Monday, February 25, 2008

معلومات عن مرض السرطان

قاعدين في الدبلونة لا بينا ولا علينا في استنظار السيد الدكتور المحترم واللي معاده معانا الساعة 5 ونص .. بس اتأخر شوية اكمن عنده محاضرة الساعة 5 لسنة أولى .. ودا عادي جدا لأن الدبلونة إدارة أصلا وعشان كده قمة روعة التخطيط والإدارة تلاقيها حدانا .. المهم وعشان ما اطولش عليكم .. قولوا طول .. واحنا قاعدين لاببنا ولا علينا في استنظار السيد ... (الكوبليه دا اتقال قبل كده ؟؟!!!!!! .. ما علينا )
المهم قام الدكتور عاصم وهو طبيب نسا وولادة وقال يا جماعة عايز اتكلم معاكم شوية لو ممكن .. طبعا لانه أكبرنا سنا ورجل له احترامه وكمان حيقضي وقت الانتظار الممل اللي معظمنا بيحاول يقاوم النوم فيه فقلنا طبعا يا دكتور اتفضل ...

قال باهتمام بالغ .. يا جماعة أنا عايز اكلمكم في موضوع مهم .. عايز اكلمكم عن مرض السرطان ..

وبدأ يشرح يعني إيه خلية سرطانية وإنها عبارة عن خلية بتشذ عن قوانين الجسم وبتخرج عن سيطرة الجسم عليها وتبدأ بالتكاثر .. ولو اتكاثرت في مكان محدد وما خرجتش عنه بنقول عليها ورم حميد ... ولو خرجت من منطقة محددة ووصلت مع الدم لمناطق تانية في الجسم بنقول عليها ورم خبيث

قال إن فيه نظريات اتحطت عن سبب تكون الخلايا السرطانية وقال كلام مفهمتش منه حاجة ..

قال كمان إن السرطان مرض ويمكن الشفاء منه بس لازم المريض يكون عنده الأمل إنه يقدر ينتصر عليه لأنه لو المخ فقد الأمل حيكون الجسم ومناعته زي الجيش اللي القائد بتاعه اصدر أمر بالانسحاب .. فمهما كانت قوة الجيش حينهزم في المعركة لأنه انسحب .. والأمل أول سلاح للي اصيب من المرض دا وعايز يتعالج

قال الدكتور عاصم إن الخلايا دي يمكن بتخرج عن التصرف الطبيعي لخلايا الجسم نتيجة لعوامل وراثية أو ضغوط خارجية زي الالتهابات المتكررة أو السعال المستمر أو التوتر الزائد أو انتقال دم ملوث أو اشعاعات ..

وقال إن سبب كلامه في الموضوع إن اساليب الوقاية من السرطان سهلة جدا وبسيطة جدا لو اتبعناها بإذن الله ربنا حيحفظنا من المرض ده وهي :

- البعد عن التوتر والقلق والزعل والحزن .. لازم الإنسان يقاوم الزعل بأي شكل .. لأن الزعل مش حيرجع أبدا ما فقدت وعجبا لأمر المؤمن إن أمره كله له خير وليس ذلك لأحد إلا للمؤمن إن أصابه خير شكر وإن أصابه ضر صبر فكان خير له

- البعد عن مصادر التلوث بكافة انواعها وخاصة المناطق التي تكثر فيها عوادم السيارات والرصاااااص بالذات وكمان الغبار زي مصانع الأسمنت والبعد عن أماكن الضوضاء السمعي أيضا والبعد تماما عند التدخين والمدخنين والأغبياء والغبيات اللي بيدخنوا الشيشة والسجاير (الجملة الأخيرة من عندي )

- البعد عن كافة الأطعمة التي تستخدم الألوان وأكد على إبعاد أطفالنا عن الحلويات والمواد الحافظة والبعد عن الكورن فليكس والحاجات اللي زيه اللي فيها قمح مخزن

- تناول الفيتامينات وخاصة سي .. وقال ان احنا مش نكتفي بعصير اللمون أو البرتقان .. لا كمان ناخده من الصيدلية حبوب .. وإن الجسم بيحتاج عدة جرامات منه يوميا لمقاومة عمليات التلوث اللي بتحصل في الجسم

- تقليل التعرض قدر الإمكان لمصادر الإشعاع زي الكمبيوتر والموبيلات وخطوط الضغط العالي

مش عارف يمكن اكون نقلت معلومات ناقصة أو مش مفهومة صح .. لكن اهتمام الدكتور عاصم بنشر اساليب الوقاية هو اللي خلاني انشر كلامه .. مين عارف ..

10 comments:

عصفور المدينة said...

جزاكما الله خيرا
ولابد من الاهتمام بجهاز المناعة
باتباع نظام غذائي سليم والتقليل من النشويات والدهون والمواد الحافظة والاهتمام بتكامل الغذاء والكالسيوم والمعادن والخضروات خاصة

وأهم من ذلك الحالة النفسية

خمسة فضفضة said...

السلام عليكمورحمة الله وبركاته

صح كده الله ينور عليك ن نقل تمام التمام

بس قولي بقي بالله عليك ، فيه واحد فمصر ممكن يتفادي الحاجات اللي انت ذكرتها دي
في حد مش بيتقهر ويزعل كل يوم بسبب الاسعار والقرف اللي بنشوفه في كل حته

فيه حد مش بيمشي في الشوارع اللي سجلت معدلات عاليه جدا من التلوث بالرصاص ، وعلي ما اعتقد ان القاهره هي الاولي عالميا في كده

في حد مش بياكل قمح مخزون ، دا كل العيش المدعم من قمح مخزون ومسوس ومليان افلاتوكسينز اللي هي السبب الاساسي للسرطانات وسرطان الكبد اساسا و كل ده والناس مش لاقياه ، رضينا بالهم والهم مش راضي بينا

في حد مش بيتعرض يوميا ولكميات كبيره من الاشعاعات ، دا حتي لو انت مش شايل موبايل هاتلاقي حواليك 2 او 3 مليون شايلينه دا غير ابراج التقويه اللي في كل حته

طيب سيبك من كده ، الكمبيوتر في حد ما بيعدش قدامه علي الاقل ساعتين في اليوم

دا غير الاكل المهرمن والمليان مبيدات مسرطنه
والميه الملوثه

الحاجه الوحيده اللي نقدر نعملها هي حكاية فيتامين سي دي ، مش غالي ومتوفر في كل الصيدليات ( فيه منه شريط بجنيه )
بس برضو هايقدر علي ايه ولا ايه دا الجسم بيدخل فيه كل يوم بلاوي متلتله


يبقي كمية الناس الفظيعه اللي بتصاب كل يوم بالسرطان دي مش جايه من فراغ

ربنما يسترها معانا ويطلعنا منها علي خير

آلام وآمال said...

ربنا يبارك فيك والله على المعلومات الجامة دي

جزاك الله خيرا حضرتك والدكتور عاصم وكل واحد بيحاول يعلم الناس ويفيدهم وميبخلش عليهم بعلمه

ربنا يعافينا من كل بلاء

آلام وآمال said...

الجامدة**

بمعنى القيمة
:)

رفقة عمر said...

معلومه فيتامين سى دة ااقدر اعملها ولكن بقيه المحظورات مش هاقدر اوعدك زى كا دكتوره فضفضه قالت
نسال من الله العافيه
هو الحافظ
ربنا يسلمك ويحفظك من كل سؤ
ويحفظ كل المسلمين من الامراض اللهم امين يارب العالمين

ammola said...

طيب كنتو قولوا كده م الاول
دى وصفة سهلة...دى وصفة هايلة
هو القمقم راح فين؟؟
:)
طبعا انا باهزر ..طبعا معظم الحاجات دى صعب ويمكن مستحيل نتجنبها وده حيخلينا نزعل وجهاز المناعة يبوظ..عاجبك كده؟؟؟

مسلم said...

سبحان الله يا ما علينا؛ خروج خليه واحده عن نظام الجسم قد يسبب وفاه البني آدم

و برده خروج الناس و شذوذهم عن دين الله قد يؤدي بالأمه إلي ذل و هوان؛ سبحان الله

يعني نقدر نقول إن بسكوتنا و قله دعوتنا؛ إحنا اللي سايبين السرطان في جسد أمتنا

و الأهم من كده إن لو فقدنا الأمل زي ما إنت قلت؛ يبقي مفيش عمل؛ صحيح

بس يا تري سرطان أمتنا؛ يحتاج بتر؛ و لا ينفع معاه العلاج

أعتقد محتاجين دكتور..!!!؟

طال الليل said...

الله ينور عليك كلام فى الصميم

تدوينة الصراحة مش راحة كمان أعجبتنى وجت عالوجيعة عندى برضه وعشان كدة لما الظروف تسمح هكتب لحضرتك بعض الأفكار والدروس اللى خرجت بيها من تجربتى الفاشلة بسبب المصارحة الزايدة عن الحد على حد زعم بعضهم
ولا يهمك يا غالى إقلب كل اللى فات وراك
أنا شخصيا مستمر على نهج الصراحة ومش هزوق الكلام وهفضل صريح وبلاش الجواز دة اللى هييجى بالخداع
أنا صعيدى بقى ومش هتغير ومش هكذب عشان أتجوز

الراقص مع الذئاب said...

السلام عليكم

جزاك الله خيرا يا هندسة
معلومات جميلة ومفيدة

وبالفعل الحالة النفسية بيكون ليها عامل كبير اوي في الانتصار علي مرض الرسطان بإذن الله تعالي
والدليل علي كدا غن معظم حالات الشفاء بإذن الله بتحصل بين المصابين من الاطفال
عشان هما مش عارفين حاجة ولا بيعيشوا وهم ويأس المرض

اللهم اشفي مرضي المسلمين وأدم علينا نعمة الصحة

جزاك الله خيرا مرة اخري يا باشمهندس

ma_3alina said...

عصفور المدينة
جزانا وإياكم .. الأكل والحالة النفسية .. اصعب حاجتين عند محاولة السيطرة عليهم في مصر
:)

خمسة فضفضة
وعليكم السلام ورحمة الله وبركاته
لا طبعا مفيش حد ممكن يتفادى الكلام ده
:)
والله الكل قال للدكتور عاصم كده .. بس هو مصر إنها حاجات بسيطة بتيجي بالتعود
بالنسبة لفيتامين سي دي .. انا بعمل دعاية للصيدليات اهو .. يعني الأرباح بالنص
:))

آلام وآمال
ربنا يخليك ويكرمك ويجزيكم بمثله
صاحبك كرم مسلم عامل إيه ؟؟ بلغه سلامي وتحياتي

رفقة عمر
اللهم آمين .. وماله يا رفقة أهو اللي نقدر نعمله نعمله والباقي .. ربنا يقدرنا عليه
:)
هي اصعب حاجة البعد عن الزعل
:D

ammola
احم احم .. أهلا أهلا يا ست أمولا
مش أنا والله اللي قلت دا هو الدكتور عاصم الله يجازيه خير اللي بيقول .. انا ماليش دعوة
:)
بلاش حكاية القمقم دي .. حضرتك بتنسي مفاتيح الحاجات
والله الحاجات وإن كانت صعبة بس مش مستحيلة ولا حاجة .. حاجات الأكل دي يمكن الاستغناء عنها .. الألوان والكورن فليكس والشيبسيات والكارتيهات .. كل الحاجات دي يمكن الاستغناء عنها وبدل ما نطبخ بسمن ممكن نستخدم الزيت برضه مفيد ..
مش كده ولا إيييييييييييييه ؟؟

مسلم
إيه ده ؟؟
هي المدونة نورت كده ليه ؟؟
هو مين بيعلق عندي ؟؟
مش ممكن .. مش معقول .. أخي مسلم هنا ...
يا أخي طالت غيبتك عنا .. يا مرحبا بك .. متابع كل تدويناتك .. ولكن مش بقدر اعلق
يااااه .. مشكلة المشاكل .. والسؤال اللي بقاله عشرتاشر سنة بيتقال .. بتر ولا علاج .. عايز رأيي .. العلاج افضل وسيلة .. بس لازم احتمال البتر يفضل قائم وواضح عشان السرطان يلم الدور ويكش ويسمح بالعلاج

طال الليل
وينور عليكم يا فندم
يا أهلا بالصعايدة .. وفي انتظار أفكار حضرنك بإذن الله

الراقص مع الذئاب
وعليكم السلام ورحمة الله وبركاته
جزانا الله وإياكم
ربنا يشفي كل مريض ويساعد مرضى السرطان على تجاوز محنتهم ويمدهم بالأمل .. اللهم آمين