Friday, December 07, 2012

خد نقطة



مسابقة الفهم: مجموعة من الاسئلة، كل سؤال تجاوب عليه ب(نعم) احسب لنفسك نقطة، وجمع النقط واعرف نفسك ؟


لو انت فاكر انك بتتعاون مع الحزب الوطني مؤقتاً عشان تقضي على الاخوان وبعد ما تتخلصوا من الإخوان اصدقاءك من الحزب الوطني حيسيبوا البلد تنضف ويتعاونوا معاكم في ديمقراطية حقيقية لخدمة البلد ... خد نقطة.


لو أنت من الثوار الشرفاء وتحالفت مع رجال الحزب الوطني وفي وسط مظاهرة شفت أشكال البلطجية بتوع الحزب الوطني معاك في المظاهرة بيقتلوا وبيحرقوا، فسكت وعملت نفسك مش واخد بالك .... خد نقطة، ولو بررت اللي بيعملوه .... خد نقطتين.

لو أنت مقتنع إن ممكن عدد مهول من ميلشيات الاخوان المسلحة تهجم على عدد بسيط من المعتصمين الشرفاء السلميين الغير مستعدين ولا مجهزين فتكون النتيجة مقتل خمسة من الميليشات المسلحة ... خد نقطة.

لو الكام صورة اللي صحابك شيروهم عن المصابين هزوك من اعماقك وخلوك تكره الاخوان عشان وحشين فضوا الاعتصام بالقوة ومش مصدق كلام الاخوان إن الخيم كانت فاضية، وفي نفس الوقت حرق مقرات الحرية والعدالة، وحرق مقرات جماعة الاخوان المسلمين، واقتحام مقرات صحيفة الاخوان، ومهاجمة بيت أهل مرسي في الشرقية شايف انه عادي ... خد نقطة.

لو مصدق إن عند الإخوان ميليشيات مسلحة وفي نفس الوقت ما دافعوش عن مقراتهم اللي اتحرقت، وبالرغم من كده انت شايف برضه إنهما اللي بيجروا مصر لحرب أهلية، لكن اللي بيعتصم قدام القصر الجمهوري وبيهدد باقتحامه ، وبيرفض عمل دستور، وبيرفض الحوار وينسحب من التأسيسية بعد خمس شهور دا اللي بيحاول يخرج بالبلد لبر الآمان ... خد نقطة.

لو شايف ان اللجنة التأسيسية قعدت تلعب 6 شهور وسلقت الدستور في 24 ساعة ... خد نقطة

لو انت فاكر ان د. البرادعي لما لف يطلب التدخل الأجنبي من امريكا واوربا ويروح المانيا ويتكلم عن الهولكوست ويروح المجلات الاقتصادية في العالم يحذر من الاستثمار في مصر دا تصرف وطني سليم ... خد نقطة.

لو انت مؤمن بكل مبادئ الديموقراطية لكن كافر بمبدأ المعارضة الوفية، وشايف إن الديمقراطية مش لازم تيجي برأي الشعب عشان الشعب جاهل ومضحوك عليه ... خد نقطة.

لو انت فاكر إن الاخوة المسيحيين اللي بيهاجموا مرسي دلوقتي اكتر من أي هجوم عملوه ضد مبارك ونظامه دا بدون توجيه من الكنيسة، ومجرد وجهة نظر سياسية ... خد نقطة.

لو انت شايف إن إعلام بهجت وراتب وساويرس والأمين والجلاد وأديب المستمرين من ايام مبارك ممكن تاخد منهم معلومتك، وواثق في النظام القضائي المستمر من أيام مبارك، وإن دول الخليج اللي ضد الثورة من البداية فجأة بقا قلبهم على الثورة ... خد نقطة.

لو شايف ان الصح ان المعارضة تقاطع كل دعوة للحوار الوطني إلا بعد تنفيذ السلطة لكل شروطها ... خد نقطة.


احسب بقا كام نقطة اخدتها:

لو اقل من نقطتين، فأكيد انت مش مصري، وأكيد أنت دسيسة من قبيلة الاخوان الاعداء.

لو اكتر من نقطتين فمبروك انت فاهم جداااااااااااا (لو مصدق إنك فاهم خد نقطة)




6 comments:

Anonymous said...

أخيراغيرت رأيك فى البرادعى... عقبال سلفيو كوستا ومحمد يسرى سلامة

Anonymous said...

بالمناسبة ... البوست أكثر من رائع

ma 3lina said...

كنت فاكر إن خبر من سوريا هو وحده اللي ممكن يخفف عنا ما نحن فيه من الهم والحزن .. لكن تعليق حضرتك كأنه شفاء .. فجزاك الله خيرا.

ونعم أخطأت في رأيي في البرادعي وأنت صح .. ولعله تقديم حسن الظن هو ما خدعني فيه ولكنه ليس بعذر لسوء التقدير .. وأرجع واستغفر الله.

Anonymous said...

:)

Unknown said...

:) فكرة البوست رائعة
http://egypic.blogspot.com/

ma 3lina said...

Mostafa Al Shall
جزاك الله خيرا

والرائع هو مرورك وتعليقك الكريم

تحياتي