!!هو فيه جواز من غير نيش ؟

بعض الأشياء في هذه الحياة بتكون أبسط من إنها تحتاج لتفسير .. فقط نفعلها لأننا نحب أن نفعلها وأحيانا نتركها لأننا نريد أن نتركها .. بدون أي أسباب غير الارتياح النفسي للفعل أو الترك .. هذا ما اسميه الحياة البسيطة دون الحاجة لمبررات عميقة لكل خطوة تخطوها .. طبعا هنيئا لك إن استطعت أن تحيا مثل هذه الحياة .. يمكنك أن تعدد معي مزايا كونك إنساناً بسيطاً .. فأنت بالفعل من دون البشر جميعا من يستمتع بالحياة .. بل يستمتع بأدق تفاصيل الحياة بدون تكلف وبدون أن ترهق نفسك بالخوض في أمور ترهقك وتفسد عليك لحظاتك بأفعال لا تحبها لمجرد أن الناس يطالبونك بالقيام بهذه الأمور. فأنت تأكل وتشرب ما تريد و ترتدي ما تريد وتمشي حيثما تريد وقت ما تريد وإجمالا تفعل ما تريد من أشيائك الصغيرة التي ترغب فيها دون الحاجة لإيجاد مبررات لفعلها .. هي السعادة إذن أن تحيا كما تحب. لكن أعقد ما في كونك بسيطا هو أنك لبساطتك ستعقد حياتك في مجتمعك الغير بسيط وستكون أنت نفسك لغزا يحتار أصحاب العقول البسيطة في تفسيره وستحتاج إلى تفسيرات غير بسيطة ومعقدة لمحاولة أقناع هذه العقول البسيطة أن جميع تفسيراتهم الغير بسيطة لأفعالك البسيطة هي في الحقيقة غير صحيحة .. وأن كل ما هنالك أنك تحب هذا أو تكره هذا وهيهات أن يقتنعوا بمثل هذا مبررك البسيط .. مش واضح ؟؟ امممم .. مع إنه كلام بسيط .. طيب لو أنت مش بتحب اللحوم الحمرا بكل أصنافها (لانشون سدق بسطرمة هامبورجر .. إلخ) وتفضل سندوتشات الفول والجبنة المقلية على سندوتشات الشاورما والكلاب السخنة .. العلماء النفسيين اللي حواليك في كل حته حيمنجوها إن دا هروب من واقع ارتفاع سعر كيلو اللحة باستخدام نظرية العنب الحصرم بإني اقنع نفسي إن مش بحبها .. تفسير قمة في التعقيد .. فكر كده تقول لمراتك ما نجيبش لحمة .. حتقول لك : لو انت زاهد في الحياة طب إيه ذنبي أنا وعيالك .. وحتلزمك إنك تجيب لحمة حتى لو هي كمان مش بتحبها .. بس عشان ما ينفعش وتتكسف إن حد يعرف إنها بتعمل الطبيخ من غير لحمة .. الناس يقولوا علينا ايه ؟؟ .. احنا فقرا يعني ؟!!. لو أنت وصاحبك قاعدين في مكان مدة طويلة ومش مستعجلين على طلبكم اللي طلبتوه من نص ساعة ولسه ما جاش .. بس لما يجي الجرسون صاحبك يغسله عشان اتأخر .. وأنت تبتسم ومش هامك .. وبعد ما يمشي الجرسون تحاول تشرح لصاحبك إن الموضوع مش مستاهل لأننا كده كده قاعدين وبعد ما ناخد طلبنا - اللي مش مستعجلين عليه – حنفضل برضه قاعدين .. فمفيش داعي لإحراج الشاب .. أو مثلا صاحبك طلب من الجرسون أول ما يجي انه يبعت حد يمسح الترابيزة .. فرحت أنت مطلع منديل ومسحتها .. صاحبك حيفسر موقفك إنك بتتنازل عن حقك لأنك بتدفع تمن الطلبات والخدمة ومن حقك تحصل على أفضل خدمة وإلا حيكون تشجيع منك ليهم على إهمالهم .. وإنك بكده بتضر كل زبون حيجي بعديك. لو انت بتحب عربية زي الفولكس القديمة (البيتل) عاجبك شكلها ومرتاح لها كده نفسيا من صغرك لما كنت بتتفرج وأنت صغير على أفلام العربة الطائشة .. لدرجة إنك بتشعر فعلا إنها عربة بتضحك لك ( عربية بتحبك وبتحبها ) وقلت مرة لواحد صاحبك إنك عايز تشتريها وإنها أحسن من مشاوير الموتورجل اللي بتطخها كل يوم .. حيقول عليك إنك فقري وتفكيرك قديم ومعندكش طموح ومش بتتطلع للأحسن .. !! لو أنت تحب تقعد في نادي المهندسين وما تحبش تقعد في أماكن مقفولة تتكتف فيها .. وخطيبتك بتقول لك إن القعدة في كوستا كوفي حلوة وأنت بتقول لها المكان مش مريح ليا وحفضل قاعد على ترابيزتي بعكس النادي اقدر أتحرك فيه بحرية أكبر .. أو قلت لها إنك مش حتعمل فرحك في الداون تاون لأنك مش بتحب المكان ده .. ساعتها حتقول إنك مش وش نعمة ومالكش في قعدات الأماكن النضيفة وواخد على الأماكن الأي كلام المعفنة من الآخر أنت بيئة يعني !! لو قلت مش عايز أجيب في بيتي تكييف عشان مش بحبه وبلاش صالون نتكتف واحنا قاعدين عليه عشان خاطر الضيوف اللي بيجوا من السنة للسنة وخلينا نجيب أنتريهات نرتاح عليها أحسن .. وكمان إيه لازمة الاختراع اللي اسمه (نيش) ده .. والدتك وحماتك ساعتها حيستغربوا جدا من كلامك ويقولوا : إيه ده هو فيه جواز من غير نيش ؟؟ .. هو فيه عروسة من غير صالون ؟؟ .. لو ما كانش تفسيرهم إنك بخيل ومستخسر في بيتك .. ودا غالبا اللي حيحصل. لو انت مش متعود ومش بتحب تطلب من حد يعمل لك طلب .. شاي أو قهوة أو يجيب لك أكل .. إلخ .. وكل اللي في الشركة (هو انا قلت لكم اني غيرت الشركة ولا لأ .. طب بعدين بقا ) كل اللي في الشركة شغالين على البوفيه الله ينور .. ما هو ببلاش بقا .. إلا أنت .. لا عمرك طلبت ولا يحزنون .. ساعتها عامل البوفيه حياخد موقف منك وحيفتكرك موسوس أو مقروف منه وحتلاقيه يقول لك بزعلة : يا بيه أنت مش بتطلب مني حاجة ليه ؟؟ .. على فكرة إحنا مسلمين برضه !!! اعتقد أنك عشان تعيش حياتك البسيطة كما تريد لازم الأول تقنع الناس (المحللين النفسيين) إنهم يكفوا عن محاولتهم البائسة لتفسير أفعالك أو إنك إمعانا في البساطة تعيش في جزيرة معزولة عنهم وساعتها حيقولوا أنك أكيد انطوائي مش اجتماعي وبتخاف من مخالطة الناس.