هذه المواقف حدثت معي أومع زملاء لي في مجال المحاضرات والتدريس .... باشمهندس انت قلت لنا نفتح قائمة File ونقول open عشان نفتح فايل جديد .. انا روحت البيت وفتحت قائمة File وقعدت اقول Open Open وبرضه مفيش حاجة اتفتحت .. دا درس للباشمهندس عشان بعد كده يختار ألفاظه بعناية وما يقولش قول open ويقول اختار open المحاضر للمتدرب الذي مسك الماوس ووضعها على الشاشة : حضرتك بتعمل ايه ؟؟ .. فرد عليه المتدرب : هو مش أنت قلت حطوا الماوس على قائمة File ؟؟!! ودا درس تاني للمحاضر عشان يفكر الف مرة قبل ما يقول كلمة زي (حط الماوس على ..) دي هو لو انا عملت Static Member داخل class وناديت عليه من جوا الـ Class من Non-Satatic Method وعملت object من الـ Class دي ومن الـ Object ناديت على الـ Non-Static Method هل الـ Static Constructor حيتنفذ ولا لأ ؟؟ .. دا سؤال من نوعية اسئلة التعذيب بالكهربا وجلد الذات .. حرام عليك يا بني بتعمل فينا كده ليه ؟؟!! هو ايه الفرق بين الـ Void والـ Array ... حسبي الله ونعم الوكيل هو ليه القوسين في آخر الـ C# Method مدورين () ومش مربعين [] .. معلش ظروفهم كده باشمهندس .. انا عملت الكود زي ما انت كاتب بالظبط وبيطلع ايرورز .. تبقى المشكلة فين ؟ .. أكيد مش فيك وأكيد مش في الكود وأكيد مش فيا .. غالبا المشكلة في مايكروزفت هي مش الـ Metod مش بتـ Return حاجة ... إيه لازمة الـ Void بقا ؟؟؟!! الله يسامحهم اللي عملوا الـ Void الطالب : هي الـ HTMLControls عاملة زي الـ abstract Class .. المحاضر : نعم ؟؟؟!! .. الطالب : آآقصدي الـ Interface .. المحاضر : افندم ؟؟؟!! .. الطالب : لا لا ولا حاجة الطالب خريج الجامعة المصرية لمحاضر البرمجيات .. ايه ده هو كله فهم فهم مفيش حاجة حفظ ؟؟!! .. معلش تعال كمان يومين اكون جهزت لك حاجة تتحفظ طالب آخر لنفس المحاضر : أفففف .. أنا زهقت من التفكير !!! والمحاضر في ذهنه :: XXXX التعليم واللي جابوا التعليم |
Sunday, June 29, 2008
طرائف محاضري الأي تي
Monday, June 23, 2008
إنترنت إكسبلور vs فايرفوكس
كمطور ويب ارشح للمستخدم الانترنت على نظام تشغيل الويندوز برنامج انترنت اكسبلورر7 .. لأن دا حيساعدني اني اعرض صفحات الويب بإمكانيات معينة لا يمكن اظهارها مع متصفح آخر كال فايرفوكس مثلا.. زي مثلا لو كنت عايز عمل خلفية بلون متدرج لخلية في جدول ولا اعرف كم سيكون ارتفاع هذه الخلية .. بمعنى انها خلية والكلام المكتوب داخلها سيأتي من داتا بيز مثلا .. وسأقوم باستخدام شريحة مدرجة اللون كباكجراوند للخلية .. سيكون شكل الشريحة كالتالي :
ولو استخدمت الشريحة في خلية حيكون الكود كالتالي <table width="200" align="center" background="bg.png"><tr><td
المشكلة حتظهر مع عدم توقعنا لارتفاع الخلية المعتمد على كمية الكتابة الموجود داخلها .. يعني لو كان الموضوع اكبر من كده حتلاقي الشكل كالتالي :
بمعنى إن تدرج اللون مش حيطول معاك مع تغير ارتفاع الخلية ... وحتى لو حاولت تمنع التكرار باستخدام الـ Styles بمعنى إن الكود يبقى كده : <table style="background-repeat:repeat-x"width="200" align=center background="bg.PNG"><tr><td valign=top>نص الموضوع نص الموضوع .... نص الموضوع</td></tr></table>
طيب وايه الحل ??? الحل بمنتهى البساطة هو الاستغناء عن الشريحة واستخدام الكود التالي <table style="FILTER: واللي حيطلع لي النتيجة التالية :
واللي بالتأكيد حيكون مناسب تماما لكل ارتفاع لهذه الخلية واللي مستخدمي أي متصفح آخر غير الإنترنت إكسبلورر لن يتمكنوا من مشاهدتها .. واللي حتمثل صعوبة على مطور الصفحة إذا أراد لمستخدم أي متصفح آخر أن يرى بغيته نوع آخر من الإمكانيات أتاحه لي استخدام حضرتك للانترنت اكسبلورر بدلا من غيره onclick="document.images['ImageID'].width -=25;document.images['ImageID'].height -=25;" onclick="document.images['ImageID'].width +=25;document.images['ImageID'].height +=25;" اتفرج على المزيد من اللعب في كثافة الصورة وتدويرها وعمل ميرور ليها وحاجات تانية واتفرج كمان على اللعب بالظلال ياسلام على الصورة لما تتعمل على شكل موجات .. ايه الجمال ده اتفرج على عمل سليدز زي الباور بوينت بالظبط وكله سكريبتات كفاية كدا عشان نراعي مشاعر اخواننا اللي بيستخدموا فايرفوكس .. واللي يا حرام مش شايفين اي حاجة من الحاجات اللي فوق دي
لكن المزايا اللي الناس بتتناقلها كميزة كبرى وفارق شاسع بين الفاير فوكس والانترنت اكسبلورر زي مثلا إنه سريع ؟؟ انا مش عارف مين مصدر الإشاعة .. بس لكل الناس النت بيبقى سريع أو بطيء تبعا لسرعة الاتصال .. اما الفروق بين البروزرات فدي فروق في طريقة تحميل الصفحة .. وهي ايحائية اكتر منها جدية .. يعني لما واحد قديم شوية في النت يقول للتاني الجديد في عالم النت الفايرفوكس سريع ونزله .. التاني ينزله ويجربه وتلقائي بيقول والله فلان دا عنده حق .. الموضوع بالظبط عامل زي نظرية القرود الخمسة ونفس الميزة تنطبق على موضوع الآمان .. فأنا استخدم برامج الحماية المتعلقة بالـ Internet Security واللي وظيفتها الأمان عند تصفح النت بغض النظر عن نوع متصفحك عموما قناعتي بأفضلية الانترنت اكسبلورر 7 لأنه افضل للمطور وبالتالي الفائدة ستعود للمستخدم والنقطة دي مهمة جدا ولا يمكن إغفالها .. إلا إني برضه أوجه تهنئة لكل مستخدمي الفايرفوكس على ظهور الاصدار الثالث من البرنامج ورغم اني مش من مستخدميه لكن نزلته وجربته عندي لاحتياجي لوجود اكتر من متصفح ويب على الجهاز ليرقد بسلام إلى جانب اخويه الاوبرا والنيتسكيب كل في انتظار فرصته للقفز على مكانة الانترنت اكسبلورر |
Friday, June 13, 2008
مش حتكلم عليها
اكيد الكل زهق مني .. كل بوستاتي بتكلم عليها .. 3 بوستات ورا بعض بتكلم عليها .. هي وبس .. فانا قلت اعتذر للكل .. وانهاردة اتكلم في أي مواضيع تانية من باب التغيير والتعويض عن البوستات الخاصة جدا اللي فاتت اللي بتعبر عن مشاعري .. ها نتكلم عن ايه ؟؟؟ شفتوا اوباما اخيرا فاز بترشيح الديمقراطي . شيء متوقع .. المنافسة اصلا كانت متقاربة لأن طبيعة اطرافها متساوية مش في القوة لا في الضعف ومش بيلاقوا قبول عند الشعب الأمريكي اللي مش بيحب لا ان واحد من اصول افريقية يحكمه او واحدة ست تحكمه .. وماكين في حالة فوز أيا من كلينتون او اوباما مرتاح ع الاخر لأنه ضامن ان منافسه الديمقراطي أيا كان حيفشل قدامه ... وسقوط المرشحة الست في سباق الرياسة من المنافسة التمهيدية تاكيد اكتر على ان الشعب الامريكي زيه زي معظم شعوب الارض اللي لا تفضل تولي المرأة لمنصب القيادة .. لا على مستوى الفرد ولا على مستوى الأمة ويتساوى في كده شعوب العالم التالت والاول .. وما فوز بعض النساء بمناصب قيادية في بعض الدول إلا لاعتمادها على ميزة غير موجودة عند الرجال .. ألا وهي كونها ست وبتيتغل الدعاية بتاعة رشحوني وادعموا قضية المرأة .. وهو عامل بعيد كل البعد عن الكفاءة والقدرة على القيادة .. لكن ان تقودني امراة فدا امر دائما مرفوض عندي مثلي مثل صديقي الأمريكي .. إلا طبعا لو كانت هي .. هي فقط .. لو كانت هي الوضع يختلف تماما .. هي الوحيدة اللي اسلم لها كل مفاتيح قيادتي .. هي الوحيدة اللي بالاضافة لعواطفها التي كبوصلة حقيقية توجهها نحو الخير لها أيضا عقل منير يرشدها إن اظلمت الطرق .. يعني هي سواء قادها الاحساس أو العقل والمنطق موفقة الى الحق والصواب .. مش كده تستحق تكون قائـ .... ايه ده .. احنا مش قلنا مش حنتكلم عليها .... اسف اسف .. خلينا نتكلم طيب في موضوع تاني الشغل دا بقا حاجة مزعجة جدا .. طب اديني اهو داخل على 3 شهور في الشغل الجديد والحقيقة اني بحب المكان والشغل .. بس برضه لسه كل انواع الشغل بتثبت لي النظرية اللي بتقول ان احنا بنتقاضى مرتباتنا 90% منها مقابل حرقة الدم و 10% مقابل الانتاج والمجهود ... وساعات 100% مقابل حرقة دم .. يعني شغلانة كتير مننا مش مهندس ولا محاسب ولادكتور .. شغلاتنا كلنا محروق دمنا .. الاستاذ فلان الفلان المحروق دمه في شركة كذا كذا .. وعلى هذا الاساس يتقاضى مرتبه .. ولو فكر يتمرد ويرفض حرقة الدم .. اكيد بيبقى بيمضي اوراق استقالته أو اقالته من عمله .. بس الحمد لله اظن اني بدأت اتأقلم مع طبيعة الشغل في مصر واتقبل الصداع اللي بيحصل كل يوم واسلوب اني اعود للبيت محمل بالوان من الاستفزازات والمشاكل والاحباطات .. بس احسن ما في الموضوع اني عندما اعود محمل بكل هذه الشرور أسارع للبيت عشان أجدها في انتظاري والمح فيها اشتياقها لي واسمع كلماتها العذبة المميزة فيزول عني كل سوء .. تكلمني وانا اسمع واستزيدها من حديث شهرزاد الذي لا يمل .. حتى اذا ما انتهت منه غردت لفيروز بهمسات في اذني كي انام كالطفل الصغير وقد زال عنه كل ما يؤلمه ... عارف عارف اني بتكلم عليها برضه .. خلاص حسكت .. وحشوف موضوع تاني يقولوا مصر حتلعب مع مالاوي يوم السبت .. وقبلها لاعبنا جيبوتي والكونغو وغلبناهم ... الغريب ان في كل مرة في تصفيات كاس العالم احس ان سكتنا خضرا والفرق اللي معانا فرق سهلة وظريفة وحتدينا البطاقة على طول .. واذ فجأة الاقينا بره وجورج ويا يلعب في الدفاع ويطلع مرة واحدة من اخر ملعبه وياخد الملعب كله لغابة الجون بتاعنا ومحدش عارف يوقفه ويدخل فينا جون ويرجع ونطلع من كاس العالم على ايد ليبريا .. اللي مليانة حرب اهلية واللي محدش يعرف هيا فينا ع الخريطة ممكن يكون الوضع مختلف المرة دي ويوصل المنتخب لكاس العالم .. ولو إن حماس الناس المبالغ فيه للكورة واستبدالهم مباريات الكورة بمصطلحات عسكرية محضة بتخلي الواحد شاكك في احقيتهم انه يفرحوا بوصول منتخب بلادهم لبطولات مهمة .. ان شاء الله مصر تكسب .. بس ياريت الواد اللي اسمع عمرو ذكي دا ميجبش اجوان .. عشان هي اصلا زملكاوية ولما سي بتاع دا بيجيب اجوان بتبقى فرحانة اوي ان زملكاوي جاب الجون لمصر .. بحس ان حد غيري هو الي قادر يفرحها ويسعدها ... مع إن دي المفروض تبقى وظيفتي انا وبس .. وسعادتها دي هي اللي حتخـ .... ايه ده برضه اتكلمت عليها ؟؟؟ معلش يا جماعة .. مش متعود بس .. معلش نغير الموضوع اخيرا خلصت امتحانات .. الحقيقة الامتحانات جاية سهلة خالص .. بس للي ذاكر .. انا كنت بدخل الامتحان من غير ما افتح كتاب .. يعني كنت بدخل المادة ومعرفش هي اصلا بتتكلم عن ايه .. وطبعا النتيجة متوقعة ومعروفة .. انا مش مشغول فعلا بالنتيجة السنة دي ومستعد للسنة الجاية ولو ان كان نفسي ان انتهي من الدبلومة السنة دي واوفر سنة من عمري .. لكن مع القاعدة اللي حاططها لنفسي اني امشي في طريقي بالراحة وعلى مهلي .. فمفيش مشكلة من اني استنى سنة كمان بدل ما اوتر علاقتي بنفسي وادمر اعصابي .. اوحش ما في الموضوع اني اخشى من نظرتها ليا بعد النتيجة .. اكيد حتبص لي على اني الطالب الفاشل .. ياترى حتتفهم اني ... اوك نغير الموضوع .. أخر محاولة الشوارع بقت فظيعة بجد .. البلد في الصيف بتبقى جحيم ومجرد نزولك الشاعر معناه حرقة دم وعكننة .. ستات ماشية على حل شعرها ورجالة بقرون كتيرة ماشية جنبها كل وظيفتها إنه بتشرف عليها اثناء عرضها لجسدها امام الناس .. ستات شكلهم وحش جدا جايين من كفر ابو طشت فاكرين نفسهم سياح وقاعدين على كافتريا بيشيشوا وكل طشت قاعد جنبها سعيد والناس بتتفرج على المدام وهي بتشيش .. لبحر مقفول .. فكرة اني اتمشى او اقعد عليه انتهت من حوالي شهر .. وحستنى لغاية فك الحصار عشان اقدر اتمشى عليه تاني .. يعني قدامي لغاية ما بعد العيد .. قبل كده ما افتكرش .. مع اني الفترة دي محتاج اروح للبحر جدا واكلمه واقول له رسالتي عشان يبلغها ليها .. بس الحواجز اللي بيني وبينه هي نفسها الحواجز اللي بيني وبينها .. كتل بشرية وزمنية بيننا .. وحضطر اكتفي بالرسائل اللي بيوصلها القمر ليها .. يمكن في يوم تبص بالليل ليه وتسأله عليا ويجاوبها القمر باللي في قلبي من ناحيتها أنا اسف لكل من يقرأ .. مش قادر ما اتكلمش عنها .. كل الكلام يقودني في الاخر إليها |
Friday, June 06, 2008
حيرة الأديب العاشق
هلموا .. اقتربوا .. اقتربوا أكثر وأكثر وتجمعوا من حولي .. التفوا حولي يا من اخترقتم حاجز المكان ببعدكم عن مكاني واخترقتم حاجز الزمان فدخلتم هذه المدونة لتقرأوا كلماتي بعد سنوات وسنوات من مصرعي .. اقتربوا .. فالآن سأنشدكم شعرا عن امراة لم ولن تروا مثلها أيدا .. سأنظم لكم في جمال عينيها التي أتخيلها ولم أرها بعد قصيدة من ألف بيت وسأرصعها بألوان البديع ولؤلؤ الشعر .. وسألقيها عليكم بفصاحة لم تعهدوها فتخترق قلوبكم معانيها .. وسأبدأ قصيدتي الألفية بكلمة .. يا حبيبتي .. ثم ...... ................ انتظروا .. عفوا لقد بدلت رغبتي ... فلن اكتب في عينيها شعرا .. بل سأكتب فيها نثراً اختار فيه العبارات بحرية أكبر .. لكي تصل لكم المعاني أسرع وأشمل .. وبعباراتي سأرفع من شأنها بين نساء العالمين واودعها بيدي بين نجوم السماء .. سأجعلها بكلماتي ملكة النجوم .. وستغار كل نساء الأرض منها .. ويحسدني كل الرجال لأني ابصر عن قرب تلك الملكة في السماء .. وسأبدأ نثري هذا بكلمة يا حبيبتي .. وبعدها ... ................ امم .. يبدو اني عدلت رأي مرة أخرى .. دعونا اكتفي بان اقص لكم عنها حكاية فهذا أوقع في قلوبكم وأصدق .. سأحكي لكم قصة عن محاسن أخلاقها .. نعم .. وستكون القصة الأجمل التي تقرأونها طوال حياتكم .. سأذكرها كثيرا في قصتي وكلما ذكرتها لكم ستحبسون أنفاسكم وتشخص عيونكم وتنخلع افئدتكم .. سترتجون رجاً وستنتفض مشاعركم مع وصفي وكلماتي عنها .. وسأبدأ قصتي بكلمة .. يا حبيبتي .. ومن ثم .... ................ كلا .. لن أفعل .. يا حبيبتي ... لا استطيع أن اكتب أي شيء حول هذه الكلمة اعلم انكم احترتم معي .. ولكن اغفروا حيرة الأديب المقتول في هواها .. فهو لايملك الصناعة التي يوفيها بها حقها .. ولم يجد بين فنون الأرض ما يمكن له به ان يرضي قلبه ويصف محبوبه .. تعددت رغباته .. لكن رغبته في نطق اسمها هو العامل المشترك بين جميع أفكاره .. فمن بين كل خواطر ذهنه ما كتب على أوراقه الأدبيه إلا كلمة واحدة أراد أن يبني حولها البناء .. لكن الكلمة كانت أكبر من أن يستوعبها أي بناء .. اعذروني ان لم تجدوا في بضاعتي ما يغذي عقولكم وينير أفهامكم .. فما أنا الا رجل [ خط سطرا في الهوى ] داخل مساحة يملكها ويتركها ليقرأها كل عابر سبيل وجعل في هذا المساحة تاريخه كلها .. حلوه ومره .. ليرى كل من يقرأ هذه المدونة كيف كان صاحبها قبلها وكيف أصبح بعدها .. ليدركوا هذا الفارق الشاسع بين كلماته الآن وكلمات قديمة ممسوحة من داخله موجودة في الماضي المهدر تحت اقدامها ولم يتبق منه سوى الشاهد فلتشهد عزيزي الزائر .. هل الآن أنا .. مثلي قبل سنة ؟؟ |
Subscribe to:
Posts (Atom)
