Thursday, April 26, 2007

من حفر حفرة لسكتم بكتم

وبما إننا جبنا سيرة الناس اللي بتنرفزني وتحرق دمي زي أخوكم محمد بتاع الـ 3 بوستات اللي فاتت
فأحب أحكيلكم قصة واحد برضه من الناس اللي بتنرفزني وتحرق دمي على طول ..

على فكرة البوست دا رقم 100 .. يعني بوست المئوية وكان نفسي احتفل بيه بطريقة خاصة .. لكن بعد احتفال الأهلي بالمئوية .. الواحد نفسه اتسدت عشان كده ححكي لكم حكايتي مع سكتم بكتم

والحكاية تبتدي من أولى اعدادي .. لما تركت مدرستي الابتدائية وانتقلت للمدرسة الإعدادية ودخلت فصلي 1/6 واستقريت في الفصل يومين كده ولا حاجة .. لغاية ما حصل اللي حصل ودخلوا المدرسين عشان ينظموا الفصول من تاني وقرروا إني ما ينفعش استمر في فصلي 1/6 ولازم انتقل لفصل المتفوقين المجاور 1/5 .. طيب يا جماعة ما هو أي فصل وخلاص والمدرسة كلها مدرسة متفوقين .. يعني العملية شغالة برضه وأنا خلاص حطيت حالي وترحالي .. إلا أبداً لازمن ولامد تروح الفصل دوكها .. رحت لافع العدة فوق ظهري واتنقلت للفصل المذكور لأبحث عن مكان لي فيه ..

ولأن العدد كان في الليمون وكأن البلد كلها متفوقين وخلاص ما عدش فيه لا نص نص ولا خايبين .. فيادوب لقيت مكان بالعافية جنب الثنائي الباشمهندس (وس) والدكتور (اس) واللي سبحان الله .. أصبحوا إلى الآن أصدكائي المكهربين .. آآقصدي المقربين .. وأصبحنا ثلاثي أضواء المسرح

الناس اللي لسه مستغربة إني بكتب كل يوم بوست .. أحب أقولهم إني أتشارك مع الباشمهندس (وس) والدكتور (اس) في آلاف الذكريات .. يعني لو خصصت مدونة ليهم لوحدهم .. فحكتب فيها برضه بوست كل يوم مرتاح .. فمحدش يستغرب من الرغي الكتير لأني ببساطة عضو في فريق أضواء المسرح ..

لما عملت المدونة طبعاً كان لازم أقول لهم هما بالذات إني عملت مدونة .. ومش كده وبس دا قعدت أزن عليهم عشان كل واحد يعمل مدونة خاصة بيه .. بس اعتذرت لهم إني مش حديهم عنوان مدونتي لأني أحتاج مساحة من الحرية اكتب فيها براحتي عن كل شيء من وجهة نظري دون الاستماع إلى رخامتهم ... آآآ قصدي نصايحهم ..
وفعلاً ما عطيتش حد العنوان برغم توسلات الدكتور (اس) اللي أخيرا استجاب وعمل مدونته فضفضة .. بس للأسف سابها فاضية وما أضافش فيها مواضيع .. وكل ما اسأله يقول لي : والله أنا مش فاضي للكلام ده أنا مشغول والمستشفى والنيابة والماجستير إلخ إلخ .

لغاية ما توقفت فترة كده عن التدوين وحولت المدونة لموقع مفكرة الإسلام .. وسألني الدكتور (اس) عن أخبار المدونة فزلة لسان مني قلت له : حولتها على موقع مفكرة الإسلام .. على اعتبار إني خلاص مش حفتحها تاني فميش مشكلة .. راح الواد الدكتور ما كدبش خبر وأخد المدونات كعب داير لغاية ما وصل لمدونة الغائبة الحاضرة رفقة عمر ولاقى آخر التاجات اللي جاوبت عليه وشرفتني بإنها ذكرت اسم مدونتي عندها وعتبت عليا إني حولت المدونة فعرف عم الناصح اسم المدونة ..

وتدور أيام وسنين .. وكل ما اسأله : نزلت بوست ؟؟ يقول لي : مش فاضي .. لغاية ما في يوم لقيت واحد باسم سكتم بكتم بيعلق عندي .. وكالعادة لما حد يدخل يشرفني بالتعليق لازم اروح اشوف مدونته واطلع على مواضيعه قبل ما ارد عليه .. وأول ما دخلت مدونته وكان فيها موضوعين فقط .. أول ما دخلت شميت ريحة الفورمالين في كل أنحاء المدونة .. النغمة بتاعة الكلام دي مش غريبة على ودني .. رحت كلمته ع الماسنجر : يابني المدونة دي بتاعتك .. قال لي : مدونة إيه وكلام فارغ إيه أنا مش فاضي أنا ورايا ... وأنا مش عارف إيه ..

طيب ماشي ..

بس إن جيتوا للحق كل ما عم سكتم ده يعلق عندي ريحة الفورمالين مش راضية تفارقني .. لدرجة إني كنت بكلمه على إنه الواد الدكتور صاحبي وكنت بقول له يا دكترة .. على الرغم إني مش عارف هو بيشتغل إيه .. وكل ما اشوف خلقة الدكتور (اس) اقعد اقول له : يا بني هو أنت ولا مش أنت وهو يقعد يلف ويدور ويلاعبني ويقول افرض إنه أنا .. وكلام خيبون كده

عم سكتم لما حط بوستات بعد كده وبطريقة رده على الناس وبالضحكة اللي تفرس اللي مفيش غير اتنين بيضحكوها في القطر المصري : هو والواد الدكتور التاني المكلبظ (صاحبي برضه بس نسيت شكله) الضحكة اللي تغيظ : نياه نياه نياه نياه .. قلت بس هو بعينه برخامته بوشه العكر .. وبعت له SMS الساعة 6 صباحا .. قلت له فيها :


رد عليا وقال :

بااااااايخ
وأخيرا في يوم عزمني عنده وكانت حالتي متأندلة خالص وأعصابي مش مستحملة فلم لاقاني كده قال يريحني من واحدة من الاسئلة اللي في دماغي وصرح لي أخيراً إنه هو سكتم بكتم وكان بينتقم مني عشان مش كنت راضي أقول له على المدونة بتاعتي ..

طبعاً لكم أن تتخيلوا عملت فيه إيه ..

عشان كده في آخر تاج كان سؤال مين اللي منرفزك دلوقتي قلت سكتم بكتم .. ولغاية دلوقتي هو أكتر واحد لأنه بيغظني بحاجة كده حبقى أقول لكم عليها بعدين

وبمناسبة الحاجات اللي حقولها لكم بعدين .. عم سكتم عامل كل حاجة في الـ Profile بتاعه سر سر .. فمعنديش مشاكل خالص اللي عايز يعرف حاجة عنه أنا في الخدمة

ومبدئياً كده وعربون محبة حقول لكم إنه دكتور عناية مركزة يعني حانوتي بدرجة بكالوريوس الطب .. طبعاً مش كل دكاترة العناية كده ,, دول ناس محترمة جداً ربنا يبارك فيهم كلهم وعلى رأسهم دكتورنا المحارب .. أنا اقصد سكتم بكتم تحديداً لما يكون دكتور عناية يبقى حانوتي على طول .. وامتحانات الماجستير بتاعته على فكرة على الأبواب .. ابقوا ادعوا له .. أو ما تدعوا له .. يعني براحتكم .. والملاك البريئة الرقيقة (اللي هي خطيبته) مطلعة عينه .. وإيه كمان يا واد يا ماعلينا .. إيه كمان .. مش عارف بقى .. اللي عايز يعرف حاجة عنه يسأل وأنا حقول

طبعاً حيهددني ويقول لي أنه هو كمان حيقول كل حاجة عني .. حقول له ما تقدرش .. الـ DVD بتاعتك اللي أخدتها منك آخر مرة لقيت عليها الكليبات اللي أنت وزمايلك بتاكلوا العيانين فيها .. لو فكرت تعمل حركة كده ولا كده .. حتلاقيها بكرة على جوجل وقد اعذر من انذر

سلاااااااام يا صاحبي

11 comments:

Ma-3lina said...

ههه انا اول واحدة كالعادة يعنى

المهم ايه التحف دى مش كفاية واحد جالنا سكتم كمان

بس ايه التشريد دا حرام عليك براحة عليه شوية يعنى كل يوم اعمل بوست على مواقفكم مع بعض

البوست دا كان مكثف اوى

و صور الموبايل مسخرة

على فكرة كل الدكاترة كدا دمهم خفيف ههههههههههههه

على فكرة انا مش فاهمة انا كاتبة ايه و مفيش ترابط بين كلامى و الحالة صعبة اوى بس ماا علينا مش قرينى استحمل باه

Mohamed A. Ghaffar said...

صحابك ايه بقى ، ده انتم ماسكين على بعض صور

فرحتوا قلبى وضحكتنى من اعماقى ربنا يديم عليكم المحبه ولا يقطع اللى بنكم ابدأ وربنا يوفقه ويوفقك ويهدليه خطيبته ويهديك للى بتدور عليها

تحياتى

أمــانــى said...

السلام عليكم
كــل مئوية وانتم طيبين وربنا ما يحرمكم من الهزائم ههههه يعنى على كده البطولات بتاعكم مزيفة وفعلا مصريين احنا اصحاب حضارة سبعة الالف سنة هههههههه
ده كلامنا دائما
:D
نفتكر الكويس بس الاخطاء لالالالا ههههههههه

ربنــا يخــليكوا لبعض ويجمعكم فى الخير دائمآ ياااااارب امـــين

سكتم بكتم said...

هي الحرب إذا يابن حلزة

زمان أيام الحرب العالمية التانية لما اليابنين فقعوا الأمريكان الزمبة المتينة في ميناء بيريل هاربر واحد ياباني أبن حلال قالهم"لقد أيقظنا أسدا نائما" فاهم ياهندسة

الأسد صحي...وأذا كان أنت عندك صور وفيديوهات فأنا أعرف عنك اللي أنت نفسك متعرفوش عن نفسك

وأنا بحذرك ملكش دعوة بالرقيقة البريئة الملاك وإلا أنت عارف..دة حتي ياعيني البنت عيانة وبردانة وحالتها كرب من يوم معينك المدورة جت في الموضوع

وبالمناسبة السعيدة دي يا جماعة أنتم وصحابكم وصحاب صحابكم معزومين عندي علي ما ئدة أسرار ماعلينا..اللي نفسة في حاجة يسأل وميتكسفش...ترسل الأسئلة علي العنوان سكتم بكتم.بلوج سبوت.كوم

والعاقبة عندكم في المسرات

مبرمج حر said...

ههههههههههههه

بوست لذيذ أوى يا صديقى

ربنا يديم حبكم لبعض يارب

:)

Ma-3lina said...

سكتم:

هههه ايوا عاوزين دم باه

الاسد ايه صحى ماشى لما نشوف
ههههه

شوف ما علينا عمل الموضوع بالادلة و القرائن يعنى مثبوتة عليك لما نشوف انت هتعمل ايه باه

عصفور المدينة said...

أخي ما علينا استاذنك هنا أن أعلن عن عودة موقع مفكرة الإسلام
http://www.islammemo.cc
وبعدين حد ياراجل يناوش واحد سكتم بكتم
يعني واحد ماعلينا ضد واحد سكتم بكتم والحرب عاملة كدة أمال لو كان رغاي ضد غلباوي
عايزين دم أقصد فراولة

khaled said...

يا سولام
ادى اديله عايز دم سبعة كيلو
هههههههههههههه
انا بس جاى اهدى النفوس
:)

رينـــــــــــا said...

ربنا يخليكوا لبــــــــــــعـض
قول امين
:D
وكل مئويه وانت طيب
بس احتفالك تفضح صاحبك بالصور ههههههههه
شكلهم من اكلين اللحوم البشريه
اللهم احفظنا

انا بهزر
:D

خمسة فضفضة said...

السلام عليكم ورحمة الله وبركاته

مبروك علي المئوية

وعقبال الالفية


و معلش بقي العبوا سوا دا انتوااصحاب وعشرة عمر وزمايل زنــ.....احممم اقصد فصل واحد


ربنا يخليكوا لبعض


تحياتي

ronel_elswda said...

هههههههههههههههههه
ربنا يخليكوا لبعض ..
والله الواحد حس انه قاعد معاكوا:)
وياسيدى ما انا عرفت مدونتك عن طريق سكتم بكتم ..

الصحوبية ديه نعمة غالية ..

بتفكرونى بأنا وجيجى صاحبتى :)

طبعا ...مدونتك جميلة ..وعقل جديد
مصرى واعى محترم..بيُضاف للعقول اللى عندى :)


كل سنة وانته طيب ..بمناسبة رمضان
ربنا يعودوه عليك وعلينا وعالامة الاسلامية كلها بخير وسلام يارب :)