Friday, June 22, 2007

أخويا المصيف .. بي نيس

يا أهلا يا أهلا .. إيه النور ده .. والله شرفتنا وآنستنا .. دا أنت لو ما شاليتكش الأرض نشيلك على راسنا من فوق نشيك في حباب اعينينا .. يا سلام دا كفاية دخلتك علينا بس دي بالدنيا .. يا أهلا يا أهلا .. اتفضل اتفضل بيتك ومطرحك قومي يا حاجة تفيدة حضري الغدا للضيوف .. والله دا احنا انهاردا الفرحة مش سايعانا .. يا سلام دا احنا ياراجل بنستناك من السنة للسنة تيجي حدانا وتجيب الخير معاك وتعمل حركة في البلد والمحلات تشتغل وسواقين التاكسي يتأمروا علينا والدنيا كلها كده تترد فيها الروح أي نعم الدنيا بتبقى زحمة موت وبنتخنق الكام شهر اللي أنتوا بتقعدوا عندنا فيها لكن وماله كل يهون عشان الغالي ابن الغالي .. يا أهلا يا أهلا .. وماله كله يهون عشان خاطر عيونكم .. وماله نغصب على نفسي أنا وأم العيال والعيال ونكن الشهرين دول في الركن الجواني من الدار ونسيبلكم بقيت الدار كلها تبرطع فيها انت ومراتك وعيالك براحتك .. وماله دا احنا أهل كرم برضه ونفهم في الأصول .. هو يعني يا بخت من زار وخفف .. لكن برضه يا أهلا يا أهلا .. يا مرحب يا مرحب

بس أخويا الله يكرمك ما تآخذنيش يعني زي ما دخلت الدار نظيفة تسيبها لنا نظيفة .. عشان العيال عيالك بيسوقوا الهبل ع الشيطنة وما يسيبوش حتة إلا لما يخلوها خرابة .. فلا مؤاخذة يعني النظافة مش وحشة ومش مكلفة .. أوعى تزعل مني ..

يا أهلا يا أهلا .. سلاماااااااااات

أخويا وعدم اللامؤاخذة يعني أنا مش عارف إنت ليه أول ما بتنزل حدانا بتلبس شورت وحمالات وتمشي في الشارع بيهم وبالشبشب.. معلش يعني ما هو انت جاي من بلد حر وجفاف وكنت فيها بتلبس كل هدومك !!! ومش ممكن تقلع في الشارع كده أبدا .. تقوم لما تيجي حدانا في الجو الحلو والطراوة تقلع .. طب اشمعنى ؟!! .. ما داهية لا تكون بتقلد الخواجات .. طب دول خواجات جوهم بارد وساقع واخد بالك .. فلما بيجوا حدانا مش بيستحملوا الحر وبيقلعوا .. خواجات بقى .. أنت خواجات ؟؟ .. وبعدين ما يصحش تمشيلي بالمنظر دا في الشارع كده وتركب الاتوبيسات .. مش منظر ياخويا .. وبعدين ما يصحش ابقى ماشي أنا والمدام بتاعتي يعني والاقيك بالمنظر ده جوا البلد .. ما يصحش ولا إيه .. أوعى تزعل مني

يا اهلا يا أهلا ... إيه النور ده شرفتنا والله

أخويا برضك الست بتاعتك أول ما بتيجي وألاقيها ماشية على كيفها وعلى حل شعرها .. إزاي يا راجل يا حر تقعدها على القهوة كده .. حتقولي دي قهوة سياحية حقولك هو انت سايح ولا هي سايحة .. مش معقول يعني يا راجل يا حر إنها تقعد قدام الناس حاطة رجل على رجل بالبنطلون الاستريتش وتشد شيشة قدامك وقدام كل الناس .. أنت عارف الناس بيقولوا عليها إيه وبيقولوا عليك إيه .. ولا مؤاخذة يعني ... أنا عارف إنك مش كده طبعا .. أومااال دا انت حر ودمك حر .. بس أهي الناس بتقول كده .... لا لا أوعى تقول لي ما يهمنيش كلام الناس وإلا تبقى أنت صح زي ما قالوا .. وبعدين المنظر المقرف دا مش بنشوفه إلا لما تهل علينا أنت واللي زيك .. والبت بنتك مقصوفة الرقبة تمشي ع البحر تتمايع هي وصحباتها وقال إيه بتتمشى .. وكله كوم و قلعها حجابها كوووم تاني .. هو يعني ربنا مش حيشوفها في المصيف .. ولا هو البلد اللي ما يعرفكش حد فيها ........ أوعى تزعل مني

يا أهلا يا أهلا .. دا احنا انهاردة فرحتنا بالدنيا

أخويا الواد ابنك ربنا يهده آآقصدي يهديه .. كل يوم قاعد لوش الفجر في البلكونة بالفانلة الحمالات ومشغل الكاسيت بصوت عالي وبيلعب دومينو وطاولة هو وصحابه .. ويبحلق لبناتي وبنات الجيران .. يعني هو يعني مش يحترم نفسه ويلم عينه .. وبعدين هو جاي يومين وماشي .. إحنا عايشين هنا وبنصحى الصبح نروح أشغالنا .. لما هو عاملنا يوميا الحفلة دي الواحد يرتاح إزاي في بيته يعني .. دا غير إن بشوفه بينزل بيروح الديسكو .. يا أخويا خلي بالك على ابنك .. حرص عليه .. على فكرة الديسكو دا مش بيشتغل إلا لما اللي زي ابنك يهل ويهل الهلس والكلام الفارغ معاه .. فلمه وخليه يراعي ربنا .. عيب والله عيب كده .. أوعى تزعل مني

يأهلا يا خويا يا بن أبويا

أخويا برضه مش لأنك مصيف يعني تبقى احسن من أهل البلد .. أصل شفتك سايق عربيتك كده أكنك ماشي في الشارع لوحدك .. ما هي قواعد المرور حداكم هي زي اللي حدانا .. عيب كده لما تفتكر إن عربيتك عشان مكتوب عليه ملاكي مصيف تبقى أحسن من العربيات اللي مكتوب عليها ملاكي الدار .. وبعدين مش كل حاجة تشتم البلد والناس اللي فيها .. مش عاجباك ما تجيش خليك في دارك أحسن .. دا حتى من خرج من داره اتقل مقداره

الله قمت ليه ؟؟ رايح فين .. شكلك زعلت ... بتلم هدومك ليه يا عم أنت .. هو يعني الواحد ما يفكش معاك بكلمتين .. لا والله شكلك زعلت .. طب تعال بس .. نتفاهم .. مش حتيجي عندنا تاني ..
طيب .. أحسن برضه .. وفرت .. خد بقى الباب في إيدك
دا حتى المركب اللي تاخد ..

سكي يا حاجة تفيدة ع الغدا .. الضيوف شكلهم فيه حد زعلهم

17 comments:

عصفور المدينة said...

يابني ليه التهزيق ده
هم 3 أيام اللي باجيهم وفي شهر 9
والسنة دي مش جاي كمان
عشان عندي ظروف مش عشان انت هزقتني وكرشتني من دارك عشان التهزيق ده مش بياكل معانا يا جميل
لقد اسمعت لو ناديت حيا
ولكن لا حياة لمن تنادي

Ma 3lina said...

بذمتك دى اخلاق مضيف ابدا
يا ساااااتر عليكم يا اهل اسكندرية مبطقوش حد

اما اهل القاهرة فبيرحبوا و الى عايز يقلع يقلع مبنقولش حاجة

وبعدين مهما تقول و تعيد هنيجى برده و انت ترحب بينا و تفسحنا كمان

و معلش باه بدل اهل اسكندرية بيضايقوا منا يبقى فى الكام شهر دوول يشوفلهم حتة تانية

ده مصيفنا من السنة للسنة يعنى براااااااحتنا

و بعدين انا مشفتش ديسكوهات و كلام فاضى بلاش كدب باه

اتبلوا على المصيفين

جاااااااين جااااااااااين مهما قلت

يالا حضروا السمك باه

Dr.khaled said...

الحقيقة انا من مدة مرحتش اسكندرية
الواحد نفسه يروح مكان ع البحر فاضي مفيهوش اي حد عشان يستحمه براحته ويهيص
لكن هيهات
ربنا المستعان
----------------
مكنتش افتكر ان عصفور المدينة يطلع منه كل الكلام ده... :)

خليك فى البيت said...

ندعوكم لزيارة مدونة خليك فى البيت والمشاركة فى الحملة

ammola said...

لالا مالكش حق خالص يا ما علينا
دول حتى لذاذ ولطاف وخفاف واول مايهلوا احنا بندخل اعتكاف اجبارى
ولا الشوارع بتتزحم ولا التاكسيات بتغلى ولا البلاجات بتتبهدل
بس اقولك على حاجة سر...خليهم هما ييجوا فى الصيف والحر والزحمة وخلينا احنا مع اسكندرية القمر بتاعت الشتا بتبقى حاجة تانية خالص والله وكفاية انهم محرومين من الكورنيش الفاضى الرايق لما تنزل تتمشى بعد الفجر...يااااااااه دى لوحدها تساوى مليون مصيف
عموما مرحب بيكو يا جماعة احنا بنوسع السكة من دلوقتى

AHMED SAMIR said...

فعلا المصيف له تقاليد
واهم تقاليد المصيف
يا بخت من زار وخفف
تحياتي على الموضوع الجميل دة

رينـــــــــــا said...

هههههههههههههههههههههه
ههههههههههههههههههههه
هههههههههههههههههههههه
بجد تجنن

أمــانــى said...

نعم نعم
ايوا كده بسم الله مشاء الله على الكرم واهل الكرم
صحيح المثال اللى بيتقال عليكم تعرفه ولا اقوله
ولا اقولك بلاش
احسن شايفة القعدة بسم الله مشاء الله كلها اسكندرانى الافضل خلينا ساكتين
بص بقى يا عم ماعلينا
حتى برضو الناس اللى بييجوا يشرفوا عندنا وبرضو بيقلعوا قال ايه الجو حر كدابين تلاقى الواحد منهم بيتنفض من البرد وبرضو قالع دا كلام يا اخويا
بص بقى المشكلة فى البيوت وتربية
يعنى مثلا فى العيد اطلع ساعة الصلاة بسم الله مشاء الله الدنيا نضيفة خاااالص وبعد بس ما الناس توصل الحدائق تلاقى الدنيا كلها اخر قرف لامؤاخذة
بس خـــلاص هنقول للناس روحوا بادب بقى شوية وعيب كده لما تروح عند ضيوف تقعدوا بادب مش ده برضو الاصول
كفاية بقى رغى
وطولت عليكم
:D

Unknown said...

عندك حق الصراحة لان انا كمان لما بصيف مش بستريح من سلوك المصيفين الأوفار ده

البحر والهوا والجو ده للإستجماااام مش للجنااااااان
يعنى الواحد يقعد كدة ( ويسمع من البحر) ويقرا او يكتب او حتى يتفكر فى خلق الله
مش للزروطة ابدا والعوم مع كل خلق الله دى والرملة والبهدلة دى كلها

يلا ربنا يهدى الجميع ويهدينا

أدعولنا بقا نعرف نروح يااااااااارب
اللهم اميييييين

صاحب البوابــة said...

تقاليد المصيف

عبارة لها رنين خاص يقترن بحرارة الصيف

تحياتي

سكتم بكتم said...

وسع يا جدع أنا جي أتعارك

أية كلكم علية ولا أية

الواد ماعلينا يعني أتخنق وأتخنقنا كلنا معاه

تعرفوا أن أسوء شهور السنة في الأسكندرية هي شهور الصيف
زحمة ودوشة وحر أنا مش عارف المصيفين بيحبوها لية في الصيف أنا رأيي أنهم يجوا في عز الشتا وينزلوا البحر علي الأقل مش حيفكروا يجوا تاني

هههههههههههههه

أتكلم يابني براحتك قول دا أنت جيت علي الجرح

نسرين - أمة الله said...

السلام عليكم
ايوه ايوه ايه بقى الكلام ده
والله الواحد ساكت ومش عايز يتكلم وهو مين اساسا اللى علم الناس لبس الشورطات مش البحر برضه احنا بقى عندنا بحر ولا عندكم
وحنيجى بقى فى شهر8
ولما نشوف

BinO said...

ماعلينا
أخويا
حبيبي
نصير الضعفاء
أنا معاك قلباً وقالباً
أخ من منظر الحمالات المقزز والناس اللي ماشية حافية في الطريق
التاكسيات وشغلها وأستغلالها
ده غير الزحمة
عموماً أبقي أستخدم الطريق الدائري أو الساحلي
بقولك
أقعد في البيت أكرم

mohand said...

السلام عليكم
والله ما قصرت
فعلا فعلا فعلا
كلامك صح صح صح
---------------
معلش مش كنت منتظم في الدخول عندك
بس ملحوقه
اهوه بشوف اللي فاتني
تحياتي

البنت الشلبية said...

بالبنطلون الاستريتش وتشد شيشة قدامك وقدام كل الناس

ولا هو البلد اللي ما يعرفكش حد فيها ........

ههههههههههههه

لا ومش الشباب بس الى بيسهرو للفجر انا اعرف اعئلات مبيحللهاش المشى الا بالليل لحد الصبح,,

وبعدين ماهو مصيف لازم الناس تغير رتم حياتها ,,يبقى ايه الرفق بقى؟!!

ماهم طول السنة بيصحوا الصبح وبينامو بالليل ,وهتيجى على الكام يوم دول لما يشمو نفسهم شوية

هع هع هع

البنت الشلبية said...

انت شخصيا بتنام الساعة كام لما بتكون فى المصيف؟@@

قول بأمانة

رفقة عمر said...

السلام عليكم ماعلينا
جزاك الله خيرا على السؤال ربنا يكرمك يارب واسفه على التاخير انا كويسه الحمد لله
وعبدالله كويس نايم طول النهار وصاحى طول الليل
جاى متبرمج جاهز