مش طايقاااااك

مش عارف إيه سر إصرارنا لما نحكي قصة من نوعية سندريلا ولا الأميرة النائمة ولا ست الحسن والجمال .. إن إحنا لازم نختمها بجملة ... واتجوزوا بعض وعاشوا في تبات ونبات وخلفوا صبيان وبنات ... مش دا يعتبر نوع من الغش والخداع .. لأن الحقيقة بتقول لنا إن الأجزاء المركبة دي مش ممكن تجتمع مع بعض أبدا لو حبوا بعض مش ح يتجوزوا ولو اتجوزوا مش ح يعيشوا في تبات ونبات ولوعاشوا في تبات ونبات يبقى أكيد مش شاغلهم لا مصاريف المدرسة ولا كسوة الشتا ولا الدروس الخصوصية ولا الثانوية العامة يعني من الآخر مش حيكونوا خلفوا لا صبيان ولا بنات طيب إيه لازمة نخدع الأطفال الأبرياء بكلمات مش حقيقية ونعيشهم في أوهام يتربوا عليها ويطلعوا نفسهم يحبوا ويتجوزوا ويعيشوا في تبات ونبات ويخلفوا صبيان وبنات .. كله كله كنت قبل كده سألت عن إيه اللي حصل في قصة ست الحسن والجمال بعد ما اتجوزوا .. والحقيقة قلت ارجع أدور في القصص الحقيقية للحبيبة بتوع زمان اللي وجعوا دماغنا بقصصهم .. قلت أشوف إيه اللي حصل لهم بعد الجواز .. وعلى ما يبدو إن معظم قصص الحب فيها عامل مشترك واحد إن بطلة القصة بعد ما تأكدت من حب البطل ليها بتزحلقه وتقول له في النهاية مش طايقاك .. مش لازم باللفظ يعني .. لكن ممكن كمان بالمعنى وبالأفعال معنى كده إن ست الحسن أكيد قالت للشاطر حسن بعد كام سنة جواز .. يا أخي حل عني بقى مش طايقاااااااك رجعت لكام قصة كده ولقيت القصص كذا نوعية فيه نوعية من القصص البطلة قلبت للبطل وقالت له اصل أهلي غصبوا عليا اتجوز واحد تاني غيرك وهي جملة تحمل بداخلها نفس عبارة مش طايقاك لكن متزوقة لزوم التلمييع الإعلامي وعشان ما تطلعش وحشة قدام جمهور المسرح والأطفال الصغيرين اللي بيسمعوا القصة ومن امثلة البشرية دي : عم قيس بن الملوح اللي اتجن بحب الجارية ليلى بنت سعد وهام في الصحرا من غير لا أكل ولا شرب ولا كلام إلا شعر بيقوله للست ليلى هانم .. وهي عادي خالص اتجوزت واحد تاني وعاشت حياتها ومحدش قال عنها إنها هامت في الصحرا ولا ماتت كمدا .. وطبعا ابو الفوارس عنترة اللي راح جاب العصافير من نوق الملك النعمان وحارب جيوش وفي الاخر لقى عبلة هانم متجوزة فارس أبيض من فرسان العرب .. الغريب إنهم يضحكوا علينا ويقولوا إنها اتجوزته .. وجميل افندي اللي كان من عيلة اشرف من عيلة البت بثينة ومع ذلك لما يتقدم لها يرفضوه .. ممكن حد يقول لي ليه ... إلا لو كانت البت مش طايقاه واتحججت بأهلها .. وأصل هو مستأصدني في الرايحة والجاية وأنا ماليش ذنب يا بابا .. مش أكيد قالت كده ... وقوام قوام اتجوزت نبيه بن الأسود .. وبعد الجواز من الزوج المخدوع ... تلاقي نفسها مش طايقة الزوج الجديد فتستمر في مقابلاتها مع جميل بعد الجواز والزوج المخدوع لما يعرف يثور لكرامته اللي اهدرتها الهانم فيضطر جميل إنه يهاجر بيعد عنها عشان يحافظ على سمعتها ويقعد بعيد عنها شوية ويموت حزنا على فراقها .. وهي .. عادي زعلت شوية وكملت حياتها وفيه نوعية ثانية البطلة اتجوزت البطل فعلا أو حبته وبعد شوية .. لما زهقت منه وملت إنها تكون معاه قالت له ببساطة : مش طايقاك ومن أمثلة البشرية دي : الأخ قيس بن ذريح واللي حب الست لبنى هانم بنت الحباب وهام فيها عشقا وبعد قصة حب طويلة وجميلة استطاع الزواج منها لكن أهله كانوا معارضين الجوازة دي وقاطعوه وهو فضل مستحمل بعدهم عنه 10 سنين .. وبعد 10 سنين طلقها ...ليييييه ؟؟ .. عشان هي اللي طلبت منه .. قال إيه بعد 10 سنين اكتشفت إنها مشفقة عليه من معارضة أهله للجواز وطلبت الطلاق .. بعد 10 سنين اكتشفت إنه يا حرام بيعاني من مقاطعة أهله .. طبعا الحقيقة إنها اكتشفت إنها مش طايقاه .. وبرضه عشان ما تبقاش وحشة عطيت لها شكل رقيق .. طلقني عشان مصلحتك برضه شمشون بعد الحب اللي حبه لدليلة وبعد ما اتجوزها .. عملت فيه إيه ؟؟ باعته لليهود وقصت شعره مصدر قوته وقلعت عينيه .. برغم الحب اللي هو حبه ليها وبرغم إنه كان قوي وصاحب نفوذ .. يعني الراجل ما يتعايبش .. لكن الحاجات دي مالهاش وزن إذا وصلت البطلة لمرحلة مش طايقااااك وفيه نوعية كمان الهانم فيها قعدت تلعب بالأفندي شوية تقربه وشويه تبعده .. يعني بتلعب بيه اليويو .. ومن أمثلة البشرية دي .. الأخت الفاضلة الأميرة ولادة بنت المستكفي اللي اشتغلت على الوزير الشاعر ابن زيدون وقعدت تمطوح فيه هو والوزير التاني ابن عبدوس .. وشوية تقرب ده وشوية تقرب ده .. ابن زيدون اللي كتب واحدة من اجمل قصائد الشعر أضحى التنائي بديلاً عن تدانينا ** وناب عن طيب لقيانا تجافينا أن الزمان الذي ما زال يضحكنا ** أنسا بقربهم قد عاد يبكينا خدناها في ثانوي .. شوفوا الراجل يا كبد أمه في القصيدة متبهدل إزاي رايح جاي لكن هي طبعا ولا هي هنا وبرضه الجدع اللي اسمه ابو نواس ده هو كمان وقع في حب جنان .. وكانت اسم على مسمى عشان جننته برغم إنه كان مقضي حياته بالطول وبالعرض لكن هي طلعت على جتته البلا الأزرق وكانت شغالة تريأة عليه حتى لما مولاتها عرضت عليها إنها تهبها ليه ... هي اللي رفضت وقالت مش طايقااااااااه الخلاصة يعني .. اللي ما يتعلمش من اللي سبقوه ويصمم إنه يمشي ورا واحدة يبقى ذنبه على جنبه ليا نصيحة لأي حد حاسس إنه حيقع .. خد بالك هي بطبعها متقلبة ومتغيرة ومزاجها بيتغير في اليوم الواحد كذا مرة وفي الأسبوع وفي الشهر وفي السنة..هي انهاردة مش زي بكرة مش زي كمان سنة .. فما تتوقعش منها إنها تكون زيك .. فكر كويس الخطوة دي ما تخطهاش إلا لو عندك استعداد تسمع منها بعد كل اللي حتعمله علشانها كلمة : مش طايقاااااااااااك