Friday, January 18, 2008

زي انهاردة مات فرعون

زي انهاردة من كام ألف سنة كده لم فرعون جيشه وحرسه وقرر إنه يضرب ضربته ويقضي على أي حد يخالف كلمته

زي انهاردة قال كفاية عليهم كده أنا صبرت كتير عليهم دول عايزين يعبدوا غيري ويسبحوا بحمد غيري ويذكروا غيري بفضله ونعمته

زي انهاردة لم العسكر الحرامية والكلاب المفترية

زي انهاردة قال له الحاشية والملأ الظالم اطلع عليهم واوعى تسيبهم دول لو سبتهم حياخدوا عرشك وسلطانك ويخربوا الأرض عليك وعلى أهلك

زي انهاردة اختار موسى وأتباعه إن الأرض مش مهم والوطن مش مهم والحياة مش مهمة .. المهم الدين وهربوا عشان يحافظوا عليه

زي انهاردة موسى والمؤمنين تركوا دنيتهم وهجروا أوطانهم وهربوا عشان يحافظوا على دينهم

زي انهاردة فئة قليلة مؤمنة وشها للبحر ووراها جيش إمبراطور الأرض وفرعون الدنيا

زي انهاردة وقف الناس الطيبين قدام البحر وقالوا مفيش مفر

زي انهاردة قال موسى .. كلا إن معي ربي سيهدين

زي انهاردة حصلت المعجزة وظهر المخرج اللي كان قدام عنيهم .. لكن مين يشوف

زي انهاردة انفلق البحر ونجا موسى وقومه

زي انهاردة مات فرعون .. مات الملك وزال ملكه وضاع سلطانه وجيشه وجنده .. مات اللي كان فاكر إنه صح والكل غلط وإنه مالك الدنيا والأنهار بتجري من تحته فمات تحتها ولو كان يملكها ما كنتش قتلته ..

زي انهاردة فاق فرعون من غيبوبته على الحقيقة اللي كان مش مصدقها .. إنه ولا حاجة وإنه حيموت وحيضيع كل اللي ظلم وقتل وسرق وسجن عشان يحافظ عليه ..

زي انهاردة اتخلى عن فرعون كل اللي حواليه وسابوه يغرق في البحر وحيد مش عارف يعمل حاجة غير إنه يحس بطعم الهزيمة المرة وهو بيشوف الشرذمة القليلة تنجو وإنه مش قادر يعمل لها حاجة ولا يوصل لها ومش قادر يتغلب على شوية مياه حواليه رغم إنه كان مفهمينه إنه إله وإنه يقول للشيء كن فيكون ورغم كده مقدرش غير إنه يردد كلمات سمع الفئة المؤمنة بتقولها له وكان بيرفضها .. وحتى الكلمات تكاد لا تخرج من فمه وهو يقول .. آمنت أنه لا إله إلا الذي آمنت به بنو إسرائيل


آلآنَ وَقَدْ عَصَيْتَ قَبْلُ وَكُنتَ مِنَ الْمُفْسِدِينَ ???!!!

فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ آيَةً

وَإِنَّ كَثِيرًا مِّنَ النَّاسِ عَنْ آيَاتِنَا لَغَافِلُونَ


8 comments:

خمسة فضفضة said...

السلام علكم ورحمة الله وبركاته

لو كل حكامنا كانوا ذاكروا تاريخ كويس كانوا هايعرفوا ايه اللي فيها ، بس المشكله ان تقريبا كلهم كان بيجيلهم ملحق تاريخ وجغرافيا كمان



وَإِنَّ كَثِيرًا مِّنَ النَّاسِ عَنْ آيَاتِنَا لَغَافِلُونَ
صدق الله العظيم

عصفور المدينة said...

ليكون لمن خلفه آية


فاليوم ننجيك ببندك لتكون لمن خلفك آية تفتكر يا هندسة من خلفه بيصوموا عاشوراء

ammola said...

السلام عليكم
ربط جميل بين الذكرى والحدث
زى ما بتقول خمسة فضفضة حكامنا ساقطين فى التاريخ
وفاشلين بامتياز فى قراءته

Mohamed A. Ghaffar said...

محدش اتخلى عنه ملحقوش ، كلهم راحوا سوا سوا

أمــانــى said...

السلام عليكم
اين الحكام من القرأن الكريم والاحداث التاريخة لكى ينقذوا اخواننا فى كل مكان
يارب كن عليهم واغرقهم كما اغرقت فرعون يااااااااارب آمـــــين

طـعـمـة said...

كلكم بتسألوا أين الحكام ؟
غالبا هتلاقوهم بياكلوا عاشورا بمناسبة الموسم

حسبنا الله ونعم الوكيل

ma_3alina said...

خمسة فضفضة
وعليكم السلام ورحمة الله وبركاته
هو تاريخ وجغرافيا وبس .. وحساب ودين وتربية وطنية ورسم

عصفور المدينة
هما بيصوموا رمضان اصلا عشان يصوموا عشوراء .. ودا لو مكنش بسبب الملة فحيكون بسبب العمر اللي بلغ أرذله

ammola
وعليكم السلام ورحمة الله وبركاته
جزاكي الله خيرا أختنا أمولا .. ربنا يبارك فيكي

Mohamed A. Ghaffar
هما كلهم راحوا ؟؟؟ أومال انا بكتب البوست دا لمين

أمــانــى
وعليكم السلام ورحمة الله وبركاته
اللهم آمين

طـعـمـة
يا كلوا عاشورا ياكلوا جاتوه .. ياكلوا كل اللي يحبوه .. المهم إنهم يطفحوه بالسم الهاري

eldoctor said...

تعرف انى اتوقف كثيرا امام سيدنا موسى و سيدنا نوح و سيدنا يونس من الانبياء .. و اتعجب من صبر سيدنا موسى على بنى اسرائيل .. كيف كان صبره .. و اعود فانظر الى سيدنا يونس .. حيث فاض به من قومه فتركهم .. و سيدنا نوح فاض به به من قومه فدعا عليهم ان لا يذر الله على الارض منهم فردا ..
الصبر انواع .. و على الطرف الاخر يكون الحسم ...
خاطرة توقفت عندها..