Wednesday, November 07, 2007

كل مؤتمر وأنت طيب ياراجل يا طيب

وبعد انتهاء أعمال مؤتمر الاتحاد الاشتراكي .. أحب اهدي جميع قطاعات الشعب المصري هذه الأغنية


بعد ما ادى وبعد ما خد
بعد ما هد وبنى واحتد
شد لحاف الشتا من البرد

بعد ما لف وبعد ما دار
بعد ما هدى وبعد ما ثار
بعد ما داب واشتاق واحتار
حط الدبلة وحط الساعة
حط سجايره والولاعة
علق حلمه على الشماعة

شد لحاف الشتا على جسمة
دحرج حلمه و همه واسمه
دارى عيون عايزين يبتسموا
اللي قضى العمر هزار
واللي قضى العمر بجد
شد لحاف الشتا من البرد


اذكر من سنوات أني ضحكت كثيرا عندما قرأت الخبر في جريدة الأخبار أن هذه الأغنية ممنوعة في التلفزيون المصري لأن بها إسقاط سياسي .... وكنت اسأل نفسي أين هو هذا الإسقاط ؟؟

الآن وبعد كل مؤتمر قمة للزعماء العرب وبعد كل مؤتمر حاشد للاتحاد الاشتراكي وغالب مؤتمرات بلادنا اضحك كثيرا على سذاجتي


بعيداً عن الموضوع
حوار مع جمال عياش القيادي بحركة فتح



19 comments:

عصفور المدينة said...

لا ..بلدنا بتتقدم بينا إحنا

ده شعارنا

رفقة عمر said...

تصدق مش فهمت حاجه انت رجعت للالغاز تانى ولا ايه

لحظة said...

هو الحزب الاشتراكي والا حد تاني؟؟؟؟؟؟؟؟
عموما مش فارقة
تحياتي

محمد عبد الغفار said...

لعلمك بقى التدوينه دى هتتمنع عشان فيها اسقاطات سياسيه

mohand said...

السلام عليكم

يا راجل
هو دا اسقاط سياسي

يمكن اللحاف سقط ولا حاجه


بس هو مقالش السجاير نوعها ايه ليه


تحياتي

إيمان الحسيني said...

فاكر أغنية (بابا أوباح) ؟
كانوا بيقولوا برضه إن فيها إسقاطات سياسية

:D

islamz said...

اسقاط سياسي هههههههه
هما دول بيهمهم اسقاط ... بس برده اغنية منير شديدة وعلى رأى المثل اللى على راسه بطحة ..

ammola said...

المقصود بالاسقاط هو اسقاط الشعب من حساباتهم
حلوة الجملة بتاعت"علق حلمه على الشماعة"
طيب يصرفوا لنا شماعات علشان الحلم ما يتكرمش

shorouk said شروق سعيد said...

تكدير للأمن العام

shorouk said شروق سعيد said...
This comment has been removed by the author.
Ma 3lina said...

كدا يا بشمهندس ما كنت فى السليم و بعيد عن السياسة

ليه باه الاسقاطات دى

بس الاغنية جاامدة

البنت الشلبية said...

الاغنية ممتازة طبعا
وكل مؤتمر وانتو بخير

رفقة عمر said...

كل سنه وانت طيب ماعلينا
هاتسالنى ليه
هاقولك علشان انت كملت سنه فى التدوين انتظرتك تحتفل بيه
بس الظاهر نسيت ولا ايه
مش اول نوفمبر برضه كانت ميلاد مدونتك
عقبال اليوبيل الذهبى للمدونه
ومعاك احفادك بقى وسنناك مش موجودة و الشعر شايب
كل سنه وانت بالف خير

ma 3lina said...

عصفور المدينة
الخوف إنها مش بتتقدم أصلا لا بينا ولا بيهم

رفقة عمر
ههههههه .. قصدي هما بيعملوا ايه في المؤتمرات دي غير هيصة وزمبليطة ع الفاضي .. ما هو شوية صراحة وشوية ألغاز .. من ده على ده ..
:D
رفقة .. مش عارف اقول لك ايه .. بجد بجد تذكرك لبداية تدويني فرحني جدا .. انا ما نسيتش احتفل بيه .. بس الحقيقة محتار احتفل بيه ازاي واقول ايه .. عموما أنا فاكر إن عيد ميلاد مدونتك قرب برضه وإن شاء الله نردها لك .. ربنا يكرمك يا رفقة ويجزيكي كل خير على طيبتك دي وعلى كلامك ليا

لحظة
قصدت الحزب الوطني الديمؤراطي اللي زيه زمان الاتحاد الاشتراكي .. نورتي المدونة وتحياتي

Mohamed A. Ghaffar
أنا برضه اتكلم في السياسة .. دا انا حتى بطلت من زمان .. دي تدوينة فنية .. ربنا يبعدنا عن كل ساس ويسوس ومسوس وكل ما اشتق من السوس


mohand
وعليكم السلام ورحمة الله وبركاته .. وأنا مالي يا خويا .. دا هما اللي بيقولوا .. أما نوع السجاير فأكيد سجاير محشية لزوم الدماغ العالية

طـعـمـة
ههههههههه .. بجد ?? .. أنا فاكر الأغنية بس مش عارف كلماتها ... بس للدرجة دي خايفين .. والله فكرتيني بأغنية برضه سمعتها مرة وانا ماشي في الشارع وكان اظن وقت انعقاد القمة العربية حسيت فيها كده كلام من تحت لتحت .. كانت بتقول :
كل الحلاقين اللي حلقم ليا .. تحيا الوحدة العربية
:D

islamz
هما لا بيفهموا اسقاط ولا سياسة وآخر اسقاط ليهم لما سقطوا في الاعدادية ومن ساعتها وهما عندهم حقد على كل ناجح فبيحاربوه ..
:D
كل عام تدويني وأنت طيب

ammola
تفسير ممتاز للاسقاط .. وبالنسبة للشماعات فدا مش للشعب .. عشان الشعب مالوش حق الحلم .. لأنه ببساطة لا يملك تمن الشماعة .. هذا وتدرس الوزارة استيراد شحنة شماعات من الصبن ودعمها لسد حاجات الشعب المصري وامداد المواطنين في القرى والنجوع بالأحلام

مدونة تحت العشرين
مين ؟؟؟


Dr. Ma-3lina
يسعدني إنها عجبتك يا دكتورة .. ما تخافيش أنا في السليم برضه .. وبعيد عن السياسة


البنت الشلبية
ما هي المشكلة إن كل مؤتمر يتناسب عكسيا مع كوننا بخير .. يعني ما ينفعش يبقى فيه كل مؤتمر وفي نفس الوقت نكون بخير
:(

أميرة محمد محمد محمد said...

انت شكلك كده عدو الديمقراطيه و التقدم و عايز تعقل موتوسيكل التقدم
هذه بلادنا وهذا حالنا و ربنا يرحمنا

اسامة يس said...

ههههههههههههههههههه
واديها كمان حرية ادي ادي ادي
وبكدهاثبت الحزب الوثني احقيته في الحكم .. وما علينا

دمتم بكل ود...

mohand said...

السلام عليكم

ايه مش باين ليه؟

علك بخير

رفقة عمر said...

السلام عليكم
خير مش فيه جديد ليه
علشان تبقى عارف مش هانزل بوست جديد الا بعد ما تنزل بوست
واظن عرفت ان دة سياستى الجديدة

ma 3lina said...

أميرة محمد محمد محمد
يارب يرحمنا .. هو موتوسيكل التقدم دا بيروح فين ؟؟ .. مفيش حاجة المعمورة من هنا ؟؟

osama
آه مش هو بس اللي بيتكلم .. حقه يحكم بقا .. وعلى رأيك أدي أديها

mohand
وعليكم السلام ورحمة الله وبركاته .. ربنا يكرمك يا أخي مهند .. موجود والله بس شوية لخبطيشن كده والحمد لله على كل حال

رفقة عمر
وعليكم السلام ورحمة الله وبركاته
ربنا يكرمك يا رفقة .. انا حصلت عندي شوية لخبطة عشان كده اتأخرت .. جزاكي الله خيرا على السؤال .. وياريت تنزلي على طول دون انتظاري عشان زوار مدونتك ما يضربونيش .. وإيه حكايات السياسات الجديدة دي .. كده دخلتي في السياسة من ورايا