ليتكم تعرفونها كما أعرفها

إذا لتمرد الوقت عليكم وكسر كل قوانينكم وثوابتكم ولصار حصانا بريا جامحاً .. ولما استطاع احد ترويضه .. فكلما اقتربتم منها ركض وأسرع فلا تدركونه وكلما ابتعدتم عنها تباطأ حتى إنه يكاد لا يمر ليتكم تعرفونها كما أعرفها إذا لفقدت اللغة عندكم حروفها واهتزت المفردات وتحطمت القواعد النحوية ولعدتم أطفالا تعبرون عن ما بداخلكم فقط بالضحك والبكاء .. وما أدركتم بعدهما وسيلة .. ليتكم تعرفونها كما أعرفها اذا لانهدت الجبال الراسية في قلوبكم .. تلك الجبال التي تحفظ لكم التوازن ستزول .. ولتعرضتم من بعدها لاعنف الزلازل واقوى الرياح .. واصبح استقرار أودية قلوبكم أسطورة من الأساطير .. وياللعجب إذ أنكم ستعشقون ذلك .. ليتكم تعرفونها كما أعرفها إذا لانقطعت آمال النساء في الرجال .. فكل الرجال سيسعون لها وحدها دون غيرها .. الملوك والأمراء والرؤساء والساسة والأتباع .. الأغنياء والفقراء .. الكل سيقف عند باباها ويقدم لها ما استطاع من براهين الهوى .. وسأصبح عندها مجرد رقم في الصف !!!! أحقاً ؟؟!!! إذا ... الحمد لله انكم لا تعرفونها كما أعرفها

تاج الأحلام

تاج الأحلام دا وصلني من العائشة في الأحلام رفقة عمر جزاها الله خيرا واللي بعد إذنها اقتبست اسم البوست من عندها .. بصراحة التاج صدمني .. الواحد بالتاجات دي بيعرف حاجات عن نفسه أول مرة يعرفها .. خصوصا السؤال الأول اللي بيسأل عن أحلامي في الماضي واللي حقيقة حيرني جدا .. مش عارف الواحد معندوش احلام ولا إيه عموما أتا قعدت عصرت دماغي واجمع حلم من هنا على حلم من هنا لغاية ما عملت التاج وإليكموه بالتفصيل .. السؤال الأول .. أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟ خمسة كتير قوي .. انا مش لاقي بصراحة .. كفاية تلاتة المرة دي ويبقى لكم حلمين عندي .. أو خدوا بيهم شوية رغي على شوية حواديت .. براحتكم يعني أول حلم .. كان إني ادخل الفنية العسكرية واكون ظبوطة .. بعد ثانوية عامة خالي قال لك اكلمك اللوا فلان .. وعمي قال لي يعرف المقدم علان .. قلت لهم : لااااااا .. أنا ادخل بمجهودي ومحدش يكلم لي حد .. ودخلت وكان مجموعي في الثانوية 94% .. وكان صف الظباط مستغربين اني داخل العسكرية اصلا .. واحد منهم قعد يقول لي : يا بني حرام عليك تعمل في نفسك كده .. دا بدل ما تاخدلك بنت تروح تتفسح معاها عايز تدخل الجيش .. المهم في الآخر ما قبلتش .. انا وقتها زعلت ورحت للبديل بتاعي .. كلية الهندسة .. وتعدي أيام وسنين وحياتي تتغير تماما .. لكن جوايا برضه كان فيه أسف على الكلية اللي معرفتش ادخلها .. وسبحان الله بعد ما دخلت الجيش كمجند لمدة 12 شهر اتغيرت فكرتي تماما .. ساعتها بس عرفت النعمة اللي ربنا أنعم عليا بيها وأد ايه فضله عليا كبير كان إنه حفظني من الجيش واللي بيحصل فيه .. الحمد لله حمدا كثيرا اني ما بقتش ظابط وبقت حياتي كلها كده .. تاني حلم .. كان لما دخلت هندسة .. كان نفسي ادخل قسم مدني وكنت على طول مخطط لنفسي كده وكنت بقول اني يإما ادخل فنية عسكرية واكون ميكانيكي يإما هندسة قسم مدني .. هندسة بالنسبة لي كانت يعني مدني وبس .. بس اللي حصل اني دخلت إعدادي هندسة وجبت مجموع كبير وحلو كده .. وقسم مدني كان وقتها بياخد مجموع قليل (قسم الشعب زي ما كانوا بيقولوا عليه وقتها) .. زمايلي قعدوا يقولوا لي : ازاي .. وخسارة مجموعك .. ما تضيعهوش .. ادخل كهربا .. وبصراحة الزن على الودان أمر من السحر .. وانا ساعتها ما اعرفش ازاي استسلمت لكده ودخلت كهربا .. الحمد لله على كل حال .. بس اظن مع رجوعي بالزمن لورا كان زماني عدلت رغباتي وخليت اول رغبة : قسم مدني .. تالت حلم .. هو حلم طفولي شوية .. لأني كنت بحلم وأنا صغير إني أكون رئيس جمهورية .. اظن الحلم دا فضل معايا لغاية تالتة ثانوي ولا حاجة .. ما اعرفش هو اتوقف امتى بالظبط .. يمكن لما عرفت النهي عن طلب الإمارة .. يمكن لما الحياة بدأت تبان قدامي على حقيقتها وعرفت إني كنت غلطان لما كنت فاكر إنه الواحد ممكن يترقى في مصر بالمجهود والصبر والعلم ويوصل لأعلى المناصب .. عموما الحمد لله إن الأفكار السودا دي راحت من دماغي .. انا فعلا مش حمل اني اشيل ذنوب الناس دي كلها .. السؤال التاني .. أذكر خمس أحلام على الاقل ..تخص مستقبلك أول حلم .. إني أكمل دراستي في المجال اللي انا بحبه .. واخد دكتوراة في نظم المعلومات وابقى عقبال أملتكم كده استشاري قد الدنيا في نظم المعلومات يشار إليه بالصوباع .. ايييه اوعدنا يارب .. هو مشوار طويل جدا .. بس واحدة واحدة وربنا إن شاء الله ييسر لي موضوع الدراسة دا بس ادعو لي احسن انا كسلان جدا .. والامتحانات قربت تاني حلم إني اتجوز الأميرة اللي بتمناها .. هي .. شهرزاد .. ست بجد .. أميرة .. الدينة الخلوقة .. انسانة تفهمني وافهمها وكل واحد مننا ياخد التاني زي ما هو بعيوبه ومميزاته .. يداري العيوب ويحاول يصلحها ويحمد ربنا على المميزات .. البشوشة المحبة لجوزها .. الواثقة فيه .. الودودة الولودة الطيبة الحنونة الرقيقة .. بيتها جنتي في الأرض .. محافظة على مالي وعيالي .. محترمة لي ولأهلي .. تاخد بإيدي للجنة .. جميلة من غير كبر .. هي أحسن مني دينا وخلقا لكن لأنها هي من هي فعمرها ما حتحسسني بكده .. تالت حلم .. إني اثبت حفظ القرآن في صدري .. وبلاش نتكلم في النقطة دي اكتر من كده عشان شكلي وحش جدا .. وممكن نحشر مع الحلم دا .. زيادة جرعة العلم الشرعي .. نفسي ازيد بجد فيها والله المستعان رابع حلم .. إن ربنا سبحانه وتعالى يفتح على احد ابنائي ويكون قائد للأمة وربنا يفتح على ايده الخير للناس ويكون سبب بفضل الله في قيام الدين وتحكيم شرع الله وعودة عزة أمة الإسلام .. خامس حلم .. إنه يكون معايا فلوس كتير .. أنا بصراحة شدبدة مش حهلكه في الخير ولا حاجة .. عشان مش ابقى كذاب .. برضه حتمتع بيه ومن حولي .. وبعد كده اعمل حاجات كتيرة في دماغي .. السؤال الثالث .. أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن أول شخص .. واحدة .. هو مش حكاية انها تكون موجودة من زمن .. بس نفسي تكون موجودة على طول .. هي انسانة دخلت حياتي وانا بحاول ادخل حياتها .. هي مش زي أي واحدة ممكن تعرفها .. كل كلمة صغيرة بتقولها بتخليني مبهور بيها .. مبهور دي كلمة كبيرة على فكرة .. بس انا ممكن اعجب بناس كتير .. بس اني انبهر بحد دي صعبة شوية .. هي بقا فعلا غير عادية خلتني مبهور ومستغرب من وجودها اصلا .. ابسط كلمة ممكن توصفها إنها من زمن جميل غير زماننا ده .. زي ما تكون من عصر تاني ركبت آلة الزمن وجت لنا هنا .. لؤلؤة في محارتها مخرجتش منها .. بريئة ومحتفظة بجمال وتألق غير عادي غير مختلط بغبار الناس وعوادم السيارات .. كل حدوتة من حواديتها بتقربني منها اكتر .. هي تستحق الأفضل .. هي اكتر من عرفت من النساء اللي تستحق الأفضل .. تتستحق واحد فعلا يسعدها .. وأظنه حيكون الأسعد بين رجال العالم .. لو كنت رجل وبتقرا كلامي فما تحاولش تتخيلها ولا تقارنها بواحدة ست انت شفتها وثق في كلامي هي حاجة تانية .. انا مش عارف لو ليا قصة معاها ممكن تنتهي ازاي ولا حتى عارف ممكن تبتدي إزاي .. خصوصا ان فيه حاجز ومشكلة كبيرة تفصل بيني وبينها وازاي مع وجود الحاجز ده ح اقدر أسعدها .. بس عموما الأيام حتقول لي على كل حاجة .. تاني شخص هو خالتي .. وطبعا دي موجودة من زمن أكيد يعني .. بس انا اقصد إنها تكون اقرب لي من كده .. لأنها ورغم انها موجودة من زمن إلا انها عايشة طول عمري في ليبيا .. ومش بشوفها غير كل فترة طويلة ولأيام معدودة .. انا بحبها جدا .. وهي الوحيدة اللي اتمنيت تكون أمي مكان أمي .. ربنا يخليها ويديها طولة العمر .. المفروض انها حتستقر في مصر بعد ما أولادها الأربعة اتجوزوا .. وقعدت فعلا في مصر .. لكن دلوقتي راحت تزورهم لمدة شهر .. المفروض الشهر قرب يخلص وترجع وتستقر بقا .. الخوف انهم يأثروا عليها ويخلوها تقعد معاهم . السؤال الرابع .. اذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا لا دا بقا صعب جدا .. لكن عموما أي داعية وشيخ - مش من الشيوخ اياهم طبعا - لما بيموت انا بزعل جدا وبتمني يكون موجود في حياة مش بس أولادي .. لا والأجيال الجاية كلها .. لأني بفكر إن الشيخ دا لما كان موجود وحواليا كنت ممكن اروح واسأله .. وكان صورة ليا وقدوة حية اقتدي بيها .. وإن اي حاجة جديدة بتجد في حياتنا هو حبخرج ويقول لنا رأيه واجتهاده فيها .. فبكون مطمئن .. بخاف جدا من ان ابني يحاول يلتزم فيدور على حد يساعده وما يلاقيش القدوة اللي تساعده .. او انه ما يلاقيش أصحاب العلم فيتخذ رؤوسا جهالاً اضيف سؤال كمان للتاج .. فيه حد نفسك إنه يختفي من حياتك ؟ آه .. اليومين دول فيه مدون كده نفسي انه يختفي من عالم التدوين .. يارب يرزقه بسفرية كده لدولة ويقبض 100 الف يورو في الشهر .. انا بدعي له اهو بالخير .. بس يارب تكون الدولة دي مفيهاش نت ولا تليفونات أصلا .. آميييييييين :) التاج أمرره لكل من إنسانة وطعمة ود. ماعلينا

غنوة وحدوتة

أولا الحدوتة .. وهي قصة منتشرة في المنتديات .. والحق الأدبي محفوظ لصاحبها الذي لا أعرفه دخل حمار مزرعة رجل وبدأ يأكل من زرعه الذي تعب في حرثه وبذره وسقيه تسائل صاحب المزرعة في حيرة : كيف يخرج الحمار من الأرض ؟؟ أسرع الرجل إلى البيت وجاء بعدَّةِ الشغل فالقضية مصيرية ولا تحتمل التأخير .. أحضر عصا طويلة ومطرقة ومسامير وقطعة كبيرة من الكرتون المقوى وكتب على الكرتون (يا حمار أخرج من مزرعتي) ثم ثبت الكرتون على العصا الطويلة بالمطرقة والمسمار وذهب إلى حيث الحمار يرعى في المزرعة ورفع اللوحة عالياً ... وقف رافعًا اللوحة منذ الصباح الباكر حتى غروب الشمس ولكن الحمار لم يخرج حار الرجل وقال في نفسه : ربما لم يفهم الحمار ما كتبتُ على اللوحة .. رجع إلى البيت ونام .. في الصباح التالي صنع عددًا كبيرًا من اللوحات ونادى أولاده وجيرانه واستنفر أهل القرية وحكماءها وصف الناس في طوابير يحملون لوحات كثيرة مكتوب عليها (أخرج يا حمار من المزرعة) (الموت للحمير) (يا ويلك يا حمار من راعي الدار) (سنلقي بك أيها الحمار إلى البحر) وتحلقوا حول الحقل الذي فيه الحمار وبدأوا يهتفون : أخرج يا حمار .. أخرج أحسن لك .. والحمار يأكل ولا يهتم بما يحدث حوله .. غربت شمس اليوم الثاني وقد تعب الناس من الصراخ والهتاف وبحت أصواتهم فلما رأوا الحمار غير مبالي بهم رجعوا إلى بيوتهم يفكرون في طريقة أخرى في صباح اليوم الثالث جلس الرجل في بيته يصنع شيئاً آخر لإخراج الحمار فصنع نموذج مجسم للحمار يشبه إلى حد بعيد الحمار المغتصب لأرضه ولما جاء إلى حيث الحمار يأكل في المزرعة وأمام نظر الحمار وحشود القرية المنادية بخروج الحمار وعدسات وكالات الأنباء العالمية وبكل الشجاعة سكب البنزين على النموذج وأحرقه أمام الجميع .. نظر الحمار إلى حيث النار ثم رجع يأكل في المزرعة بلا مبالاة أرسل حكماء القرية وفدًا ليتفاوض مع الحمار العنيد .. قالوا له: صاحب المزرعة يريدك أن تخرج وهو صاحب الحق وعليك أن تخرج .. نظر الحمار إليهم ثم عاد للأكل لا يكترث بهم بعد عدة محاولات أرسل الرجل وسيط آخر قال للحمار : صاحب المزرعة مستعد للتنازل لك عن بعض من مساحته .. الحمار يأكل ولا يرد .. ثلثه .. الحمار لا يرد .. نصفه .. الحمار لا يرد .. قال له : طيب حدد المساحة التي تريدها ولا تتجاوزه .. رفع الحمار رأسه وقد شبع من الأكل ومشى قليلاً إلى طرف الحقل بعيداً عن الوسيط الذي يزعجه بهمهماته التي لا يفهم معناها .. فرح الناس فقد ظنوا أن الحمار وافق أخيرًا .. أحضر صاحب المزرعة الأخشاب وسيَّج المزرعة وقسمها نصفين وترك للحمار النصف الذي هو واقف فيه .. في صباح اليوم التالي كانت المفاجأة لصاحب المزرعة لقد ترك الحمار حدوده واقتحم حدود صاحب المزرعة وأخذ يأكل منه .. جمع صاحب المزرعة اهل القرية ليشهدهم على اعتداءات الحمار المتكررة .. وذهب سريعا لبيته ورجع مرة أخرى حاملا اللوحات المطالبة بخروج الحمار .. وبعد فترة من حملها حدث نفسه : يبدو أنه لا فائدة من هذا الحمار .. وبدأ الرجل يفكر في ترك المزرعة بكاملها للحمار والذهاب إلى قرية أخرى لتأسيس مزرعة أخرى .. ابتهج أهل القرية لهذا الحل الذي يكفيهم القتال ويزيح عن صدورهم هذا الهم .. وأمام دهشة جميع الحاضرين وفي مشهد من الحشد العظيم تقدم طفل صغير خرج من بين الصفوف ودخل إلى الحقل وتقدم نحو الحمار وانحنى والتقط حجرا من الأرض ورمى به الحمار فإذا بالحمار يركض خارج الحقل ... حلوة الحدوتة ولا ملتوتة ؟؟ طيب .. وآدي كمان الغنوة أحترف الحزن و الإنتظار أرتقب الآتي و لا يأتي تبددت زنابق الوقت واحد وستون عاماً و أنا أحترف الحزن و الإنتظار عبرت من بوابة الدموع إلى صقيع الشمس و البرد لا أهل لي في خيمتي وحدي واحد وستون عاماً و أنا يسكنني الحنين و الرجوع كبرت في الخارج بنيت أهلاً أخرين كالشجر أستنبتهم فوقفوا أمامي صار لهم ظل على الأرض و من جديد ضربتنا موجة البغض و ها أنا أستوطن الفراغ شردت عن أهلي مرتين سكنت في الغياب مرتين أرضي ببالي و أنا أحترف الحزن و الإنتظار

خلف باب الأمل

هو .. وقف أمام الباب واستجمع كل أشلاءه المتناثرة وأجزاءه المحطمة واستعاد بعضاً من شجاعته واستخار الله وبقوى خفية لا يعرف من أين جاءته رفع يده وطرق الباب ثم طأطأ رأسه وأغمض عينيه وانتظر .. هي .. وراء الباب تجلس على كرسيها الهزاز تنظر إلى ظله المضطرب وتستمع إلى دقات قلبه المختلطة بطرقاته على الباب .. هو .. قرر أن يشغل لحظات انتظاره ويرسم صورة لها في خياله .. قرر أن يغرق ذهنه في بحر من الخيالات .. أخرج ريشته وألوانه وبدأ يرسمها في ذهنه .. يرسم ويمحو ..ثم يعود فيرسم من جديد ويمحو .. رسمها مرة طويلة ومرة قصيرة .. نحيفة وسمينة .. شقراء وسمراء .. شديدة الجمال وشديدة القبح .. كان يرسم ويمحو وهو مغلق العينين ويبتسم لتناقض صوره المختلفة .. وقعت ريشته منه فرسمتها له مزيفة مخادعة .. اضطرب بشدة وانزعج ومحا هذه الصورة المشوهة سريعاً وانتفض جسمه وسرت فيه قشعريرة فانتبه للحظات الطويلة التي مرت وهي لم تفتح له الباب بعد .. فعاود الطرق على الباب .. هي .. لازالت على كرسيها الهزاز .. تبتسم هو - بعد مدة - يتسائل في خوف : هل هذه إشارة له لكي يتراجع ؟ .. هل يترك الأماني الطيبة التي ينتظر منها أن توصله لأمله .. ولكن أين سيذهب بعدها .. كل الأبواب مظلمة كئيبة محبطة .. ولا يرى في الحي سوى بابها المسحور الذي جذبه إليها تدريجيا منذ اول يوم رآه وتمنى أن يطرقه يوماً .. وها هو قد جاء اليوم .. هل يفقد الأمل الان وينسحب .. كلا .. هتف في نفسه وثبت قدميه في مكانه وطرق الباب وانتظر هي .. لازالت على الكرسي .. قلبها يدق وعقلها يفكر .. هو لا يعرف سري .. بدأ الطفل الغضوب يتحرك بداخله وهم أن يخرج منه ثائرا على عدم اكتراثها بقلقه وانتظاره خلف الباب - هكذا بدا له أمرها - .. لكنه تمالك نفسه وقال له .. أيها السخيف .. أنت مثلي تحتاجها .. لا تحرضني إذن ودعني انتظر ودندن معي .. نطرونا كتير كتير عا موقف دارينا لا عرفنا أساميهم ولا عرفوا أسامينا يا نسمة خدينا يا نسمة جبينا سيارة صغيرة والليل والغيرة والعشاق اتنين اتنين ما حدا عارف لوين ؟؟ نطرونا .. نطرونا كان يظهر له بوضوح انحياز الباب لها وتعاونه الكامل معها .. فلو كان لهذا الجماد مشاعر لرق لحاله وانفتح من تلقاء نفسه .. لكنه بطبيعته تعاون معها .. أعجزته الحيلة واحتار .. ماذا يفعل .. أخرج ورقته وقلمه .. كتب كلمات وصف لها فيها حاله وما حدث في اللحظات الماضية وهو يقف خلف بابها ينتظر إشراقتها وألقى إليها ورقته من تحت الباب .. ثم تراجع وسحب كرسياً وجلس وانتظر ..

مطلوب واحدة ست

لما حد بيسألني أول صفة عايزها تكون موجود في شريكة حياتك تكون إيه - بعد الدين طبعا - برد على طول وأقول له عايزها تكون واحدة ست .. الرد دا طبعا مش حيعدي على صاحب السؤال بالساهل كده فلازم يبدي الاندهاش من ردي ويبتسم على الآخر ويستغرب.. وما يعديش فرصة أنه يتهكم على كلمتي ويوجه بونية في وشي بجملة : يعني أي واحدة ست وخلاص ؟!! .. كأنهم كتير يعني .. أو إنه يقول : ما هو طبعا حتكون واحدة ست أمال حتكون راجل يعني .. هو بيفترض إني قلت صفة عادية جدا وأكيد إنها حتكون متوفرة في أي واحدة حرتبط بيها .. مع إن أنا شايف العكس وإن الصفة اللي أنا عايزها دي - إنها تكون ست - مش موجودة غير في قلة قليلة (مندسة .. على رأي جماعة أصحابنا) بين الصف النسائي .. القلة دي هي الوحيدة اللي فعلا عارفة إزاي تكون واحدة ست واحدة ست يعني لما تشوفها تقول هي دي فعلا { خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً } أبي آدم عليه السلام لما عاش على الأرض واستوحش من الوحدة جعل له رب العزة أنيس وشريك ولم يجعل هذا الشريك رجل مثله بل جعله واحدة ست .. واحدة ست يحصل معها السكن والمودة والرحمة وكل ما كانت شريكة الحياة اقرب على المؤشر من كونها ست وأبعد عن صفات وأخلاق الذكورة .. كل ما تحقق السكن والمودة والرحمة .. وكل ما كانت المرأة ابعد عن أنوثتها كانت أبعد عن الصلاحية لتكون شريكة حياة وعليه فتفسيري لكافة المشاكل الكبيرة وكثير من المشاكل الصغيرة التي تحدث بين الأزواج يكون مرجعها غالبا لابتعاد أحد الطرفين عن طبيعته (الذكورة أو الأنوثة) واقترابه من طبيعة الطرف الآخر .. فيبقى البيت فيه اتنين رجالة أو اتنين ستات .. أما بقى لو الراجل خد دور الست والست خدت دور الراجل بتبقى المصيبة أكبر لأن الفطرة معكوسة وهما الاتنين مش حيقوموا بأي من أدوارهم الطبيعية .. يعني كأن البيت لا فيه راجل ولا ست .. يعني بيت خرابة لكن المرأة لو ابتعدت عن أساليب الحياة الذكورية واهتمت بأنوثتها واعتبرته دور تقوم به حتكون فعلا واحدة ست ولو افترضنا أن أي واحدة قرأت كلامي السابق وفسرته على إني بطالب المرأة أنها تكون دمية وجسد ليتمتع به الرجل الأناني .. فدي مش واحدة ست .. لأنه في تفكيرها القتالي دا والاسلوب الحاد العنيف في تمردها وعدم معرفتها بحقيقة أنوثتها أصبحت بعيدة تماما عن إنها تكون واحدة ست .. وحقيقة الأنوثة أصعب من إني أذكر تفاصيله سردا .. بل إني لا اعرف تفاصيلها ولكن استشعرها مع أفعال الست .. وكل واحدة تعلم بطبيعتها وفطرتها إزاي تكون واحدة ست بجد .. وإن أنكرت نفسها عليها ذلك .. مع قبولها لزن الودان ومكر الليل والنهار (إنتي مش خدامة عنده وعند عياله .. زيي زيك .. حقوق المرأة .. المرأة مهضوم حقها .. المساواة .. المجتمع دا ذكوري .. اشمعنى هو .. كلنا ليلى .. إلخ ) لكن ممكن نتكلم عن مثال لواحدة ست لما قريت عنها حسيت إنها واحدة ست بجد .... الست دي هي جاين أوستن .. جاين أوستن كاتبة إنجليزية تعتبر رقم اثنين في تاريخ الأدب الإنجليزي بعد شكسبير ليه جاين أوستن واحدة ست .. ؟؟ سؤال وجيه جاين أوستن برغم فقرها وعمرها القصير وعدم زواجها وعدم إنجابها كانت سعيدة وأسعدت كل اللي حواليها واسعدت ناس إلي يومنا هذا لما يقروا روايتها الستة فقط اللي ألفتهم .. الماديات لم تكن أبدا مركب السعادة بالنسبة لجاين أوستن .. لا مال ولا قصور ومع ذلك وجدت مركب السعادة ونشرته على الجميع .. عشان كده هي واحدة ست بجد. روايات جاين أوستن دايما كانت تنتهي بنهايات سعيدة لأبطالها .. رغم إنها عاصرت مشاكل كثيرة وحروب وكانت ممكن تشير لها في روايتها ( على نظام سينما الواقع ).. لكنها أبدا لم تعرّض شخصيات رواياتها لهذه الحروب .. واكتفت بذكر حكايات اجتماعية عن الحب المؤدب والزواج بأسلوب خفيف اقرب للكوميديا .. كأنها بتقول يكفي ما في الحياة من شقاء مش لازم اخلي أدبي كمان رحلة شقاء .. كأنها بتحاول ترسم السعادة على وجه من سيقرأ روايتها وتعطي له أمل بحياة أجمل ولتخفف عنه عبء الحياة اليومي .. عشان كده هي واحدة ست وبرغم أن جاين لم تتزوج ولم تنجب إلا أن عطاءها لم يتوقف عند حدود الرواية والأدب فكانت أم وعمة وخالة لأبناء شقيقاتها وأشقائها .. ولما تتوفى زوجة أحد أشقائها تسافر إليه وتضع نفسها في خدمته وخدمة أبناء أخيها اليتامى .. بدون تعقيد ولا صياح ولا شعور إنها ضحية الظروف ولا إن المجتمع ظلمها .. كانت بتعمل كده لأنها حاسة إن دا دورها .. فكانت سعادتها في رعاية من حولها صغارا وكبارا حتى لو كانت هي تتألم بمرضها اللي كان سبب في موتها وهي في سن الأربعين .. عشان كده هي واحدة ست. جاين أوستن لما اتقدم لها عريس غني وافقت عليه لفترة قصيرة جدا استجابة لضغط اجتماعي بيطلب من كل بنت وقتها (أواخر القرن الثامن عشر) إنها تحسن من وضعها الاجتماعي بالزواج .. لكنها تمردت على كده وصحت من النوم في يوم عشان تقول لبنات أختها: يمكن للإنسان أن يتحمل كل شيء يحدث له إلا أن يتزوج بغير حب .. هي كده واحدة ست لأنها عايزة تتجوز مش عشان الشقة ولا العربية ولا الوضع الاجتماعي ولا هروبا من كلمة عانس .. هي كده واحدة ست لأنها بتقدم عاطفتها على ماديتها ومادية الظروف حواليها .. لم تكن جاين تسعى وراء الشهرة والمال وعدد الروايات التي كتبتها ست روايات فقط طوال حياتها .. فلم تكن موهبتها ولا مجدها الشخصي يشغلها عن أسرتها الكبيرة ورعاية أسرتها التي اختارت أن تكون في خدمتهم ولم يفرض أحد عليها ذلك .. ولما انتهت من روايتها الأشهر "رغبة وكبرياء" في سن الثالثة والعشرين ذهب والدها بالكتاب ليعرضه على دور النشر التي لم تهتم بالرواية .. كان الأب مشفقا على جاين من صدمتها إذا عرفت بعدم اهتمام دور النشر بروايتها .. لكن جاين لم تكن لتزيد هم والدها برؤيتها مهمومة فعند عودته محبطاً من دور النشر كان الكل يسأل عن الأخبار إلا جاين التي اشعلت له نار المدفأة وقدمت له الحساء الساخن ولم تسأله عن مصير كتابها بل عرفت من وجه أبيها ما يريد قوله وأخذت هي تواسيه وتطمئنه وتخفف عنه وتقول له : لا تيأس فسوف يبحثون هم عنك .. هي التي تواسيه وهي التي تخفف عنه رغم أنها هي صاحبة الهم .. عشان كده هي واحدة ست في وقت جاين أوستن كان الراجل راجل والست ست .. ما كانش حد بيحاول ياخد دور التاني .. لما كان الرجل يقابل أي واحدة ست لازم يغض الطرف وينظر في الأرض وكانت الست تنحني له نصف انحناءة تعبيرا عن الاحترام المتبادل بينهما .. وكانت سيدات المجتمع الراقي تصب كل الاهتمام في البيت والتربية والقراءة والشعر والموسيقى والتطريز ومساعدة الزوج .. فكانت الستات ستات بجد .. يمكن عشان كده وبغض النظر عن صحة الحكايات المروية عن جاين أوستن من عدمها فبالنسبة لي الأسلوب دا أسلوب واحدة ست