Sunday, June 03, 2007

يالا بينا نألف قصة

ندخل على طول في موضوع القصة ونختار موضوع ..

الحمد لله ما اكتر المواضيع عندنا في بلدنا .. عندك موضوع الفساد في مصر وخصوصا فساد الشرطة والعبارات اللي بتغرق وقروض البنوك والعمارات اللي بتقع والقطرات اللي بتدخل في بعض .. ووكسة الرياضة وصفر المونديال .. والمحاكمات العسكرية والانتخابات المزورة .. واللـ ....

حيلك حيلك .. لا طبعا ولا موضوع من دول ينفع .. أنت عايز تقلب الحكومة علينا ولا إيه ؟؟ يا عم إحنا مش قدها .. إحنا لازم نتكلم في موضوع يخلي الحكومة ترضي علينا وتقربنا من الناس اللي فوق ..

فهمت قصدك .. نتكلم عن التشدد والإسلاميين المتطرفين الوحشين .. ونحذر من الجوامع والمساجد وسكة الالتزام فيها .. ونخلي أي حد يقول للناس تعالى احضر درس .. يبقى زي اللي بيقول تعالى شد سجارة بانجو ... صح ؟

الله ينور عليك .. هو دا موضوعنا ..

أيوا بس أنا خايف من الجماعات إياها ؟؟

جماعات إييييه إنت بتصدق كلام الحكومة .. الجماعات دي حيلها اتهد من المناهدة في الناس من ناحية والمناهدة مع الحكومة من ناحية تانية .. والصورة اللي راسماها الحكومة دي بس للتخويف تخويف الناس عشان يطاوعوها في أي قوانين تنزل بيها وتخويف أمريكا من البعبع اللي هي قال يعني مسيطرة عليه .. وبعدين حتى لو طلعت جماعة ولا واحد عيان وعمل معاك دقة نقص بمطواة ولا هددك بجواب .. حيبقى عز الطلب وهنيالك يا عم حتشتهر وتاخد جوايز من العالم كله ومش بعيد تاخد نوبل كمان .. ندخل بقى على اختيار الشخصية المحورية للقصة

أكيد حيبقى واحد بدقن هو اللي حيكون المحور بتاعنا ؟!

لا لا .. خلي محور القصة بتاعتنا واحدة ست أحسن

اشمعنى ؟؟

عشان لما محور القصة بيكون ست بيكون التجاوب مع القصة أكبر لأن الرجالة دايما بيتطلعوا لمعرفة أسرار وخبايا الستات .. والستات بيحبوا يعرفوا تفاصيل حياة بعض .. فالقصة اللي محورها واحدة ست حتشد عدد أكبر من الناس

ماشي كلامك .. يبقى نخليها واحدة ست أتجوزت واحد متشدد متطرف و ....

مش حينفع .. القصة دي قديمة .. ابراهيم سعدة ألفها من 6 سنين ونشرها على 3 صفحات في أخبار اليوم على اسبوعين تحت عنوان رسالة من امرأة مجهولة وعمل الفرقعة الكبيرة .. وقال إن دي رسالة جاية له بالبريد .. والناس كلها هللت له .. فحيقولوا علينا بنسرق أفكار المؤلفين التانيين .. خلينا نطلع بفكرة جديدة أحسن .. وأوعى تقولي ابنها هو اللي يتطرف .. المسلسلات العربي هاريانا بالقصة دي .. وبعدين هو الرجالة بس اللي بيتطرفوا .. ليه ما تبقاش الست نفسها هي المتطرفة .. أهي دي فكرة جديدة ..

والله براوة عليك .. طيب نقول إنها اتجوزت واحد عادي وكان فقير كحيان .. والفقر هو اللي ألقى بها في سكة التشدد والتطرف .. اللي هيا حتبقى الجامع طبعا ..

لا برضه بلاش .. النغمة دي ما بقاش حد بيصدقها .. نغمة إن الظروف المادية هي اللي بتخلق التشدد والتطرف .. بعد ما ظهر في شوارعنا في كل حتة المنتقبات اللي راكبين أحدث عربيات والرجالة بدقون ورجال الأعمال كبار .. دا يا عم الحكومة نفسها بتقول على دكاترة الجامعة والعلماء إرهابيين ومتطرفين ومتشددين ورامياهم في المعتقلات ومنتظرين محاكم عسكرية .. يعني نغمة الفقر والبطالة هي اللي بتدفع الناس للالتزام .. آآقصدي للتطرف .. النغمة دي مفيش حد بقى يصدقها ..

خلاص نخليها اتجوزت راجل غني ولا تزعل . .

آه وياريت تقول في الأول إن أهلها طلعوها من المدرسة وهي عندها 17 سنة وجوزوها لابن عمها من غير حب ..

وطب وإيه لازمتها الحتة دي هو إحنا مش بنتكلم ع الإسلاميين وحنخليهم وحشين ما لنا ومال قصة جوازها دي وحب ولا مش حب ؟؟

يا عم خليك ناصح .. معاك حق مالهاش لازمة طبعاً .. بس لما نذكرها معانا بالمرة حيقف معانا وفي صفنا النساوين بتوع تحرير المرأة ويدافعوا عن صحة القصة .. عشان الكلام حيبان لهم كأننا ضد اضهاد المرأة ومنعها من التعليم وزواج الأقارب في المجتمع الذكوري المتعفن على مقولتهم .. حيبان كأننا بنحذر يعني .. وما تنساش تخلي جوزها مشغول كتير بشغله ومش فاضي لها

بس حيبقى إيه السبب في إنها تطرفت .. جوزها مشيه بطال مثلا .. ؟؟

لا لا .. خلي جوزها راجل مثالي .. وهادي ومحب .. وغني .. هي دي النقطة .. إحنا لو خلينا فيه سبب لتطرفها وتشددها .. الناس ممكن تتعاطف معاها .. فأحسن حاجة إن نخلي جوزها راجل متدين وبيحبها وأعماله الخيرية والصدقات كتير وحج واعتمر 17 مرة

17 مرة ما شاء الله .. هههههههه

يا عمي .. هو حد بيعد ورانا .. دا ونخليها هي كمان حجت واعتمرت 7 مرات ولا حاجة .. ونخليها ميسورة الحال وحالهم ميت فل وعشرة وأوعى تخليها محجبة .. خليها متدينة جدا بس فري وسبور

مش محجبة وحجت واعتمرت سبع مرات وجوزها متدين وحج واعتمر 17 مرة .. ماشي .. وتطرفت لييييييه يقى ؟

أقول لك .. بعد ما جوزت عيالها كلهم لقيت عندها وقت فاضي كبير قالت لما أروح الجامع .. في الجامع دا تخلي واحدة لابسة نقاب عمالة تدي دروس عن عذاب القبر والثعبان الأقرع .. فالست بتاعتنا خافت .. إيه رأيك ..

ماشي حنلاقي ناس تدافع عنا وتقول إنه بيحصل .. بس أنت نطيت نطة كبيرة قوي .. لسه بتقول اتجوزت وفجأة كده بقت عندها عيال وجوزتهم كمان .. يالا مش مهم .. ها وبعدين ..

خلي الست المنتقبة دي فاشلة في حياتها الزوجية وبتبحث عن دور في حياة الزوجات الآخريات فبتحرضهم على هجران فراش الأزواج كأنها بتنتقم منهم في فشلها ... وخلي صاحبتنا محور القصة تنتقب وتهجر فراش جوزها بأمر الشيخة

حيلك حيلك يا عم أنت .. دا أنت لو جبت عيل صغير حيقول لك إن مفيش أي جماعة متطرفة في الدنيا بتحرض المرأة على هجر فراش جوزها .. وإن طاعة الزوج عندهم مقدمة على أي حاجة تانية

أفهم يا بني آدم .. الناس مش حتدور في الجماعات ولو قدرت تخليهم يتعاطفوا مع القصة حيصدقوا أي هجايص أنت تقولها فيها ..

طيب وبعدين ؟

خلي صاحبتنا محور القصة تتدخل في شئون بناتها المتزوجات وتأمرهم إنهم لازم هما كمان يتنقبوا بأمر الشيخة .. ويحضروا الدروس معاها

طيب وحيسمعوا كلامها ؟؟

امممممم .. بص خلي عندها 3 بنات واحد خليها ربة بيت ودي حتسمع الكلام ويبقى كده أظهرت المرأة الغير عاملة بإنها فاضية من جوا وسهل إنها تنقاد لأي فكر بدون تفكير منها أو إعمال للعقل .. وخلي البنتين التانيين يرفضوا ودول خليهم من السيدات العاملات .. وخلي واحدة مدرسة وواحدة طبيبة ..

أيوه أيوه .. عشان دول بالذات فيه في شغلهم اتصال مع الجماهير فكأن النقاب عائق .. با خبر دا أنت طلعت سوسة .. بس قولي هنا مش الحبكة كده زيادة عن اللزوم .. يعني الحبكة الدرامية اللي في الدنيا مش كده أبدا .. أنت كده حابكها بطريقة مفقوسة قوي ..

اسمع الكلام وبلاش مناهدة .. دي قصة عمرك إحنا بالحتة الأخيرة دي كسبنا فريق ماما سوزان معانا ودا كفاية إنك تبقى في الأمان واللي حيتكلم حنطلع عليه إنه حاطط دماغه في الطين ومش حاسس باللي بيجرى حواليه ومسيطر عليه فكر المؤامرة

المهم إيه اللي حصل بعد كده

اللي حصل إن جوازات البنات كانت حتبوظ بسبب تدخل الحماة المتشددة دي في حياة بناتها وجوزها الراجل الصالح بدأ ينصحها وهي مش راضية تتراجع ومتمادية في تشددها وتطرفها وقعدت تقول لأحفادها الملتزمين بس بيسمعوا أغاني إنهم كلهم حيخشوا النار حيخشوا النار لغاية ما كرهوها وخليها تطلب من جوزها إنه يطلق لحيته فجوزها اللي أنت حتظهره طول القصة على إنه هادي جدا وزوج مثالي يبتدي يثور ويهدد لأول مرة بالطلاق والانفصال و .... و ...... و ...... وبس

إيه هو اللي وبس .. وبعدين إيه اللي حصل

خلاص كده اقفل على كده وابعت لأي حد من بتوع الجوابات دول .. حسن شاة ولا خيري رمضان .. اقول لك خليك مع حسن شاة .. ابعتها عشان تنشرها في باب أريد حلا يوم الجمعة 1 / 6 / 2007 بعنوان يحذر أي واحدة تفكر تدخل الجامع وإلا حتنجرف في تيار التشدد .. يعني خلي العنوان ..


بعد النشر

أيه ياعم البلوة السودا اللي انت عملتها دي ؟؟؟

إيه أنا عملت حاجة ؟؟

يعني بعد ما نقعد نحبك الرواية ونظبط فيها طول الليل .. تعمل الغلطة دي !!!

غلطة إيه بس ؟؟

كاتب إن الست عندها 52 ومتجوزة من 45 سنة من وهي عندها 17 سنة .. فيه ست مش عارفة هي متجوزة بقالها كام سنة ؟؟ ولا الناس يعني مش حتعرف تعد ... كشفتنا الله يخرب بيتك



يا رااااجل عادي عادي .. كله بيطلع في الغسيل ..

12 comments:

Ma 3lina said...

يااااااااااااه على الرغى

لا و كمان جايب حد يرغى معاك مكفاية انت

قصة طويلة عريضة قد كدا و الفت ادوار و مشاهد و كل دا علشان الخبر اياه

اخ يا سيدى الست غلطت علقولها المشانق باه

ايه يعنى 10 سنين وقعوا منها فيها ايه بس

اتقوا ربنا و شوفو حالكم

لولا انك عيان و عندك امتحان كنت ...........

يالا ما علينا قوم ذاكر يا شاطر بدل متجيبلنا كحك العيد بدرى

BinO said...

السلام عليكم
طبعاً يا ماعلينا ياأخويا الهدف من القصة واضح وأصيل
حتي لو كانت القصة حقيقة فنشر التفاصيل بالحبكة الدرامية هدفه أظهار ما هو غير حقيقي
انت مشفتش افلام لعادل أمام
اللي لا هو عادل ولا ينفع الا اماماً لل..... ولا ماعلينا
هي قصة واحدة وأدوات برمجة مربوطة والناس مسحوبة للحد الحيطة
ويجعله عامر
بيتكم طبعاً
:)

لحظة said...

انا برده قريت القصة واستغربت من خطا العملية الحسابية
واستغربت اكتر من اصرار محررة الصفحة ونصيحتها مرتين لمرسلة الخطاب انها مش مؤهلة للرد في المسائل الدينيه واسالي الدكتورة سعاد صالح بالذات مرتين
واستغربت لانهم في الجامع والدروس ( في مساجد السنه بالذات عشان ما تخلطش الجماعت كلها مع بعض ) اهم شيئ هو طاعة الزوج حتى لو منعها تزور ابوها وهو بيموت
لكن ما جاش في بالي انها قصة متفبركة لان مش كل الجماعات زي بعض
واكيد حضرتك قارئ وعارف ان فيه ناس كتير وجماعات كتير مختلفة الفكر وكتير فكرهم مشوه ومش صحيح وارجع لمدونة استراحة المحارب الفرق كتير قوي وفيه ناس كتير بتفتي منغير علم وبتقعد تدي دروس وهي مش قارية غير كام كتاب
ده موجود وده موجود
يبقى احنا ما نروحش ناخد دروس في البيوت من ناس غير موثوق بيهم
مساجد السنه موجودة وشرايط اهل العلم الثقات في كل حته
والا ايه؟

رفقة عمر said...

الاول اخبار الامتحانات ايه ربنا ييسر لك الخير اللهم امين يارب العالمين
على فكرة انا برضه رجعت مش بفهم تقصد ايه بس طبعا
عجبنى موضوع انها عندها 52 ومتزوجه من 45 سنه
يمكن بتحصل احيانا

عصفور المدينة said...

عثل ثكر مثيبة
مثكلة
جزاك الله خيرا
بعد كدة ألف لنا فيلم لعادل إمام

أمــانــى said...

تصدق بقى الصفحة عندى تطلع وتنزل لما عينا اتعمى كنت قربت الزقها ههههههههه علشان اعرف وصلت فين
ما قولتش حضرتك مؤلف مسلسل ايه فى رمضان
الحق سبوبة جالتك لغاية عندك
وبما انه بليد فى الحساب كده يبقى لازم حضرتك تديه درس خصوصى فى الحساب هههههههههه
سبحان الله اصل لازم ربنا يفضحه اصل المثل بيقول
الكدب ملوش رجلين

محمد عبد الغفار said...

احسن حاجه تشوف كام فلم لعادل امام على كام مسلسل لأسامه انور عكاشه ووحيد حامد وهما هيظبطولك الأسباب والدوافع والكراكتر ومحدش بعد كده هيتهمك بالسرقه طالما بتسب فى المتدينين

ومحدش هياخد باله ان اللى كتبته خلط مؤسف بين الأمور والجماعات ممكن تكون مسميه اخوانى وكله تكفير او سلفى وكل سلوكه تبليغ او أزهرى وتقول متطرف متشدد او لا تسمى خالص وتخلع عليهم أفعال مستنكره من جميع الجماعات والأتجاهات نفسها المهم اطارك العام لتناول الشخصيات يبقى الرجل مكشر وخلقته تقرف وعينه زايغه ومعندوش ضمير والست محرومه جنسياً ومحجور على فكرها ومتخلفه ولا هم لها الى الأشباع بكل صنوفه

هو انت فاكر ان فى حد فاهم حاجه ويعد يفتش ويدور ويربط

sally said...

مش يمكن الست بريئه و الموضع خطأ مطبعي لا اكثر ولا اقل

البنت الشلبية said...

شوف انا احييك على البوست ده بجد لان
ممكن يكون فى ناس تانية بتصدق الفبركة دى

وعلى فكرة انا كنت بحب القصص دى اوى واتأثر بيها ويصعبوا عليا لحد ما قريت قصة الست الى جوزها متشدد والتأليف العالى الى كان فى بريد الجمعة

بصراحة انا هعبر عن الموضوع ده كله بكلمتين ,,الجبن والاستهانة

والجبن هنا مش الجبن الرومى لا ده ده جبن الاخلاق والاستهانة بعقول القراء زى ما يكون معانا اعدادية ويادوبك نفك الخط

والجبن هنا اقصد بيه ان الكاتب او نسميه المؤلف بقى معندوش الجرأة انه يعبر عن رأيه وبيبتدى يألف قصة عشان يوضح من خلالها فكرة معينة عارف ان كتير من القراء ممكن يرفضوها من خلال الاسلوب المباشر فبيبتدى يحور فى الفكرة ويألف قصة بسيطة توصل للناس اسهل وكمان الناس السذج يقتنعوا بيها وبواقعيتها

مش هقول كل القصص متألفة لكن انا مبقاش عندى ثقة انى اقرا قصص مكتوب عنها واقعية فى اى جرايد او مجلات بصراحة

وشكرا

Anonymous said...

بوست جامد جدددددددا


موضوع الملابس نط في دماغي من 10 دقائق..اما شفت ستات هنا في البلد اللي انا فيه لابسين نقاب كامل وأسود في الحر ده ..ومعظم الستات هنا كده بس دول كمان كانوا مغطيين عيونهم ما يدل على التزامهم به دينيا بعيدا عن التقاليد


ده طبعا ليس انتقاد لغير المنتقبات الملتزمات بالحجاب الشرعي..ولكنها درجات عند الله


بارك اللهم فيهن وفي امثالهن...وقل نار جهنم أشد حرا ...لعل الله يروح به عنهن من حر يوم القيامة

chico said...

على فكره البوست ده جامد اوى و فكرته جميله جدا
بس الحبكه دى بتتعمل بره و جوه و الموضوع بقى عادى بس انا نفسى ان حكومتنا تتيح فرصه للتيار الاسلامى المعتدل زى ما فى فرصه كبيره اوى للتيار السنيمائى و الغنائى و الحركات دى
و ربنا يستر

Anonymous said...

من الصغر و كتب الدراسة مليئة بأمثال اللي ميشربش اللبن
و اللي مبيغسلش سنانه
واضح إن التعامل مع قارئ الصحف على أنه بيذاكر محو أمية
و شوية شوية تنزل في عالم سممسم
أنا سلوى
بنت مؤدبة و بضفاير
و فستاني قصير بس مش قوي
ديه صورة أختي هبة
هي مش موجودة دلوقت علشان هي في المعتقل
عارفين ليه
علشان لبست النقاب و بتعمل حاجات وحشة
و بعد كده تخش خوخة و نمنم و يلعبوا مع سلوى