غمض عينيك .. وحاول تفهمني

غمض عنيك كده وارجع بالزمن لورا شوية .. بتاع حوالي كام ميت سنة كده .. شايف الحال عامل ازاي ؟؟؟ شايف الخلافة العباسية إزاي في أضعف حالاتها ؟! الأتراك السلاجقة مسيطرين على كل حاجة، بيشيلوا الخليفة ويحطوه زي ما الواحد لا مؤاخذه بيخلع مركوبه ويلبسه. كل قطر مسلم فيه واحد لامم شوية رجالة حواليه وعامل بيهم زعيم على الناس، دول طولونية وأغالبة وزنكية، كلهم أينعم بيدعي للخليفة العباسي في الخطب ورافع راية وعلم الخلافة الإسلامية العباسية، إنما الخليفة - لامؤاخذة - طرطور والخلافة مش بتقوم بالمهمة اللي هي أصلا جُعلت عشانها .. حفظ الدين والدنيا .. دا غير الدول التانية بقا اللي مع نفسها في المغرب العربي. الخلافة العباسية الإسلامية بتتجزأ وبتنهار والمد الشيعي بقا كمان عسكري وسيطر على شمال أفريقيا كلها، والدولة الصغيرة بتكبر، أخشيديين ومرابطين وموحدين وأيوبيين، وأوروبا بتاكل في أرض المسلمين حتة حتة في الأندلس وفي الشرق بحروب صليبية والقدس راحت والأقصى راح والخلافة موجودة ومش موجودة، دمياط والمنصورة سنة معانا مساجد وسنة معاهم المساجد بتتحول كنايس. شوية كمان وحتى مسمى الخلافة راح واختفى بعد ما إمبراطورية المغول أطلقت الرصاصة الأخيرة على الهيكل اللي أصلاً فارغ من جوا .. حتى اسم الخلافة وشكلها استخسروه فينا وسقطوه .. بقى مفيش للمسلمين خلافة .. الخلافة أصبحت ماضي وتاريخ، بقت أساطير الأولين .. الدنيا شكلها اتغير .. صعب ومستحيل إن الدول المتفرقة دي ترجع تاني دولة واحدة .. عودة خلافة موحدة لكل المسلمين أصبح زعم وأوهام المجاذيب وأحلام الدراويش .. مش ممكن .. مش ممكن. اسوأ لحظات شكّك في الوقت دا لما تقرا حديث عبد الله بن عمرو " بينما نحن حول رسول الله صلى الله عليه وسلم نكتب إذ سئل رسول الله صلى الله عليه وسلم أي المدينتين تفتح أولاً قسطنطينية أو رومية، فقال رسول الله صلى الله عليه وسلم مدينة هرقل تفتح أولاً، يعني قسطنطينية ". تسأل نفسك .. معقولة القسطنطينية ؟؟؟!!! القسطنطينية اللي ما اتفتحتش أيام عمر وخالد وسعد ومعاوية وهارون الرشيد والمعتصم .. حتتفتح ... طيب أمتى ؟ دلوقتي ؟!! وعلى أيد مين ؟؟ إحناا ؟؟؟ .. حتشكّ ؟ .. مش بشكّ .. بس إزاي ؟ دا حتى الخلافة سقطت ... بقت ماضي وراااح .. المسلمين اتفرقوا وبيحاربوا بعض والحكام ظلمة ومش بيحكموا بالشرع ولا حتى أدني درجات العدل .. حكام مماليك بيقتلوا في بعض عشان كرسي الحكم .. مؤامرات خارجية ومتربصين .. وفتن .. لا لا .. دا إحنا في آخر الزمان والأمم تكالبت علينا كما تكالب الأكلة على قصعتها .. خلاص دي النهاية .. احنا في طريق اللاعودة .. حاسس بالفترة ؟ لكن .. حاول كده توسع مدى رؤيتك ... حتعرف إن بعدها بشوية رجعت الخلافة اللي قلت عليها " مزعومة " واللي اعتبرتها ماضي مش حيرجع وخرافات وأوهام أفيون .. رجعت خلافة إسلامية عثمانية من جديد وحدت بلاد المسلمين اللي أنت افتكرت إنهم عمرهم ما حيتوحدوا. ورجع الأقصى ورجعت القدس. وعلى فكرة برضه .. الخلافة دي فتحت القسطنطينية. فتح عنيك بقا .. ها إزي الحال ؟ { أَوْ كَالَّذِي مَرَّ عَلَى قَرْيَةٍ وَهِيَ خَاوِيَةٌ عَلَى عُرُوشِهَا قَالَ أَنَّى يُحْيِي هَذِهِ اللَّهُ بَعْدَ مَوْتِهَا فَأَمَاتَهُ اللَّهُ مِائَةَ عَامٍ ثُمَّ بَعَثَهُ قَالَ كَمْ لَبِثْتَ قَالَ لَبِثْتُ يَوْمًا أَوْ بَعْضَ يَوْمٍ قَالَ بَلْ لَبِثْتَ مِائَةَ عَامٍ فَانْظُرْ إِلَى طَعَامِكَ وَشَرَابِكَ لَمْ يَتَسَنَّهْ وَانْظُرْ إِلَى حِمَارِكَ وَلِنَجْعَلَكَ آيَةً لِلنَّاسِ وَانْظُرْ إِلَى الْعِظَامِ كَيْفَ نُنْشِزُهَا ثُمَّ نَكْسُوهَا لَحْمًا فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَى كُلِّ شَيْءٍ قَدِيرٌ }