الجزيرة وعم ممدوح

ميزة قناة الجزيرة بالنسبة لي مش إنها بتقدم الأخبار بسرعة وبتابع عن قرب كل النقط الساخنة في العالم بمراسليها الناشطين المتواجدين في كل مكان واللي أقل واحد فيهم يتفوق على كل أصحاب لقب الأعلامي الكبير في دولة زي مصر مش كمان أنها بتحترم المشاهد وما بتستخفش بعقله زي نشرة أخبار الساعة التاسعة اللي اتربيت عليها واللي كلها أخبار عن الانجازات المصرية وتبعية كوكب الأرض كله للقيادة المصرية الحكيمة ومش لأنها برضه تصدر من دولة صغيرة مساحتها واحد على عشر تلاف من مساحة مصر وعدد سكانها واحد على مية من عدد سكان مصر ورغم كده قدرت تقدم قناة محترمة ناجحة برغم إنها قناة مش معتمدة على الأغاني والرقص والكلام الفارغ .. ولا على متابعة الشباب الهايف وشريط عايزة اتجوز ياما وانا وائل عايز اتعرف على بنت المعادي .. برضه مش لأنها مش بتحط القوانين الغبية بتاعة الإعلام المصري من نوعية شرط عدم ظهور المذيعات المحجبات أو المذيع الملتحي ولأن احتكام قناة الجزيرة للكفاءة وبس مش للواسطة اللي بتخلي المذيعة بتقدم النشرة وهي ما تعرفش الفتحة من الضمة ولا الفرق بين تقديم الخبر والأغنية .. وكل مؤهلاتها إنها قريبة فلان الفلاني ومش لأن الجزيرة بتقدم تقارير وافية عن مسائل دقيقة جدا وبتقدمها بطريقة تشد ولا أجدعها فيلم أمريكاني والواحد بيقوم وهو حاسس إنه قرا كتاب كامل في الموضوع .. وكمان بتفتح وثائق تاريخية لقضايا حصلت من زمان وبتخليني افكر كتير في المستقبل قبل ما افكر في الأحداث وإزاي وصلنا لحالنا ده مش لأنها فاتحة الحوار لكل الناس بدون كبت لاتجاه على حساب اتجاه تاني وبتقدم برامجها باحترام لهويتنا العربية الإسلامية مش تقليد لعالم ولاد الخواجات اللي ما تعرفش فيه انت بتتفرج على تلفزيون مصري ولا تلفزيون أمريكاني هابط لغاية ما تطلع عليك مذيعة الربط وتقول لك بصوت مايع اصدكائي كل أفراد الأوثرة .. أمال إيه ياعم انت إيه اللي بيعجبك في قناة الجزيرة .. دوختنا .. إيه الرغي ده .. ما تقول وتخلصنا ؟؟ اللي بيعجبني في الجزيرة أنها بتقدم مواضيعها مش للمثقفين ولا للمتعلمين وبس .. لا .. دي بتقدم جزء من أخبارها عني انا وليا انا .. أنا الراجل البسيط اللي ماشي في الشارع .. بتقدم أخباري مش أخبار السيد الرئيس ولا السيد الوزير .. بتعرفني بحال البلد من خلالي أنا المواطن العادي مش من خلال افتتاح مشروع ولا مآدبة عشاء أقامتها حرم السيد الرئيس على شرف الضيوف .. بتخلي في أحيان كتيرة للخبر بعد إنساني عجيب .. يخليك بتشوف نفسك في المراية ... أول امبارح في برنامجها هذا الصباح .. قدمت الجزيرة موضوع عن عم ممدوح عم ممدوح شغال مع العمال في العمارات اللي تحت الإنشاء بيرفع شكاير الأسمنت والجبس والرمل للأدوار العليا بيخرج من بيته الصبح بيمشي 12 كيلو عشان يوصل لحتة ممكن يشتغل فيها .. بيمشي خمسة كيلو عشان يوصل للهضبة ويمشي بعدها سبعة كيلو بعد الهضبة .. انا مش عارف قصده إيه ! .. المهم إنه بيمشي 12 كيلو وبيرفع في اليوم حوالي 2 طن شكاير جبس لغاية الساعة 5 العصر .. يوميته 3 جنيه .. بيفطر بنص جنيه .. بيجيب بيهم 3 أرغفة بـ 15 قرش وبـ 35 قرش طعمية ويفطر بيهم .. وبنص جنيه زيهم بيتغدى .. وبيجيب بنص جنيه سجاير (اتكسف ألوم عليه ولا اعاتبه) .. وهو مروح بيجيب بنص جنيه حاجة حلوة لأبنه الوحيد .. والجنيه اللي فاضل يإما بيروح في مواصلات يإما بيشيله ... حلمه إن ابنه يطلع لعيب كورة زي أبو تريكة وبعدها يحترف في بلاد بره زي رونالدينهو .. الراجل دا مش بقول حكايته عشان يصعب علينا ونقول يا حراام ... معلش .. انا بقول حكايته عشان نتعلم منه اللي نسيناه في الزحمة ..