Sunday, July 01, 2007

مش طايقاااااك

مش عارف إيه سر إصرارنا لما نحكي قصة من نوعية سندريلا ولا الأميرة النائمة ولا ست الحسن والجمال .. إن إحنا لازم نختمها بجملة ... واتجوزوا بعض وعاشوا في تبات ونبات وخلفوا صبيان وبنات ...

مش دا يعتبر نوع من الغش والخداع .. لأن الحقيقة بتقول لنا إن الأجزاء المركبة دي مش ممكن تجتمع مع بعض أبدا

لو حبوا بعض مش ح يتجوزوا
ولو اتجوزوا مش ح يعيشوا في تبات ونبات
ولوعاشوا في تبات ونبات يبقى أكيد مش شاغلهم لا مصاريف المدرسة ولا كسوة الشتا ولا الدروس الخصوصية ولا الثانوية العامة يعني من الآخر مش حيكونوا خلفوا لا صبيان ولا بنات

طيب إيه لازمة نخدع الأطفال الأبرياء بكلمات مش حقيقية ونعيشهم في أوهام يتربوا عليها ويطلعوا نفسهم يحبوا ويتجوزوا ويعيشوا في تبات ونبات ويخلفوا صبيان وبنات .. كله كله

كنت قبل كده سألت عن إيه اللي حصل في قصة ست الحسن والجمال بعد ما اتجوزوا .. والحقيقة قلت ارجع أدور في القصص الحقيقية للحبيبة بتوع زمان اللي وجعوا دماغنا بقصصهم .. قلت أشوف إيه اللي حصل لهم بعد الجواز .. وعلى ما يبدو إن معظم قصص الحب فيها عامل مشترك واحد إن بطلة القصة بعد ما تأكدت من حب البطل ليها بتزحلقه وتقول له في النهاية مش طايقاك .. مش لازم باللفظ يعني .. لكن ممكن كمان بالمعنى وبالأفعال

معنى كده إن ست الحسن أكيد قالت للشاطر حسن بعد كام سنة جواز .. يا أخي حل عني بقى مش طايقاااااااك

رجعت لكام قصة كده ولقيت القصص كذا نوعية

فيه نوعية من القصص

البطلة قلبت للبطل وقالت له اصل أهلي غصبوا عليا اتجوز واحد تاني غيرك وهي جملة تحمل بداخلها نفس عبارة مش طايقاك لكن متزوقة لزوم التلمييع الإعلامي وعشان ما تطلعش وحشة قدام جمهور المسرح والأطفال الصغيرين اللي بيسمعوا القصة

ومن امثلة البشرية دي :

عم قيس بن الملوح اللي اتجن بحب الجارية ليلى بنت سعد وهام في الصحرا من غير لا أكل ولا شرب ولا كلام إلا شعر بيقوله للست ليلى هانم .. وهي عادي خالص اتجوزت واحد تاني وعاشت حياتها ومحدش قال عنها إنها هامت في الصحرا ولا ماتت كمدا ..

وطبعا ابو الفوارس عنترة اللي راح جاب العصافير من نوق الملك النعمان وحارب جيوش وفي الاخر لقى عبلة هانم متجوزة فارس أبيض من فرسان العرب .. الغريب إنهم يضحكوا علينا ويقولوا إنها اتجوزته ..

وجميل افندي اللي كان من عيلة اشرف من عيلة البت بثينة ومع ذلك لما يتقدم لها يرفضوه .. ممكن حد يقول لي ليه ... إلا لو كانت البت مش طايقاه واتحججت بأهلها .. وأصل هو مستأصدني في الرايحة والجاية وأنا ماليش ذنب يا بابا .. مش أكيد قالت كده ... وقوام قوام اتجوزت نبيه بن الأسود .. وبعد الجواز من الزوج المخدوع ... تلاقي نفسها مش طايقة الزوج الجديد فتستمر في مقابلاتها مع جميل بعد الجواز والزوج المخدوع لما يعرف يثور لكرامته اللي اهدرتها الهانم فيضطر جميل إنه يهاجر بيعد عنها عشان يحافظ على سمعتها ويقعد بعيد عنها شوية ويموت حزنا على فراقها .. وهي .. عادي زعلت شوية وكملت حياتها

وفيه نوعية ثانية

البطلة اتجوزت البطل فعلا أو حبته وبعد شوية .. لما زهقت منه وملت إنها تكون معاه قالت له ببساطة : مش طايقاك

ومن أمثلة البشرية دي :

الأخ قيس بن ذريح واللي حب الست لبنى هانم بنت الحباب وهام فيها عشقا وبعد قصة حب طويلة وجميلة استطاع الزواج منها لكن أهله كانوا معارضين الجوازة دي وقاطعوه وهو فضل مستحمل بعدهم عنه 10 سنين .. وبعد 10 سنين طلقها ...ليييييه ؟؟ .. عشان هي اللي طلبت منه .. قال إيه بعد 10 سنين اكتشفت إنها مشفقة عليه من معارضة أهله للجواز وطلبت الطلاق .. بعد 10 سنين اكتشفت إنه يا حرام بيعاني من مقاطعة أهله .. طبعا الحقيقة إنها اكتشفت إنها مش طايقاه .. وبرضه عشان ما تبقاش وحشة عطيت لها شكل رقيق .. طلقني عشان مصلحتك

برضه شمشون بعد الحب اللي حبه لدليلة وبعد ما اتجوزها .. عملت فيه إيه ؟؟ باعته لليهود وقصت شعره مصدر قوته وقلعت عينيه .. برغم الحب اللي هو حبه ليها وبرغم إنه كان قوي وصاحب نفوذ .. يعني الراجل ما يتعايبش .. لكن الحاجات دي مالهاش وزن إذا وصلت البطلة لمرحلة مش طايقااااك

وفيه نوعية كمان

الهانم فيها قعدت تلعب بالأفندي شوية تقربه وشويه تبعده .. يعني بتلعب بيه اليويو ..

ومن أمثلة البشرية دي ..

الأخت الفاضلة الأميرة ولادة بنت المستكفي اللي اشتغلت على الوزير الشاعر ابن زيدون وقعدت تمطوح فيه هو والوزير التاني ابن عبدوس .. وشوية تقرب ده وشوية تقرب ده .. ابن زيدون اللي كتب واحدة من اجمل قصائد الشعر


أضحى التنائي بديلاً عن تدانينا ** وناب عن طيب لقيانا تجافينا
أن الزمان الذي ما زال يضحكنا ** أنسا بقربهم قد عاد يبكينا

خدناها في ثانوي .. شوفوا الراجل يا كبد أمه في القصيدة متبهدل إزاي رايح جاي لكن هي طبعا ولا هي هنا

وبرضه الجدع اللي اسمه ابو نواس ده هو كمان وقع في حب جنان .. وكانت اسم على مسمى عشان جننته برغم إنه كان مقضي حياته بالطول وبالعرض لكن هي طلعت على جتته البلا الأزرق وكانت شغالة تريأة عليه حتى لما مولاتها عرضت عليها إنها تهبها ليه ... هي اللي رفضت وقالت مش طايقااااااااه

الخلاصة يعني .. اللي ما يتعلمش من اللي سبقوه ويصمم إنه يمشي ورا واحدة يبقى ذنبه على جنبه
ليا نصيحة لأي حد حاسس إنه حيقع .. خد بالك هي بطبعها متقلبة ومتغيرة ومزاجها بيتغير في اليوم الواحد كذا مرة وفي الأسبوع وفي الشهر وفي السنة..هي انهاردة مش زي بكرة مش زي كمان سنة .. فما تتوقعش منها إنها تكون زيك .. فكر كويس الخطوة دي ما تخطهاش إلا لو عندك استعداد تسمع منها بعد كل اللي حتعمله علشانها كلمة : مش طايقاااااااااااك

20 comments:

Ma 3lina said...

هههههههه

انت بتجيب القصص دى من فين يا بنى؟؟؟

اذا كانت الانثى متقلبة فالراجل باه خاين و بيحب على التوازى

وبعدين انت جايبلنا الامثلة الوحشة و سايب مثلا

روميو و جيولييت الى لما شفت حبيبه مات شربت السم علشان متعيش بعديه

شوف التضحية لو كان راجل الى حصل معاه كده كان دفنها و صلى عليها و تانى يوم قام اتجوز

بلاش افترا بااااااااه

تصدق بعد البوست دا فعلا مبقتش طايقة مدونتك
:p

أمــانــى said...

باشمهندس قولتك قبل كده قولى عليها وكده المرة التالتة انا باقول لحضرتك قولى عليها وانا اجيبلك تارك منها اصلها مش سايبة وراك رجالة تاكل الزلط قصدى بنات
هههههههههه
هو اكيد طبعا فى بنات اوحش من كده
انا كانت معايا واحدة فى السكن الله يمسيها بالخير كانت قاهرية المهم بقى كان فى واحد بيحبها وهى البنت كانت مستغلة كده اوووى كل ما واحدة تسافر يجى هو يعنى يشيل الشنط لما قولتلها حرام عليكى قالتلى سيبك منه هو كله سنتين واقلب هههههههههههههههه
يبقى ضيف عندك النوعية دى بقى نوعية المصلحة فقط
بس برضو ما ننساش ان فى نوع الرجالة ما يقدرهم اللى ربنا وبرضو الستات

وواوعى تنسى قول الله عزل وجل " الطبيون للطبيات " يعنى حاجة ميتزعلش عليه
تحــياتى لحضرتك

نسرين - أمة الله said...

السلام عليكم
هههههههههههههههه
هههههههههههه
متحاولش وتنصح حد برضه بيقعوا ولا حدش بيسمى عليهم
وبعدين ده اكيد تار بايت وتخليص حق
بس من غير حمشنه كده
لانك برضه يوم ما حتقع تانى مش حتحس يعنى حاجه كده زى الهوى مبتحسش بيه لما بيجى
ولما نشوفك حتعمل ايه
وبعدين ليه دايما البنات همم الوحشين
ما انتوا برضه فيكم ناس قله الاصل على الكيف

BinO said...

هذا القول لا ينطبق عليه غير قول الله تعالي
لا يكلف الله نفساً الا وسعها

:)
أنت نازل تعقيد في الناس ليه
هما يهبوا بعض انتو مالكوم

أنا عايز أقول حاجة غريبة جداً ان معدلات الطلاق في المحبين زايدة جداً بطريقة ملفتة
وخاصة في مراحل الزواج الأولي أو بمعني أدق خلال السنة الأولي
وانا بتكلم عن حالات حقيقية

البنت الشلبية said...

رجعنا تانى للنغمة اياها

هوا انت مش كنت هتتأهل..عامة قصصك دى توضح حاجة مهمة وهيا ان المرأة هيا الى بتتحكم فى امور كتيرة مهمة وممكن تتجنن الراجل من مجرد رفضها او قبولها ليه

طبعا الرجالة ميقدروش يعيشوا من غيرنا...هما كده يحبو يتعذبوا بحبنا وكلمة منا تجيبهم وكملة منا توديهم

هع هع هع ههههههههههههههه

عصفور المدينة said...

يا نهارك أبيض
اتجوز أنا باقولك أتجوز ده انت عايز تعقد الناس ليه الحقد ده ع المتجوزين
معاك الفصص عايزة تعديلات عشان تكون واقعية ويلا شد حيلك واكتب الواقع عشان احنا الرقابة مانعانا

كلام بجد
أشير إلى الإحصائيات التي ذكرها بينو
ثانيا اشير إلى موضوع الحب في الله حتى بين الزوجين

رينـــــــــــا said...

اييييييييييييييييييييه النظرة التشاؤميه دى
يابنى والله الدنيا حلوة
واللى عايز يحافظ على علاقه بيحافظ عليها
ومش شرط ابدا ان دا يحصل
انا كمان عندى امثله
أبى وأمى :D:D:D:D

شد حيلك انت بس وقرر
وان شاء الله تكسر القاعدة دا ان كان مسلم انها قاعدة :D

Just a Reader said...

طيب ما هو الرجاله برضو ليهم نفس التقلبات المزاجية دي ...مش تحيز بس هثبتلك الفكرة: بما إن التقلبات المزاجية دي مشاعر خلقها ربنا في النفس البشرية فأكيد أكيد هتنطبق على الرجل زي المرأة بالضبط ...فمفيش حد أحسن من حد:)
بل بالعكس أعتقد إن البنات بيقى عندها نسبة الميل إلى الاستقرار أعلى بكتير من الرجالة.
أما ليه بقى بيضحكوا على الأطفال ويقولوا أخرتها تبات ونبات ...فخليهم يقولوا عشان الناس تتفاءل وتقتنع بكده ووالصورة دي هي اللي تثبت في دماغها وتحاول تطبقها.
جديدة جدا القصص دي :).

طالب اخوانى said...

اظن ان العملية واضحة تماما .. بس مش محتاة تعقيد والحل بسيط جدا جدا جدا جدا جدا .. الحب فى الله .. وما أظنش أنه قصة خيالية ولا حاجة ..

ذكريات فى جامعة المنصورة

أحمد said...

هههههههههههههههه

الكلام دا صحيح انا قريته في مجله اسمها..... اسمها ..... علمني العوم و النبي يا أحمد

ايه يا عم فيه ايه , مش بالضرورة طبعا , ثم غالبا يعنى كلمة
"مش طايقاااااك" == "أوعى تصدقنى لو قلت مش طااااااااااااااايقك"

:)))

لحظة said...

ما هو طمان ممكن يقول مش طايقك
ومنغير عيوب التقلبات والتغيرات
وبعدين لازم كل واحد يسال نفسه هو عمل ايه عشان التاني ما يطيقهوش؟

مسلم said...

ايه يا عم ما علينا

ده بقول يا جواز...يعني رأيك أتراجع..!!؟

عموما يا سيدي بوست جميل

و بالنسبه ليه بقه لقد كان لكم في رسول الله أسوه حسنه

أنا بحب مواقف محمد صلي الله عليه و سلم مع زوجاته أمهات المؤمنين

بتفائل منها و الله

سلام يا أخي

eldoctor said...

؟؟؟؟؟؟؟؟؟؟؟؟؟؟؟
انت مش باين عليك حا تتجوز ابدا ..
مش طايقها و مش طايقاه دى مرحلة لازمة فى الزواج ... ساعات الابتلاء من الله بيكون فى النقطة دى ..
و كلنا بشر .. يعنى لازم الموضوع ده يحصل .. بس الاختلاف فى رد الفعل .. و الا منين جت امساك بمعروف او تسريح باحسان
الاتنين اصعب من بعض .. الامساك بمعروف و لو مش طايقها و هى مش طايقاه .. و التسريح باحسان برضه صعب ..و خصوصا ان النفس البشرية فيها نزعة انتقامية شوية
تحياتى

محمد العدوي said...

ههههههههههههه

وجهات نظر برضو ..

دا طبيعي لذلك كان لازم الحواديت تختم بالعبارات المقتضبة دي ..

والموت نهاية كل حي .. بغض النظر عن كونها متقلبة أو معدولة . فالنفوس كلها دائبة البحث عن الجديد . تهرب من التكرار . ثم إن معادلة الحب لكل الأطراف هي الرغبة والامتناع . يعني البحث الدائب ..

سكتم بكتم said...

جميل ياماعلينا يا أخويا

أنا رأيي أنك تنزل كتاب أسمه تعلم كيف تكرة المرأة وتحط فية كل البوستات اللي ليها علاقة بالموضوع ده عندك

وحتكسب دهب بس موعدكش أنك ممكن تتجوز بعد كدة

وأنا من نحيتي سوف أنكر أي صلة بيك
ياعم داأحنا غلابة مش قدهم

Unknown said...

هههههههههههه

هقول ايه بس

تفائلوا بالخير تجدوه

وشوشات said...

و لا تزال سينمانا حتى اليوم سينما البطل يتزوج البطلة.. في فيلم شورة و فانلة و كاب و كنت أول مرة أشوفه - بالأحرى هي آخر حتة فيه و هو ان بنت الراجل المهم ده اتجوزت البطل و هو احمد السقا.. و بس. انما لأ مش و بس.. طيب فين التوافق الاجتماعي و النفسي و الثقافي بين الطرفين؟ هو الموضوع حب و تبات و نبات و دمتم؟ يااااااا ريت الحياة كانت كده.. ما كانش حد اتطلق.

ftataljanna said...

هههههههههههه

قال يعني ده رد كل مؤنث هايدخل المدونة

ايه ده يا استاذ ما علينا

انت عارف لو حضرتك قلت للشباب ما يحبوش علشان دى علاقة ما ترضيش ربنا هانقول ماشي


بس علشا المرأة خاينة ومش طايقاااااااك والكلام ده لا

بجد

وبعدين ايه يعنى الست الله يكرمها بعد عشر سنين سابته لاهله مش يمكن بقى لها عشر سنين بتفكر ولسه واخده قرار


وبعدين مافهمتش يعني ايه

ماهم لو حبوا بعض مش هايتجوزوا ليه بقى اممال اللى بيحبوا بعض بيحبوا بعض ليه مش علشان يتجوزوا ولا علشان حاجة تانية انا ماعرفهاش

وبعدين يعنى ايه برضه لو اتجوزوا مش هايعيشوا فى تبات ونبات هو يعني التبات والنبات معنها انه خلاص مفيش مشاكل ده متعة الحياة فى انك تعدى مع شريك حياتك مشكلة صعبة وتحمدوا ربنا على انها عدت سوا

مش عارفه اقول لحضرتك ايه جايز حضرتك معترض عالعلاقات بين الاولاد والبنات بس ياريتك كنت عبرت بطريقة احسن من التشكيك فى كل مؤنثة

ما علينا said...

والله
جميل ان الواحد عرف نهاية قصص الجماعة دول

ودي قصص واقعية من تاريخ العرب
على عكس روميو وجولييت
اللي من نسج خيال الاخ شكسبير

وفعلا فعلا المرأة بطبعها متقلبة المزاج
وما يتعرفلهاش حال

لكنها اذا احبت بصدق فهنيئا لمن تحب
واذا ابغضت فاالويل والثبور وعظائم الامور لمن تبغض

يا حفيظ منهم
احذروا

وواضح فعلا انك مضادي منهن جدا

كلامك كدا متحيز ومش حيادي

المجاهدة said...

lol
اسلوب حضرتك جميل جداا ماشاء الله
:d


مممم
هوا للاسف ببيقى سوء اختيار و عدم تحمل مسؤولية و شوية عك كمان بيحصلوا
حتى للاسف بين الملتزيمن... مش بس غير الملتزمين


بس مش معنى كده ان كل الامثلة دلوقتي وحشة و ان مافيش حاجة اسمها حب صادق... ممكن بجد اي حد يجيبه :) لو اتبع بس نقاط معينة و اسس ثابته و تمسك بيها
هيعرف يختار صح و يعيش فعلاً
happily ever after
:)