Sunday, April 27, 2008

!!هو فيه جواز من غير نيش ؟

بعض الأشياء في هذه الحياة بتكون أبسط من إنها تحتاج لتفسير .. فقط نفعلها لأننا نحب أن نفعلها وأحيانا نتركها لأننا نريد أن نتركها .. بدون أي أسباب غير الارتياح النفسي للفعل أو الترك .. هذا ما اسميه الحياة البسيطة دون الحاجة لمبررات عميقة لكل خطوة تخطوها ..

طبعا هنيئا لك إن استطعت أن تحيا مثل هذه الحياة .. يمكنك أن تعدد معي مزايا كونك إنساناً بسيطاً .. فأنت بالفعل من دون البشر جميعا من يستمتع بالحياة .. بل يستمتع بأدق تفاصيل الحياة بدون تكلف وبدون أن ترهق نفسك بالخوض في أمور ترهقك وتفسد عليك لحظاتك بأفعال لا تحبها لمجرد أن الناس يطالبونك بالقيام بهذه الأمور.

فأنت تأكل وتشرب ما تريد و ترتدي ما تريد وتمشي حيثما تريد وقت ما تريد وإجمالا تفعل ما تريد من أشيائك الصغيرة التي ترغب فيها دون الحاجة لإيجاد مبررات لفعلها .. هي السعادة إذن أن تحيا كما تحب.

لكن أعقد ما في كونك بسيطا هو أنك لبساطتك ستعقد حياتك في مجتمعك الغير بسيط وستكون أنت نفسك لغزا يحتار أصحاب العقول البسيطة في تفسيره وستحتاج إلى تفسيرات غير بسيطة ومعقدة لمحاولة أقناع هذه العقول البسيطة أن جميع تفسيراتهم الغير بسيطة لأفعالك البسيطة هي في الحقيقة غير صحيحة .. وأن كل ما هنالك أنك تحب هذا أو تكره هذا وهيهات أن يقتنعوا بمثل هذا مبررك البسيط ..

مش واضح ؟؟ امممم .. مع إنه كلام بسيط .. طيب

لو أنت مش بتحب اللحوم الحمرا بكل أصنافها (لانشون سدق بسطرمة هامبورجر .. إلخ) وتفضل سندوتشات الفول والجبنة المقلية على سندوتشات الشاورما والكلاب السخنة .. العلماء النفسيين اللي حواليك في كل حته حيمنجوها إن دا هروب من واقع ارتفاع سعر كيلو اللحة باستخدام نظرية العنب الحصرم بإني اقنع نفسي إن مش بحبها .. تفسير قمة في التعقيد .. فكر كده تقول لمراتك ما نجيبش لحمة .. حتقول لك : لو انت زاهد في الحياة طب إيه ذنبي أنا وعيالك .. وحتلزمك إنك تجيب لحمة حتى لو هي كمان مش بتحبها .. بس عشان ما ينفعش وتتكسف إن حد يعرف إنها بتعمل الطبيخ من غير لحمة .. الناس يقولوا علينا ايه ؟؟ .. احنا فقرا يعني ؟!!.

لو أنت وصاحبك قاعدين في مكان مدة طويلة ومش مستعجلين على طلبكم اللي طلبتوه من نص ساعة ولسه ما جاش .. بس لما يجي الجرسون صاحبك يغسله عشان اتأخر .. وأنت تبتسم ومش هامك .. وبعد ما يمشي الجرسون تحاول تشرح لصاحبك إن الموضوع مش مستاهل لأننا كده كده قاعدين وبعد ما ناخد طلبنا - اللي مش مستعجلين عليه – حنفضل برضه قاعدين .. فمفيش داعي لإحراج الشاب .. أو مثلا صاحبك طلب من الجرسون أول ما يجي انه يبعت حد يمسح الترابيزة .. فرحت أنت مطلع منديل ومسحتها .. صاحبك حيفسر موقفك إنك بتتنازل عن حقك لأنك بتدفع تمن الطلبات والخدمة ومن حقك تحصل على أفضل خدمة وإلا حيكون تشجيع منك ليهم على إهمالهم .. وإنك بكده بتضر كل زبون حيجي بعديك.

لو انت بتحب عربية زي الفولكس القديمة (البيتل) عاجبك شكلها ومرتاح لها كده نفسيا من صغرك لما كنت بتتفرج وأنت صغير على أفلام العربة الطائشة .. لدرجة إنك بتشعر فعلا إنها عربة بتضحك لك ( عربية بتحبك وبتحبها ) وقلت مرة لواحد صاحبك إنك عايز تشتريها وإنها أحسن من مشاوير الموتورجل اللي بتطخها كل يوم .. حيقول عليك إنك فقري وتفكيرك قديم ومعندكش طموح ومش بتتطلع للأحسن .. !!

لو أنت تحب تقعد في نادي المهندسين وما تحبش تقعد في أماكن مقفولة تتكتف فيها .. وخطيبتك بتقول لك إن القعدة في كوستا كوفي حلوة وأنت بتقول لها المكان مش مريح ليا وحفضل قاعد على ترابيزتي بعكس النادي اقدر أتحرك فيه بحرية أكبر .. أو قلت لها إنك مش حتعمل فرحك في الداون تاون لأنك مش بتحب المكان ده .. ساعتها حتقول إنك مش وش نعمة ومالكش في قعدات الأماكن النضيفة وواخد على الأماكن الأي كلام المعفنة من الآخر أنت بيئة يعني !!

لو قلت مش عايز أجيب في بيتي تكييف عشان مش بحبه وبلاش صالون نتكتف واحنا قاعدين عليه عشان خاطر الضيوف اللي بيجوا من السنة للسنة وخلينا نجيب أنتريهات نرتاح عليها أحسن .. وكمان إيه لازمة الاختراع اللي اسمه (نيش) ده .. والدتك وحماتك ساعتها حيستغربوا جدا من كلامك ويقولوا : إيه ده هو فيه جواز من غير نيش ؟؟ .. هو فيه عروسة من غير صالون ؟؟ .. لو ما كانش تفسيرهم إنك بخيل ومستخسر في بيتك .. ودا غالبا اللي حيحصل.

لو انت مش متعود ومش بتحب تطلب من حد يعمل لك طلب .. شاي أو قهوة أو يجيب لك أكل .. إلخ .. وكل اللي في الشركة (هو انا قلت لكم اني غيرت الشركة ولا لأ .. طب بعدين بقا ) كل اللي في الشركة شغالين على البوفيه الله ينور .. ما هو ببلاش بقا .. إلا أنت .. لا عمرك طلبت ولا يحزنون .. ساعتها عامل البوفيه حياخد موقف منك وحيفتكرك موسوس أو مقروف منه وحتلاقيه يقول لك بزعلة : يا بيه أنت مش بتطلب مني حاجة ليه ؟؟ .. على فكرة إحنا مسلمين برضه !!!

اعتقد أنك عشان تعيش حياتك البسيطة كما تريد لازم الأول تقنع الناس (المحللين النفسيين) إنهم يكفوا عن محاولتهم البائسة لتفسير أفعالك أو إنك إمعانا في البساطة تعيش في جزيرة معزولة عنهم وساعتها حيقولوا أنك أكيد انطوائي مش اجتماعي وبتخاف من مخالطة الناس.


29 comments:

محمد عبد الغفار said...

إنى أرى فيك شبابى

ولم اجد حل الا القناع

رفقة عمر said...

عجبنى قوى السدق والجبنه المقليه
:)
عارف بجد احلى حاجه البساطه انا بحب اتعاش ببساطه لدرجه ان صحباتى لما اكون خارجه معاهم بقولوا احنا حاسن اننا خارجين مع طفله
وموقف المطعم دة حصلى كنا فى تكا وكنت انا لسه مش اتغديت انا طلبت وجبه وصحبتى طلبت ايس كريم
المهم انا اللى جعانه والطلب اتاخر جدا تقريبا ساعه لغايه لما جه صحبتى هى اللى زعقت واتخنقت وانا قاعده ولا قلت ولا كلمه
وكنت شبعت من كتر الجوع اساسا
والله اللى عايز يعيش مرتاح البال
يعيش بالبساطه اللى بتقول عليها دى
مبروك على الشغل الجديد
ربنا يوفقك اللهم امين

Unknown said...

هههههههههههههه

اه والله فى جواز من غير حاجات كتير اوى

لحظة said...

ماحدش بيسيب حد في حاله
وفي احوال كتير مضطرين نجاري الواقع والناس اللي حوالينا
زي في مواضيع الجواز مثلا
من قبيل ارضاء الناس اللي يهمونا في حدود مانستطيع
اما العربية والطلبات والمشاريب واخدمة
فدي من ضمن الحرية الشخصية اللي ما يقدرش حد يقرب منها
ربنا يعينك

mohand said...

كما تعيش داخل المجتمع فان المجتمع يعيش داخلك ايضا

تحياتي

خمسة فضفضة said...

السلام عليكم ورحمة الله وبركاته

من كتر ما الماده طغت علي الناس وتصرفاتهم بقي اللي واخدها ببساطه اكنه جاي من عالم تاني

بس ولا يهمك اكيد هاتلاقي حد يتفهمك ويعرف ان دي فعلا طبيعتك مش حاجه تانيه

علي فكره انا مارضيتش اجيب صالون ، وماجبتش صيني ولا فضيات

Unknown said...

ربنا يحفظك يابشمهندس
ياه لو الناس تفقه هذا الكلام وتفقه ان الحياة وماعليها لاتستحق كل هذا وان يعيشوا حياة البسطاء
قال رسول الله صلي الله عليه وسلم
"كن في الدنيا كأنك غريب او عابر سبيل"
لو تفكرنا في الحديث بكل معانيه لما عانينا في حياتنا
كان النبي صلي الله عليه وسلم يدعوا قائلا اللهم احشرني في زمرة المساكين ,واظن انها كانت تعني البسطاء والمفتقرين لربهم ولا اظن انها كانت تعني الفقراء
اللهم يسر علينا كل امر
وجزاكم الله خير

Anonymous said...

انا اقتنعت بحاجة ان الناس موراهاش غير الكلام وانها تبص على الناس وتتفلسف وفيه غيرهم بيبصوا عليهم ولو كل واحد معتش وراه غير يسمع كلام الناس وفى الغالب ده بييجى من فراغهم ورفاهيتهم الزايدة ووقت الجد والحاجة الكل بيسكت فيبقى ليه ارهن نفسى باراء الاخرين ما اعمل اللى انا عايزاه ومستريحاله وخالاص مدام مش حرام واللى يتكلم براحته الكلام معلهوش جمرك المهم اننا نفسيا مستريحة وبعدين دى حياتى اعيشها زى ما انا عايزة طالما مش بعمل حاجة حرام وكل واحد بيعيش حياته هو مش حياة شخص تانى

البنت الشلبية said...

ماهو الى انت كاتبه دى بتدل على عوارض الانطوائية
هههههه
تكونشى انت انطوائى ومش عايز تعترف بالحقيقة؟


المهم انك بخير....
سلام

اوعى تفكر said...

يا عينى على البساطه
دى حاجه هايله اوى
انا حتى ارى فى نفسى البساطه
بدليل انى رضيت انى اخش معهد بتلات تلاف جنيه
ولما لقيت اصحابى شيلين موبايلات حديثه اوى
جريت على بابا عشان يجبلى واحد
ده غير الامثله كتير
على العموم انا مبحبش اتكلم على نفسى انتو عاملين ايه دلوقتى
على العموم
الاختلاف سنة الحياه

la3lahakhier said...

لا حول ولا قوة الا بالله
والله فيه
العنوان لوحده ازمة
هههههههههه
اوعى تاخد القناع من محمد عبد الغفار (معلش يا محمد)ههههههههههه
كل التحية

بنات صاحبة الجلالة said...

ميصحش الجواز يبقي من غير نيش طبعا ههههههههه هيقول عليك معندكش صيني تتفاخر بيه قدام الناس اللي هتجي تعبرنا وتبارك وتنق عليه ههههههههههههه
لو اعد مستني الطلبات تجي ههههه انا مرة اعدت مستنية نص ساعه لما نسيت انا طلبت اية اصلا ههههههههه
بوست هايل جدا عجبني اوي

مشاء الله عليك طرحته بشكل ظريف

لك تحياتنا

مجداوية said...

يالله
سبحان الله والحمد لله انى مش أنا لوحدى كده فيه ناس زيى إليان أهه وجايين من نفس كوكب البساطة
بص يا سيدى أنا أثاث منزلى كله تقريبا جايباه معايا من جده من شركة ايكيا لا فيه اويما ولا نقوشات ولا يحزنون طبعا أنا فى عيلتى بتاعة عفش دمياط بيمصمصوا شفايفهم مشفقين على خالتى قالتلى ايه الكراكيب اللى انت جايباها معاك دى أنا طبعا رد فعلى هو الضحك الشديد وبرضة معنديش صالون أقولهم المهم الوظيفة لازم أكون مرتاحة فى فوتيه بشلت كبيرة ومنجد كده وتغوص فيه لكن انت بتكلم عقلية مبرمجة ومعندهمش أى مانع يطلع عينهم فى التضيف أو يقعدوا مأسدين كده على الكرسى المدهب ولا انهم يعيشوا مع شوية كراكيب
واحد من شركة ايه آر تى كان جى يركب لى الدش لما شاف نظام شقتى قالى يا سلام البيت شكله مريح بس أنا لو قولت لخطبتى أعمل زيك كده حترمى الدبلة فى وشى !!!!
كل اللى قولته صحيح لكن أنا بأعمله بدون التفكير فى رأى الغير لأنك انت اللى حتتعب لو سمعت كلامهم
سيبك انت يا باشمهندس
ما احلى قعدة نادى المهندسين دخلته مرة كانت القعدة جميلة وأول مرة أعرف ان كوستا بيقدم خمور !!!! توبة أقعد عنده

وعلى البساطة البساطة

مجداوية said...

معلش نسيت اكتب تحليلى لشخصيتك
عشان نضرب بيه تحليل علماء النفس
انت انسان من زمن الصح ضل طريقة الى عالم النيش اللى بأويما
وتحاليلى ياما

mohand said...

ارجو المرور علي اخر موضوعاتي في مدونة الباحث عن الحقيقة باسم استفتاء عن الافتاء يهمني رايك
تحياتي

مجداوية said...

السلام عليكم

الباشمهندس ما علينا
أنا نزلت انهاردة وروحت سان استيفانو مول وروحت على كوستا ونديت لواحد من العمال هناك وشاورتله على صور زجاجات تشبة الخمور وسألته اللى هناك دى خمرة ؟؟؟قالى لأ دى عصير مستورد زى صوص كده قولتله يعنى مش خمور قالى لأ وحضرتك بصى على المنيو مفيهاش خمور فأنا قولتله يعنى يمكن بتقدموا خمور دكاكينى قالى لأ لو المحل هنا بيقدم خمور مكنتش أشتغل فيه أصلا قولتله ربنا يفتح لك ما هو أنا برضه مكنتش حادخله تانى لو كان بيقدم خمور ,,المهم لأن اليوم كان زحمة جدا ملقتش مكان فيه فأنا عايزة أتأكد منك من المعلومة هل فعلا انت اتحققت انهم بيقدموا خمور ؟؟؟ ولا شوفت زجاجات العصير دى افتكرتها خمور أصل أنا ليا مرة فى الشهر بأنزل أشرب الكابتشينو هناك او عند دينو يعنى دى فسحة الشهر فأفيدونا أفادكم الله

ma 3lina said...

محمد عبد الغفار
طب قولي بسرعة أجيبه منين القناع ده .. انقذني

رفقة عمر
شبعتي من كتر الجوع .. هههههه
جملة تحفة بجد .. كل ما اقراها اضحك
:D
ربنا يبارك فيكي ويتقبل دعواتك ودعواتي لك

إنـســـانـة
اهلييييييين بست العرايس .. والله يا بنتي انا فرحان لك قوي قوي قوي خالص
وفرحان ان اسمه على اسمي
وفرحان انك حتبقي جارتي
ربنا يتمم لك على خير ويبارك ليكي وليه ويبارك عليكما ويجمع بينكما في خير وعلى خير ويصب الخير عليكما صبا ولا يجعل عيشكما كدا

لحظة
تعليق متوازن جدا اشكرك عليه
والمجاراة للناس اللي بيهمونا اللي حضرتك ذكرتيها تكمل النقص في طرح الموضوع .. فعلا لازم نستحمل عشان الناس اللي يهمونا ودي نقطة مهمة ..

جزاكي الله خيرا على التنبيه

mohand
احم احم احم
:(
مش فاهم .. عاااااااااااا
بالنوسبة للزيارة علم وسينفذ يا فندم
وعلى فكرة انا قريته من قبل ما اشوف تعليقك .. لكن الحقيقة انا بهرب من اي منطقة ممكن يحصل فيها مشاكل ..
بيني وبينك انا في فترة مش عايز ازود همومي .. لكن عشان خاطرك اعود لمدونتك مرة أخرى

خمسة فضفضة
وعليكم السلام ورحمة الله وبركاته
انا مش عايز واحد بس يفهمني انا عايز القبيلة كلها تفهمني .. هي دي المشكلة
:)
حضرتك ما جبتيش لا صالون ولا صيني ولا فضيات ؟؟
والناس عملوا فيكي ايه .. يعني حضرتك سليمة ؟؟
عموما النماذج اللي ذي حضرتك متأكد إنها موجودة .. بس قليلة جدا جدا جدا....

الفاتح الجعفري
ربنا يكرمك ويبارك فيك أخي الكريم
وييسر لنا جميعا
واضيف لكلامك ان الناس لا تظن ان البساطة فقر ولا الافتقار لله عز وجل ضعف .. ولكن كما ذكرت هو حياة الغرباء
جزانا الله وإياكم واشكرك على تعليقك الطيب

hend...hanady
ما هو انا موافقك من البداية للنهاية وعلى كل كلمة .. بس لو الواحد أهمل كلام الناس وركب دماغه هما حيزعلوا وحيبعدوا عنه .. والإنسان كائن اجتماعي مش معقول يعيش في جزيرته هو .. فلازم ساعات يعمل حاجات هو مش مقتنع لمجرد ان يكسب رضا الناس اللي يهموه كما قالت أختنا لحظة

البنت الشلبية
يووووه .. هو انتي ما تعرفيش اني انطوائي متقوقع
دي حاجة معروفة من زمااااان .. علامة مميزة لأي مبرمج
الحمد لله أنا بخير .. وانتي عاملة ايه ?

اوعى تفكر
لا البساطة واضحة في اسلوب حياتك جدا
دا من بساطتك بقيت من الإخوان .. اللي هما ابسط الناس وحياتهم سهلللللة جداااااا
شرفت يا هندسة واسعدني تعليقك

la3lahakhier
ليه حضرتك عايزة تحرميني من القناع .. دا الراجل جايب لي الحل
هههههه
شرفتيني بجد وانا فعلا سعيد لزيارتك وتعليقك

بنات صاحبة الجلالة
يا أهلا ببنات الصحافة وأهل الإعلام والتنوير
طبعا بالنسبة للبنات والسيدات ما ينفعش الجواز من غير نيش .. اكيد طبعا .. كله إلا كده بالنسبة لكم .. حتى بنات الصحافة ..
:))
اشكرك على الإطراء وتقبلن تحياتي


مجداوية
وعليكم السلام ورحمة الله وبركاته
أيوا أنا من الكوكو دا
والله انا مرة قلت كلام حضرتك دا لابن خالي .. قلت له بلاش صالون يا عم وخليه انتريه .. وكانت زوجة خالي اللي هي والدته يعني أم العريس واقفة معايا .. كانت مستغربة جدا من كلامي .. كنت حاسس إنها شوية وحتضربني
:)
ما شاء الله حضرتك بتحللي شخصيات كمان .. طب ياريت تحللي لنا مجموعة شخصيات كده وأولهم الحكومة .. عشان انا حاسس إنها محتاجة نقل دم .. ربنا يشفيها .. أو يريحها

بالنسبة لكوستا .. الحقيقة انا اكتفيت برؤية ثلاجة العرض لكن ما سألتش .. لكن بما إن حضرتك سألتي والشاب أجاب الإجابة دي وحضرتك أكيد استشفيتي صدقه من عدمه .. يبقى خلاص كوستا براءة وانا غلطان .. يا احراجي يانا .. وشيلت الجملة ..وبعتذر بشدة وهنيئاً لحضرتك فسحتك الشهرية
ولو ان كان نفسي حضرتك تقاطعيه وتشرفي نادي المهندسين .. تنورينا هناك .. واهو تنفعينا بدل ما تنفعي سلسلة كوستا كوفي البريطانية
:)
أحيي في حضرتك الإيجابية .. وأغبطك عليها
تحياتي

أمــانــى said...

السلام عليكم
ايه يا باشمهندس كل ده حضرتك شايله فى نفسك
فعلا الحياه بسيطة بس الناس هم اللى مصاعبين كل شئ
واوعى حضرتك تنسى النيش علشان يكون فى البيت محلات الخزف الصينى
:D
تحياتى لحضرتك

Anonymous said...

البساطة شىء راقى يعجز عن رؤيتة الناس و كل ما الإنسان يرتقى بفكرة يتجة للرؤية البسيطة للأشياء...
موضوع جميل

من أصدق ما قرأت من فترة طويلة ;)

ammola said...

شوف سيادتك
الحاجات والمحتاجات تنقسم الى نوعين
نوع بتاعى أنا لوحدى يعنى ماحدش حيشاركنى فيه وده يجب حتما ولابد أعمله بالطريقة اللى تريحنى من غير ما أفكر فى أيتها جنس مخلوق حيقعد يفتى لى فيها ويقوللى يصح واللا لأ ما دمت أنا ملتزمة بحدودى مع الله ومع العرف الصحيح الشغال فى المجتمع زى مثلا حكاية نادى المهندسين أو كوستا كل واحد حر ما دام مش بيضايق حد..لكن الكلام ده لو أنا رايحة لوحدى لو معايا حد يبقى لازمن الحكاية تكون خلّى شوية عليا وشوية عليك
أما بالنسبة حضرتك لموضوع النيش فهو يعتبر من تداعيات الاختيار اللى مش مظبوط للطرف الآخر فى حد ذاته..ازاى بأه أقولك أنا...هو اللى بيحب واللى بيتجوز مش مفروض بيحب حد شبهه فى أختيارياته وميوله وطباعه مع بعض الفروق الطفيفة؟؟يبقى أنا لو أخترت صح موضوع النيش حضرتك مش حييجى أصلا ولا حندّى فرصة لحد يفرضه علينا لاننا دماغنا واحدة..وبعدين على فكرة البوفيه بيكون أشيك بكتير من النيش وأرقى كمان بس هه.
:)
على فكرة نادى المهندسين بيكون حلو أوى ورايق الصبح فقط فى غير أيام العطلة أما الاوقات الزحمة فأجارك الله..والله كان عندنا زمان نادى شيك اسمه المحامين ما تعرفش راح فين؟؟
حاقولك على مكان خطير بس ما تقولش لحد عليه علشان الزحمة..عارف القلعة طبعا فى هناك كافيه"مش كافيه أوى يعنى"داخل لجوه كده ومعزول جرب تروح تقعد هناك الصبح بدرى فى الحتة دى وابقى ادعى لى

إخوانى مخربش said...

ينهار اسوس

وانا بقول البنية مرضيتش بيا ليه

اتابى علشان موضوع النيش والسفرة

شكرا على التوضيح يافندم

بس انا لو مش هتجوز غير لما اخلل برده مش هجيب سفرة ولا حتى شبكة

واللى عجبه

Ma 3lina said...

انا اؤيدك فى موضوع النيشو الصالون

و كذلك العربية البيتلز اصلا شكلها مسخرة بجد

بالنسبة لكوستا فمفيش خمور و لا حاجة هيا الازايز شكلها كدا

بوست راااااااائع على فكرة

شــــمـس الديـن said...

السلام عليكم و رحمة الله و بركاتة

معلش هو سؤال سخيف
يعني ايه نيش ؟؟؟

دورت عندنا في البيت علي البتاع دا و ملاقيتش

لنرفع شعار المدونة و نقول باعلي صوت
ما علينا :))

انما انا عايشة حياتي ببساطة زييك كدا بس اللي حوليا اتعودوا عليا كدا فمحدش بقي بيتطفل او بيرهق نفسة بالسؤال
و ان كان الامر دا بيكون متعب شوية في كل مجان جديد بروح فيه و لكن هي الفترة الاولي دي و اتعودت عليها خلاص

تدوينة فعلا جميله :))

Anonymous said...

بما أنك جيبت سيرت التحليل النفسي أسمحي أحللك نفسيا..وبما أني شخصية معقدة ومكلكعة .. وكل عقدة فوقيها ألف عقدة وشنيطة.. أسمحلي أقولك
أولا البساطة دي نسبية بمعني لو سعادتك قمت من النوم الصبح منكوش ونزلت بالبيجامة الشارع حافي ورحت الشغل بالمنظر دي لمجرد أنك مبتهتمش بالمنظر تفتكر رأي الناس حيكون فيك أية(أذكر خمس صفات حيوصفوك بيها غير الجنون؟)
حبيبي أنت بساطتك معقدة لأنها غير مفهومة
ولو أنت فعلا بسيط يبقي مش حتنشف دماغك في رغباتك اللي بتقول عليها بسيطة
صدقني أصرارك علي أفكارك اللي بتوصفها بالبساطة وعدم قدرتك علي فعل العكس ببساطة هو قمة العقد
يعني ماله كوستا ولا مالها العربيات الجديدة
وأخيرا أحب أشكر صديقك اللي قالك إنك فقري وتفكيرك قديم ومعندكش طموح ومش بتتطلع للأحسن

صاحبك ده ذكي فعلا ولماح وسريع البديهة وأبن حلال قوي يارب وفقة وأرزقه بمليون جنية يااااااااارب

سلام

doctor mohamad said...

و نصحونى بالسيراميك ف الشقة.. ياجماعه إيه لازمة السيراميك_أنا ما باحبوش _ما بارتاحلوش _ باتضايق منه_ و ف بيت العيلة باختار الحته اللى مفروشه و بعيده عن السيراميك و أقعد فيها_أنا باكرهه أصلا.. وبعدين أنا أصلا كدا كدا هافرش الشقة كلها موكيت و هاجيبه من أحسن الأنواع_أنا مش بخيل صدقونى .. يبقى إيه لازمته؟! ثالثا بقى أنا الشقة عندى برد غير عادى ف الشتا محتاج ادفيها أو حتى أحس إنها دافيه _أقوم أحط سيراميك؟ وانقلبت الدنيا . .هوه فيه دكتور من غير سيراميك؟! الأول سيراميك و بعدين غطيه_ السيراميك برستيج وإيمدج ..لما لقيت الناس حواليا كلها كدا قلت:يعنى أنا لوحدى اللى عاقل ؟! إعتبرته لبس و لبست اللى يعجب الناس.. و لبست معاه تكلفه غير عادية بلا فايده ولا عايدة _ و ضيق نفس طول ما انت بتبص له _ و هى إيه الحياة غير لبس؟ ؟ ! و قررت انتقم..وعليا و على أعدائى.. و هاغطيه موكيت برضك!! هه بس.

ma 3lina said...

أمــانــى
وعليكم السلام ورحمة الله وبركاته
انا برضه بقول المدونة منورة ليه .. شرفتي يا حضرت الأفوكاتوا والحمد لله على السلامة
يارب تكوني بخير دايما
نعم الأخت أنتي
بوركتي

FTM
ربنا يخليكي يا باشمهندسة ... دائما زيارتك وتعليقك وسام شرف لمدونتي

ammola
وبعدين بقاااااا
هي الحاجات والمحتاجات الخاصة قوي حضرتك عايزة حد يشاركك .. فيها ولا محدش حيشاركك فيها أبدا .. أنا كده اتلخبطت
:)
في موضوع النيش مش اقصد إن التعليق حيجي من الأخت اللي انا حبقى اخترتها .. التعليقات دي اما حتيجي من والدتي أو والدتها أو وخالاتي أو عماتي أو خالتها أو عماتها .. ودول ماليش اختيار فيهم ..

والبوفيه حلو طبعا .. بس بيقولوا بطلوه مش عارف صح الكلام ده ولا لأ
:)
نادي المحامين ضموه على نادي المهندسين .. نفعوا النادي بقا

حجرب المكان اللي حضرتك قلتي ليه عليه .. بس يوم الجمعة بقا عشان ما يبقاش ورايا حاجة .. بس اوصف لي المكان كده تاني .. فين بالظبط ؟؟

إخوانى مخربش
ههههههههه
البنية مارضيتش بيك .. عشان أنت أكيد ربنا مقدرلك واحدة تانية إن شاء الله حتبقى احسن منها الف مرة
بس بصراحة وكلام في سرك .. حكاية مفيش سفرة وشبكة دي جامدة أوي ... بلاش كده عشان تعرف تتجوز
واتعلم من رأس الزوج الطائر .. قصدي رأس الذئب الطائر
:)
وخلينا نعترف جميعا بمقولة ابن عمر رضي الله عنهما ... غلبتنا النسااااء
:))

Dr. Ma 3lina
البيتل مسخرة .. استغفر الله العظيم .. امال لو شفتي عربيات الجيش اللي حندخل بيها الحرب بقا حتقولي ايه .. دا البيتل بالنسبة لها إيرباص
:)
علم يا فندم وتم التصحيح واعتذر عن الخطأ .. وجزاكم الله خيرا
سعيد لنشاطك التدويني في المدونتين وأرجوا ألا يتوقف

شــــمـس الديـن
وعليكم السلام ورحمة الله وبركاته
لا مش سؤال سخيف ولا حاجة .. هو غريب بس .. انا متعود إن فيه رجالة ما يعرفهوش كتير .. لكن استغربت لما عرفت إن فيه بنت أو ست مش تعرفه
:)
عموما النيش كما جاء في التعريف الخفيف لأثاث البيت اللطيف .. دا دولاب بواجهة زجاجية بيتحط فيه أطقم الصيني اللي هي عبارة عن طقم للشاي وطقم للقهوة مجموعة أطباق فاخرة ومجموعة من الكاسات .. إلخ والغرض منها العرض فقط وعدم الاستخدام في أي حال من الأحوال وتحت أي ظرف
وبيبقى الغرض الدفين إن العروسة تغيظ بنت خالتها اللي اتجوزت قبليها خاصة وبنات العائلة عامة وتقول لهم انها جابت حاجات احسن منهم
بس
:)
ربنا يخليكي يا دكتورة .. جزاكي الله خيرا على الإطراء .. وأسعدني تعليقك وزيارتك ودمتي بخير

المحلل النفسي
إيه ده انت لسه عايش .. طب والله كويس
يا بني ما هو دا اللي انا قلته .. إن البساطة حتعقد حياتك .. يادي العكننة ع المسا
ويارب يا خويا صديقي دا ربنا يرزقه بمليون جنيه .. لأني عارف طيبة قلبه وحنيته .. مش حيستخسر فيا ساعتها مية ألف هدية
:P
ابقى اتصل يا بني آدم

doctor mohamad
يا مرحب بالدكتور
ما شاء الله خمسة دكاترة علقوا ع البوست ده
:)
يعني سيراميك وفوقيه موكيت .. دا كده حضرتك بتحرق دمهم
ههههههههه
بس يا دكتور فعلا الموكيت وحش جدا جدا .. بلاش منه
انا عشت عمري في بيت والدي والأرض عندنا موكيت .. الاختراع دا سيء جدا
تنظيفه صعب وبيلم تراب كتير ومهما اتكنس بيفضل التراب موجود فيه ولازم يتغسل كل فترة وطبعا شيله وغسيله شغلانة ضلمة
وفي الصيف بيزود الحر ...

إلا اسعار السيراميك اخبارها ايه اليومين دول
:)

BinO said...

يا عم عيش وخلي الناس عايشين
متجمدين
:)
وحشتني يا أخي
أتمني أن تكون بخير حال

BinO said...

أنا رجعت تانيوانت كمان يا أخي أفتقدتك كثيراً
مش الجواز يا أبراهيم هو الشغل مش أكثر
لأن الواحد لما بيتجوز نص همومه بيشيلها حد معاه
:)
عقبالك يا أخي
وعموماً النيش مش مهم خالص

ma 3lina said...

Bino
أخي بينو .. ربنا يعلم يا هندسة كم أسعدني عودتك ..

ربنا يعينك ويسهل لك الحال في الشغل ويوفقك
ويبارك لك في زوجك

:)