Tuesday, July 31, 2007

تهانينا

لأن المدونة غير إنها لأفكاري فهي كمان لتدوين يومياتي فاحب اتكلم عن الاسبوع اللي فات ده واللي كان اسبوع فعلاً سعيد جدا على ناس كتيرة ودا من فضل الله سبحانه على عباده

انهاردة الثلاثاء .. 31 / 7 / 2007

من اسبوع فات ...

يوم الاتنين : أخونا الباشمهندس الطبيب أبو زياد الشهير بأبي زياد وولده .. رزق ببنوتة حلوة سماها سلمى .. ومتهيألي كده حيبقى اسمه الجديد أبو زياد وولده وبنته .. أو يخليه أبو زياد والفومليا

يوم الثلاثاء : الاستاذة إنسانة ظهرت نتيجتها واتخرجت .. الف مبارك عليها النجاح والتفوق كمان .. الست إنسانة ما شاء الله رفعت راس المدونين وجابت جيد مرتفع في كلية الاقتصاد .. يارب دايما كده من نجاح لنجاح ومن تفوق لتفوق

يوم الاربعاء : صديقي العزيز الشيخ مصطفى كانت دخلته .. فرحه كان جميل ما شاء الله .. وياسلام على الأفراح وجمال الأفراح .. أحلى حاجة فيها إنك تقابل الناس اللي بتحبهم وباعدت ما بينك وبينهم الدنيا فالحمد لله من قبل ومن بعد

يوم السبت : الست شلبية هانم فرحتنا بخبر خطوبتها فبتقول لها ألف مبارك .. وبارك الله لكما وبارك عليكما وجمع بينكما في خير وعلى خير .. وياريت ما تكليش علينا الجاتوم زي ما ضحكتي علينا في عيد ميلادك وما خدناش جاتوم

برضه يوم السبت : فتاة الجنة المهذبة الصدوقة احتفلت بعيد ميلادها الثامن عشر .. ربنا يبارك في عمرها ويعمره دايما بالطاعات ويرزقها الصحبة الصالحة دايما يااارب


يوم الأحد : عيد ميلاد الاستاذة نسرين أمة الله .. كل سنة وهي طيبة .. اظنها مش حتشوف البوست ده .. لأنها حتشد الرحال لأليكس في رحلة تصيفية .. اسأل الله أن يردها سالمة لبيتها بعد مصيف ممتع بإذن الله

يوم الاثنين : اكتشفت حاجة مهمة جدا بعد بحث عميق والتدقيق الشديد وجلسة مع النفس .. الحاجة دي هي : إن فيه احتمال إني ما اكونش اتعس إنسان على ظهر الأرض ...

12 comments:

BinO said...

السلام عليكم ورحمة الله وبركاته
عموماً أنا أحساسي كان بيقولي حاجة تانية
بس بدال الأمر هكذا
فالحمد لله وربنا مايجبش زعل
ولا تعاسة
وعقبال حضرتك لما يجيلك نصيبك

رفقة عمر said...

ليه بس حاسس انك تعيس
ربنا يجعلك منالسعداءدايما يارب فى الدنيا والاخرة
بس حاسه انك كاتب البوست مخصوص
علشان تقول الكلمه دى بالذات
وهى انك يوم الاتنين بالذات اكتشفت انك مش تعيس
ربنا يديم عليك الاسباب اللى جعلت تشعربالاحساس دة

عصفور المدينة said...

مبروك الإكتشاف العبقري
احتمال انك مش رقم واحد
يعني فيه احتمال انك رقم واحد
أو أي رقم تاني في التعساء

بس مش باين عليك
قل بفضل الله وبرحمته فبذلك فليفرحوا هو خير ممايجمعون

Ma 3lina said...

الحمد لله ان فيه اخبار حلوة

يا ريت تعمل النشرة دى كل فترة علشان تنشر البهجة بدل الكابة اللى عايشين فيها دى

Ma 3lina said...

اه نسيت اقولك انالاكتشاف متاخر اوى

بص على اخوانا فى فلسطين و العراق و لبنان و المعاناة اللى هما عايشنها دا غير الدول المعدمة

هتلاقى نفسك رقم 89999253258598516844118484881818516

فى التعساء دا على اساس انك تعيس يعنى

أمــانــى said...

الســـلام عليكم
ايه الحكاية يا باشهمندس بقالك فترة منقطع عن المراسلة هو حضرتك غيرت القناة ولا ايه
تعاسة ايه بس يا هنــدســة لالالالالالالالا بقول لحضرتك حاجة
او تزعل نفسك ولا تقول الكلام ده تانى
الدنيا دى كده الناس يوم فوق ويوم تحت ومفيش حااجة أصلآ بتفضل على حالها
ربنا يكرمك وييسرلك امورك ياااااااااااااارب آمــــــــــــين ويفتحها فى وشك يااااااااااااااارب آمــــــــــــــين
ويحققلك كل ما تتمناه ياااااااااارب آمــــــــــــين
قول أمــــــــــــين

رينـــــــــــا said...

السلام عليكم
ليه التعاااااااسه
الاخبار الحلوة دى لازم تخليك متفائل
ان فى امل تتجوز :D
ناس بتتخطب وناس بتحتفل بيوم ميلادها
يعنى فى امل يا بشمهندس

الف مبروك للناجحين والمخطوبين
وكل سنه وانتوا طيبين على ايام ميلادكم
سنه سعيدة عليكم

وعقبالك يا بشمهندس
وربنا يجعله فى ميزان حساناتك النشرة دى لانها اسعدت ناس كتير

Unknown said...

Allah yebarek feeeeeeeeeek

w alf mabroooook llenas kolaha w 3o2balak isA

thanks 3ala far7etak leya begad

rabena yekramak w ye3wzak ya raaaaaab

سكتم بكتم said...

قريت الأخبار اللي في الأول قل مش عادتك يعني تقول أخبار حلوة
دايما معكنن علينا ومسودها في وشنا
بس لما قريت خبر يوم الأتنين قلت بس رجعت ريما لجلبيتها القديمة

وحسيت أن كل البوست ده مكتوب علشان الجملة الأخيرة
اللي في ظاهرها الفرحة وباطنها عكننة

يا نكد باشا

سلام

المجاهدة said...

ماشاء الله اخبار جميلة
مبروك لكل اللي نجحو و مبروك لخطوبة اختنا و عقد اخونا و عقبال ااباقيين :)

اكيد حضرتك مش اتعس انسان ولات حاجة
حضرتك مسلم مؤمن بالله استحالة تكون اتعس انسان :)

جنـه said...

جميله الاخبار الحلوه دي
الواحد محتاج منها كتير

اما عن اكتشافك فهو اكتشاف خطير

والحمد لله علي اي حال

لحظة said...

الاكتشلف بتاعك ده المفروض انه من البديهيات
غريبة ان حضرتك لسه واخد بالك
عندك مية في الحنفية والا لا؟
دخت السنه دي في التنسيق الالكتروني والا عديت قبل ما يخترعوة؟
عندك حالة في مستشفى الشاطبي؟
لك فلوس في البورصة؟
بتقدم لولادك في مدرسة تجريبية وطالبين منك "تبرع"؟
لسه عايش في مصر ما متش يعتي
قول الحمد لله
ربنا يديلك الصحة