Saturday, January 06, 2007

رسالة إلى العائشة في الأحلام

كلمة للجميع قبل الرسالة
إلى الآن لازلت لا أعرف كيف أرد وأين أرد أو أشكر من يعلق على مواضيع المدونة ..
هل أعلق بعد تعليقه في نفس المكان ... لا أحب ذلك .. لأني أريد أن أترك التعليقات مكان خاص بالزوار فقط .. مش عارف ليه ؟؟ .. بس هو كده ..
طيب
أضع تعليقي وشكري في مدونة كل واحد علق على مدونتي .. هنا تظهر لي مشكلتان .. إنه لو حب يعلق على تعليقي أنا مش حشوفه ولازم أمر على مدونة كل من يعلق في المدونة وافتح البوست اللي فيه تعليقي عشان اشوف هو علق على تعليقي ولا ما علقش على تعليقي ... (واخدين بالكم ؟؟!!!)
.. وحتى لو قلنا إني قدرت أعمل كده .. تظهر المشكلة التانية .. طيب أنا حعلق في مدونة واحد عامل بوست في موضوع معين .. فاروح أنا كاتب له تعليق على تعليق هو كتبه عن موضوع كتبته أنا في مدونتي .. أحسب أن ذلك مش ظريف ... مش كده. أفيدونا أفادكم الله
المسألة تبدو صغيرة وهايفة .. لكنها فعلاً محيراني .. زي حاجات كثيرة صغيرة ومحيراني وافضل واقف قدامها وفي الآخر أقول ما علينا
بعض الناس بيقولوا .. لا تدع الأشياء الصغيرة تزعجك .. فناس تانية ردو عليهم وقالوا .. جربوا تقعدوا في أوضة واحدة مغلقة مع ناموسة.
المهم أنا كنت مش عارف اعلق على تعليق فين ؟؟ عشان كده حعلق في بوست لوحده لغاية ما ألاقي حل ..
ما علينا .... المهم

إلى أختنا الطيبة العائشة في الأحلام
تحية طيبة وبعد ..
أحب أقول لحضرتك إن فعلاً بوست [إيه الموضوع صداميون ولا عراقيون] كان للرد على البوست اللي حضرتك قمت بكتابته [انصر أخاك ظالماً].. لكن كمان كان رد ناس تانية كتبت حاجات زي كده وأكتر منهم مثلاً [عشت بطلاً ومت بطلاً] و [طوبى لأبي الشهداء] و [خيمة المهنئين بإستشهاد إمام المجاهدين عبد الله صدام حسين المجيد] وغيرهم .. وقبل ما يكون رد .. فهو وجهة نظر أردت أن أقولها .. وأنا لم أقصد أهاجم وجهة نظرك .. بل على العكس أحترم وجهة نظرك تماماً في أي موقف ويكفي أنك غيرت أحد آرائي التي عشت بها طوال عمري ولكنك مع آخرين غيرتم هذا الرأي .. إذن فأنت صاحبة فضل على لا أنكره .. فجزاكي الله وجزاهم عني خيرا
وليس لأني أعترضت على ما قلتيه أرفض تعدد وجهات النظر .. أو أني أحجر على الآخرين
كل ما أردته أن أقول لنفسي أن صدام ليس محور القضية وليس قتله في أول أيام العيد هو المشكلة وليس تصوير إعدامه المهين هو المحزن .. العراقيون هم محور القضية .. وما يحدث في بلادنا هو المشكلة .. وحالي وحال المسلمين هو المحزن.
وعلى فكرة أنا لم أشاهد فيديو إعدام صدام وهو عندي .. ولا أنوي أن أشاهده الآن.
وبالنسبة لما ذكرتيه .. هل تاب من أفعاله السابقة ؟؟ وحديث توبة قاتل المائة نفس وتوبة وحشي ونطق صدام بالشهادة .. فهي مسائل لها ردود تجعلها في غير محلها ولا تغير شيء من نظرتنا لصدام سواء كنا مؤيدين أو معارضين له .. ولكن لن أذكر هذه الردود لأن الرجل أفضى لما قدم وحسابه على الله .. ولأني بينت وجهة نظري في طلب الكف عن الحديث في كل قضية تلقى إلينا لنلهو بدراستها ونغفل عن الأهم.
....... فاصل اتفقد فيه مدونتك ......
عدت بعدما قرأت آخر بوست في مدونتك [حلمي أحس بطعم الحياة] .. ودي أصبحت عادة أن اتفقد مجموعة المدونات اللي موجود على يمين البلوج بجانب شعار حملة (اتنيل يامدهول) ممكن 3 مرات يومياً أو أكثر بالإضافة لكثير من المدونات الأخرى. أصبح الأمر كالإدمان عندي.
كنت بقول إنك صاحبة فضل عليا .. لكن بعد هذا البوست الأخير أصبحت صاحبة فضلين ..
لكن أرجوك أن ترفعي الصور من البوست.

تحياتي لك ولـ إنسانة ولـ الديب ولـ الدكتور المحارب ولـ عيون وللجميع

4 comments:

Human said...

الموضوع مش هياف ولا حاجة وبما إنى لسة جديدة فى عالم التدوين فكانت النقطة دى محيارانى أوى
بس هو اسلم وانسب حل إنك ترد على التعليقات فى البوست بتاعك
ولو عاوز إنه يكون خاص بس بالزوار حاول مثلا إنك ترد فى تعليق واحد على كل الناس عشان مش تاخد عدد تعليقات ... فى الحالة دى هتبقى غالبية التعليقات من الزوار وإنت بس رديت عليهم فى تعليق واحد بس لو حد علق بعد ما حضرتك كتبت الرد نتصرف إزاى؟
بسيطة خالص .. إستنى شوية يمكن حد يعلق تانى ورد عليهم فى تعليق واحد برضه
وبعدين ردود صاحب المدونة بعتبرها شئ مهم لأنها بتوضح وجهة نظره ولو فى نقطة مش واضحة بيوضحها وبنعرف أكتر عن شخصية صاحب المدونة غير إنه بيرحب بوجود الزوار فى المدونة وبيشجعهم يزوره تانى "مهتم بيهم وبرأيهم بمعنى أصح"

ده رأيى المتواضع جدا
وتحياتى لك وللعائشة فى الأحلام ولكل الناس الجميلة دى
:)

رفقه عمر said...

انا دخلت المدونه علشان اقرأ ايه الجديد عندك لان انا كمان لازم اشوف الموجودين عندى لانى بحب اقرأ لهم اولا اتفجأت باسم المدونه الخاص بى طبعا دة كتير عليا قوى انك تعمل لى بوست مخصوص لترد عليا شكرا ليك كتير ثانيا انا مش عارفه انا صاحبه فضل فى ايه بجد انا عملت ايه علشان اكون صاحبه فضل انا عملت مدونتى ابتغاء وجه الله ونفسى اعمل حاجه لدينى بجد والحمد لله ان ربنا يسر لى هذا الطريق
على العموم ماعلينا وشكرا ليك كتتير كتير

رفقه عمر said...

انا نسيت اسالك ليه عايزنى ارفع الصور من على البوست انا فعلا بحب الطفله دى جدا ومعى صور لها فى المحفظه الخاصه بى وكمان علشان تحس شويه بغيرنا وخصوصا المدو نين اللى بيتكلموا كلام فى حق الله ويتلفظوا بالفاظ بذيئه مش عارفين انه الكلام دة كله محسوب عليهم عند الله

رفقه عمر said...

شكرا ليك لتعليقك على البوست الحب فى قفص الاتهام حبيت ارد على البلوج الخاص بيك علشان يكون سهل تقرأ التعليق بس انت برضه لم ترد عليا فى الاسئله اللى سألتهالك