نظرية المدرسة السرية

وبعدين في الجو الملبد بالغيوم ده ??!! .. يا جماعة انا مش مستلم الستات ولا حاجة ولا مضطهدهم .. بس هو الكلام بيجيب بعضه .. الدنيا حر فقلت كلمتين من نفسي .. قلت الله يكون في عون المنتقبات ... قوم إخواتنا المحجبات جندوا الأخ سكتم بكتم - رده الله إلى بيته سالما غانما - عشان يتحدث باسمهن ويدافع عن ثباتهن هن كمان .. قوووم إيييييه .. قعد الأخ سكتم يتكلم معايا عن النقاب والحجاب قوووم إيييييييه .. افتكرت آآني بجى موضوع التكلف الزيادة عند الستات في موضوع اللبس والشياكة يعني المواضيع هيا اللي بتجيب بعضها مش أكتر .. لا انا مستلم الستات ولا انا ليا أغراض خفية ولا حاجة والله انا خايف واحدة تطلع زي الناشط المسيحي عدلي أبادير كده لما قال إن النظام المصري الكافر بيخطط بالتعاون مع الإخوان المسلمين لإخلاء منطقة الشرق الأوسط من المسيحيين بتمويل وهابي سعودي .. - أي والله قال كده - .. خايف واحدة تطلع برده وتقولي لي إني بتمول من بلاد الواق الواق لإخلاء المنطقة من الستات .. ساعتها اروح ورا الشمس وللعلم حبب إلي النساء .. لكن الكلام هو اللي بيجيب بعضه مش أكتر .. وبعدين في البوست الأخير لم أذكر رأي في المشاهدة وإنما سجلتها بس دون ذكر أي رأي شخصي فيها .. العجيب إن كتير من المدونات هما اللي حللوا المشاهدة .. الدكتورة ما علينا افتكرت إني اقصد السبب إن المراة فاضية وما وراهاش غير الموضة .. باشمهندس حسن محمود والأفوكاتو أماني بنت الجنوب شايفين السوق هي السبب في كده .. أختي رفقة شايفة إنها فطرة داخل كل ست .. الأخت أمولا بتقول الرجالة هما السبب .. الآنسة إنسانة شايفة إنة سنة الاختلاف هي السبب .. شلبية هانم شايفة غموض المرأة وحبها للتغيير هو السبب .. باشمهندس عصفور المدينة شايف إن طبيعة الإنسان هي اللي بتحدد مش النوع الجميع حلل المشاهدة إلا العبد لله .. ذكرتها واكتفيت بذكرها مع رأي لدكتور سلوك تنظيمي دون إبداء أي وجهة نظر شخصية .. وصدقوني الموضوع ما فيهوش هجوم .. لكن الكلام هو اللي بيجيب بعضه .. يعني مثلا .. في تعليقات حضراتكم الطيبة كان فيه تعليق لشلبية هانم .. قالت فيه إن كل الستات ملتزمات أو غير ملتزمات كلهن ليهم نفس الطبع ... لما قريت التعليق دا افتكرت نظرية افتراضية كنت حطيتها من زماااان .. ما احنا اتفقنا إن ليا نظريات .. يعني التعليق هو اللي فكرني .. والمواضيع بيجيب موضوع .. وتعليق شلبية هانم هو اللي فكرني بنظرية اسمها نظرية المدرسة السرية اللي مش حقدر احكي لكم عليه طبعا أحسن تقولوا عليا مستلم المرأة ولا حقدر أقول لكم إني كنت بتندر بالنظرية دي على تشابه كتير من طباع الستات - إلا ما رحم ربي - على اختلاف ثقافتهم ومستواهم المادي والتعليمي .. وكنت مش بصدق هذه النظرية طبعاً .. هي مجرد تخيل افتراضي لتمثيل الواقع ... لكن برضه في وقت كان بيني وبين إني أصدقها شعرة صغيرة .. فمعلش بعد الاتهامات دي الموجهة لشخصي مش حقدر احكي النظرية ولا اقول خلاصتها ولا اقول إنها بتفترض إن كل النساء في كل انحاء العالم بيدخلوا المدرسة السرية دي بمجرد بلوغهم سن معينة ومفيش حد يعرف عن المدرسة حاجة خالص غير النساء فقط وهو السر الوحيد اللي استطاعت المراة حمله .. وجوا المدرسة بيتعلموا فيها كل حاجة ابتداء من امتى وإزاي تعيط وانتهاء بالطريقة المثلى لتعبئة الزوج في أكياس بلاستيك .. وأهم أهداف المدرسة استمرار سيطرة المرأة على كوكب الأرض بالتحكم في الكائنات الأخرى وعلى رأسهم بالرجل .. وكل الستات على اختلاف مشاربهم وتوجهاتهم أعضاء في هذه المدرسة وبيقوموا بدورهم فيها بشكل تكاملي .. يعني الست المطالبة بحقوق المرأة بتكمل دور زوجة وأخت كل واحد فينا .. رغم إنهم ما قبلوش بعض ولا يعرفوا بعض .. ويمكن بيظهروا البعض العداوة كمان ولأن المدرسة واحدة والمدرسين نفس المدرسين .. فعشان كده طباع الستات كلها واحدة .. طبعا الفانتزيا دي مش حقيقية ومش حقدر أقول إن برتوكولات حكماء بنات حواء اتسربت ليا وانا اعرفها ... برغم إن عندي أمثلة كتيرة لتشابه طباع الستات رغم اختلاف الزمان والمكان .. لكن أصلا مش حقدر افتح بقى ولا اقول النظرية ولا اعرفكم بيها خاااااالص عشان ما حدش يزعل مني والحمد لله الدكتور سكتم غايب اسبوعين فمش حيعرف يشعلل المواضيع .. أصله رايح شرم الشيخ .. طبعاً لو موجود حيقول شغل يا جماعة وحقعد في المستشفى مش حخرج منها إلخ إلخ .. قال يعني حد بيروح شرم عشان شغل .. وقال إيه مفيش نت هناك ومش حيعرف يدخل يرد على الناس في مدونته .. لما نشوف .. يالا ربنا يرجعه لبيته بالسلامة .. ومن هنا من إمبراطورية أرض الرغي .. حنبعت له رسالة نقول له فيها : خلي بالك من بنات شرم يا رأفت .. ابعد عنهم .. مصر عايزاك يا رأفت .. ابعد عن أي واحدة اسمها استر بولونسكي يا رأفت .. أو جوجو يا جمعة .. وبالنسبة ليا فخلاص حعمل بنصيحة الاستاذ محمد عبد الغفار واتكلم في أي حاجة تانية .. دا الواحد لما جاب في سيرة الإخوان والحزب الوطني وكفاية وحسني مبارك .. كان الموضوع أهدى من كده بكتير .. أمري لله نحول المحطة .. وسلموا لي كتير .. على حرية التعبير .. بس ياريت برضه تقنعوا الأخت طعمة إنها تحول المحطة

فلسفة الملابس

طيب .. ومادام الموضوع جاب بعضه .. ودا بالمناسبة مش كان قصدي خالص من البداية .. لأن كان كل قصدي هو تسجيل إعجابي بالأخت المنتقبة .. لكن يبدو إن الكلام اتخذ اتجاه آخر بعدما تدخلت المحجبات دفاعا عن ثباتهن أيضا أمام هجمات المعارضين لحجاب المرأة بكافة أشكاله .. والكلام وصل بينا للحديث عن الزي المشروع وما يصح للمرأة أن ترتديه وما لا يصح .. ولأني أحاول الحفاظ على طابع المدونة الشخصي الذي يعبر عن آرائي الشخصية فحتكلم في نقطة بتلفت نظري كتير في فلسفة الملابس عند كل من الرجل والمرأة وأحب أقول إني لا أهاجم أي من الأطراف لكن بسجل في المدونة مشاهدتي لما حولي وقد تكون مشاهدتي صحيحة أو خاطئة .. ولا تعبر عن توجه معين أو معاداة لأي من الرجل أو المرأة .. الحقيقة كل ما اشوف حوليا الرجال على اختلاف مهنهم أو مستوياتهم الاجتماعية والثقافية .. أجدهم جميعاً قد توحد عندهم شكل الملابس إلى حد ما بحيث أصبح معتاد أن تجد في المكان الواحد أكثر من رجل لهم نفس الهيئة مع اختلاف الألوان فتجد دائما الرجل العادي في غالب الأحوال تتلخص فلسفة ملبسه في كلمتين بنطلون وقميص .. وأحيان قد يزيد عليهم التي شيرت .. فدا كل ما يتعلق بملابس الرجل العادي مهما كان الوسط الذي ينتمي إليه الرجل أو الشاب فهو دائما يرتدي بنطلون وقميص .. أو بنطلون وتي شيرت بطبيعة الحال تختلف الخامة من مستوى مادي لآخر وكذلك الألوان وطريقة الارتداء فمن الرجال من يفضل إخراج القميص خارج البنطلون ومنهم من يفضله إلى الداخل لكن في النهاية فإن هذا كل ما يرتديه الرجل في الغالب ... وأحيانا يزيد الرجل الجاكيت على ما سبق ليكون البدلة ... لكن في النهاية فلسفة ملابس غالب الرجل هي فعلا البنطلون والقميص .. وآدي صورة فيها أغنى رجل في العالم .. وشوفوا اللي لبسه هو والطقم اللي معاه فلسفة الملابس عند الست مختلفة تماما .. ليس فقط في تعدد المسميات ولكن في إخراج هذه المسميات في صورة تجعل من الصعب .. بل من المستحيل أن تجد في نفس المكان سيدتين يتشابهان في ملابسهن .. فملابس المرأة تعدت الفستان والتيير والبلوزة والجيب لتشمل البنطلون والبانتكور والبرمودا والتونيك والسلوبت والمينى سكيرت والدريل .. والباديهات بأنواعها (الكارينا مثلا ) وغيرها أسماء كتير .. (احب اشكر المصدر اللي ساعدني في التعرف على هذه المسميات) حتى المتأمل في أشكال النقاب والحجاب ..فهناك أشكال للنقاب يسمح للمرأة ان تنتقي الشكل الذي يعجبها من بين أشكال مختلفة .. أما عن أشكال الحجاب فحدث ولا حرج عن أنواع الحجاب المختلفة .. وآخره الموضة اللي مش عاجباني خالص اللي اسمها سبانيش شاهد أيضا الشكل التالي للحجاب واضغط ع الصورة لترى الشكل الكامل لطريقة لف الطرحة بهذا الشكل العجيب .. يعني الموضوع طرق ونظريات كم كبير جدا من المسميات والتعاريف اتعجب من استيعاب السيدات له .. واتعجب أكثر من حرصهن على تنوع فلسفة الملبس لديهن بحيث كل مسمى من هذه المسميات يصاحبه عشرات الطرق في الإخراج بالشكل الذي يضمن التفرد والتميز وأحب اسجل برضه إعجابي الشديد بالملابس البسيطة والألوان الهادية الغير ملفتة .. هذه الفلسفة التي افتقدها كثيرا في ملابس المرأة في وقتنا الحالي دكتور صلاح عبد الباقي أستاذ السلوك التنظيمي بجامعة الأسكندرية .. تكلم ذات مرة عن الإدراك ومتي يكون الإدراك في أقوى حالاته .. وذكر الآتي : 1- عندما يكون المدرك كبيرا 2- عندما يكون المدرك له صوت مميز 3- التناقض بين المدرك وما حوله 4- أن يكون المدرك جديدا غير مألوفا 5- أن يكون المدرك متحرك غير ثابت وعقب في نهاية حديثه على هذه العوامل بقوله والكلام بالمعنى وليس بالنص : لذلك تجد أن كثير من النساء يكن حريصات أن يتوفر في ملبسهن وسلوكهن جميع هذه العوامل حتى يكن محط إدراك جميع من حولهن .. فيظهرن أكبر قدر ممكن من جمالهن ولابد للحذاء من دبة مسموعة على الأرض ولابد لألوان الزي أن تكون مميزة ومختلفة وتصميم الملبس غير مألوف ولا معهود إضافة لأشكال براقة كاللمعة أو الحركة المستمرة في المكان أو الصوت العالي .. دا رأي الدكتور صلاح واللي عايز يناقشه يقول لي وابعت له رقم الموبايل بتاعه

خناقة .. خناقة .. أوعى يغرك جسمك

ماعلينا إزيك يااااااااااااااااااااااااض سكتم بكتم معلمي .. بخير يابشبوش ماعلينا عامل إيه ... أوعى لا سمح الله تكون في البيت سكتم بكتم أه لية .. لسة داخل ماعلينا ياااااااااااه من زمان انت ما كنتش في بيت يلمك .. كل ما اكلمك .. تكون متشحطط باللاب نوب في حتة سكتم بكتم نعمل أية أكل العيش مر يا أبن والدي .. والقرش الأبيض ينفع في البحر الأحمر .. وقال يا جارية أطبخي ياسيدي كلف ماعلينا ايه يا عم ما خلاص انت فتحت ماعلينا .. النت فصل .. الله يخرب بيتك ياواد ياناششكة بانشاكة يا بتاع النت .. الواد عاطيني وصلة مضروبة سكتم بكتم الواد باينه حط بدل النشوق بطيخ .. كشفت راسي ودعيت عليك يا ماعلينا ماعلينا المهم أنت شفت بوست النقاب ؟ سكتم بكتم أه ماعلينا إيه رأيك ؟ .. شغال ؟؟؟ سكتم بكتم مهم يعني ماعلينا قوووووووووووول سكتم بكتم لازم يعني ماعلينا خلص سكتم بكتم شوف ياسيدي ماعلينا هاااااااا سكتم بكتم من حيث الأسلوب .. أنا ملاحظ أن أسلوبك الأدبي بيتطور .. وبصراحة مش مصدق .. أنك اللي كاتب الأسلوب ده مع رزالتك وغلاستك المعهودة .. ده من حيث الأسلوب .. وشكرا .. نكتفي بهذا القدر ماعلينا كمل سكتم بكتم لا ياعم أنت ايدك طارشة ماعلينا هات ما عندك سكتم بكتم طيب .. بص ياسيدي ممكن أسألك الأول حاجة .. أنت لية قلت المنقبة مقلتش المحجبة ولا حتي المختمرة .. ممكن اعرف ماعلينا عشان هما الأكتر معاناة في الحر .. والحجاب فيه منه خفيف خالص .. فلو قلت محجبة حيدخل معاها كل محجبة خفيف وتقيل حتى المايوه الاختراع العجيب اللي اسمه مايوه شرعي .. فأنا كنت عايز أبين الفرق بين الأكتر معاناة في الحر في مقابل الأكتر انحلالا .. المقابلة بالضد بتبين المعنى .. اسلوب بلاغي .. :-P سكتم بكتم يعني بس كده يعني أنت لغيت المحجبات اللي هم أختي وأختك ومامتي ومامتك .. والبنات المحترمات الكتيير جدا ماعلينا أكيد طبعا المحترمات كتير .. بس خدت بالك تصنيفي إيه للبوست ؟ سكتم بكتم فتاة احلامي يا كذاب ماعلينا ايوه .. فتاه أحلامي أنا .. يعني مش مامتي ولا مامتك .. لا .. سيبك إني ممكن أتأندل مع واحدة مش منتقبة .. لكن فعلاً فتاة احلامي منتقبة .. ولو أتأندلت حيبقى بفعل الكهربا سكتم بكتم وهل لازم فتاة أحلامك تبأه منقبه ماعلينا بص .. أنا قلتها صريحة وواضحة .. لكل الناس .. انا عايزها منقبة أو مختمرة أو محجبة مش حتفرق معايا .. بس أهم حاجة .. واخد بالك من اهم حاجة دي .. إنها تكون هي عارفة هي عاملة كده ليه شرعا .. يعني عارفة انا محجبة بس .. ومش منقبة عشان كذا وكذا وكذا .. عارفة حتقول إيه لربنا سبحانه وتعالي .. مش بتقلد وخلاص .. مش بتقول ما هما اللي قالوا يجوز كشف الوجه (في حالة المحجبة) أو بتقول ما هما اللي قالوا ما ينفعش ابين وشي (في حالة المنقبة) .. لا مفيش هما اللي قالوا .. افضلها عارفة بنفسها ... وأفضلهن عندي .. المنتقبة حياءا .. وبالنسبة ليا فانا عندي محجبة تونسية أفصل من منتقبة سعودية .. وفي كل خير .. في حالة حياد باقي العوامل .. فهمتني ؟؟ سكتم بكتم والله شوف أنا فتاه أحلامي مش متنقبة رغم احترامي لكل المتنقبات عن أرادة ذاتية وهن في رأيي قليلات جدا ماعلينا يعني إيه إرادة ذاتية قليلات ؟ .. قصدك يعني إن المنتقبات أكترهن بالغصب ؟ سكتم بكتم آه .. والدليل هل تجد بيت عادي مش بيت راجل شيخ وبدقن فيه بنت متنقبة لوحدها كده مع نفسها عن أقتناع شخصي ماعلينا معلش بقى بحكم إني قريب من الموضوع ده فاسمح لي اقول لك لأ طبعا .. المنتقبات بإرادتهن الحرة هم الأكثرية وبشوف منتقبات لأزواج بيسبوا الدين كمان والعياذ بالله .. والله يوم الجمعة لسه واحد قالي كده عن جارته المنتقبة سكتم بكتم والله لا أظن .. وأن كنت أتمني تكون أنت صح وأنا غلط ماعلينا البيت الملتزم .. غالبا بيساعد على إن البنت تنتقب بإرادتها .. عشان كده بيبقى غالبا المنتقبة بتخرج من البيت الملتزم .. اما البيت العادي .. بيتي وبيتك .. فغالبا برضه بيقف ضد النقاب وتسمع بقى كلام من نوعية وانتي لسه صغيرة ولما تتجوزي ... وربنا مقالش غطوا وشكم .... إلخ سكتم بكتم مقلناش حاجة طيب مش لو هي مقتنعه من جواها بشدة زي ما أنت بتقول مفروض تحارب علشان كدة ماعلينا حرام عليك .. انت عارف بيوتنا وعارف اللي فيها وعارف البنت حتحارب على إيه ولا إيه ؟ .. ومش كل البنات عندهم الروح القتالية ... إذا كان الولاد ما عندهمش يبقى البنات حيبقى عندهم ؟! سكتم بكتم بس بقولك غلط أنك أتكلمت علي فئة شديدة الخصوصية .. مجموعة من الناس لقيت مامتها كدة .. وباباها لبسها الطرحة من 6 سنين .. ومبقتش تقدر تفكر في نفسها غير بزيها الأسلامي الجميل الساتر .. نفس البت في ظروف تانية كانت بقت حاجة تانية ... لكن في بنات كتيير محجبات في بيئه متبرجة .. وحجابهم اصعب بكتير من نقاب الجماعة الحلوين اللي بقدرهم جدا اللي أنت أتكلمت عليهم ماعلينا يا بني .. أنتوا ليه بتقارنو كلامي بالمحجبات .. أنا كان قصدي تقارنوه بالمنحلات اللي بالمايوهات .. كلامي عن صنفين .. واحدة ع الشط عريانة في مقابل واحد منتقبة ملتزمة ظاهرا وجوهرا .. أنا اتكلمت على الصورتين دول بس .. وقارنت بين الاتنين دول بس سكتم بكتم أشمعني المحجبات لا ماعلينا عشان أكمل حاجة عندي في فتاة أحلامي .. هي المنتقبة بإرادة ذاتية حسب تعبيرك .. ومش معقول ادعو محجبة إنها تتحجب .. وانا عايزهم يفكروا في الأكمل من وجهة نظري .. خد بالك من حاجة مهمة .. إنه كان دار حوار عند بينو حولين النقاب وأنا قلت رأيي ساعتها إني شايف إن النقاب فضل مش واجب .. فهمتني ؟ سكتم بكتم والله حتي لو فهمت الظاهر أن أنا عجزت يا بني وخلاص مبعرفش أغير رأيي بسهولة .. وبعتمد دلوقتي بعد نظري ما ضعف علي أحساسي .. وأنا أحساسي قلتهولك خلاص .. من أول قراءه للمقال ماعلينا بتدافع عن حد معين .. :-P ??? سكتم بكتم والله بفكر أعتزل الطب وأتحجب .. هههههههههههه ... لا ياسيدي والله الحمد معنديش اللي أدافع عنه اللهم إلا وجهة نظري اللي راح .. إيه رأيك عندي فكرة كويسه ماعلينا هاااااااااا .. قول سكتم بكتم ياسيدي أنت عارف تعمل أية في البوست الجديد .. تنزل الشات اللي أحنا كتبناه ده ماعلينا ها .. امممممممممممممممممم سكتم بكتم وتقول مثلا أن دة خلاف في وجهات النظر .. وإن أنا رأيي كذا وفلان ده رأية كذا ونشوف رأي الناس ماعلينا شغال والله فكرة ظريفة .. أجرب تحديث: برجاء من زواري الكرام الذين أتشرف بمرورهم في مدونتي المتواضعة .. أرجو منهم في هذا البوست بالذات التعليق على كلامي مع سكتم فقط وليس على تعليقات الزوار الآخرين .. اعتذر عن هذه الإضافة واجعلها لهذا البوست فقط .. وللجميع مني خالص التحية والتقدير

رسالة إلى أختي المنتقبة

ها هو الصيف قد أقبل بحرارته ومرارته .. وقد سنت الشمس أشعتها لتلفح وجوه وأجساد العباد .. وأعلن الجميع سخطه على الطبيعة فغير من عاداته رغم أنفه ليكيف نفسه مع ما حل بالطبيعة من تغيير وخرجت النساء يتبارين قبل الرجال في التخفف من ملابسهن فمنهن من كشفت الصدور ومن كشفت الذراع والسيقان .. وأخفهن من جعلت رأسها كسنام الجمال .. كلهن خرجن وسرن في الطرقات وركبن السيارات والمواصلات بحالهن أحاطت بهن العيون تختلس النظرات لما كان يوماً ما مستورا .. وتعللن بشدة حرارة الجو .. ولهيب أشعة الشمس من بين هذا كله خرجتي أنتي – أختي المنتقبة – لتعلينها صريحة ولتقمعي زيف ادعاءاتهم بقولتك الحق : قُلْ نَارُ جَهَنَّمَ أَشَدُّ حَرّاً ۚ لَّوْ كَانُوا يَفْقَهُونَ وبينما خرجت النساء إلى الشواطئ بصحبة أزواجهن الذين كانوا يأبون يوما أن ينكشف من زوجاتهم وبناتهم شيئاً .. كانوا يغارون على أعراضهم ..فها هم اليوم بأنفسهم من يأمرون أهليهم بالتخفف من ملابسهم ويأمرونهم بكشف ما لم يحل الله عز وجل كشفه .. وقالوا هذا أيام صيف معدودات .. دعونا نمرح ونلهو فساعة ساعة .. ساعة نطع الله وساعة نعصيه .. هكذا زعموا وبئس ما زعموا .. في وسط كل هذا برز صوتك الأبي - أختي المنتقبة - لتقوليها لهم وتصمي بها آذانهم ..والله لإن أفقد ولدي خير من أن أفقد حيائي أختي المنتقبة الملتزمة بشرع الله ظاهرا وجوهرا .. أنتي تاج على جبين هذه الأمة وفخر لها ومثال لعزتها وإبائها .. رأيتك قدوة تضيئي لغيرك الطريق .. ورأيت نساء كثيرات تشبهن بك في الملبس فانتقبن مثلك .. لكن أنى لهن أن يكن مثلك وقد أساءوا فنعم القدوة أنتي وبئس المقلد هن .. تحسنين إليهن ويسيئون إليكي .. أخيتي .. كلما تخيلت رجلا يخرج من بيننا كعمر أو صلاح لا أجده يخرج إلا من بيتك .. لا أتخيل له أما إلا إياك .. فنعم الأم ونعم المربي .. لكم وددت وأنا أمر بجوارك أن أقبل يدك .. وأشكرك على ثباتك رغم كيدهم ورغم سخريتهم ورغم افتراءاتهم كم وددت ان أقتفي أثرك فأحمل من تراب الأرض الذي تسيرين عليه فأتعطر به .. كم وددت أن أسألك بالله أن تدعي الله لي بالقبول فإن كان أحد يقبل دعاءه ..فلا أراه إلا أنتي كم وددت أن أسألك أن تعلميني كيف أكون بمثل هذا الثبات أمام عيونهم الناقدة .. كم وددت أن أتعلم منك كيف ضربت بجذورك في الأرض لتجعلي رأسك فوق هام السحاب كم وددت أن تعلمي الرجال .. كم وددت أن تفيضي عليهم من إقبالك على دين الله حتى قدمتي رضا الله عز وجل في أمر قد يكون فضلاً وليس بحتم .. ولكنك أقمت في جنة على ربوة بعيدة يصعب على أمثالي أن يدرك جمالها ... امثالي ممن أقام على حرف الواجبات فلم يجاوزوها .. بل إنك جاوزت الأرض وحلقت بعيدا عن المتثاقلين إلى الأرض الراضين بالحياة الدنيا من الآخرة .. تركتي خلفك الخوالف .. وارتقيتي مرتقى صعبا على غيرك لتحوزي أنتي الشرف أو يحوزك الشرف .. أخيتي .. أنتي بين البشر من أنتي .. وكلهن بعدك سواء ....

يا تاجاااتك يا أحمد

تاج ظريف وصل لنا عن طريق منبع التاجات أحمد بيه المبرمج الحر .. وطبعاً لازم نرد عليه وإلا تبقى عيبة في حق إمبراطورية أرض الرغي ... التاجات عندنا ما تتأخرش كل ده أحب شخص لقلبك في الدنيا؟ الحقيقة الحقيقة .. أحب شخص ليا هو منة بنت خالي ذات ال 8 سنوات هي أحب وأقرب شخص قابلته لقلبي .. حاسس بتأنيب الضمير إني مش بقول والدي ولا والدتي .. بس هي دي الحقيقة .. إن شاء الله ح احكي كتير عنها .. او اعمل لها مدونة خاصة بيها وهي تحكي لكم حكاويها انسان مستعد تضحي بحياتك – ركز فى كلمة حياتك – عشانه؟ أي حد بحبه .. الحقيقة ما عرفش وقت الجد إيه اللي حيحصل .. بس مبدئياً .. كل واحد بحبه عندي استعداد أضحي بحياتي عشانه انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟ حفترض إن المطلوب شخص من اللي انا قابلتهم في الحقيقة مش سمعت عنهم مجرد سماع .... وإلا فاللي بكرههم بالسماع كتييييير جدا منهم اللي عايش ومنهم اللي ميت بس من اللي قابلتهم شخصيا واتعرفت عليهم وكرهتهم من كل قلبي .. الشاويس أنور والعياذ بالله ودا شخص عرفته في الجيش .. عبارة عن شر محض .. يمكن ما تصدقوش إن فيه شر محض وتقولوا كل واحد جواه خير .. بس طوال فترة معرفتي بيه .. ما شفتش منه خير قط .. بيصحى من النوم يسب الدين .. بيسرق حتى المية والأكل .. بيرتشي ويكذب .. مش بيصلي ولا حتى الجمعة .. طول ما هو موجود يوقع الناس في بعض وبسببه حصلت مشاكل كبيرة جدا في الوحدة وكان كلها هو المحرك ليها من خلف الكواليس وكان بيستمتع بكده اكبر استمتاع وكان بيفتخر بإنه وقع الناس في بعضها وإنه كان السبب في هذه المشاكل خواف جدا يخاف من خياله .. جبان للغاية ... كسووول .. مغرور ومدعي .. بذيء للغاية .. خاين للأمانة .. كل الصفات دي مش بفتري عليه وكل اللي اتعامل معاه عن قرب يعرف عنه كده .. المرة الوحيدة اللي شفت إنسانيته .. كانت لما دخلت عليه المكتب ولقيت الناس ملمومة حواليه بيواسوه وهو بيعيط .. فسألت إيه الحكاية .. قالوا ابنه تعبان ولأنه بياخد جزا حجز ورا جزا فمش عارف ينزل اجازة ... وطبعا تعرف بعد كده إنه لا ابنه تعبان ولا حاجة وكانت تمثيلية عشان القائد ينزله أجازة ... الحمد لله كان بيتجنبني قبل ما انا اتجنبه وإلا كان حصل اللي مذكور في التاج ... ما هو اسم اجمل كتاب كتبه بشر قراته ومحتفظ به حتي الان؟ لافتات احمد مطر ودواوينه ... تقدر تقول المجموعة الكاملة لأحمد مطر هي عندي أجمل كتاب كتبه بشر ... اسم كتاب كتبه بشر برضة- انت متعلق بيه وبتقرأه كل فترة؟ كتير برجع لكتاب بحر الدموع للامام ابن الجوزي أقرأ فيه شوية ... بحس براحة غريبة من أسلوب الوعظ البلاغي بتاعه اهم جهاز منزلى انت متعلق بيه او بتستخدمه كتير؟ الحقيقة الغسالة مرتبط بيها عاطفيا جدا ... جررررر اقول إيه ؟؟ .. الكمبيوتر طبعا مكان تحس بالراحة عندما تدخله؟ مسجد الإمام البخاري حدانا في البلد. شىء تحس بالراحة النفسية عندما تنظر اليه؟ البحر وأي جنينة وخضرا. مكان تحس فيه بالحنين الى شىء لا تدرى ماهو و ذكريات جارفة الى لاشىء؟ الشارع اللي فيه المعهد اللي أخدت فيه المراجعة النهائية لمادة الفيزياء في ثانوي ... كل ما امشي في الشارع ده اشعر بالحنين والذكريات الغير محددة اجمل مدينة زرتها داخل مصر ؟ ما زرتش مدن كتير في مصر .. بس المدن اللي رحتها يخلوني أقول مفيش أجمل من مديني أجمل مكان طبيعي رأيته داخل مصر ؟ سماء الصحراء الغربية اللي قضيت فيها جيشي كان جمالها غير عادي .. برغم القبح اللي كان موجود على الأرض بسبب أفعال البشر .. لكن كانت السما جميلة جدا جدا جدا .. وكأن الله عز وجل بيعوضنا إحنا المطحونين الغلابة عن اللي كنا بنشوفه .. شفت في مرة في أول الصيف السحاب زي القطن الأبيض .. على طبقتين ... سحابتين فوق بعض وكل طبقة سرعتها مختلفة عن التانية .. لما شفت المنظر قعدت متنح للسما .. عمري ما شفت المنظر ده في أي مكان غير هناك ... وبالليل بقى السما صافية جدا .. لدرجة إني كنت بشوف كمية نجوم غير طبيعية .. عدد وهمي ولا الشهب اللي ورا بعض .. حاجة رهيييييييييبة شخصية كارتونية بتحبها بطوط وتوم وجيري نوع هاتفك المحمول؟ تليفون الشعب .. نوكيا 1100 سرعة بروسيسور جهازك؟ الديسكتوب 2.4 واللابتوب 1.8 حجم ذاكرة –هارد- جهازك؟ الديسكتوب 80 جيجا واللابتوب 40 جيجا المساحة التى تشغلها المواد الاسلامية على جهازك؟ لو حسبت موسوعة هارون يحيي والأناشيد وأفلام الكارتون الإسلامية يبقى الإجمالي 8 جيجا تقريبا .. أهم هدف انت واضعه لحياتك الآن؟ في هذه اللحظة ... عايز اتجوز. مواصفات فتاة الأحلام بالنسبة لك؟ والله ممكن ترجع لبوست الأميرة من الأمارة .. وقبل كده متدينة بس تدينها مش بمعنى إنها بتحب الإسلام وبس .. لا ... أتمنى إنها تكون بتتنفس الإسلام .. على رأي واحد صاحبي إنها تكون صاحبة رؤية .. متفهمة .. صبورة .. قابلة للتغيير مش جامدة .. عاطفية .. رقيقة .. صف ما يأتى: شعورك لما بتسمع كلمة مصر ؟ يجعل صدره ضيقا حرجا كأنما يصعد في السماء شعورك لما بتسمع كلام عن اليهود؟ اليهود في حد ذاتهم بفتكر يهود المدينة في عهد النبي عليه السلام والسلام ... لكن لو المقصود الصهاينة فالشعور غل وغيظ مالوش حد شعورك لما بتشوف ظابط شرطة؟ بحاول اقنع نفسي إن فيه منهم ناس كويسة ومحترمة شعورك لما بتشوف الكناس العجوز فى الطريق؟ بزعل من نفسي إني مش بشكر ربنا كفاية على نعمه عليا .. وفيه ساعات بتمنى إني أكون مكانه واشعر بالرضا والطمأنينة والسلام اللي بحس إنه هو شاعر بيهم افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟ والله حيث إنني أصلا منهم يعني شبه الشاب ده .. فدا يخليني أشعر بمشاعر إيجابية تجاهه .. يعني أخ ليا .. يعني هييييييييييه .. أنا ماشي أهو .. بالمناسبة لما شفت السؤال دا عند أحمد مبرمج حر .. لاحظت إني بقالي مدة طويلة مش بخرج في الهيئة المذكورة في السؤال وكل لبسي بقى بنطلون وقميص .. حتى الدروس كنت بروحها أفندي .. فقلت لا بقى ما بدهاش .. فيوم السبت اللي فات موعد الدرس الاسبوعي اللي بحضره رحت ضارب الطقم التمام ورحت بيه الدرس ... هههههههه ... الشيخ استغرب جدا لما شافني باليونيفورم ؟؟؟ قالي مالك إيه اللي حصل ؟؟ .. احساس يراودك فى اشارة مرور مغلقة بسبب مسئول كبير؟ بتضايق جدا .. نمرر لمين ؟؟ طبعا للناس الحلوين رفقة طبعا .. بما إنها هي اللي اعطت اشارة الانطلاق لهذا البوست .. وعلى فكرة يا رفقة انا علقت عندك قبل ما اشوف سؤالك .. بينو .. حيقول لي مشغول وعنده مشروع جديد وخلافه .. حقول له ماليش دعوة .. التاج يتجاوب عليه خاااااااااااااالد الفنان .. موضوع الفوتوشوب اتكرر مع اللينكس .. فالتاج دا اقل واجب اعمله مع حضرتك .. سي محمد عبد الغفار .. فيه ناس تانية بعتوا له التاج ولسه ما جاوبش .. بنت الجنوب أماني الأفوكاتو الزمالكوية .. ياريت والله تجاوبي ع التاج ومش عايز اسمع سيرة الماتش الواد سكتم اللي مش عايز ينزل حاجة جديدة .. جاوب يابني من سكات

حملة المدونين للإفراج عن أبو الفتوح شوشة

ماذا تبقى في مصر لم يحفظ كرامتها ..؟؟

وماذا بقي من الشعب لم ينعم بأمان واطمئنان ..؟؟

هذه الهجمات الشرسة البربرية التي يمارسها النظام المصري ضد كل معارضيه من الشعب الأبي ألن تنتهي في يوم من الأيام ..؟؟

لماذا يجز النظام على شفتيه ويشهر زبانية سجونه ويلوح بعصا البطش دوما في وجه كل مصري شريف يحاول أن يقول كلمة حق أو ينطق نطق الصدق ..؟؟

أغابت الحرية من بلدنا وانتهى الأمان من عندنا ..؟

أغدت مصر مرتعا لبضعة نفر من الظالمين والمستبدين يستعبدون رقاب الأباء والأبناء والشيوخ بل والنساء ..؟؟

لحساب من يزج بالمجاهدين في السجون .. أهي لحساب الصهاينة وإرضاء لهم ..؟؟ أم لحساب أمريكا وحلفائها ..؟؟ أم لحساب البقاء على الكرسي ..؟

إنني ومعي كل حر شريف نرفض أن نعيش في هذه الحياة الكالحة التي لم نعد نأمن فيها على أي شئ لا حاضر ولا مستقبل بل ولم نعد نذكر فيها ماضينا

ومع هذا الرفض أناشد كل من بيده صنع قرار - أناشده ليس توسلا فلم أتوسل إلا لله - ولكن اناشد فيه ضميره ودينه ووطنيته التي يعمل من أجلها أن يطلقوا سراح ذلك الرمز الشجاع والمجاهد المناضل والشيخ العجوز ( أبو الفتوح عفيفي شوشة ) - الذي يبلغ من العمر قرابة الثمانين عام - معتقل الإخوان المسلمين الذي جاهد فوق تراب فلسطين من أجل أمته ، وجاهد تحت قبة البرلمان من أجل وطنه ، وجاهد مع الإخوان من أجل دينه في الوقوف في وجه هذا الظم العاتي ..

أي خوف يخافه النظام من رجل بلغ من العمر عتيا ..؟ وماذا يخشى من رجل أصبح كل همه في الدنيا أن يدرك صلاة الجماعة ويقرأ جزءه اليومي من القرآن ..؟؟

أناشد كل حر مخلص .. مكان هذا الرجل المجاهد أن يكرم وينال نوط العزة والكرامة بدلا أن يزج به في زنزانة حقيرة لا تليق به
إنني أرفض بشدة سجن هذا الرجل ساعة أخرى واحدة .. وأدعو بكل قوة إلى إطلاق سراحه

فهل من مجيب ..؟؟

- منقول -
- من هو أبو الفتوح شوشة -

بوست خاص بمناسبة عودة الباشمهندس حسن محمود

احتفالا وابتهاجا بعودة الباشمهندس حسن محمود إلى عالم التدوين من جديد .. بعد انقطاع لم يكن ابدا سهلا علينا فقد افتقدنا فيه زياراته وتعليقاته في جميع المدونات حتى ان المدونين خرجوا من عند سي محمد عبد الغفار بحثا عنه وتقصياً أخباره كنا قد طالبنا الباشمهندس كثيرا بإنشاء مدونة خاصة به حتى يتسنى لنا متابعة كتاباته .. خاصة ان تعليقاته تنم عن شخصيته الودودة وتبشر بصداقة مقربة مع الجميع .. كما ان المدونة ستزيد من همته لكتابة المزيد .. فيتحقق لنا المزيد من الاستمنتاع بقراءة مواضيعه .. والآن بعد غيابه عنا كل هذه المدة نجد أن الحاجة أصبحت أشد وأكثر إلحاحا لإنشائه لمدونته الخاصة حتى نستطيع الرجوع إليها وإرسال المناشدات والنداءات إذا غاب عنا .. وامبراطورية أرض الرغي إذ تحتفل بالعودة الميمونة للباشمهندس حسن محمود فإنها تعيد تقديم باقة من تعليقاته الذي قام مشكورا بتشريف مدونتنا المتواضعة بها .. في النعامة لوجو المدونة قال : انا بحب النعامة جدا .. ولعلمك هى مش بتدفن راسها علشان ماتشفش المشكلة زى ماكل الناس فكره .. دى بتستخدم حقيقة علمية جدا هى لما بتحس بالخطر بتروح حاطه راسها فى الارض علشان عارفه ان الصوت بيتنقل فى المواد الصلبه (زى الأرض) أسرع من الغازات (الهواء) واسرع من السوائل (الماء) يعنى هى بتسمع الخطر بدرى علشان تقوم تلحق تجرى علشان كده رجليها طويلة علشان تجرى بسرعة بس حقيقى اللى بيعجبنى فيها وشها ومخها البرىء وعقلها النونو اللى بيتحكم فى جسم كبير قوى .. النعامه نسبيا طولها عالى شويه .. مش واطيه زى حيوانات كتير - الطاوس مثلا - ومش عاليه قوى برضه مش زى الزرافه الأسود والنمور والفهود وخلى بالك من الفهود لأن سرعتها ممكن توصل 70 كم فى الساعه الحيوانات دى ذكيه جدا ومش بتبين نفسها للضحية وهى اصلا حيوانات ارتفاعها واطى فبتستخبى مش بتبقى باينه الا ساعت لما تنقض على الفريسه النعامه بقى مخها لما يحس ان الجو مش طبيعى تروح حاطه ودانها على الارض الارض بتشتغل كأنها وسيط - سماعه- بتسمع من خلاله فى دب على الارض ولا لا - واذا فيه جاى منين؟ .. الكلام ده مثبت علميا حقيقى وتلاحظ هى مش بتدفن راسها الا ساعت الخطر بس .. وبعدين ياسيدى ماهى بتجرى امال هى بتعمل ايه؟ ده هيه سلاحها الوحيد اللى ربنا اداه ليها الرجل الرشيقه علشان تجرى بيها علشان هى مش بتطير في الزرافة قال : انا سمعت بس مش متأكد من المعلومة دى ان الزرافه هى الحيوان الوحيد اللى مش بيعمل صوت خالص والله أعلم .. دى الزرافه دى كانوا قدماء المصريين بيطلعوا عليها ويراقبوا النجوم والفلك وكان ليها مكانه كبيره زمان في ليه الأسد ملك الغابة قال : أصلى لما عملت بحث عن النعامه قلت فى بالى وليه بقى الاسد ملك الغابه العلماء بتوع الحيوانات قالوا علشان 3 اسباب: 1 - شكل الشعر اللى فوق راسه كأنه تاج 2 - مش بياكل أى حاجه ميته طالما انه مش هو اللى اصطادها يبقى مش بيقرب ليها - عنده ذمه وضمير وبيأنف انه يأكل من تعب غيره 3 - اذا دخل معركه مع أى حيوان حد من الاتنين لازم يموت ياهو ياالحيوان التانى انما لايمكن يسمح ان حد ينتصر عليه وهو عايش وده قانون الغابة البقاء للأقوى فى سبب رابع بس فى حيوانات كتير بتشترك معاه فيها وهو انه بيحب الحرية وعمره فى الأسر يبقى قصير بس فى حيوانات كتير كده مش هو بس في العمل الجماعي الدعوي وتنوعه قال : التناغم والتوافق بين الجماعات الاسلامية بمختلف افكارها .. بتفكرنى بفريق كوره بالظبط .. اذا فى لعيب واحد او اتنين بس اللى كويسين والباقى واقع يبقى مافيش أمل ان الفريق ده يكسب .. الاتحاد قوة .. والامريكان تقدموا علشان قالوا : unite we STAND, divide we fall سيبك بقى من الاسامى والتوصيفات .. المهم الافعال الاسامى ولا ليها أى اهمية خالص .. وهو يعنى الحزب الوطنى معناه انه هو بس اللى وطنى والباقى مش وطنى؟ أصلا مفهوم جماعه يعنى ناس كتير مش شخص واحد وماينفعش واحد يبقى جماعه على كل حال زى مارفقة عمر قالت التعصب هو اخطر من كل ده .. لازم يبقى فى تفاهم ومساحه كافية لثقافة الاختلاف فى فرق بين التنوع والتفرقه .. لما يكون فى تنوع ده بيدى زخم وبيعمل حركه ونشاط ايا كان نوع التنوع عرقى سياسى دينى اما بقى التفرقه هى دى اللى مصيبه كبيرة في جبروت المرأة قال : معاااااااااااك .. أنا معاااك .. فى حاجه غريبه بتحصل .. حاسس ان الستات قرروا ياكلونا .. هو احنا عملنا ليهم حاجه خالص؟ مش عارف ليه أفتكرت النكته دى .. ست دايما منكده على جوزها .. فهو زهق منها فقالها شوفى ياستى .. خلينا نعمل اتفاق .. يوم تنكدى عليه ويوم راحه , ماشى؟ فهى وافقت .. أول يوم راحت منكده عليه .. تانى يوم لقاها بتقول لى .. بكره النككككد بكره ربنا يرحمنا .. ويهدينا ويهديهم في القرار : للأسف احنا اذا بلد عندها دم كان المفروض تقطع العلاقات بس لسه كنت قايل للأخت مريم (مانو) فى مدونتها القرار مش فى ايدنا .. احنا بنفذ اللى ماما أمريكا تطلبه مننا .. من لايملك قوته لا يملك قراره السياسى .. وللأسف الشديد نحن هذه البلد .. نحن لا نملك قرارنا في البرنامج النووي المصري قال : كان فى دكتور فى هندسة نووية جامعة اسكندرية هو اللى حكى ليه القصة دى .. سألناه يادكتور ياترى حضرتك موافق انه يكون عندنا مفاعل نووى بحق وحقيقى مش مفاعل انشاص التعبان اللى الطلبة فى المانيا واسرائيل بيتدربوا على واحد زيه ده قال لا ما أحبش ليه يادكتور ؟ علشان ده اللى هايحصل يا أولاد فى يوم من الايام المفاعل شغال طبيعى, المهندسيين والفنيين بيراقبوا الشاشات يجى تليفون فجأه ألو ألو المهندس .... موجود؟ خير - مين عايزه؟ البيت قله يلحق يجى البيت بسرعه مامته بتموت أيييييييييييييه؟ أمى انا جاى حالا طيران ويروح سايب المفاعل للمساعد بتاعه كمان نص ساعه يرن جرس التليفون تانى ألووو ياترى الباشمهندس ,,, موجود؟ خير نقوله مين؟ المدرسة أخوك عمل خناقة والمدرسه مولعه نار نار تعالى بسرعه - أخويا حااااااااااضر انا جاى حالا ويروح سايب المفاعل للفنى اللى شغال عنده كمان نص ساعه يرن جرس التليفون الوووو ياترى ***** موجود؟ ايوا مين ؟ انا خطبيبته واذا ماجاش حالا هارمى الدبله واسيبه -لاااااااااااااا انا جاى حالا وعلى اخر اليوم هانلاقى ان عم عثمان البواب هو اللى بيدير المفاعل وطبعا كل سنه واحنا طيبين تانى يوم فى الجرايد انفجار مفاعل فى مصر على كل حال معانا ربنا أقوى من الكل بس للأسف احنا بعيد عنه علشان كده بنعانى من اللى احنا فيه دلوقتى يالا ربنا يتولانا برحمته في الثورة قال : ياسيدى يهىء ليه ان مافيش شرعية أصلا فى كل حاجه دلوقتى .. الصح واللى كان المفروض يتعمل ان لما العسكر عملوا ثورة 23 يوليو كانوا سابوا الحكم وعملوا انتخابات مدنية يعنى مايشاركش فيها اى عسكرى واحد .. والحكم يبقى مدنى موريتانيا يارااااااااجل عملتها .. احنا لا ليه؟ بس بقى المثل اللى ينطبق علينا دلوقتى؟ يافرعون ايه فرعنك؟ .. مالقتش حد يلمنى

الحب ع التوازي والحب ع التوالي

ومادمنا اتكلمنا على الحب وبما إني مهندس كهرباء قوى متقاعد .... وعلى فكرة متقاعد مش يعني عديت ستين سنة ولا حاجة .. لا .. يعني نفدت بجلدي من المجال المغناطيسي لقسم كهرباء قول كده من سنة تانية في الكلية واخدت قرار إني أحصل ع الشهادة وادور لي على مجال تاني غير الكهرباء وقد كان .. بس المشكلة إني ساعات .... إيه ده ؟ إيه ده ؟!! ... أنا كنت حتكلم ع الحب التوالي والحب التوازي إيه اللي دخلنا في حكايتي مع الكهرباء .. طيب نرجع تاني .. بقول إن دراستي الأصلية للكهرباء لسه برضه مأثرة عليا وساعات بتأثر على نظرياتي التهييسية .. آيوه ليا نظريات .. فيه حاجة ؟؟!! .. حد عنده اعتراض وحكاية الحب ع التوالي وع التوازي دي واحدة منها .. ليه بقى ؟؟ .. اقول لحضرتك .. لأني دايماً بحس إن الراجل بيحب ع التوازي والست بتحب ع التوالي .. إزاي .. ؟؟ أقول لحضرتك عارف نظرية التوصيل ع التوازي لو عندك مصدر كهرباء فأنت ممكن توصله لكذا لمبة بالشكل ده وكده الكهرباء حتطلع من المصدر وتتوزع على اللمبات في نفس الوقت بحيث كل لمية تاخد قد ما تحتاج ولو حصل ولمبة فصلت فدا مش حيأثر بالسلب على بقية اللمبات .. لأنها حتفضل شغالة برضه .. مش بتكلم عن تأثر المصدر .. لأ .. انا بتكلم عن اللمبات لأنها شغالة ومنورة في جميع الحالات دون النظر لبقية التوصيلات الطريقة التانية للتوصيل إنك ممكن توصل المصدر باللمبة الأولانية وبعد كده تطلع من اللمبة الأولانية تودي للتانية ومن بعديها للتالتة وهكذا .. يعني ساعتها الكهرباء حتروح للمصدر الأول وبعد كده الباقي بيروح للمصدر التاني وهكذا ولو فصلت لمبة الشحنة مش بتكمل وتقف على كده والدايرة الكهربية بتتقطع دا قصدي بحب الراجل اللي ع التوازي وحب الست اللي ع التوالي فمن جهة الرجل (اللي حبه ع التوازي) لو اعتبرنا إن حب الراجل هو مصدر الكهرباء والستات هي اللمبات فالراجل وارد إنه يحب أكتر من واحدة وفي نفس الوقت .. بقول وارد .. ممكن يعني مش شرط .. تقدر تقول كده إن عاطفته القوية موزعة بشكل أفقي .. ومش حيكون بيخدع ولا واحدة فيهم .. بالعكس .. هو صادق في مشاعره القوية دي معاهن كلهن .. وفعلاً بيحبهن كلهن في نفس الوقت ومشاعره متوجهة للكل في نفس الوقت .. ولو واحدة ست من اللي هو بيحبهم خدعته او أهانته أو عملت فيه أي حاجة وحشة (يعني حصل انقطاع بينهم) .. فحبه للبقية مش بيقل ولا بيتهز بالعكس دا بيزيد .. لأنه بيعرف قيمتهن وساعتها حيزيد حبه ليهم أما من جهة الست (اللي حبها ع التوالي) لو اعتبرنا إن حب الست هو مصدر الشحنة الكهربية والرجالة هما اللمبات فالست بتحب راجل واحد بس في الوقت الواحد .... وما ينفعهاش إنها تحب كذا واحد في نفس الوقت .. يعني عاطفتها القوية مركزة بشكل رأسي .. فبتوجه للواحد اللي بتحبه كل مشاعرها ولو حالت الظروف بينها وبينه مثلاً .. ومرت الأيام وانتقلت لقصة حب تانية فبتوجه للراجل دا مشاعرها كاملة برضه ولكن مشاعر غالباً بتكون أقل من المرة السابقة .... أما بقى لو خدعها أو أهانها أو عمل معاها فصل بارد من فصول الرجالة الرذلين إياها (ودا الانقطاع) .. فالدايرة بتتقطع ونظرتها للحب والرجالة بتختلف تماماً .. بتتحول لروتين اجتماعي خالي من أي مشاعر .. وبتفقد جزء كبير من مشاعرها وعواطفها مع الجل التالي في حياتها .. عشان كده دايماً يقولوا إن أول رجل في حياة الست بيكون فكرتها عن الرجالة طول عمرها هو دا قصدي بالحب ع التوالي والتوازي .. كل اللي قلت لهم الكلام ده رجالة وستات أنكروه وقالوا احنا مش كده وبعض الرجال قالوا إحنا بالعكس بنحب ع التوالي ... أنا بيني وبين نفسي ضحكت لأن اللي سألتهم هما اللي ينطبق عليهم بالضبط الكلام اللي فات ده وإنكارهم مخالف تماما لتصرفاتهم آه بالمناسبة قبل ما انسى .. الكلام السابق دا يثبت إن الحب كهربا .. مش زي الإشاعة اللي مطلعها الكيميائيين .. إن الحب كيميا .. لااااا .. الحب كهربا سلام بقى عشان حفصل

ما زلت في فن المحبة .. طفلة

قل لي ولو كذباكلاماً ناعما قد كاد يقتلني بك التمثالُ مازلتِ في فنّ المحبةِ طفلةً.. بيني وبينكِ أبحرٌ وجبال لم تستطيعي بعد أن تتعلمي .. أنّ الرجالَ جميعهمْ أطفال إني لأرفضُ أن أكونَ مهرجــاً ... قزمـاً علـى كلمـاتِه يختــَـــالُ فإذا وقفتُ أمام حسنكِ صامتاً .. فالصمتُ في حرمِ الجمالِ جمال كلماتنا في الحب تقتل حبّنا .. إن الحروفَ تموتُ حين تقال قصص الهوى قد افسدتك ... فكلها غيبوبة وخرافة و خيال ... الحب ليس روايةً شرقية ...بختامها يتزوج الأبطال لكنه الإبحار دون سفينة ... وشعورنا أن الوصول محال هو أن تظل على الأصابع رعشة ... وعلى الشفاه المطبقات سؤال هو جدول الأحزان في أعماقنا ... تنمو كروم حوله وغلال هو هذه الأزمات تسحقنا معاً ... فنموت نحن وتزهر الآمال هو ان نثور لاي شئ تافه ... هو يآسنا هو شكنا القتال ... الحب هو تلك الكف التي تغتالنا ... ونقبل الكف التي تغتال لا تجرحى التمثال فى احساسه ... فلكم بكى فى صمته تمثال قد يطلع الحجرالصغير براعمآ ... وتسيل منه جداول وظلال انى احبك من خلال كآبتى ... وجهآ كمثل وجهك ليس يطال حسبي وحسبك أن تظلي دائما ... سرا يمزقني وليس يقال - نزار قباني -

من داخل المستشفى

عم منصور .. رجل بسيط كان يقف أمام أنبوبة بوتجاز صغيرة حدث بها تسريب لكنها لم تنفجر وإنما من شدة الضغط طارت واصطدمت بحائط وارتدت منه لتصطدم بصدر عم منصور وتحطم أجزاء كثيره من جسده الضئيل .. فتح الأطباء في جسد عم منصور فتح طولي وعرضي ... يسمونها عملية استكشاف ... وأجروا له العديد من العمليات ليستعيد وظائفه الحيوية التي يعجز عن القيام بكثير منها حتى الآن محمد ابن عم منصور ترك عمله وتفرغ تماما لرعاية والده والبقاء معه فهو لا يغادر المستشفى وينام فقط إذا كان أحد أخوته موجود مع والدهم لرعايته نشاط محمد المرابط بجوار والده تعدى عم منصور ليساهم محمد في مساعدة باقي المرضى حتى أطلق عليه طاقم التمريض .. الدكتور محمد عن ابن عمر رضي الله عنهما قال : سمعت رسول الله صلى الله عليه وسلم يقول : انطلق ثلاثة نفر ممن كان قبلكم ، حتى آواهم المبيت إلى غار ، فدخلوه ، فانحدرت صخرة من الجبل ، فسدت عليهم الغار ، فقالوا : إنه لا ينجيكم من هذه الصخرة إلا أن تدعوا الله تعالى بصالح أعمالكم .. قال رجل منهم : اللهم كان لي أبوان شيخان كبيران ، وكنت لا أغبق قبلهما أهلاً ولا مالاً ، فنأى بي طلب الشجر يوماً فلم أرح عليهما حتى ناما ، فحلبت لهما غبوقهما فوجدتهما نائمين ، فكرهت أن أوقظهما وأن أغبق قبلهما أهلاً أو مالاً ، فلبثت – والقدح في يدي – أنتظر استيقاظهما حتى برق الفجر ، والصبية يتضاغون عند قدمي فاستيقظا فشربا غبوقهما .. اللهم إن كنت فعلت ذلك ابتغاء وجهك ففرج عنا ما نحن فيه من هذه الصخرة .. فانفرجت شيئاً ....... رواه البخاري ياسر .. أجرى جراحة .. طوال فترة انتظار العملية وما بعدها لم أر معه إلا والدته وزوجته .. في أحد المرات كنت معه واتصل به أخوه وتكلمت معه زوجة ياسر وعاتبت عليه انه لم يأت لزيارة أخيه .. فأشار إليها ياسر لتمتنع عن معاتبته وأخذ منها التليفون وقال لأخيه ما يفيد بأنه بخير وقال له ألا يرهق نفسه بالمجيء وألا يشغل باله ويراعي ظروفه .. إلخ وبعد انتهاء المكالمة عاتب على زوجته عتاباها لأخيه .. وقال لها .. إحنا حنشحته عشان يجي يقف جنبي لو عايز يجي أهلا وسهلا مش عايز هو حر عن أبي هريرة رضي الله عنه قال : قال رسول الله صلى الله عليه وسلم : إن الله عز وجل يقول يوم القيامة : يا ابن آدم مرضت فلم تعدني ! قال : يارب كيف أعودك وأنت رب العالمين ؟! قال أما علمت أن عبدي فلانا مرض فلم تعده ؟ أما علمت أنك لو عدته لوجدتني عنده ... رواه مسلم نعيم .. عسكري مجند يعاني من مشاكل في القولون والكبد ورغم تحذير الأطباء والآلام الشديدة اللي بيعاني منها لكنه مصر على أكل كل أنواع الأكل الحريف والفلفل والتوابل .. وحالته تسوء أكثر فأكثر قال تعالى : { وَلاَ تَقْتُلُواْ أَنفُسَكُمْ إِنَّ اللّهَ كَانَ بِكُمْ رَحِيمًا} [سورة النساء : 29] أستاذ مجدي .. رجل هادئ جدا قليل الكلام من أول لقاء تشعر بأنه يحمل هما ما .. تفسر ذلك بأنه لعله هم الجراحة التي ينتظر إجراءها ... لكن الحقيقة أن الأستاذ مجدي يحمل هموم أخرى فكلما بدأ مشروع تجاري لا يستطيع الاستمرار فيه ويفشل المشروع ويبحث عن مشروع جديد ليفشل هو الآخر وهكذا ... حتى زواجه قدر الله له ألا يستمر فقد توفيت زوجته وتركت له طفلتين في الخامسة والسادسة من العمر .. الأستاذ مجدي كلما قابل الدكتور يطلب منه الخروج عدة ساعات للاطمئنان على بناته والعودة مرة أخرى .. بناته التي وافقت أخيرا أخت زوجته على استضافتهن مؤقتا لحين إجراء الجراحة له يعد رفض الجميع استضافتهن وخاصة الجدة التي كان يعقد عليها الأمل في تربية البنات إذا حدث له مكروه لا قدر الله .. عن أنس رضي الله عنه عن النبي صلى الله عليه وسلم قال : من عال جاريتين حتى تبلغا جاء يوم القيامة أنا وهو كهاتين .. وضم أصابعه .. رواه مسلم

ابسط يا عم حيفرجوا عنك

أصدر الملك السعودي عبد الله بن عبد العزيز الجمعة عفوا عن سجناء الحق العام في كل سجون المملكة الذين "لا يشكلون خطرا على الأمن". وأوضح وزير الداخلية الأمير نايف بن عبد العزيز أن الملك عبد الله أصدر عفوا عن "سجناء الحق العام والموقوفين والمحكومين في جميع سجون مناطق المملكة الذين لا يشكلون خطرا على الأمن ولا تندرج قضاياهم في الجرائم الكبيرة ولا يعاقب عنها بحد شرعي ولا يترتب على الجريمة حق خاص".رابط الخبر واحد صاحبي مالوش في حاجة كده زي حالاتي بيسأل : لما هو مش خطر على الأمن العام وقضيته مش كبيرة ولا بيعاقب عليها بحد شرعي وجريمته لا يترتب عليها حق خاص لما هو كده كان اتسجن ليه من أصله؟؟!!

عايز تصلي .. اطلع بره

بعد مسابقة لاختيار التصميم المناسب لمكتبة الاسكندرية تم منح الجائزة الأولي ومقدارها ستون ألف دولار أمريكي لشركة Snohetta للتصميمات المعمارية ومقرها أسلو بالنرويج.

تبلغ المساحة موقع مجمع مكتبة الإسكندرية ٢٠٠,٠٤ م2• ويبلغ اتفاع المكتبة عشرة طوابق.
ويشمل تصميم المكتبة الجديدة أربعة مستويات تحت الأرض وستة طوابق علوية

راعي التصميم الهندسي للمبنى في حسبانه الترتيب الوظيفي للأرفف والمكاتب المخصصة للقراءة.
وكذلك فإن جسم المبني يغوص أسفل الأرض لحماية محتوياته من عوامل البيئة الخارجية. وتعد قاعات القراءة العديدة المفتوحة هي السمة البارزة في مكتبة الأسكندرية، حيث تضم 2500 قسم للقراءة تؤدي إلي سبعة شرفات. ولقد تم تخزين الكتب أسفل هذه الشرفات لتسهيل الحصول عليها.

ونظراً لارتفاع منسوب المياه الجوفية فقد قامت الشركة المنفذة بإنشاء حائط جار بعمق 35 متر (وهو عمق لم يسبق استخدامه) تم تدعيمه علي عدة مراحل. و هذا الأسلوب لم يتم استخدامه قبل خارج الشرق الأقصى. ولقد أدخلت الجدران الخرسانية في البنيان تحسباً لأية أحمال أخري بما في ذلك الرياح والزلازل.

ويوجد داخل حائط الجار جدارين إضافيين من الخرسانة حيث يوجد أحداهما علي المستوي الأرضي ويفصله عن حائط الجار طبقة مضادة للماء ومزود بآليات صرف وهو ما يسمي بالجدار الخارجي. ويتحمل هذا الجدار الحمل الرأسي للطوابق الأرضية ولديه القدرة علي مقاومة ضغط الماء في حالة حدوث أي تسريب بحائط الجار في أي مرحلة من عمر المبنى والذي يقدر بـ 200 عام.

ونتيجة للحالة الغير مواتية لموقع المشروع احتاج هذا المجمع إلي أعمال هندسية وأعمال تأسيس ضخمة شملت الحفر وشفط المياه ودق الخوازيق والتحسينات التي أضيفت إلي خلطة الخرسانة.

راعى التصميم تقسيم قاعات القراءة إلى سبعة مستويات ، في كل منها مساحة للإطلاع ومساحة لرفوف الكتب ، بالإضافة إلى مكتب معلومات. كما راعى التصميم توزيع المساحات في كل مستوى بالشكل الذي يوفر الراحة للقراء والزائرين. كما قسمت المستويات السبعة بالمكتبة حسب الموضوعات والمواد المعرفية بالشكل الذي يخدم كافة الأنشطة المصاحبة للمكتبة
وفوق تلك المستويات السبعة ، توجد قاعتان للندوات متصلة بالجزء الإداري والبحثي بالمكتبة من خلال كوبريين.

كل شيء في المكتبة يبدو مدروسا ومخطط له جيدا .. شيء واحد قد يجعلك تندهش .. وهو أن المكتبة الضخمة ذات المساحة الواسعة .. لا يوجد بها مكان مخصص للصلاة .. وإن دخل عليك وقت الصلاة وكنت عايز تصلي .. فاطلع بره ..

الحق يقال أن هناك مكان عبارة عن ثلاثة امتار في متر واحد داخل المكتبة وهو مخصص للعاملين فقط وغير مسموح للجمهور بالدخول فيه .. أما إن كنت من الجمهور البائس وصادف ذلك كونك مسلما تريد الصلاة .. فيمكن التوجه لأحد أفراد الأمن بالمكتبة وطلب مكان للصلاة فمن الممكن أن يتركك مشكورا تصلي في أي ركن يراه مناسباً ..

طبعاً لن يفوت إدارة المكتبة تشنجات أمثالي من المتزمتين المتشددين الرجعيين المتطرفين الوهابيين السوداويين الإظلاميين الذين سيطالبون بمكان للصلاة داخل أرجاء المكتبة الفسيحة .. فإدارة المكتبة بينت وجهت نظرها في عدم تخصيص مكان للصلاة بان المكتبة مكان عالمي لا يقتصر على ديانة دون أخرى وقالوا لو حنخصص مكان كمسجد لصلاة المسلمين يبقى لازم نخصص مكان ككنسية وكمعبد يهودي كمان .. ولأن دا مش ممكن فمش حنقدر نخصص لكم مكان تصلوا فيه .. حتى لو قلتم إن غالب رواد المكتبة من المسلمين وإن صلوات المسلمين تختلف عن غيرهم في كونها ملزمة وعلى مدار اليوم .. ما نقدرش .. عايز تصلي .. اطلع بره

كل حاجة ليها مبرر حتى اللي قتلوا الأنبياء كان ليهم وجهة نظر ورؤية ..

الموضوع ده أخبرني بيه أحد المعارف العاملين في المكتبة .. والعهدة على الراوي وإن كنت لا اتهمه بكذب

أظن دلوقتي عرفت معنى كلمة من الكلمات اللي كنت اسمعهم .. التغريب التغريب .. متهيألي فهمت معناها .. التغريب .. هو إنك تذبح نفسك كقربان للغرب حتى لو الغرب لم يطلب منك مثل هذه التضحية ..

وسلموا لي ع المادة التانية من الدستور ..

مرتبط : أقرأ ولا تصلي