Monday, April 09, 2007

كافحوا مخترعي التاجات

التاج دا من تأليف وسيناريو وحوار المبرمج الحر اللي يظهر إنه بطل برمجة وتفرغ لإمداد البلوجرية بالتاجات .. يعني خلي بالكم التاج دا not recognized لأنه من اختراعه
وقد قام المبرمج كريم بتدشين حملة مكافحة مروجي التاجات على الأنترنت وسأشارك بكل جهدي في هذوها الحملة .. ياسلااام يا أحمد صحيح عدوك ابن كارك ...
كل من يريد الانتقام من مبرمج حر عليه إنه يحضر سؤال وسيتم تجميع كافة الأسئلة وتوجيهها إليه وعليه الالتزام بالإجابة وإلا سيقوم الفدائيون البلوجارية بمهمتهم الخاصة جدا.

لكن لأني بحب التاجات فحجاوب طبعا ع التاج وهو عبارة عن سؤال واحد بيقول :

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها

هي مش هواية وبس دي احتراف كمان .. يعني باختصار بقت حياة بما تمثله الحياة من فرح وحزن ونجاح وفشل .. هي هوايتي ومهنتي ولعبتي وتسليتي البرمجيشن يا واد عمي
البرمجة لمن لا يعرفها .. هي مجموعة أكواد بتترص جنب بعضها عشان في الآخر تنفذ مهمة محددة أو مجموعة مهام .. أكواد بتترص .. زي بالضبط مجموعة من الألوان بتترص جنب بعضها عشان تعمل لوحة أو مجموعة من الكلمات تترص جنب بعضها عشان تعمل قصيدة

عندك هدف عايز تعمله .. تبدأ تحط مجموعة من الخطوات .. خطوة ورا التانية لغاية ما توصل لهدفك في النهاية .. وفي كل خطوة لازم تراعي كل الاحتمالات .. هي دي البرمجة .. هي دي الحياة

عايز تعمل برنامج .. يبقى لازم تتعرف على عقلك بيفكر إزاي .. لو عرفت عقلك بيفكر إزاي فأنت مبرمج .. تعال نعمل برنامج بيجمع رقمين .. عقلك بيفكر إزاي ؟؟!! ها .. فكر كده
أول حاجة عقلك بيسأل فين الرقم الأول
تاني حاجة عقلك بيسأل فين الرقم التاني
تالت حاجة عقلك بيحط الاتنين على بعض جوا حاجة افتراضية اسمها الناتج
أخيرا عقلك بيطلع لك الناتج دا
هي دي البرمجة

بيقولوا الموسيقى لغة عالمية لأن كل الناس في كل مكان مهما كانت لغتهم بتفهمها .. طبعا الكلام دا غير صحيح من وجهة نظري .. اللغة مش بس رموز يتعرف معناها .. لأ اللغة عبارة لازم تفهمها وتحس بيها
والموسيقى عند القبائل الأفريقية مثلاً إحنا بنعتبرها نوع من الخبط والرزع .. مش بنفهمها على الإطلاق .. والموسيقى الآسيوية غير الآسيويين مش بيفهمومها .. والموسيقى الشرقية غير الشرقيين لا يفهموها غالبا .. وهكذا كل أهل بلد هما بس اللي بيفهموا موسيقاهم بالرغم من إن الرموز واضحة للكل ..
برضه الموسيقى اللي بيسمعها الناس الكبار غير اللي بيسمعها الشباب غير المراهقين .. إزاي بقى تبقى الموسيقى لغة عالمية ؟؟!!

اللغة العالمية الحقيقية هي البرمجة .. كل الناس مهما كانت لغاتهم ممكن يتكلموا بيها .. أنت ممكن تقرا كود عمله واحد ياباني وأنت مش بتعرف ياباني وممكن تصلح له الكود وتعدل له فيه لو كان فيه غلطة وأنتوا الاتنين مش بتعرفوا لغة بعض ..

وأنا شغال في أي أكواد .. بغوص جواها .. ورغم إن ناس كتيرة عارفة عني الهدوء وطولة البال .. إلا إن في الشغل الناس كلها عارفة عصبيتي أثناء السباحة في عالم الأكواد .. لأني لا اتحمل حد يكلمني وأنا غطسان جوا الأكواد .. فأيا كان الحد دا لو قطع افكاري بيبقى هوا اللي جابه لنفسه ولا بيهمني مدير ولا غفير .. وعشان كده بقول إني حترفد قريب لأنهم أكيد زمانهم زهقوا مني

وانا شغال بشعر إني عازف على البيانو .. زي الصورة دي بالضبط ..




ولو سبق إنك اشتغلت برمجة قبل كده فأكيد عارف وظيفة الزر الجميل F5 واللي معناه إنك أنهيت مهمتك تقريباً ووصلت لهدفك .. فعلاً لو حد شافني وأنا بضغط عليه زي عازف البيانو كده وأنا بعد ما انتهي من الكتابة ارفع إيدي لفوق واروح نازل بشكل مسرحي دا دا على زرار F5 إيذانا بتنفيذ البرنامج .. صورة كوميدية جدا ..

المتعة اللي بشعر بيها لما اعمل حاجة مميزة لا توصف .. والحسرة والضيق اللي بشعر بيه لما حاجة تقعد محيراني فترة طويلة برضه لا توصف .. عشان كده بيقولوا إن دايماً المبرمج تلاقي عنده وهو في سن صغير كام شعرة بيضا كده .. أو شعره يقع بدري بدري ويبقى أصلع ..

بالمناسبة كريم قال لي اكتب موضوع تقني كل شهر في مجال البرمجة وإن شاء الله يوم 15 اكتب أول موضوع لما نشوف حينفع اكتب ولا لأ ؟؟!!

نمرره لمين .. نمرره لمين .. طبعاً لبينو اللي شكله أخد الجنسية الكورية فنحاول نفكره بالبلد والعائشة في الأحلام لما ترجع من السفر بإذن الله والبنت الشلبية عشان تبطل سياسة شوية ومهند الباحث عن الحقيقة وكفاية كده المرة دي عشان ما حدش يدعي عليا .. اللي عايز يدعي على حد اتفضلو مبرمج حر ادعوا عليه زي ما انتوا عايزين وربنا يتقبل .

13 comments:

BinO said...

no ma3lina
noooooooooooooooo
another crown
my mind is freezing for about 10 days
cant get out this deeeeeeeeeeeep frozen hole
any way
time is coming
and running
thank u brother
gazakom Allah khyran
by the way i wanna learn programming ;)

bastokka طهقانة said...

مفروض يغيروا اسم التاج من تاج الى مغرز


كل مغرز و انت طيب

Karim Ali said...

المشكلة يا ما علينا .. إن الأسئلة لازم اللى بيسألها يجاوب عليها الأول!!! :(
عايزين نجمع الأحزاب التدوينية ونعمل إستفتاء عام .. ونشوف الناس موافقة على النقطة ولا لأ...
عندى إعتراض بسيط بس على نقطة إنت قولتها ..ده لو سميناه إعتراض يعنى !!.. البرمجة مش مجرد أكواد جنب بعض.. البرمجة دى إحساس وعقل ,, لإن الكمبيوتر اللى بنبرمجه ده مش مجرد ألة!! ده كائن جميل جدا .. حاجة كدة غير الناس العاديين.. كمبيوتر يا ناس .. حاسب.. حاسوب .. زى ما تسموه .. إختلفت الأسماء والحب واحد
:)

khaled said...

F5
يبقى انت اكيد من بتوع مايكروسوفت ستوديو
VB
C##
اطلع من دول يا ما علينا افندى
:)

Ma 3lina said...

ايه دا انت منهم برده المبرمجين

طيب ورينا اى برنامج عملته كدا و لا اى حاجة

و ميمو كمان مبرمجة طيب انا عاوزة انا كمان هههه

بس حاجو حلوة انك تحب شغلك اوى كدا
و مقالات كمان فى مجالات ربنا فتحها عليك

eldoctor said...

الحل بسيط .. كل واحد يبعت تاج يكون ملزم بالاجابة على خمس اسئلة من كل واحد اتسبب فى تدبيسه ... و لا شروط للاسئلة ... وخليه يجاوب

Unknown said...

حسب معلوماتى الضحلة إن
F5 بيعمل ريفرش

بس بما إنك حضرتك مبرمج قد الدنيا وبتعزف على أوتار الأكواد كمان فشد حيلك كدة وعايزين نسبق الغرب فى مثل هذا المجال الكاميكازى

صحيح ما تعمل برنامج صغنن كدة لكاميكاز يلعب بيه شوية

-------------
ايه ده؟
برنامج ليا انا؟؟
بتتكلمى جد؟؟؟

طيب حاسبى انا هاشكره بنفسى اهوه

متشكر اوى يا أونكل ما علينا
يقعدلك فى صحتك وأكوادك
ويجعله عامر

المخلص/كامكوز

سكتم بكتم said...

جميل أن الواحد يحب شغلة أنا متهيئلي لو واحد في كل ميت واحد في مصر حبوا شغلهم وأتكلموا عنة زي ما أنت بتتكلم عن البرمجة مصر كانت حتبقي أحلي كتير.
كنت تلاقي العمارة المبنيه بفن .
والطبخة المعمولة بفن .
والمكنة المظبوطة بفن وكنت تلاقي حياتنا كلها فن في فن.
مع الأعتذار لفن الأنسة هيفاءوأخواتها

أمــانــى said...

بسم الله مشاء الله الناس كلهم بقوا مبرمجين
طيب شوفوا حاجة صغيرة للغلابة اللى زينا نتعلمها
:D

mohand said...

السلام عليكم
ازيك يا باشمهندس
اشكرك انك تذكرتني
وفي ايه حاجه صعبه قوي
تصدق انا شوفت التاجات دي بتمرروها
طبعا انا جديد موصليش ولا تاج قبل كده
بس انا كنت بجاوب علي التاجات دي مع نفسي
وسبحان الله التاج اللي يوصلني يبقي صعب قوي كده
عموما انا هرد عليه بس في بوست مهم لازم اعمله الاول
تحياتي
وحمدلله علي السلامة تاني

خمسة فضفضة said...

السلام عليكم ورحمة الله وبركاته

سؤال محيرني اوي من زمان نفسي اعرف هما ليه سموه تاج ...وهل له علاقه بتاج الجزيره ...السلطاااااااااانيه

Maha said...

بسم الله

السلام عليكم ورحمة الله

ضحكت كثيرا .. وأؤيدك تماما .. البرمجة عالم رائع وهواية ممتازة

ما لغتك المفضلة للبرمجة ؟

ma 3lina said...

إلى بينو : ههههههه .. الدنيا عندنا ربيييع والجو بدييييييع .. . ربنا يرجعك بالسلامة .. جزانا الله وإياكم ولو عايز تتعلم برمجة لما ترجع بإذن الله نشوف لنا أنا وأنت أي حد يعلمنا
-------- 10/04/2007 04:59 am ------

إلى طهقانة : وحضرتك طيبة .. والله فكرة .. حتى يبقى الاسم ماشي مع المضمون بدل تاج دي !! .. شرفتيني بالزيارة وسلامي لسي طهقان افندي
-------- 10/04/2007 05:02 am ------

إلى كريم : صحيح أنا نسيت خالص اتكلم عن موضوع الإحساس .. عارف فيه ساعات واحد يسألني ينفع نعمل كده أقول له لأ .. يسألني ليه ؟؟ أقول له مش عارف بس إحساسي كده .. فيضحك عليا وبعد كده يطلع كلامي صح .. تصدق حاجة زي كده ؟؟!!
-------- 10/04/2007 05:05 am ------


إلى خالد : إيوا أنا من بتوع المايكروزفت .. إهيء إهيء .. المفروض عمو بيل يوزع علينا إعانات بدل تهنيج وبدل Bugs وبدل حرقة دم
-------- 10/04/2007 05:07 am ------

إلى الدكتورة ما علينا : أهلا بالطيبة الأميرة .. لنا حساب جامد بس حالياً ما اقدرش أقول غير ما علينا .. لو عايزة تتفرجي ابعت لك كام موأع على كام ديمو برامج ويب .. وبعدين لو عايزة تتعلمي تحت أمرك .. خيرك سابق
-------- 10/04/2007 05:11 am ------


إلى الدكتور المحارب : معلش يا دكتور مش حقدر أوافق على اقتراح حضرتك .. لغاية بوست انهاردة ما يعدي على خير
-------- 10/04/2007 05:13 am ------


إلى إنسانة : أيوا يا إنسانة صح .. ما هو F5 دا متعدد المواهب .. سلامي لكاميكاز باشا .. وقولي له هو يأمر ولو اللعب الكاميكازية مالية الدنيا
-------- 10/04/2007 05:16 am ------


إلى سكتم بكتم : معاك حق .. لو كل واحد خلى شغله هوايته أو اشتغل في هوايته الدنيا أكيد حتبقى أجمل .. قول لي بقى سيادتك شغال إيه ؟؟
-------- 10/04/2007 05:18 am ------


إلى دكتورة فضفضة : الله يسلمك يا دكتورة .. نورتي المدونة .. وأشكرك على تعليقك على موضوع الحاج صويان ويارب تدعي له كتير ..
-------- 10/04/2007 06:14 am ------