.jpg) صاحبي اللي معرفوش .. الدكتور خوفو .. قاعد في المستشفى فاضي وعامل قاضي .. وعشان بقى اقدم واحد في النيابة ففارد عضلاته على الكل وعامل فيها ريس العمال ومأنتخ على الآخر .. وسايب العيال الغلابة الجداد هما اللي شايلين الشغل كله .. قوم إييييه وهو قاعد لا بيهش ولا بينش كده وبعد أكلة دسمة على حساب العيال الغلابة أكيد .. طقت في دماغه إن يجدد مجد الحضارة الفرعونية .. وعينيه برقت وطقت شرر وهو بيفتكر إنه حفيد بناة الأهرامات .. وقوم يا مصري مصر دايما بتناديلك .. وعشان الهرم ما بقاش من عجايب الدنيا الجديدة .. الدكتور خوفو قرر إنه يبني الهرم الرابع .. اللي حيكون معجزة العالم الجديد وزي ما الهرم القديم اتبنى عشان الجيش المصري كان قاعد فاضي ومكانش لاقي حاجة يعملها فالهرم الجديد برضه اتبنى عشان دكاترة مصر فاضيين ومش لاقيين حاجة يعملوها .. خوفو القديم قرر يشغل الجيش بأي حاجة فاخترع فكرة الهرم .. أي حاجة تشغل العساكر وخلاص والحركة بركة بدل من قعدتهم كده ولا شغلة ولا مشغلة .. ومش كده وبس لا وكمان إيه .. لازمن يجيبوا حجارة الهرم من أسوان .. أصل الحجارة القريبة ما تنفعش .. ما هو شغل فضا بقا .. وبقت دي العادة المصرية الأصيلة لكل واحد فاضي .. يبني هرم بأي حاجة تقع في إيديه المهم الدكتور خوفو قعد يفكر .. ابني الهرم بإيه ؟؟ .. ابني الهرم بإيه ؟؟ وأخيراً تفتقت عبقريته .. وخرج من الحمام وهو بيصرخ وجدتها وجدتها .. وفوراً راح اشترى 3 طماطمييات .. وبدأ مشروعه المعجزة .. وخلى قاعدة الهرم هو إزازة الميا الفاضية حيث سيرقد الجثمان المحنط بعد عمر طويل إن شاء الله .. وراح مصورها عشان الأجيال اللي جاية تعرف إن الإرادة المصرية مش بيقف قصادها حاجة وكانت النتيجة المذهلة اللي شايفينها في الصورة ... وولا سحر ولا شعوذة .. وخسارتك يا دكتور في الطب .. حقيقي الهندسة خسرت واحد ... وافرحي بولادك يا مصر |
Sunday, July 29, 2007
قال عواجيز الفرح قال
Subscribe to:
Post Comments (Atom)
18 comments:
ده رد للمقلب يعني بتشهر بيه
وبعدين مين سرب الصورة دي للصحافة
عمال انفخ من ساعتها عشان تقع الطماكم مش راضية
تعالالي يا حبظلم يا حبيبي تعالالي
أنت وقعت ولا الهوا اللي رماك
تعرف قصة صاحبك دي قطعت قلبي وخاصة أني عرفت أنه زي مبتقول لا بيهش وينش ومورهوش حاجة..رغم أني سمعت والله أعلم أنه طول النهار في الشغل وممكن ميرجعش البيت بالتلات والأربع أيام
وسمعت كمان أنة لية واحد صاحبه مهندس كل شغلة من منازلهم يصحي مع أذان الضهر ويعد يتكتكله شوية علي الكيبورد قدام الكمبيوتر وهو لابس جلبية البيت اللي أنت عارفها
ولما يزهق يدخل يعمل شات..تخيل بياكل تلات وجبات كل يوم في بتهم..ولما يحب يخرج يخرج براحتة ويرجع براحتة..أما الشغل لو راحه يعني وده بيحصل قليل
قاعد باشا علي مكتب مفتخر قدامة أحدث أجهزة الكمبيوتر والنت السريع اللهلوبة والشات علي ودنه يا معلم
وبعدين يقولك والله الواحد تعب النهاردة..الشغلانه ديه أخر أرهاق
أدعيله معايا ربنا يعينه..أما صاحبك الدكتور اللي تقريبا وأنت عارف مبيروحش البيت فاضي ياروحي ولابيهش ولا بينش
وعمال يعملي في أهرامات الطماطم
أضف إلي معلوماتك : تعتبر أهرامات الطماطم المعلقة من عجائب العناية المركزة السبعة..وقد أستغرق بنائها ساعة الأسترحة كاملة..هذا وقد قام ببنائها الدكتور خوفو بمساعدة أحد الزملاء مستخدمين ثلاث ثمار طماطم معطوبة مدودة من وجبات سكن الأطباء كان من المفروض أن يأكلوها في ساعة الإستراحة مما جعلهم غير راغبين في الأكل و أجج لديهم الرغبة في التسلية والترفية بعد ساعات من العمل الشاق
وقد صمدت هذة الأهرامات أمام عوامل التعرية والتغطية لمدة ثلاث دقائق فقط لا غير مما يجعلها أفشل أهرامات مصرية حتي الأن
وهي الحرب أذن يا بن حلزة
سلام
ولو اني مش فاهمة حاجة
بس هرم الطماطم شكله كويس
أهرام مصر والبحث عن الذات المفقودة
ممكن عنوان ظريف
لهذه القصة المؤثرة
:)
حيث تبدأ قصص أهرمات مصر دائماً بالطماطم وتنتهي بصينية الكوسة في الفرن
:):):):)
وكلهات حاجات صغيرة يا ماعلنا وبتعدي
وناس مصر فل الفل مش عيانين ولاحاجة
فخلي الدكاترة مأنتخين
هههههههههههه
عارفين والله اول ما شوفت الصورة افتكرتها شيشة او جوزة ههههههههههههههههههههههههههههههههههه
والله ضحكتنى...
على فكرة ده هيبقى استايل جديد للعصاير فى محلات العصير ,,يعنى ممكن تجيب تلات منجات وترصهم فوق الازازة ويبقى منظر عجب وخد على كده كل الفواكة
لا بجد اختراع جديد..مبروك ههههههههه
اه سلملى على صاحبك الى متعرفوش سكتموفيتش
انت والدكتور خوفوواضح انكم بتحبوا بعض قوووى لدرجه
ومن الحب ما قتل
طب والهرم دة استغرق منه وقت قد ايه
اكيد تعب فيه قوى
بس احيانا القرف يخلى الواحد يعمل اكتر من كدة
وكمان الاحساس بالملل
طريقه وصفك لعمل الهرم جميله قوى وضحكتنى على الصبح
الحمدلله ان الهرم طلع بره عجائب الدنيا السبع علشان نلخص من العقدة اللى ماسكة فينا حضارة سبعة الف سنة
ومش ناويين نفوق ونقول احنا ايه
قول لصاحبك مبروك عليك برج الطماطم مش الاهرامات ههههههههههه
الشكل اقرب الى البرج
اصل ده تخيل بقى اشمعنة يعنى انتو شافينها هرم يبقى احنا لازم نشوفها هرم
انا بقى بأقول برج
بس بجد مجهود جبار وصبر ايوب علشان يفضل على هذا الشكل والوضع
:D
إحم إحم
بلاش انا الطلعة دي
(:
انا راضى زمتك ده هرم ده انا افتكرت عامل بتاعة كدة زى اللى فى الموالد اللى تحطها على جسمها تنور على اى حتة تنور
او فتح عينك تاكل ملبن
طخ طخ
نشنت يا فالح
تحياتى
هممم طب الحل أيه يا ماعلينا
؟؟؟؟
ممكن الواحد بيخطئ في التصرف أحياناً
ربما عندما تزداد غيرته علي ما يمتلكه
:)
مش أقصد المعني ده
بس التبرير اللي انا قلته صح والله أعلم الكلام ماكنش مقصود بيه حد
هو توافق الزمن قدره الله
هههههههههههههههههههههههههههههههههه
هى دى الدكاترة اللى بتعالجنا
عااااااااااااااااااااااااااااا
ههههههههههههههههههههههههههههههههههههه
وسكتم بكتم قام معاك بالواجب وزيادة الصراحه
السلام عليكم
ههههههههههههههه
هو ده كان هرم والله ما اخدت بالى غير لما انت قولت
وبعدين انا اعرف ان فيفى عبده اخدت اللقب خلاص
انا عايزه اعرف همم فى المستشفيات بيوزعوا الطماطم كده من غير حتى سكينه عشان تتقطع
على فكره انا عندى حاجه شبها كده بس انا بوقف القلام الجاف اجيب مجموعه كبيره كده واقعد اوقفها مشغوليات بقى
وبعدين كده تجرس الراجل
الاسلوب جميل اوى ماشاء الله
:)
بس للاسف مش شايفة الصورة عندي ف فيه حتة واقعة من الموضوع بالنسبة لي
بس اعتقد انى فهمت شوية مقصد حضرتك
ربنا يبارك فيك و في كتاباتك :)
واضح ان الدكتور خوفو
عزيز عليك قوي :)
انا لو منه ما اسكتش ابدا
انا جايه اهدي النفوس بس :)
هيا دى مصر و هيا دى دكاترة مصر
و مصر اليوم فى عيد
انا من موقعى هذا و بالرغم من مشاغباتى مع الدكتور الغبر معروف الى انى احييه على اختراعه العظيم و اللى هيدخل بيه التاريخ ان شاء
و على فكرة الدكاتر بجد اكتر ناس بيتعبوا مش زى المهندسين اللى قاعدين و شهم فى الكمبيوتر ليل نهار
فين السرداب اللي بيودي على الكنز
أكيد في الطماطمة التانية
و لو أني مش فاهمة حاجة
و لا فاهمة إيه علاقة العنوان بالبوست
بس فعلاً الفاضي يعمل قاضي
Post a Comment