Tuesday, June 05, 2007

كل سنة وانتوا طيبين

في ذكرى الهزيمة .. لازم نفكر كل مسئول وقتها بإنه السبب ولازم نفكر نفسنا بحالنا واللي وصلنا ليه على إيديهم .. ولازم نفهم إن لو أي إنسان مسك الإذاعة والتلفزيون حيكون القائد الملهم والزعيم المفدى وحبيب الملايين حيكون هو اللي خايف ع البلد والكل خاين وعميل ومش فاهم مصلحة الأمة..

الكلمات التالية كتبها أحمد فؤاد نجم بعد النكسة وكانت بتتوزع زي المنشورات .. ما عدا الجزء الملون .. دا رجل الشارع البسيط ضافها على كلام الفاجومي .. راجل الشارع اللي قالوا إنه خرج يطالب بعودة المتنحي

وإحنا بنقرا ياريت نفكر هل النكسة خلصت ولا احنا لسه في النكسة


الحمد لله خبطنا .. تحت بطاطنا
يا محلا رجعه ظباطنا
من خط النار

يا أهل مصر المحميه .. بالحراميه
الفول كتير والطعميه
والبر عمار

والعيشه معدن واهي ماشيه .. آخر آشيا
مادام جنابه والحاشيه
بكروش وكتار

ح تقول لى سينا وما سينا شي .. ما تدوشناشي
ما ستميت اوتوبيس ماشى
شاحنين انفار

إيه يعني لما يموت مليون .. أو كل الكون
العمر أصلا مش مضمون
والناس اعمار

الحمدلله وأهي ظاطت .. والبيه حاطط
في كل حته مدير ظابط
وإن شالله حمار

إيه يعني فى العقبة جرينا .. ولا ف سينا
هى الهزيمه تنسينا
إننا احرار

ايه يعني شعب ف ليل ذله .. ضايع كله
دا كفاية بس اما تقول له
إحنا الثوار

الحمد الله ولا حولا .. مصر الدوله
غرقانة فى الكدب علاوله
والشعب احتار

وكفايه اسيادنا البعدا .. عايشين سعدا
بفضل ناس تملا المعده
وتقول اشعار

اشعار تمجد وتماين .. حتى الخاين
وان شا الله يخربها مداين
عبد الجبار

8 comments:

البنت الشلبية said...

يسعدنى انى اكون اول واحدة تعلق على البوست

انا بيعجبنى كلام نجم اوى بصراحة ربنا يبارك فى عمره

بس هوا انت كده متاكد انك ماشى جنب الحيط!!

ههههههه

يلا تعيش وتفتكر يا سيدى

سلام

chico said...

انا اول مره ازور البلوج بتاعتك و بعد اذنك مش هتكون اخر مره
والله الموضوع ده مع انى مكنتش موجود وقته بس حاسس بمرارته كانى كنت جندى فى الجيش بس الكارثه ان النكسه لسه موجوده بس بشكل تانى موجوده فى عقول الشباب و قلوبهم انا مش عايز ابقى متشائم بس غصب عنى

محمد عبد الغفار said...

قتلت الهزيمة بحث ولطم وندب وشق جيوب

ثم ماذا حدث

رفقة عمر said...

الحمد لله انا بخير لا قلق
احنا طبعا كنا نستحق النكسه دى مش احنا كنا ما شين على نهج الشيوعيه احنا بننتصر بايمانا من غير كدة مستحيل

أمــانــى said...

اولآ انا معترضة على العنوان
عندك ديمراطية ولا لاء
علشان اسحب الاعتراض لو مفيش
مممممممممممممممممم
وبما انك أصلآ شبه السادات داخل تقطم فى الراجل الله يرحمه
أكــيد النكسة كانت طامة كبرى وعار ولكن ما الاسباب الحقيقية للهزيمة
أكـــــــيد الكدب والخــداع والزيف للحقائق
نجى بقى لدلوقتى على الرغم انى هأطلع من الموضوع ما اهو احنا باقلنا سنين من غير حروب مفيش ولا حاجة جديدة جدت علينا بل بالعكس كل يوم خراب ودمار
يـلا ربنا يرحمــنا من عنده

عصفور المدينة said...

أخويا كان عنده سنتين وأنا 3 شهور
وبعدين كان فيه أغنية بتقول حنحارب حنحارب
كل الناس حتحارب
فكان بتلقائية الطفل بيغنيها

ويقول
حنحارب حنحارب كل الناس حتحارب
طل الناس حتضلبنا (حتضربنا

أما كل ضرب يا هندسة سنين ينضرب عشان الكلمة دي كل ما يفتكروا الهزيمة يضربوه اللي هو أخي

محمد العدوي said...

والله أوقات بحس انه دا اصدق حديث عيشناه

هو مش اصدق قوي .. بس على الأقل بلغ ألمه انه مينفعش يبقى فيه حاجة غير انه يبقى مكشوف قوي ..

ومع ذلك ولا كأن حصل حاجة .

عادي جدا .
بتحصل .

رفقة عمر said...

انا بجد مش عارفه هو غلقى للتعليق يستدعى كل الزعل دة طب وانت ليه كنت قفلت مدونتك على الاقل انا لم اقفل المدونه وعلى فكرة انا زعلانه منك انت وبينو لانى مش كنت منتظره منكم انتم بالذات الموقف دة نهائى ولازم كل واحد يراعى ظروف الاخر والاسباب اللى جعلته يتخذ موقف معين والضغط النفسى اللى هو فيه
على العموم انا اللى اشكرك انت وبينو ولتظنون بى ما تشاؤن وانا اسفه مش هاعلق عند ك او عند بينو طالما انكم واخدين موقف منى كدة ومش عارفه بجد ليه مكبرين الموضوع قوى كدة