انتخبوا الفاشل

إزاي انتخب فاشل قدم أوراق فشله قبل ما يقدم أوراق ترشحه كرئيس ؟؟!! فاشل .. عينه زعيم الفاشلين مبارك، اللي فشل يتعامل مع ثورة كان الناس بتهتف لها وتنادي بيها قبل معادها ب 3 سنين، واللي يومها بالتحديد كان معروف قبليها بشهر ورغم كده فشل إنه يتعامل معاها إلا بالغباوة ... أهو الفاشل مبارك دا بتاع غرق العبارات وحوادث القطرات وحرب الخليج اللي مالناش فيها والسرطان والديون والمخدرات وأم الرشراش وتعذيب أقسام الشرطة والمعتقلات والفساد والرشاوي واللي كان بيفرغ البلد من أي حد ناجح ويبعده ويعزله واختار في كل موقع أفشل الناس ليه أختار الفاشل دا عشان يبقى مدير مخابرات حربية. فاشل كان ماسك جهاز كامل من 3 أجهزة أمنية مسيطرة على البلد ( اللي هي مخابرات - أمن دولة - مخابرات عسكرية) فقامت ثورة في البلد بعد ما مسك مدير المخابرات العسكرية بسنة واحدة بس، طيب ما فيش تقرير اترفع يحذر من مشاكل جاية، مفيش تحذير إن الأجهزة التانية مش شايفة شغلها، مفيش استقالة يقدمها عشان القيادات مش بتسمع كلامه.... مفيش أي حاجة كده. فاشل كان كل المطلوب منه كمدير مخابرات عسكرية إنه يكشف عصابات التهريب ويأمن الحدود .. فدخل مصر في عهده كمدير مخابرات عسكرية أكبر كمية سلاح تقيل وخفيف بالتهريب. واتقتل الجنود المصريين في سينا وماكشفش مين اللي قتلهم إلى الآن. فاشل أنصاره بيقولوا إنه في عهده كمدير مخابرات عسكرية حماس دخلت وفتحت السجون وهربت الناس، طيب هو كان بيشتغل إيه وقتها .. طيب ما عملش حاجة، ما منعهمش، ما كشفهمش، ما طلعش يقول للشعب المصري حماس عملت كذا كذا .. فاشل كعضو مجلس عسكري عمل كشوفات العذرية، وطلع خالف كل أعضاء المجلس العسكري وقال أيوا الجيش كشف على عذرية البنات واتسبب في أول أكبر مشكلة بين الثوار والمجلس العسكري، وفتح باب لمشاكل وأحداث سنة ونص بين الثوار والمجلس العسكري. فاشل كوزير دفاع تدخل في صراع سياسي واتسبب في انقسام حاد في الشارع المصري واستقوى بيه فصيل سياسي على آخر. وجرأه على قطع الطرق، وجرأ الشرطة على إنها تسيب شغلها وتعلن العصيان لغاية ما يمشي رئيس الجمهورية، طلع طيارات الجيش ترمي كوبونات هدايا على متظاهرين وبيانات تهديد على متظاهرين تانين. فاشل كوزير دفاع طلب تفويض من شعبه لمحاربة الأرهاب " المحتمل "، والأرهاب من ساعتها بدأ يشتغل ومعرفش يوقفه ولغاية ما هو نفسه ساب منصبه كوزير والإرهاب شغال وفشل في المهمة اللي طلب تفويض عشانها. فاشل لما كان نائب رئيس وزرا في حكومة الببلاوي وعواجيزه الفشلة اللي حصل في عهدهم شقاق مجتمعي ومشاكل في الأسرة الواحدة، ومحاربة الإعلام وقفل القنوات ومنع الجماهير من مشاهدة الكورة واتقبض على البنات وانهار اقتصادي وفشل في كل حاجة، واتوقفت حال البلد وقفل الشوارع وبقينا في حالة شلل عام تماما وعيشونا على الشحاتة طوال 8 شهور، ومفيش حاجة اتغيرت للأحسن، وكل اللي بيعملوه خداع الناس إنهم بيحاربوا الإرهاب اللي هما الأخوان. حتى فاشل كمرشح رئاسي، استخدم هو وصحابه الإرهاب والبطش عشان محدش يعرف ينزل قصاده في الانتخابات فينجح وما ظهرش في أي برنامج حواري أو مناظرة تلفزيونية مع أي حد بيفهم، وقال بعضمة لسانه أنا ماليش برنامج رئاسي بالمعنى المعروف ، وكل تسريباته سواد ومكتفي تماماً بتطبيل المنافقين والفلول والأغبياء. طيب مرسي اللي قالوا عليه فاشل .... مكنش معروف إنه فاشل ساعة لما انتخبوه وكل دولة مبارك العميقة العقيمة وعواجيز عبد الناصر والستات اياهم كانت واقفة ضده ... طيب دا بقا فاشل من زمان .. فاشل بالتاريخ والجغرافيا ... وكمان مشهور بالهاشتاج .. وحينتخبوه عشان الاستقرار إكمنه خلص مصر من الأخوان العو .. صلاة النبي أحسن.