Monday, January 07, 2008

حدث في قسم الحسابات

صاحبنا دخل قسم الحسابات في شركة الاستثمار العقاري بحي المنتزة محافظة الاسكندرية .. قوم إييييه وهو قاعد .. دخل المدير التنفيذي للشركة وطلب حوالي الف وخمسميت جنيه من مدير الحسابات - الاستاذ هشام - عشان مهندس من الحي موجود بره

المدير التنفيذي : استاذي .. عايزين الف وخمسميت جنيه شهرية مهندس الحي .. هو الحقيقة مكسوف جدا وبيعتذر إنه جاي قبل معاده بيوم .. وبيتأسف وبيقول معلش عشان دخلة عيد وكده يعني ..

أ. هشام : لا مفيش حاجة .. والتفت نحو أحد الموظفين .. جهز يا فلان اذن صرف إكرامية بالمبلغ وسلمه للباشمهندس

بعد انصراف المدير التنفيذي

صاحبنا : يعني يا أستاذ هشام مش عيب شركة كبيرة كده زي شركتكم ومشروع كبير زي مشروعكم وتبقوا مش مخلصين أوراقه وتحطوا نفسكم في الموقف ده وتضطروا تدفعوا الرشاوي كده

أ. هشام : ومين قال يا باشمهندس إن احنا مش مخلصين أوراقنا .. كل أوراق المشروع خالصة .. والتراخيص كلها طالعة ومفيش أي مشاكل ..

صاحبنا : أمال يعني المهندس دا جاي كده رغم إن كل أوراقكم سليمة

أ. هشام : أيوا ودا مش واحد بس في الحي .. دا واحد من خمسة من حي المنتزة بيجوا كل شهر بياخدوا شهرية ثابتة معروفة ما بين خمسمية والف وخمسمية جنيه

صاحبنا : كل شهر في ميعاد ثابت كأنه شغال في الشركة ؟؟!!! يعني مش مرة وخلاص .. والأوراق سليمة ؟؟؟!!

أ. هشام : آه .. ما هي لو الأوراق مش سليمة مكنش حد منهم رضي بمبلغ صغير كده كل شهر وكان أخد كل شهر شيء وشويات .. بس احنا بنعمل الاوراق عشان نقلل شهرياتهم .. مش عشان هما بياخدوا بس من المخالف

صاحبنا بسذاجة : طيب ما تشتكوهم ... يعني اصحاب الشركة اللي هما من كبار رجال الأعمال .. معندهمش اتصالات ومعارف يقدروا يمنعوا بيها الرشاوي اللي بيتكلفوها دي كل شهر

اصوات ضحكات مكتومة ونظرات الموظفين لبعض من تعليق صاحبنا

أ. هشام : نشتكي مين ولمين يا باشمهندس أنت مش في البلد ولا إيه ..

صاحبنا وقد جرفه الحماس : يعني إيه مش في البلد ؟؟!! .. اشتكوهم لرئيس الحي .. للمحافظ ..

أ. هشام : يا باشمهندس .. دي منظومة والمهندس اللي بياخد بيدي لمديره .. وكله عارف وساكت عشان بياكل .. الموظف بياخد من الناس والمدير بياخد من الموظفين ورئيس الحي بياخد من المديرين وتفضل كده وانت ماشي لغاية ما توصل لرئيس الجمهورية .. عايز تشتكي .. اشتكي لأمريكا بقا لو تقدر .. وبرضه مش حتعمل لك حاجة ..

صاحبنا : وهو المحافظ عبد السلام المحجوب كان في وقت ما كان ماسك مقدرش يمنع الفساد ده

أ. هشام : كان فيه فساد برضه طبعا .. وهو ما يقدرش يوقف كده .. وكل اللي حاول يعمله .. إنه يخلي جزء من الرشاوي دي يروح للدولة .. مش كله لكروش الموظفين .. عشان كده خلا رجال الأعمال يساهموا في تطوير المدينة

صاحبنا وكأن المال ماله : خلاص ما تدفعلهومش .. هما يقدروا يعملوا إيه يعني .. مش أوراقكم سليمة .. خايفين من إيه ؟

أ. هشام : لا .. يقدروا يعملوا كتير .. حيتلكك لك على أي حاجة ومش حتقدر تشتغل لغاية ما تثبت ان التلكيكة دي مش صح .. فيوقف لك الشغل تلات أربع أيام ما تقدرش تشتغل فيهم لغاية ما تثبت .. وأول ما تثبت .. يطلع لك حاجة تانية .. وهكذا .. ويوقف لك الشغل وكله بالقانون ...

صاحبنا مذبهلا : الموظف دا يوقف شغل الشركة ؟؟

أ. هشام : الموظف دا يوقف قرار محافظ .. المحافظ بيمضي قرارات بشرط إن اللوائح تسمح .. وممكن الموظف يقول إن اللوائح لا تسمح ويعطل قرار محافظ .. يا باشمهندس .. حي المنتزة دا اسمه حي الكويت .. لأن اللي بيشتغل فيه أو في أي حي بيجيب فلوس أكتر من اللي بيسافر يشتغل بره .. هي دي بلدنا يا باشمهندس وهي دي القوانين واللي عايز يعيش لازم يمشي حسب القوانين دي ..

صاحبنا ... خرج

21 comments:

عصفور المدينة said...

إنما يأكلون في بطونهم نارا

بس انا مستغرب إنت وصلت للمعلومات دي متأخر شوية
يا هندسة اللي مخلي الوضع لازال متماسك في البلد هو هذه الرشا كل واحد بيدوس على اللي تحته وكل واحد بينهب وبعدين يعيش النزيه الملتزم في ضنك وهو لا يستطيع أن يخالف أمر ربه ولذلك كتبت هذه التدوينة الأخيرة
والدولة أصبحت ترى في هذا الوضع مسكنا للقنبلة الاقتصادية الموقوتة ولذلك قد ترى موظفا بسيطا ينفق بشكل غير عادي

ولعل هذا أيضا ما سبب انتشار الأمراض والمصائب الفاجعة
!!!

جلست مع بعض الناس من الشرطة وجاءت سيرة الشرطة فحكوا لي عن عسكري مرور في مكان رأيته مشغل واحد مدني تحت إيده يلم الفلوس

خمسة فضفضة said...

السلام عليكم ورحمة الله وبركاته

الشكوي لغير الله مذله

و البلد دي ليها رب اسمه الكريم وزي مابيقولوا اذا كان رب البيت بالدف ضاربا فشيمة اهل البيت كلهم الرقص

ربنا يستر

Unknown said...

الكارثة ان اصبح دلوقتي في اتفاق ضمني ان مافيش مصلحة تمشي من غير رشوة ونفس اللي بياخد رشوة بيروح يدفع رشوة لحد تاني
واهو كله بينتقم من كله
وفي شكوى عامة ان مافيش بركة لا في مال ولا في اولاد ولا في صحة
لينا ربنا
:(

رفقة عمر said...

مع انى مش بافهم فى المواضيع دى قوى مواضيع التراخيص مهندس الحى وكدة
بس فى كل مكان الموظفين بينظروا الاتاوة دى وغير كدة هاتلاقى نظرات احتقار وتاخير فى فى عمل الامر اللى انت عايزه وبتكون مضطر عصب عنك تعمل كدة
بس الرسول قال لعن الله لاراشى والمرتشى واحنا مغصوبين على كدة نعمل ايه
هايشملنا الحديث دة برضه

ammola said...

تعرف المشكلة بتكون كبيرة لما بيكون فى اتنين تلاتة فى منظومة الفساد دى كويسين وبيتقوا الله لان ساعتها كل قوى الشر بتتكالب عليهم وساعتها ماحدش عارف الحل حيكون ايه
بنت خالتى كانت مهندسة مدنى فى الحى المذكور ده وحوربت محاربة شديدة وصلت للتهديد بتلفيق قضايا مش حاقولك من ناس كبار لا ده من موظفين معاها بس مرتشين واضطرت فى الاخر انها تستقيل بدل ما تروح فى داهية بدون ذنب.طيب دى
واحدة ست ويمكن كان لها الخيار لكن لو راجل وفاتح بيت ومسئوليات يعمل ايه؟
كده برضة يا هندسة تشوه سمعة اسكندرية؟

أحمد said...

هى دى مصر يا صديقى

ربنا يرحمنا برحمته

نقطة مية said...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

Ma 3lina said...

عجبنى الحوار اوى صراحة

حاجة كدا اوريجينال خاااااالص

هيا الرشاوى بقت حاجة عادية دلوقتى بس الموقف هنا مختلف و اكثر تطورا

يالا مااا عليناا

الراقـــص مع الذئـــــاب said...

السلام عليكم

والله شئ محزن اوي يا باشمهندس
حسبنا الله ونعم الوكيل

ftafeet said...

انا مبقتش استغرب حوارات الرشوه دى كلها انا طبعا اول مانزلت مصر كنت هاموت من اللى بشوفه ومكنتش مصدقه نفسى وايه اللى بيحصل ده ومكنتش بسكت؟؟

بس بعد كده لاقيت انه خلاص بقى امر مسلم بيه فى مصر هنا
يلا بقى نقول ايه ربنا يهديهم ان شاء الله

mohand said...

السلام عليكم

تفتكر بعد الكلام المكتوب ده

نقول ما علينا برضه؟

ولا ايه رأيك؟

المجاهدة said...

للاسف مشكلة كبيرة و كل شوية تزيد
و بحس ان كل ما حد يحاول يمكسها يصلحها من ناحية تكون بتبوظ من ناحية تانية

من المشاكل اللي اعتقد مش هتتحل غير لما الاساس عند الناس من دين و تربية يتظبط تاني
مشكلة مش هتتحل بين يوم و ليلة
محتاجة جيل كامل يتغير عشان المشكلة دي تروح

ربنا يتولانا برحمته

جزاك الله خيراً على الموضوع

محمد عبد الغفار said...

محكتلكش انا على اللى حصلى لما انحشر الكونتينر فى الكوبرى ليلة 7 ينايرومش هحكى لأنه عادى فى المعادى وذلك فى الزمالك

ونتقابل انا وانت وهما فى الأخرة

AHMED SAMIR said...

يا خبر قطرااااااااان
عيني عينك كدة
دة انا فعلا شكلي مش عايش في البلد دي
قلتها كتير وهاقولها تاني
هي قنبلة نووية تجيب عاليها واطيها ونبدأ على نضافة من اول وجديد
تحياتي

إيمان الحسيني said...

بعد ما اتخرجت بسنة جالي التعيين في حي من الأحياء
قعدت فيه سهر واحد بس بعدين روحت شغلي إللي أنا فيه حاليا
الشهر ده شوفت فيه العجب
في مرة نزلت مع مهندسة وكانت بتحرر محضر لعمارة مخالفة وفوجئنا بأصحاب العمارة بيسألوا سواق العربية بتاعة الحي : هما بيقبضوا كام طيب ونخلص ؟

الله المستعان

لحظة said...

لو يعلم اللي بياخد الخمسة جنيه والا حتى المليون جنيه انه ملعون مطرود من رحمة الله
والا يمكن عارف ومش فارقة معاه
اللهم ثبتنا على دينك وطاعتك
واغننا بحلالك عن حرامك وبفضلك عمن سواك

جزاك الله خيرا
وكل عام وانت بخير

Mohammed said...

قال صلى الله عليه وسلم‏:‏ ‏"‏ذكر الرجل يطيل السفر أشعث أغبر يمد يديه إلى السماء يا ربي‏!‏ يا ربي‏!‏ ومطعمه حرام، ومشربه حرام، وملبسه حرام، وغذي بالحرام فأنّى يستجاب له‏؟‏‏!‏‏"

لا حول ولا قوة إلا بالله!

ma 3lina said...

عصفور المدينة
ان كان على موضوع الرشاوي فمعلوم ووصلني من زماااان .. الجديد عليا .. وجديد فعلا ودا اللي قصدته في البوست إن الرشوة تعدت مرحلة تمرير المخالفات والمصالح الصغيرة ... وأصبحت الرشوة أتاوة على المخالف أو حتى اللي ماشي في السليم .. وحتى الناس الكبيرة الواصلةدي جديدة عليا خاااالص
ربنا يسلم بجد ... الواحد حقه ما يخافش من يوم واحد في رأس كل سنة وحقه يخاف من كل يوم تطلع فيه الشمس

خمسة فضفضة
وعليكم السلام ورحمة الله وبركاته
هههههههههه .. قصدك ايه يا دكتورة ان رب البيت بالدف ضارب .. الكلام دا كبييييير .. يالا ما علينا
وبعدين دا رب البيت مش بالدف ضارب دا بالدف اكل شارب ضارب حاطط في السجون
جزاك الله خيرا على تنبيهنا على جملة الشكوى لغير الله مذلة وأنها لا تختص بشكوى الظالمين لولي الأمر وإلا فالساكت عن الحق شيطان أخرس .. والشكوى التي فيها مذلة هي الشكوى اللي بتحمل معنى السخط على أقدار الله .. فهي مش حتنفع صاحبها ومش حتكسبه غير المذلة بين الناس

مناجاة
ما هو دا اللي مجنني .. الراجل جاي بيطلب الرشوة كأنها حق ليه وبيعتذر انه جاي قبل معاده .. بسأل نفسي الراجل دا بيفكر في إيه وهو بيفطر أو يتغدى أو يتعشى ...

رفقة عمر
كيف حالك يا رفقة ...
الموضوع زاد لدرجة إنه بقى عيني عينك واللي كان بياخد في الدرا بقا بياخد في العلن .. يعني دا اللي جاي برجليه مش خايف حد يعمل فيه كمين مثلا .... لاااا دا جاي ومطمن وفي بطنه بطيختين صيفي ..

ammola
بنت خالتك دي بميت راجل من اللي يرضوا يفتحهوا بيتهم بالحرام .. ميت إيه .. دا ضفرها برقبة ميت واحد منهم .. ربنا يبارك لها .. لسه الدنيا بخير والله .. واللي فاتح بيت انا عندي اموت أنا وولادي من الجوع ولا اكل ولادي حرام .. واحسن حاجة لأي حد كويس إن ما يدخلش اصلا في منظومة الفساد دي

مبرمج حر
مش عارف خايف اقول لك معاك حق هي دي مصر يا صديقي .. ويطلع ان دي مرحلة مؤقتة ظهر فيها الفساد ومش حتدوم وترجع مصر طاهرة تاني ... لكن حوافقك في الدعا وربنا يرحمنا برحمته

Dr. Ma 3lina
ههههههههههه
إيه اوريجينال دي .. يعني ايه بالاسكندراني ؟؟
كويس إن الحوار عجبك .. رخصوا الدوا بقا عشان الناس تبطل تاخد رشاوي

الراقص مع الذئاب
وعليكم السلام ورحمة الله وبركاته
محزن دي تعبر عن الحزن بس يا حا الظابط .. لكن ايه يعبر معاها على الغضب والغيظ والفرسة والنقطة اللي حتجي لنا في البلد دي

ftafeet
ربنا يهد كل مرتشي يااارب
حلو قوي تعبير نزلت مصر .. بجد يدي انطباع ان مصر تحت قوي قوي قوي فعلا ...
:D
ربنا يرحمنا ونئب على وش الدنيا بقا

mohand
وعليكم السلام ورحمة الله وبركاته
الحمد لله على السلامة
ولو اني مش فاهم حاجة بس برضه الحمد لله على سلامتك

المجاهدة
جزانا الله وإياكم
ربنا يبارك فيكي والحل اللي قلتيه صح .. وربنا يقدرك وتغيري ولادك وتخرجي لنا جيل متربي صح

Mohamed A. Ghaffar
لاااااااا .. انا متمسك بإننا نعرف ايه اللي حصل .. ومستني بوست بإيه اللي حصل
:)

A.SAMIR
وانا أؤيد حل القنبلة النووية .. بس ناخد لنا ساتر بقا ولا نروح فين ساعتها
:))

طـعـمـة
شهر كامل في الحي .. ربنا يجعله في ميزان حسناتك ويكون تكفير عن اي ذنب ... وربنا يرفع بيه درجاتك في الدنيا والآخرة .. والحمد لله إن من ترك شيئا لله أبدله الله خيرا منه

لحظة
جزانا وإياكم وكل عام وانتي والأسرة الكريمة بخير وثبتنا الله وإياكم على طاعته ..
الدعاء اللي ذكرتيها كان عليه خطبة الجمعة في مسجدنا هذا الأسبوع .. اللي اغننا بحلالك عن حرامك واغننا بفضلك عمن سواك ..

المهاجر
والله صدق رسولنا صلى الله عليه وسلم .. جزاك الله خيرا على الإضافة المتميزة

أمــانــى said...

السلام عليكم ازيك يا باشمهندس
هو بـس حدث فى قسم الحسابات يا خراشى على الرشوة واللى بيقولوا عليها هدايا علشان التبرير مش عارف اقول ايه الرشاوى وصلت للركب لالالالالا عديت كمان
ربــنا يرحمنا من عنده

Anonymous said...

بلاش حقد
ديه ناس بتتعب
و بتكمل مرتبها اللي مفروض تستحقه
و الفاضي يكب على المليان
ممكن كرت من المهندس ده علشان يشغل الواد زياد
ده واد عسل
مش حياخد أكتر من حق علبة بمبرز

ma 3lina said...

أمــانــى
وعليكم السلام ورحمة الله وبركاته
الف حمد لله على السلامة يا بنت الجنوب .. منورة المدونة
الرشاوي ليها اسامي كمان .. زي الخمر يشربونها يسمونها بغير اسمها ..بس حتفضل خمر

أبوزياد
يادي البمبرز اللي واجع دماغنا بيه يا عم انت .. حد قال لك تتجوز
:D
البت سلمى عاملة إيه