تكوير الحركة

مبدئياً كده لازم نعرف إن إحنا فريق واحد، وعشان كده لازم نلعب كفريق واحد، يعني لازم يكون لنا اسم واحد للفريق كله حتى لو اختلفت مراكزنا، مش كل واحد فينا يطلع له باسم مع نفسه وقال إيه عشان يوصف مركزه .. كل الفريق ليه اسم واحد، وكمان أساسي طبعاً إننا لما ننزل الملعب يبقى لينا مرمى واحد كلنا نتعاون عشان نحط الهدف فيه، مش كل واحد يختار مرمى بمزاجه ولا يجيب معاه من بيتهم 3 خشبات يعملهم مرمى لنفسه ويلعب عليه .. مش كده أبداً .. إحنا لينا اسم واحد ومرمى وهدف واحد .. الكل لازم يتعاون مع بعض، ولازم نحب بعض، ونحب الخير لبعض، ونخاف على بعض، ونخلي بالنا إن سلامة العلاقات بيننا أهم من أي ماتش حتى لو خسرنا الماتش دا، عشان الدوري طويل ولو بوظنا علاقة الفريق الواحد والمحبة اللي بيننا حنخسر مش بس الماتش دا .. لا دا احنا حنخسر كل المتشات اللي جاية بعد كده. وبعدين كلنا لازم نقعد ونتفق على خطة واحدة .. شغل الهرجلة والتأنين وكل واحد بيلعب مع نفسه وعلى حسب التساهيل وعلى حسب الظروف وعلى حسب وداد جلبي يابوي .. الكلام دا ما ينفعش ... نقعد مع بعض ونعمل خطة واحدة وكلنا نتعاون وننفذ الخطة دي عشان ربنا يكرمنا. وأهم حاجة يا سادة في الخطة إننا نكون كلنا صف واحد، ما تخلوش الفريق المنافس يخترق دفاعتنا أبدا، وما تسيبوش أي ثغرات في النص يقدر يهاجمنا منها، وغطي دايماً زميلك عشان لو زميلك غلط والمنافس عدى منه يلاقيك أنت واقف له على طول، وبلاش عصبية ونرفزة في اللعب عشان العصبية والنرفزة هما اللي بيولدوا الأخطاء. وحتلاحظوا في الخطة إن كل واحد ليه دور مناسب لإمكانياته .. مش لازم كل الناس يجيبوا إجوان عشان الهداف الناس بتحبه وتهتف له والأضواء بتبقى دايما مسلطة عليه .. مش لازم كل الناس تبقى شويطة ولا صناع لعب .. لا لا .. ممكن كل واحد يتعلم الشوط ويتعلم الترقيص .. بس دا في التدريب أو في المباريات الودية .. ودا عشان بس لو حصل لزميله صاحب المركز الأصلي حاجة هو يعرف يحل محله لغاية ما زميله يرجع .. لكن الأصل إن كل واحد ليه دوره حسب إمكانياته، كل واحد فينا ترس ليه دور في ماكينة الفريق .. الترس الصغير لو وقع الفريق كله حيقع، كل واحد في مركزه بيلعب عشان الفريق كله يكسب وعشان كده لازم يكون فيه تفاهم بينا وبين بعض، يعني نفهم بعض كده بالغمزة، بالنظرة، بالإشارات، بالهمسات بالصمت الرهيب ، داكور ؟؟. وبالنسبة للعيبة اللي بتميل للاحتفاظ بالكرة واللعب الاستعراضي وإظهار مهارات .. صدقوني دا مش وقته .. لو حتظهر مهاراتك يبقى بلمسات متقنة وفي وقتها المظبوط عشان تحبط الفريق المنافس وتوتر أعصابه وتحسسه بتفوقك عليه .. غير كده اللعب يكون جماعي. ونخلي بالنا إن خط الوسط دا أهم مركز عشان دا حركته أسهل وأقصر في التحول من الدفاع إلى الهجوم والعكس، وعشان كده لازم فريقنا يسيطر على خط الوسط ونملاه لاعيبة. واللعب لازم يكون من لمسة واحدة .. وأسهل خطة توصلك للجون هي الوان تو .. محدش ياخد الكورة ويحنط الفريق كله في انتظار سعادته لما يتكرم ويتعطف ويباظي .. سلم واستلم على طول .. إياك تحتفظ بالكرة .. تخلص مهمتك مع الكرة باظيها لغيرك وروح لمركزك المناسب ليك .. ودايما اتحرك من غير كرة كتير واخلق لنفسك مساحات كبيرة وكتيرة جدا .. متقعدش مستني الكرة لما تجيلك، لا أنت روح للكرة واظهر لزميلك دايماً عشان يباظيلك. دايما حافظ على نظافة شباكك، وحذاري حذاري من تضيع الوقت بالتمرير العرضي .. حنقعد نمرر لبعض كده بالعرض فيضيع الوقت ع الفاضي لغاية ما الفريق الخصم يظبط دفاعاته .. دايما اتحرك لقدام مش بالعرض ولا لورا .. ودايما يا جماعة نهتم بالتدريب عشان نرفع اللياقة ونستوعب المطلوب من الخطة وكمان عشان الوصول لمستوى عالي من التفاهم والتناغم وظبط الأحمال .. عشان ما نحملش أي لاعب فوق طافته ولا نهدر طاقته في دور صغير أقل من إمكانياته. وبالنسبة للمدرب فنرجو منه إن يباشر بنفسه تدريب جميع اللاعبين ويتفرج على أكبر قدر ممكن من مباريات الفريق المنافس ويدرسه كويس جدا ويشرح لفريقه نقاط القوة والضعف عنده ويعمل تشكيل مناسب لكل مباراة ويشرح للعيبة الخطة مرة واتنين وتلاتة لغاية ما يشربوها ويفهموها. وما ينساش المدرب أبدا الاهتمام بقطاع الناشئين ويدور على الصاعدين الواعدين لأنه هو دا اللي حيحافظ على استمرارية الفريق ويبث فيه روح الحماس والعزيمة ودايماً يبقى فيه إحلال وتبديل في الوقت المظبوط عشان يحتفظ دايما بشباب الفريق. أخر حاجة أحب افكركم بيها هي أهمية الكونترأتاك اللي هي الهجمة العكسية يعني .. ممكن خصمك يعمل عليك هجمة يزلزل دفاعاتك .. بس دي مش نهاية الماتش .. والشطارة إنك ممكن تستغل نشوته بالهجمة بتاعته وإحساسه إنه كعبه عالي وتستغل إنه لسه مرجعش لمركزه الحقيقي وتبتدي هجمة جديدة سريعة تجيب منها جون تنهي به الماتش .. مش حفكركم بأهمية البذل والعطاء لأخر نفس ... ياللا ربنا معاكم ويوفقكم. [ملخص من درس لأحد مشايخي]