Tuesday, September 04, 2007

إيه الأحسن

في مدونة إحدى الأخوات .. دخلت وبدأت اكتب تعليق على نقطة معينة خارج الموضوع ..

كانت الأخت حاطة صور لأسامة بن لادن والشيخ أحمد ياسين وخطاب والزرقاي والإمام حسن البنا .. والاستاذ سيد قطب رحمهم الله جميعا .. وذكرت في غير موضع إن لهؤلاء مكانة في نفسها ..

وصاحبة المدونة ذكرت اسمها ومدينتها والمنطقة وصرحت بانتماءها لجماعة الإخوان المسلمين

وكان التعليق اللي حدخل اكتبه في شكل نصيحة حقول لها فيه إن المدونات لا يمكن للأمن ربطها بصاحبها إلا بإقراره بإن دي مدونته .. وتصريحه ببياناته الشخصية داخل المدونة واللي ممكن الأمن وقتها يتتبعها ويوصل ليه .. وحفاظاً عليها من الهلع اللي حاصل في الأجهزة الأمنية في مصر ضد حتى مجرد التعاطف مع الإسلاميين ... فكانت نصيحتي إنها إن أصرت على ذكر تأييدها لهؤلاء الرجال فالأفضل أن تبقي على شخصيتها مجهولة أو أن ابقت على شخصيتها معروفة فالأفضل إنها تخفف من حرارة تأييدها وتكتفي بالإشارات من بعيد لبعيد
خصوصاً إذا كان من تصرح بمحبتها لهم هم ما يسمى عند الأمن بقادة الفكر الجهادي المغضوب عليهم من الشيطان الأكبر

المهم وأنا بكتب التعليق .. خطر في بالي حاجة ...

إنت يا واد يا ما علينا بتكتب التعليق كأنك بتنصحها لأنها مش واخدة بالها .. صح ؟؟ ..

آه صح

طيب ما يمكن واخدة بالها وقاصدة كده .. ولما تقرا تعليقك ممكن ترد مثلا وتقول لك ..

إذا كنتم أنتم يارجالة خايفين تصدعوا بكلمة الحق .. ومخبيين حقيقة شخصياتكم .. فإحنا بنات أبي ذر الغفاري ومش خايفين .. وبنعلنها في وشهم إحنا مش خايفين منهم واللي عندهم يعملوه ..

يا خبررر ... ساعتها حيبقى شكلك وحش جدااااااااا

بصيت حواليا لقيت كتير من مدونات التاء المربوطة معروف صحباتها ويمكن تتبعهم والوصول ليهم ...

مسحت التعليق وكتبت كلمتين تانيين خالص .. ومن ساعتها عمال أفكر إيه الأحسن إني أقول كلامي وأنا شخصيتي معروفة ولا أراعي ظروف مجتمعنا وخوفنا الطبيعي على بناتنا من قلة أدبهم والبهدلة على إيديهم ؟
بيني وبين نفسي واللي خلاني اكتب البوست ده إني برضه بنصح الأخوات المدونات أصحاب التوجهات بالذات بالإبقاء على شخصياتهم مجهولة .. أما أصحاب الشنبات فكل واحد بينظر في حاله .. دا رأيي إلا لو كان عندكم رأي آخر


19 comments:

صلعم said...

مرحبا

ليس بعيدا على الإخوان المسلمين أن يؤيدو الفكر الإرهابي فأسامة بن لادن هو تلميذ شيخكم الإخوانجي الظواهري

الفكر الإخواني هو اساس جميع الحركات الإرهابية في العالم وكلما رأيت إرهابي فابحث عن حركة الإخوان المسلمين تجد أن هذا الإرهابي إما هو من الإخوان المسلمين أو منشق عنهم أو متأثر بفكرهم أو قائده منهم وهكذا

السبب الوحيد اللذي يجعل الحكومة المصرية تلعب لعبة القط والفأر الخطيرة مع الإخوان هو أنها تريد أن تقدم نفسها للغرب كخيار وحيد للسلطة

سيأتي يوما ما يستولي فيه الإخوان على السلطة في مصر بدون شك وسيعيثون في الأرض فسادا فتعلق المشانق في الشوارع وتجلد المرأة وتحبس في البيت وتنسف الآثار المصرية الفرعونية بالديناميت لأنها اصنام وسترجع مصر لزمن ماقبل الفراعنة

مبروك لكم مقدما حكم الإخوان المسلمين

Mohamed A. Ghaffar said...

ده على كده انا معمولى فيل محترم فى امن الدولة فى انتظار اى تأييد منى للى بالى بالك ، ما علينا

أستوقفنى ان ممن تؤيد بن لادن!!! مع انتمائها لجماعه الأخوان ففى الأمر تناقض لعقلى على الأقل

اما الأولى فليس اخفاء الشخصيه مع إظهارالتايد او اظهار الشخصيه مع اخفاء التأييد وانما الأولى التعليم والأصلاح من اسفل من الشعب

سيدى الناس لا تعرف كيف تستنزه من بولها وفق لشرع الله فهل ننتظر منها معرفه كيفيه الحكم وفقاً للشرع او ننتظر منها تاييد من يحكم به

فبلا قاعده لاتوجد قمة وبلا شعب يعرف دينه لن يصل للحكم احد فى استطاعته تسيير الأمور بأمر الأسلام

وفى التعليق السابق على تعليقى خير برهان لما اقول

انسانة said...

مش عارفة انا شايفة انك لو كنت كتبت تعليقك الاولانى وهو بالنصيحة مكنتش هى هتقول كده وانا مش شايفة ان ده نوع من الجبن او الخوف ابدا

ده سياسة وذكاء وحرص على النفس وحفاظ عليها ,يعنى انا مش هستفاد حاجة لما اقول انا اسمى كذا وبكره الريس بس هستفاد اكتر لما اقول انا بكره الريس وهما مش عارفين اسمى لانى هعرف اقول ده كتير وبراحتى وهيكون ليا دور وطالما الهدف انى اقول انى مع الناس ده او ضدهم واعبر عن رايى فانا مش هستفاد حاجة لما الامن او غيره يعرف انا مين


يعنى مثلا انا هقتل بوش بكره اروح اقوله انا انسانة وجاية اقتلك بركه ولا اروح علطول واقتله واهو لو محدش عرف مين اللى قتل ابقى افكر اقتل شارون بعده وهكذا ده مجرد امثلة على فكرة


فى فرق بين الجبن والحرص او ان الواحد يحافظ على نفسه على قد ميقدر بدون ميكون جبان

وجزاكم الله خير

انسانة said...

http://a7rar-w-laken.blogspot.com/

عصفور المدينة said...

أنا أؤيد تعليقك الأول والنصيحة للشباب والشابات أيضا
وأفضل عدم الكلام مزيدا في هذا الموضوع لدواعي متعددة
:)

نسرين - أمة الله said...

السلام عليكم
صدقنى لو قولتلك مش عارفه
بس من باب النصيحه دى حاجه مفروضه عليك وبعد كده كل واحد حر فى تصرفاته
بص انا مش اخوان ومش اى حاجه خالص
بس بحب دينى وبقول فى حقه كلمه حق ومقبلش عليه اى كلمه من اى شخص وممكن برضه اقف فى وشه ومش هيهمنى
هو احنا لامتى حنفضل فى حيره كده
بعيد عن الموضوع هو صاحبك الانتيخ مختفى ليه

رفقة عمر said...

انا مش عارفه هى ممكن تكون تعرف ان مكن يكون دة خطر ولا لا
بس انا معاك ان البنت عموما المفروض تحافظ على نفسها على الاقل علشان خاطر اهلها
لان اللى بيتعب قو ى الاهل
على العموم ربنا يعطيها على قدر نيتها
واكيد ربنا بيدافع عن المؤمنين
ربنا يحميها
ويعينها على نشر افكارها طالما فيها خير للمسلمين

لحظة said...

اصل الكلام لا بيودي ولا بيجيب
كله مجرد تنفيس مش اكتر
وعند من اصحابه وبس
يعني مثلا عند حضرتك جريدة الدتور اللي حضرتك لا تثق بها
بيقولوا كلام يخلي الواحد مستغرب هم سايبينهم ازاي لحد دلوقتي
وبالرغم من انهم معارضين للاخوان المسلمين
يسمحون لهم بكتابه مقالات كاملة وعلى مساحات ليست قيلة بدعوى قبول الراي الاخر
متمثلين براي القائل الذي لا اذكر اسمه
قد اختلف معك في الراي ولكنني مستعد للموت في سبيل ان تعبر عن رايك
قولوا زي ما انتم عايزين
وهم برضه هيعملوا اللي هم عايزينه
وبعدين خدوا بالكوا ان عدم التصريح بالاسم مش حماية يعني
فيه حاجة اسمها الآي بي
ممكن يتتبعوها بسهوله جدا
يعني لو عايزين يجيبوك هيجيبوك
فكل واحد ياخد باله من اآي بي بتاعه

أمــانــى said...

انا مش عارفه اقول ايه الاحــسن
لان فى فى الحالتنين متراقبين وحضرتك سيد العارفين يا هندسة
المراقبة بتكون ازاى مش علشان هما بيقولوا رايهم لا طـبعآ جرب حضرتك ادخل عند اى حد من الاخوان وشوف شكل الجهاز هيكون ايه مع حضرتك سيبك من الاخوان
جرب كلم حد من فلسطين هتلاقى حد قاعد معاك وانت بتتكلم اصلى انا بأعانى من الحكاية دى
وبرضو جرب حضرتك ادخل على اى حاجة تبع اليسار برضو متراقب
يـعنـــــــــى من الاخــر كله متراقب هههههههههههههههههههه
بــس طبــعآ واجب عليك النصحية لان على اعتقد مع تخبط الوضع الامنى لازم الكـل يكون حريص
ربــنا يرحمنا من عنده ويسترنا دنيا واخره ده الاهم

الصارم الحاسم said...

عندك حق طبعا والتخفي


وهذا ليس جبنا...واجه عندما تتحتم المواجهة...فالعلنية ليس هي مقياس من اشجع


خاصة ان الحكومة لا تلعبها بشكل نظيف..ويعتمدون على امكانياتهم الغاشمة

الصارم الحاسم said...

بغض النظر عمن يتخفى ومن يظهر نفسه..فالكلام هنا ليس عنهم




لكن الحوار ده فكرني بحوار آخر لي عند نوارة نجم مع مدون من مدوني الأمن في أحد التعليقات ....وانقلب النقاش الى اتهام مباشر اني اخاف اظهار نفسي في حين انه يظهر باسمه وصورته كاملين - هو لا يعترف صراحة انه امن لكنها واضحة لكل ذي لب - و و و و


وتلقيح كلام من مدون آخر في تدوينة عن الاسلاميين الخائفين المتخفيين الذين لا يجرؤون على اظهار انفسهم

وتلقيح كلام من مدون تالت عن من يريدون دور البطولة وهم متخفيين وراء الستار



فيه مقولة بالعامي عندنا بتعجبني اوي

الرجولة- الشجاعة - أدب - فن يعني - مش هز كتاف



مش هز كتاف بفشخ الصدر - مع الاحترام لكل الظاهرين - بدعوى الشجاعة



خاصة اننا نتعامل مع حكومة لا تلعبها بعدل ولا بشكل نظيف..لها من الاماكيات التي ليست لنا


وتحشو عقولها رجالها ايضا بما يبرر لهم ما يفعلونه وكله في سبيل الوطن


اكيد كل واحد مننا - من المدونيين على نفس النهج - سواء يكتب باسمه الحقيقي او باسم مستعار له حياة



وله وسط يعيش فيه ودعوة يمارسها بشكل او بآخر...ونهج واهداف مستقبلية يخطط لها ويعمل عليها بطريقته



الغرض انه الفيصل في الأمور هو هدفك..ماذا تفعل وما ستفعل...ومتى المفروض ان تظهر وما هو العائد الذي يستحق وقتها


واكيد ربنا حط كل منا في ابتلاءات ...وكل منا جرب نفسه ويعلم هل هو شجاع فعلا...هل يخشى المواجهة..ام انه من يثبتون بتثبيت الله فيما قد يرتجف غيرهم منه



فلا يغرننا الشيطان وكلام البعض فيما ارتضيناه من اهداف ...وقتها قد يكون رياءا ان فعلنا..فلنركز فيما نريد ..وربنا يوفق كل في طريقته

karamella said...

اولا ربنا يجعل كلامنا خفيف عليهم

والله هم يضحك وهم يبكي


وبرده من الشجاعه ..... ان تجبن ساعه

آلام وآمال said...

من زمان وانا متابع مدونت حضرتك وسبحان الله كل مرة اقرأ موضوع معين وبحس اني لازم اقرأه مرة تانية واقول لنفسي المرة الجاية اسيب تعليقي عشان اعلق بضمير
وعلى مااجي تاني مرة الاقي بوست جديد
!!!

وهلم جرجر على كده
:)
لكن المرة دي عزمت على اني مش خارج من هنا الا لما اسيب تعليق

المهم انا الاول بسلم على حضرتك ف اول تعليق ليه عندك واللي جه متأخر اوي معلش

والمرة الجاية ان شاء الله اعلق على الموضوع المطروح
:D
----------------

على فكرة انا فكرت بجد كتير اوي ف موضوع الجهات الامنية دي وهل فعلا بيتابعو التدوينات والناس اللي بيدونو وكده ولا ايه
بس لما فكرت بواقعية شوية قلت ان ده شيء صعب حدوثه
إلا إذا حطو حد ف دماغهم طبعا
ربنا يسترها معانا
لكن حضرتك دلوقتي وضحتلي شيء مهم جدا وهو انهم لازم يكون عندهم اثبات حقيقي وفعلي في الربط بين المدونة وصاحبها
وبيني وبينك الكلام ده طمني اوي
:) :)

وانا متفق معاك ف ان الواحد لابد انه يكون حريص بردو مهما كان وانا فعلا مش هستفيد حاجة لما اصرح عن شخصيتي الحقيقية بالعكس

وف نفس الوقت بردو محتار مش عارف ده جبن ولا حرص

بس الآكد بفضل الله انه حرص وليس جبن
لأني لو جبان مكنتش قلت حاجة اصلا ومكنتش عملت مدونة من اساسه


مش كده بردو ولا ايه
??

ftataljanna said...

ازيك يا باشمهندس ايه المواضيع النار نار دى

حاسب لتشعلل المدونة والدخان يطلع ويعرفوا طريق المدونة

المهم

انا شايفة ان حضرتك صح

يعني لو حد جه قال لك ان المقاومة الفلسطينية بتوزع منشورات باسماء اعضاءها هاتقول ايه

طبعا جنون لان الاسرائيليين اكيد هايعرفوا يجيبوهم

يبقى بيستخبوا ليه جبن ولا ذكاء وحيطة وحنكة وخبرة

طبعا ذكاء

يعني بالذمة غزال عامل للاسد مصيدة يروح للاسد للعرين لا وكمان يقول له انا عامل لك مصيدة

ده حتى عيب

أميرة محمد محمد محمد said...

اخي ماعلينا ياتري قصدك مين؟
هو بصراحه لحد دلوقتي ماشفتش حد حاطط صورة اسامه بن لادن وخطاب والملا داد الله غيري

اياك تفتكر ان حضرتك لو جيت تنصحني انا ممكن اتهمك بالجبن او اشكك فيك بالعكس انا هقول ان حضرتك بتخاف عليا زي اخويا وان حضرتك رجل مسلم غيور علي اعراض المسلمات
ولو حضرتك قصدني انا فانا بحترمك جدا

ولكن نيجي للمساله الاساسيه وهي مسالة الصور

انا يااخي ماعلينا مش اشجع انسانه ومش واضعه الصور منظره ولا بقول انا اجدع بنت والله ابدا بالعكس انا ساعات ببقي جبانه جدا

لكن طبيعه شخصيتي اني لااحب التخفي وافضل المواجهه ولااستطيع ان اعيش في عالم افتراضي هي دي شخصيتي وممكن فعلا ده يبقي خطأ ولكن دايما انا بقول لنفسي حاجه وانا واثقه منها جدا وهي

اني بعمل كده علشان ربنا بعمل كده عشان اقول كلمة حق يمكن تدخلني الجنه,بعمل كده عشان مش طايقه الظلم والاستبداد,بعمل كده عشان لو مش هعمل كده هطق واموت فعلياوليس بيد احد
فبماان نيتي كله لله فانا واثقه ثقه عمياء في الله ثقه ليس لها حدود وواثقه ان ربنا هيثبتني اذا لاقدر الله حدث شئ

انا واثقه في التثبيت لاني طلبته من الله
ان تنصروا الله ينصركم ويثبت اقدامكم

اما الاخ الذي يتعجب من كيفية ان اكون اخوانيه واؤيد اسامه بن لادن

فارد عليه واقول ان الاخوان مش بيحجروا علي تفكيرنا وكل انسان حر فيما يحب او يكره ثم ان انا مش بحب ممثل سينما انا بحب مجاهد عظيم من افضل المجاهدين اللي عرفتهم وانا قلت مرارا اني هتكلم في الموضوع ده بس بعدما يكون عندي ماده كافيه للرد علي اي استفسار او هجوم

شكرا اخي ماعلينا ربنا يحفظك ويكرمك

eldoctor said...

مدونتك جذبت اهتمام الملحدين .. ربنا يستر .. ربنا يستر من الجدل مش من حاجة تانية

تعليق جانبى على الموضوع .. كل واحد ادرى بظروفه .. اللى شايف نفسه مفيد لو أعلن عن اسمه و شخصيته ... لو هو مثلا عالم او داعية يكون افضل انه يعلن عن نفسه .. اما لو فرد ليس له الا الله فليتق الله فىمن يعول (اولاد او زوجة او أب و أم) و ليكتف بالعمل بدون لفت الانظار طلبا لبطولة لن يحن وقتها .. الواقع بيقول كده ..
..رأيى قد يكون غريبا و لكنه من فقه الواقع

FloNa said...

انا شايفة ان الواحد ياخد بالاسباب فعلا ويتخفى زي ما حضرتك قلت !!

المؤمن كيس فطن وليس من الفطنة انك تقول انا من مؤيدي كذا واللي مش عاجبه يعني وانت عارف ان نتايج فعلتك مفيهاش اي حاجة ممكن تفيد غير البهدلة

!!

ده رأيي وبجد اساسا طريقة العرض عجبتني وموضوع البوست فريد من نوعه :)

اشياء اخرى said...

الكلام ولا هياثر
ما هينوبها الا البهدلة
اعذروني بس كل ده ملوش فايده
وما هواش تنفيس حتى
ده بيخلي الواحد يتشحن يياس من عيشته زياده
ولكن العلم احسن من الجهل برضة

Ma-3lina said...

والله ماعارفة انهى احسن الاختفاء و لا الظهور الطبيعى

انا ضد انها تقول ساكنة فين لان كده هتتجاب

لكن معلومات زى الاسم و المحافظة بتهيالى محدش يقدر يوصلها

انا مع الوسط