Tuesday, July 05, 2011

مش فاهم


مش فاهم إصرارها على قفل مدونتها، ولما سألتها عن الحاجات اللي مش فاهمها لقيتها زيي برضه مش فاهمة.

برغم إني ممكن افهم موقف د. عمرو عبيد من مريضته لو حصل قبل الثورة، لكن مش قادر خالص افهم إنه يحصل كمان بعد الثورة.

مش فاهم ليه يحيى الجمل اللي اتعين أيام مبارك يقدم استقالته والمجلس العسكري يرفضها.

مش فاهم إزاي بعد الثورة الغاز يرجع تاني يتصدر لإسرائيل وبنفس الأسعار.

مش فاهم ليه كل كام يوم اسمع إن حرس الحدود في سينا رجعوا لوظيفة قتل المتسللين إلى إسرائيل ومداهمة الأنفاق.

مش فاهم ليه قبل الثورة كنا بنزعل أوي عشان وزير زي فاروق حسني غلط في المحجبات أو كاتب زي القميئ كتب كلام سافل في كتاب محدش بيقراه عشان ياخد جوايز ويلم فلوس وبعد الثورة نائب رئيس الوزراء وكاتب زي خالد منتصر يتطاولا على الله علنا وفي التلفزيون.

مش فاهم ليه لسه المسلمات الجدد برضه بيتسلموا للكنيسة أو بيتحبسوا أو يتهموا بالتحريض على الفتنة الطائفية .

مش فاهم إزاي بعد الثورة يتحبس عمال بتروجيت عشان اعتصموا ولسه برضه مفيش أي أخبار عن الحد الدني والأقصى للأجور.

أفهم إن الشرطة تحاول ترجع للعنف والجبروت من تاني .. لكن إنها تنجح في كده وبالسرعة دي وإحنا لسه فرحانين وبنغني للثورة المجيدة اللي محصلتش في الدنيا كلها.

مش فاهم حكاية إخلاء سبيل الظباط المتهمين بقتل المتظاهرين في السويس، وبراءة المغربي وفضلي والفقي وغالي وإخلاء سبيل أسامة الشيخ، وطعن النائب العام وتأجيل كل قضايا قتل المتظاهرين لما أجازة القضاء تنتهي بدلا من إلغاء الأجازة السنة دي نظراً للظروف الراهنة، واللي يفتح بقه يبقى بيطعن في نزاهة القضاء المصري الشامخ النزيه.

مش فاهم كلام الناس اللي قالت إنهم راحوا مستشفى شرم الشيخ وما لقوش عليها أي حراسة وكلام الناس التانية اللي قالت إنهم شافوا جمال مبارك راكب عربية وماشي بيها في الشارع.

مش فاهم اللي حصل الاسبوع اللي فات.

مش فاهم وجهة نظر أخويا الشاب العشريني السايح المصيف اللي كان راكب معايا في المواصلات واعترض على السواق اللي بيهاجم حسني مبارك ويقول له الكبير ما يتهانش ؟

مش فاهم اشمعنى في فيلم رد قلبي كان علي ابن عبد الواحد الجنايني هو اللي قام بالثورة والبرنس علاء كان واضح جدا إنه ضد عبد الواحد والثورة .. ودلوقتي البرنس علاء بيزاحم علي في الثورة وبيقول لعبد الواحد ياأمي يا جاهل.

مش فاهم إيه تفسير إن مدحت شلبي بيتكلم عن الإعلام المحايد الموضوعي وحسام حسن بيتكلم عن الروح الرياضية وتامر حسني ينزل البومه الجديد ويدعي إنه حقق نجاح كاسح والأهلي برغم كل شيء برضه بيفوز بالدوري .

مش فاهم الهدوء الرسمي للإخوان.

مش فاهم يعني إيه تكوين مجلس شورى للدعوة السلفية.

مش عارف ليه رجع لي تاني الخوف كل يوم من إن العسكر حيزوروني الفجر.

2 comments:

مجداوية said...



السلام عليكم

أمولة

آاااااااه من أمولة

لقد تركت في قلبي حزنا وتركت فراغا وتركت عندي لوما وعتابا لها
ولكن أنا لا أشكو ففي الشكوى انحناء وأنا نبض عروقي كبرياء
إن كان هناك تواصل معها أبلغها ما كتبته
واسأل الله أن تكون بخير
وقل لها أنا أيضا باحاول أفهم لكن إلى الآن مش فاهمة

ma 3lina said...

مجداوية
وعليكم السلام ورحمة الله وبركاته

لك الحق في اللوم والعتاب .. وفين الواحد يلاقي حد يهتم ويحرص علي اتصاله به مثل حرصك ومحبتك لأمولة.

اسأل الله ان يجعل محبتك لها سببا في دخولكما الجنة معاً.