمدونة واحدة على أن تمرره هي لكل من تريد ... أمرره لصاحبة مدونة العائشة في الأحلام وطبعاً بذكر إن تقاليد المدونات العريقة تمنع رفض أو الاعتذار عن أي تاج