Friday, August 10, 2007

المقامة الصحية

حدثنا عبدالله بن النقيب وهو صديق لي قريب .. أن نساءاً اجتمعن عنده في الدار وبدأن في الحديث والحوار .. تقص كل واحدة منهن ما تريد من الأخبار والحواديت .. فقالت إحداهن بصوت عال رنان فسمعها صاحبي من وراء الجدران .. قالت وهي تحكي للبقية ما جرى له في الوحدة الصحية ..

قالت : ذهبت بأولادي الثلاثة للكشف على أحدهم قبل بدء الدراسة .. فدخلت على الست الطبيبة فنظرت لي نظرة مريبة .. وقالت لي : ما كل هؤلاء?? .. جئتي وثلاثة من الأبناء ؟!! .. فهممت ان أفتح فمي فخشيت من نظرتها أن تريق فيها دمي .. وقالت لي : أحضري من كل طفل عينة ليتم الفحص على بينة .. ورغم أن واحدا منهم فقط هو المريض ولسنا بحاجة لهذا الفحص العريض ... إلا إنني أطعت الأمر وذهبت إلى الحمام على الفور

وفي الداخل أعطيت كل واحد من أبنائي أنبوب وشرحت لهم ما هو المطلوب .. فأجابني أحدهم لما أردت واما الاخران فقد أرهقاني حتى مللت ... رفضا في شمم وإباء أن يجيبوا للطبيعة النداء .. وفي هذا الأثناء احترت أنا وقد لبثت في الحمام قرب السنة ..

فلما أعجزتني الحيلة وبقيت تلك المدة الطويلة .. خطرت على رأسي فكرة منيرة تخرجني مما أنا فيه من الحيرة .. فوزعت ما أخذته من الأول على الآخران .. وخرجت وفي يدي كل أنبوب ملآن ..

وتوجهت لمعمل التحليل وكتبت على كل انبوب اسم العليل .. وقالت لي الطبيبة : عودي بعد ثلاثة أيام ومعك نتيجة التحليل يا مدام ...

وبعد ثلاثة أيام ظهرت النتيجة الطبية فأخذتها وذهبت إلى الوحدة الصحية

فأخبرتني عندها الطبيبة أن الأول عنده أميبا .. والثاني ظهر بعد التحليل البائس أن المحروس لديه سكارس .. والثالث نجا من الملاريا وظهر ان لديه فقط دوسنتاريا

فنظرت للطبيبة في تعجب انتظر منها في ترقب .. أن تنتهي من الهزار وتنتقل للجد في الحوار .. لكن صعقت لما علمت أن كلامها معي بجد .. فنظرت لها وبدأت في الاستفسار فقالت مكفهرة : ما هذا النهار ؟؟؟ فانصرفت وأنا أصحك طول المسافة والكل يظن بي السخافة .. فأولادي مرضى بكل الأمراض المعروفة وأنا اضحك وكأنها حقيقة مألوفة ...

قال عبد الله : فشاب ضحكتي حسرة وندامة وقلت في نفسي على صحة المصريين السلامة

13 comments:

معمل تحاليل أولاد أبو زياد said...

مصر أم الدنيا
و حتفضل أم الدنيا
فيها دكاترة كبار
و علماء عظام
ليه نشوه صورتها
فيه 7 احتمالات
الأول تكون فعلا خد العينة من كل واحد و إنت ناسي
التان:تكون برضه خدت العينة من كل واحد إنت ناسي
التالت و الرابع و الخامس و السادس
إن يكون إبنك عنده الحاجات ديه كلها
بس فيه حاجات بتعوم لفوق و حاجات بتغطس لتحت
لما تيجي تفرغ من أنبوبة لأنبوبة
الحاجات اللي فوق حتروح في الأنبوبة اللي بتدلق فيها
و الحاجات اللي تحت حتفضل في الأنبوبة اللي بتفرغ منها

الاحتمال السابع
يكون مكشوف عنهم الحجاب و عارفين كل واحد عنده إيه من غير عينات



و لن أقبل المساس بالكلام عن مصر و دكاترة و صيادلة مصر
مصر النزاهة
و الشرف
و الأمان
و الحب
و النيل بيجري
من قبلي لبحري
روح واحدة
إيد واحدة
مسلمين و أقباط
رجال و نساء
عمال و فلاحين

بلاش الحقد
التحليل كله ب 3 جنيه
عايز تشتري البلد و تشنع عليها ب 3 جنيه
حرام عليك

سكتم بكتم said...

هههههههههههههه

أما الأسلوب فهو تحفة من تحف الزمان وضربا من ضروب الفن والروقان

وأما المضمون فالله يكسفك يا بعيد مش كنت تاخد رأيي دأنت لما بتكح بتقولي تقوم تكتب بوست لية علاقة بالطب من غير ما أعرف

عارف لية بقول الله يكسفك
علشان لا لا الأميبا ولا الأسكارس ولا الدوسونتاريا بيظهروا في البول من الأساس... يافاضحني

وكل اللي حناخده من التعليقات دلوقتي تريقة علي جهل الأطباء.ومصمصة شفاه وشوف ياخويا داكترة اليومين دول

منك الله ياشيخ
بس بصراحة الأسلوب حكاية

جنـه said...

هههههههههههههههههههههههه

حسبنا الله ونعم الوكيل

مش لاقيه كلام تاني اقوله

هم يبكي وهم يضحك

عصفور المدينة said...

دي ستامبة ثابتة والغلطة غلطة كمبيوتر

رفقه عمر said...

سؤال بجد انت فعلا اللى كاتب الكلام دة من عندك بنفس الصيغه
بجد طريقه عرضك جميله جدا
اول مرة تكتب بالاسلوب دةعندك مواهب مستخبيه
بس كدة هاتخلينا نخاف من اى تحليل نعمله
تفتكر ممكن نعمل ايه
علشان نضمن نتيجه التحاليل

البنت الشلبية said...

هههههههههههه وانا الى كنت صدقت
سكتم بكتم ايوا كده وضحلنا الحقيقة
اه منك يا ما علينا

طب هات مرض بيظهر فى البول هههههههههههههههههه

يلا الرسالة وصلت
مفيش لا تعليم ولا صحة ولا اى حاجة فى مصر

Future_Preacher said...

ههههههههههههههههههه
و لا حواديت ألف ليلة و ليلة
:)
ماشاء الله ايه الابداع ده
بصراحة حضرتك موهوب جدا
و أحسن حاجة ان حضرتك بتوصف مشاعر جميع ابطال القصة اذا كانت الام المسكينة و لا الدكتورة اللي مش طايقة نفسها دي ذي كتير من الدكاترة اليومين دول مع الاسف
بجد عمار يا مصر
ان كان طب و لا تعليم
و لا مية و لا أمية
و مواطن غلبان و حالته جيم

و مع كل ده مع الاسف بلدي و بحبها

الصارم الحاسم said...

اتكلم برضه واللابلاش انا
:(

على فكرت حاولت اتصل بيه بس ماعرفتش اوصله ...ما خارج نطاق الخدمة او لا اجابة


وحسبنا الله ونعم الوكيل...مش فيه هو طبعا

أمــانــى said...

بـعد اذنكم هأضحك
هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
مش معقولة عمار يا مصر
بس برضو عايزة اقول كلمة بصراحة الطبيبة برضو معذروة هى رايحة بالثلاثة ليه وواحد بس منهم اللى مريض
ونتيجة التحليل عجيب بصراحة يعنى لازم تطلعه مختلف
فكرنى بالتقارير المضروبة
هههههههههههههههههههههههههههههههههههههههههههههههههههه
عمــــــــــــــــار يا مـــــــــصر يا ام الدنيا

لحظة said...

من كام شهر
دخلت كلية طب القصر العيني لسبب ما
وانا بامشي في فناء الكلية الجميل
والطالبات والطلبة يمشون من حولي
سمعت مجموعة طالبات يتحدثن عن امتحان لسه خارجين منه
- عملت ايه
- مش عارفة اصل انا ما فتحتش الماده اصلا
طيب
الكلام ده مقبوا من طالب في تجارة او اداب او حقوق او حتى اي كلية تانية مع احترامي للجميع
لكن يطلع من طالب الطب اللي المفروض ان هو ال " كريم در لا كريم" في وسط الطلبة واللي جاب مجموع واو من كبره خبط في السما واللي دخلها بالضاللين
يبقى ايه؟
بيدخلوا الكليه حالهم يتضحدر ليه؟
قلة بس اللي بتفضل واخداها جد وبيعتبروا نفسهم لسة ما خلصوش سنوية عامة لحد ما ياخدوا البكالوريوس
وارجع اقول برضه غلابة
ماهم مش بيعلموهم حاجة في الكلية
ومش لاقيين حد يجربوا فيه
قصدي يدربوا عليه
ربنا مع الجميع
عذرا للتطويل

لحظة said...

عفوا
نسيت احيي حضرتك على الاسلوب الجميل
اذكر ان المقامة كانت شكل من اشكال الادب العربي
انتشر في الدوله العباسية
صح؟

إخوانى مخربش said...

انتقل الى المعتقل الحصين الاخ ماعلينا بسب التدوين

فقد قام سيادته بنظم مقامة بها من السبب والقذف والمهانه

لكل ما هو مصرى اصيل وصميم بيغير مراعة ادب ولاصدق ولا حتى دين

ونحن نحزر امثاله من اللعب فى عدادات اعمرهم

لان العمر مش بعزقه ولا حتى هيفضلهم

karamella said...

جزاك الله خيرا
اسلوب موسيقي جميل
حسيت ان الكلام له صوت موسيقي وعجبني جدا
اسلوب لذيذ لعرض الوضوع
بس فعلا الحال في مصر
مع الاعتذار الشديد لكل الدكاترة
بالنسبه للصحه تدخل سليم تطلع بفيرس
يا الله السلامه
بس حنقول ايه المصري حيفضل مصري النيل رواه والخير جواه
ههههه