Wednesday, July 04, 2007

صبيان وبنات

وبعدين إيه حكاية صبيان وبنات دي اللي حيخلفوهم ..

الكلام دا كان زماااااان أيام ما كانت الناس بصحتها .. دلوقتي بعد ما أكلونا الفاكهة الماسخة والخضروات المرشوشة بالمبيدات المسرطنة خلاص ما بقاش فيه حد عارف يجيب عيال والخصوبة قلت .. والواحد لو جاب له عيل ولا اتنين بيحمد ربنا ويبوس إيده وش وضهر .. والستات خلاص ما بقاش فيها حيل تربي زي زمان لما كانت الست تقوم من الولادة وتنفض البيت وتعجن .. دلوقتي بعد ما اكلونا السموم بقت الست هفتانة والصداع ملازمها طول الوقت من الضعف والأنيميا والست مش بتكمل حاجة وتبقى في عز خصوبتها وتهاجمها أمراض عجيبة

صبيان إيه وبنات إيه !!

الكلام ده كان زمان لما كان البني آدم في بلدنا ليه قيمة وكانوا بيدرسوا لنا إن إلإنسان هو الثروة .. وإن مصر تتميز عن كل الدول العربية إن فيها ثروة سكانية ومصر مش هبة النيل دي هبة سواعد أبنائها .. دلوقتي خلاص .. مبقاش اسمها ثروة سكانية بقى اسمها الانفجار السكاني والزيادة السكانية وقنبلة مصر الموقوتة وبقى اللي يموت في بلدنا في حادث ولا حاجة بيدفعوا لأهله خمسة آلاف جنيه .. علما بإن عائلة الضحية الواحدة من ضحايا لوكيربي أخذت 10 مليون دولار يعني وبحسبة بسيطة الإنسان الغير مصري يساوي 12 ألف نفر من مصري سوس .. وبعد كده تقول لي يخلفوا ؟!!!

صبيان وبنات قال

الكلام ده كان زمان لما كان الحكام بيفرحوا بزيادة عدد شعبهم لأن ده يخليهم أقوى .. وكانوا وقتها يعرفوا يوظفوا الناس دي إزاي .. علماً إن كانت مواردهم محدودة جدا أكتر مننا لا كان عندهم بترول ولا مصانع ولا مناجم ولا أدوات حديثة يقدروا يحولوا أي صحرا لجنة خضرا .. ومع ذلك كانوا بيفرحوا بالزيادة لأنهم كانوا عارفين يوظفوها ازاي واللي ما كانش يعرف كان يبقى دهل ويسيب الحكم للي يعرف .. لكن دلوقتي الدهل بيطلع يقول أأكل الملايين دي منين ؟؟؟ تقولش حيأكلهم من جيب أهله البعيد ..

صبيان وبنات قال

الكلام ده كان زمان لما كانش فيه سوزان وحملة تحديد النسل اللي كانوا بيقولوا عليها تنظيم الأسرة .. عنوان غير المضمون

العنوان معناها راحة الأم وتنظيم عملية الولادة والحفاظ على صحة الأم (اللي هو التنظيم ودا جائز شرعاً) .. لكن المضمون كان طفل لكل اسرة (اللي هو التحديد ودا محرم شرعاً) .. يعني العنوان غير المضمون


أنا فاكر زمان كان شعار حملة تحديد النسل دي راجل وست وواقف قدامهم ولد وبنت .. بعد كده اتغير الشعار وبقى راجل وست وتحتيهم طفل واحد بس مش معروف إن كان ولد ولا بنت .. والحمد لله الشعار بقى اسأل استشير .. حملة قومية شعارها في غلطة في النحو .. ما علينا يعني هي غلطة النحو هي الغلطة الوحيدة .. بس كويس إنهم رجعوا لطفلين تاني

العجيب في الموضوع إنهم بيستدلوا على تنظيم الأسرة بأحاديث شرعية تبيح التنظيم وبعد كده ما ينفذوش التنظيم ويطالبوا بتحديد النسل .. يعني بيستدلوا على إباحة شرب الماء بأدلة وبعد كده يعبوا في أزايز الميا شمبانيا ويقولوا المفتي قال أزايز الميا حلال ..

والعجب إنهم بيستدلوا بحديث جابر بن عبد الله لما قال : كنا نعزل على عهد النبي صلى الله عليه وسلم والقرآن ينزل

طيب إيه وجه الاستدلال يا جماعة

خير اللهم اجعله خير .. إن مضمون الحديث يفيد بأن العزل كان موجود على عهد النبي صلى الله عليه وسلم ولو كان حراما لمنعه لأنه يبلغ من قبل رب السماء .. وسكوت النبي صلى الله عليه وسلم عنه وحدوثه في عهده وعدم تحريمه يفيد إن الله عز وجل وهو علام الغيوب قد أباحه للأمة .. اللي عايز يعمله يعمله واللي عايز يتركه يتركه .. دا وجه استدلالهم

نفس الفكرة دي هي الفكرة اللي تدل على إباحة الختان لأنه كان موجود على عهد النبي وسكت عنه ولو كان حراما لمنعه .. دا في اقل الأحوال أو أرشد كمااااااان إلى الطريقة المثالية عند من حسن الحديث .. وعليه فلا يجوز التحريم لأمر اطلع عليه النبي عليه الصلاة والسلام ولم يحرمه

لكن لااااااا إزاي .. المبدأ ينفع في تحديد النسل عشان على هواهم .. لكن لو قلتها في الختان تبقى غلطان ومش فاهم حاجة

أقولكم .. هي جت على دي بس ... يالا ماعلينااااااااا

تحديث .. أفاد استاذنا محمد عبد الغفار شفاه الله وعافاه بأن موضوع تحديد النسل بدأ بحملة انظر حولك والشعار كان فيه 3 عيال

20 comments:

ftataljanna said...

ايه ده

حضرتك مالك فى ايه كل حاجة شايفها كده مش مظبوطة ليه

هاقول لحضرتك حاجة عندك حق فى كل اللى قلته

بصراحة يعني وانا هاكدب عندك حق

بس انا عن نفسي لو ربنا كتب لى هاجيب خمسه

"علشان الحسد"
ههههههههههه

omar مشروع بطل said...

يا عم قلبت علينا المواجع .. قال صبيان وبنات قال ؟؟؟ ده من اللى بناكله بدات أشك فى نفسى !!

اهو كله من "الدهل" اللى قلت عليه

اول زيارة ليا فى هذه المدونة .. بس فرصة سعيدة انى اكعبلت فيك .. وادعوك للكعبلة باستمرار عندى

Ma-3lina said...

برده مطلعنا مفيش صحة و صداع و انيميا مع ان احنا زى الفل اهو

الشعار اللى فيه طفل واحد ده عمرى مشفته بتجيب الحاجات دى من فين

يعنى كرهتنا فى الجواز و الخلفة فاضل ايه تانى

ربنا يزيدك تفاؤل كمان و كمان

مااا عليناااااااااا

أمــانــى said...

بسم الله مشاء الله
ده اسبوع رائع فى التدوين
الحيــاه من وجهــة نــظر الباشمهنــدس مــاعلينا
لونها ايه لونها ايه لونها ايه
ممممممممممممممم
مش عارفه اصلها جابت معاك كل الالوان واحنا طبعا بالتبيعة جبنا كل الالوان الرمادى والبنى والاسود والكحلى والاصفر والوان الطيف
والله اللى اقدر اقوله لـك
ربــنا ييسرلك كل أمــورك ويــكرمـك يااااااااااارب آمـــــــــــــين ويحققلك كل اللى تتمناه
يـا جماعة كل اللى يـدخل يعلق يــدعى للباشمهندس علشان السرور يرجعله تـانى
تحــياتى

عصفور المدينة said...

يعني لا تبات ونبات ولا صبيان وبنات

محاور هامة

أأكل الملايين دي منين ؟؟؟ تقولش حيأكلهم من جيب أهله

كنا نعزل والقرآن ينزل
طريقة الاستدلال تلزم الخصم أن يستدل نفس الاستدلال في الختان

التنظيم حلال والتحديد حرام


أزيد

روى مسلم جاء رجل من الأنصار إلى رسول الله صلى الله عليه وسلم فقال : إن لي جارية أطوف عليها , وأنا أكره أن تحمل , فقال : اعزل عنها إن شئت , فإنه سيأتيها ما قدر لها , فلبث الرجل , ثم أتاه , فقال : إن الجارية قد حملت , قال : قد أخبرتك أنها سيأتيها ما قدر لها

BinO said...

عقم التفكير يا أخي
بس جميلة منك بجد
كنت ناوي أكتب بوست عن الختان لقيته طوييييييييييييييييل كتبت نصه عند ماعلينا
:)

نسرين - أمة الله said...

السلام عليكم
الله الله الله
وايه تانى لسه مسودتهوش فى وشنا
هو ده اسبوع فقد الامل بالنسبه ليك
طيب امتى حتخرج من الاوضه الضلمه ديه عشان انت وجعت عنينا
والله هى لا حكايه تنظيم او عدمه اى حاجه فى الدنيا رزق والمال والبنون زينه الحياه الدنيا
طيب والله كتير قوى ستات بيكونوا منظمين وربنا بيكرمه بعيال
يعنى حاجه كده زى انا اللى بدى وانا اللى بحرم مش بأديك انت حاجه
اللهم امين يا استاذ ما علينا ربنا يكرمك بالرزق الواسع الطيب الحلال والزوجه والذريه الصالحه
وتفك الاسر اللى انت حاططنا فيه ده

مناجاة said...

السلام عليكم
اسألونى انا على وزارة الصحة والشعارات الفشر بتاعتها
بحكم عملى فيها الهى مارجعلها تانى
طول النهار يجمعوا الستات ويقعدوا يقولولهم الخبث اللى عاوزين ينشروه ومافيش فايدة بقدرة ربنا تزيد حالات التوائم الثنائية والثلاثية كمان ويعملوا الاحصائيات يلاقوا الاعداد زى ماهى بل بتزيد
قدر ربنا نافذ

الكارثة الجديدة فى مسألة الختان انى قريت امبارح فى شريط الاخبار بتاع قناة المحور الجملة دى
دار الافتاء: الختان حرام شرعا
يعنى خرجوا من الندب والكراهة ودخلوا عالحرام على طول والمطلوب ان الناس تاخد كلامهم مسلم بيه طب بأمارة ايه ومش الحرام ده فى نص بتحريمه؟

آخر حاجة خلى عندك امل وان شاء الله تعيش فى تبات ونبات وتخلف صبيان وبنات

كريم said...

Tag For You
!!

:)

خمسة فضفضة said...

السلام عليكم ورحمة الله وبركاته

انبي يا شيخ ماتقلبش علينا المواجع ..ههههه

البنت الشلبية said...

يلا ما عليناااااااااا

عمار يا محروسة

ftataljanna said...

هو حضرتك متعود ما تردش على اللى بيعلقوا عندك يعنى حضرتك مش بتعبر حد خالص يعني

انا اتهيالى كده خير الللهم ما اجعله خير ان المفروض او المتعارف عليه انك ترد عاللى بيعلق عندك

يعنى

مش عارفه جايز اكون غلطانه

mohand said...

السلام عليكم
في فيلم اهبل بس فيه شوية حاجات حلوه
اسمه ليلة سقوط بغداد
بغض النظر عن الكلام الايحائي اللي فيه
البت بسمه قالت جمله لبتاع السي اي ايه عجبتني قوي
قالتله احنا كويسين قوي وهنجيب كتير قوي علشان نغيظكم ونفرسكم
والرسول قال تكاثرو فاني مباهي بكم الامم
سيبك من الشعارات
الستات في مصر لسه محتفظين بفكرة ربط الراجل بالخلفه
متقلقش عليهم
ستات واعيه
هههههههههههههههههههه
تحياتي

ftataljanna said...

ايه ده تكنولوبيا حلوة حكاية الردود دى

لا بجد جميلة يعني

بس على فكرة العتب مش عالنظر ولا عليا العتب عالنت كنت دايما اضغط ومفيش حاجة تظهر وكان ايه مجرد فضول اللى بيخليني اعمل كده معلش بقى

اما عن عصبيتي فانا اسفه لو حضرتك فهمتها كده ابدا مش عصبية

بجد اعذرنى

لحظة said...

انت لسه مصر على نظرية المؤامرة
من اول حكاية جرنان الاخبار والست بتاعة مصير زرجة متطرفة والقصة المتفبركة ماشي
بص
معروف ان الدين عند البعض وسيلة مش غاية
وياريته وسيلة لبلوغ الجنة لا ده وسيلة لبلوغ الدنيا
وربنا يعافينا جميعا
لانه بقى وسيله بالالتفاف عليه وتحويله لخدمة مصالح ناس وارضاء ناس
وده موجود من قديم الازل
مش كل العلماء ابو حنيفة ولا سعيد ابن جبير ولا ابن تيمية يقدرو يقولو كلمة حق
فالمفروض ان احنا يا عامة الشعب نتعلم وما نفضلش ماشيين بغمانا ورا اي كلمة نسمعها ونقول امين
يا رب يهدينا كلنا ويرينا الحق ويرزقا اتباعه

سكتم بكتم said...

كمان حتعادي ماما كريمة وماما سوزي

أنت أية ياأخي

ده أنت باينلك عدو المرأة بجد

الطائر الحزين said...

السلام عليكم

اسمح لى يا أخى لا علينا ونص وثلاث اربع كمان

انت عارف ان سبب منع الختان على حد زعمهم هو ايه انه ينتهك حرمة المرأة و يقطع جزأ من جسدها
ان شاء الله تدوينى القادمة عن الختان

على فكرة فى خبر رائع بيقول ايه

مصر تزرع مش عارف مش عارف كم فدان كدة فى توشكى بجون مبيدات لتصديرة الى الخارج ويولع الشعب ولا حتى يموت

يا الله ما عليك وما علينا

تحياتى

Mohamed A. Ghaffar said...

للتاريخ الموضوع بدا بحمله انظر حولك والشعار كان فيه 3 عيال

rere said...
This comment has been removed by the author.
rere said...

السلام عليكم
عندك حق فى كل اللى قولتو باكلونا الفاكهه والخضار المسموم والمرشوش بالمبيدات اللى مايعلم بيها الا ربنا ويصدرو اللى مش مرشوش ويولع الشعب المصرى يالله مافى بدل العشرة 70 مليون تانى يالله حتى يقللو من الكثافه السكانيه
يالله حسبى الله ونعم الوكيل
ما علينا