Saturday, March 10, 2007

الجدع دا رغاي كده ليه ؟؟؟

زعيم حملة العودة إلى أيام الطفولة الجميلة .. الفنان الكبير خالد .. زعلان من حكاية بوست كل يوم .. ودكتورنا المحارب كاتب بوست عنده بيطلب فيه من كل زائريه الإجابة على سؤال كان قالوا أهل الجنة قبل كده .. أنت عامل المدونة ليه ؟؟ وضاف عليهالدكتور سؤال وحاطط الروابط اللي عندك ليه ؟ فاسمحوا لي أن أجيب عن سؤال دكتورنا وأهل الجنة وأوضح لخالد حكاية بوست كل يوم

باختصار بعتبر التدوين عندي محاولة علاج .. أيوه محاولة علاج .. ليه ؟؟ .. أقول لكم

تخيلوا واحد قاعد بيكلم نفسه طول النهار .. بدون مبالغة .. طول الوقت قاعد بيكلم نفسه بدون توقف .. لدرجة إني سألت واحد صاحبي طبيب ع المسألة دي .. هل دا طبيعي ؟؟ .. الواحد كده دماغه تقعد تودي وتجيب طول الوقت .. عماله تقلب في كلام .. وتفكر في حاجات .. سألته عشان اطمن على نفسي .. وصلت للعباسية ولا لسه ؟؟؟
هو الحقيقة ما رضاش يخضني .. فقال لي .. وأنت بتكلم نفسك صوتك بيعلى ؟؟ .. قلت له : لأ ... قال لي : خلاص كده مفيش مشكلة ...

بيني وبينكم ما رضيتش أقول له الحقيقة

أنا حاولت كتير امتنع عن الحديث الداخلي ده .. بس مفيش فايدة لدرجة لما احاول اسكت الصوت اللي جوايا .. ألاقيه عمال برضه يقول لي ياترى حتفضل مسكتني كده قد إيه ؟؟ مفيش فايدة

ساعات أغني لنفسي .. تصوروا .. وساعات اتفلسف واحط نظريات لكل حاجة حواليا .. ساعات أقول لنفسي قفشات واضحك عليها وأنا ماشي في الشارع وابتسامتي قد كده على وشي .. والناس متهيألي بيبصوا عليا وهما بيقولوا في سرهم يا حول الله يارب .. ياعيني ع الجدع واللي حصل له .. منك لله يا حكومة !!!
ساعات بدي لنفسي دروس واشرح لنفسي أحاديث أو اشرح آية .. أو اردد شعر حافظه واحلله واطلع مواطن الجمال اللي فيه ... كل دا في دماغي ..
ساعات بتكلم في السياسة والحقيقة إني مريحني ع الآخر .. متهيألي إن أنا وأنا الوحيدين اللي بيتكلموا في السياسة ومش بيختلفوا مع بعض.

أضف لكده إن إصولي تمتد لمنطقة معروفة في مصر كلها بأنهم أكتر ناس بتتكلم .. عندهم استعداد يتكلموا ويحكوا حواديت وقصص ومغامرات وأهوال لمدد أيام وليال متواصلة بدون انقطاع .. ولأن الجينات دي جوايا .. ومش عارف أطلعها على مين .. فكانت الكتابة هي المتنفس ليا .. وما صدقت ألاقي حاجة زي المدونات دي الواحد يرغي فيها ...
عشان كده تلاقي فيه بوست كل يوم .. مش كده وبس دا لو حبيتم ممكن يكون فيه بوست كل ساعة .. بس كده لازم اعمل وصلة من دماغي على المدونة على طول .. وهي جت ع الوصلة دي ما هي مصر كلها بقت وصلات ...

لما عملت المدونة .. عملتها لأسباب كتيرة منها إن أحول الكلام اللي بيروح ع الفاضي ده لكتابة .. أعمل متنفس لدماغي اللي اتزحمت بكل أنواع الرغي ..

عشان كده المدونة بالنسبة لي مش دروس ولا وعظ ولا دراسات بكتبها.. واعتذر لمن كان يحسن الظن بي وفاكر إني عملت المدونة بهذا الهدف .. فالحقيقة إن المدونة عندي هي تحويل الصوت الداخلي إلى كلمات .. بحيث أريح دماغي من استرجاع الأفكار دي .. لأنها حتبقى موجودة ولو عايز ارجعلها ابقى عارف حرجع لها فين .. بدل ما بعدمها بمجرد مرور الوقت ... واعيد توليدها من جديد في وقت تاني

لما بدأت أشارك الناس في الكلام دخل عامل تاني اللي هو الاستفادة برأي الآخرين في الرغي اللي عندي عشان اعرف الصح منه من الغلط .. واللي شجعني على فتح المدونة أمام الجميع إني شفت مدونات ناس زي الروابط اللي موجودة ع اليمين دي كسروا احتكار عالم التدوين فحبيت أكون زيهم ..

فالروابط اللي على الجنب دي حاططها ببساطة عشان الناس دي بشعر إنهم أنا في صور مختلفة .. يعني الروابط دي - بلا استثناء - روابط لنفسي بس في مدونات مش أنا اللي بكتبها .. وكل الناس دي - أفتكر - إني حطيت روابط ليهم قبل ما يحطوا هما روابط ليا .. ولو ما حطوش روابط ليا حفضل حاطط روابطهم لأنها ببساطة روابط ليا .. حد فاهم حاجة ؟؟ ..
فيه ناس تانية كتيرة بحترمهم جدا وبدخل مدوناتهم كل يوم .. بس مش حاسس إنهم أنا .. فعشان كده مش حاطط روابطهم مع احترامي الكامل ليهم وتقديري ..

بس آدي الحكاية

8 comments:

Anonymous said...

ياسيدى أرغى براحتك
وبعدين لما تتكلم مع ناس كتير ممكن تلهم لحد فيهم فكره
وممكن انت نفسك تستفيد

رأيى الشخصى البلوجرات دى خلت كل اللى فى نفسه حاجه يقولها وعلى الملأ

ولأ ياسيدى مش متجوز لازلت الحمد لله الى الان سيد قرارى
:)
مين عالم لما أتجوز هاعرف أعلق ولا لا
خير خير خير
دمت فى أمان الله وحفظه
سلام

eldoctor said...

زمان من حوالى 20 سنة ..(انا عجوز ) 20 سنة دى ولا حاجة ..
كان لو لقيت واحد ماشى يكلم نفسه فى الشارع .. تقول يا عينى الراجل مخه ضرب ..
اما دلوقت .. فببساطة .. الاخ معاه موبايل و سناعة بلو توث .. و ماشى يحكى .. بيضيع وقت ..
قديما كان المفكر و الفيلسوف يضيع عمره علشان يطلع بنظيرة .. و يجرى على ابواب الاغنياء و السلاطين لتمويل افكاره .. و مشاريعه .. و يفلس و يمكن يموت .. ولم ينشر كتاب واحد

دلوقت لا .. ممكن يكتب على النت و مايلحقش يتهنى باللى كتبه .. يا يتسرق .. ياما يعتقلوه على ازدراء أى حاجة .. حقوق الانسان .. او الخرفان ..

تحياتى

أحمد said...

حاسس والله بكل كلمة كتبتها فى البوست الحلو ده

كلنا بنكلم نفسنا لكن فيه اللى معترف بكده و فيه اللى بيحارب كده و فيه اللى ميعرفش أنه ممكن يكلم نفسه عشان يرتاح

لكن عارف أجمل حاجة فى الموضوع كله أنك بتكتب بوست كل يوم

كراكيب عادل said...

والله احلي حاجة انك تكلمي نفسك علي الاقل مفيش حد يزعل

اقولك سر انا عامل المدونة بتاعتي علشان كل ما اقراها اضحك

اصلي في الحقيقة هتجنن


اه يا نافوخي

Unknown said...

لا ده مش جنان على فكرة .. ده إسمه الحوار مع النفس .. بس أهم حاااااجة تقول لنفسك كلام إيجابى .. يعنى مش تحبطها وتطلع عنيها

انا زى حضرتك بالظبط والله

سعات ابقى مع نفسى فى أمان الله دماغى تروح لحاجة فقعد اعيط .. أو ابقى مع صحباتى قاعدين ساكتين ومرة واحدة اضحك جااااااامد .. المصيبة لما ابتسم فى الشارع عشان بيتفهم غلط

:(

لدرجة إن من كتر ما دماغى بتودى وبتجيب ومش مبطلة كلام مع نفسى جه تأليفى لشخصية كاميكاز باشا حبيب الملايين

ناس كتير متعرفش انه من خيال المؤلفة البحت .. وبفكر اعمله مدونة خاصة بيه إن شاء الله .. اهو يسترزق بدل قعدته دى

اه صحيح ده انا مدونتى على اليمين اهيه .. يعنى هى بتاعة حضرتك ازاى يعنى مش فاهمة ... يعنى انا اتعب نفسى واكتب وكاميكاز ينفض فى المدونة وفى الاخر الاقيها بتاعة المدونين التانين؟؟؟؟

يلا مش مشكلة

كاميكاز:
إرغى عادى خاااااالص لإن رغيك مفيد بالنسبة لنا .. مش احسن من الكلام الفاضى اللى فى الأماكن التانية؟؟

وبعدين انا رغيت كتير اوى

سلام عليكم

إنسان || Human said...

ياسلام ...كأنك بتتكلم عني ..أنا برده على طول بكلم نفسي وبتكون حالة جنان ........براحتك ياسيدي ولا يهمك معظم المدونين كده...

khaled said...

اولا اشكرك جدا على وصفك لى بالفنان و بالكبير
و بالزعيم
انت هاتخلينى اتغر و الا ايه
ثانيا عايز اقلك ان انا مش زعلان علشان بوست كل يوم انا نفسى باحط بوست كل يوم و لكن اللى مزعلنى ان انا ما باقدرش اكمل بوست طويل باتعب و بازهق بسرعة علشان كده باقرا البوست على مراحل
و انا زيك تمام
لو ماكنتش عملت البلوج ده ماكنتش اعرف هايجرالى ايه
و كمان ساعدتنى اكون معارف و صداقات حلوة و اتفاعل مش بس مع نفسى و لكن مع ناس تانية جواها نفس اللى جوايا
و على فكرة
انا قريت البوست ده مرة واحدة و معلش على التأخير فى التعليق

ma 3lina said...

إلى مبرمج حر : أهلاً .. اهلاً أهلاً .. المدونة نورت بتشريفك يا هندسة أشكرك على تعليقك .. أشكرك ForEach char x in YourComment
-------- 11/03/2007 03:57 am ---------

إلى الدكتور المحارب : يا أهلاً يا دكتور .. يعني حضرتك شايف إن كده طبيعي ولا مش عايز تخضني زي صاحبي الطبيب .. على فكرة هو طبيب عناية مركزة برضه
-------- 11/03/2007 03:52 am ---------

إلى حسن محمود : خلاص أنا حرغي بس مش عايز حد يقول آه يا دماغي
-------- 11/03/2007 03:49 am ---------

إلى إنسان : أهلاااا .. انت فين ياراجل .. وصلك الرد ولا عملت لي مشاكل وخلاص ... ههههههه .. المهم أنت عامل إيه دلوقت
-------- 11/03/2007 04:05 am ---------

إلى إنسانة : إيه دا هو كاميكاز السادس عشر أخد لقب البشوية وأنا عمال أقول له كاميكاز بيه كاميكاز بيه .. معلش بقى سامحني يا باشا ..
-------- 11/03/2007 04:03 am ---------

إلى عادل : هاهاها .. اختلفت الأسباب .. وعملنا لمدونة واحد .. يالا بقى ما علينااااا .. شرفتني بزيارتك الأولى
-------- 11/03/2007 04:00 am ---------

إلى خالد : والله سعيد جداً بزيارتك .. وموضوع الزهق دا زي ما بقول لك بسبب القعدة الطويلة قدام الكمبيوتر ..
---------- 13/03/2007 06:14 am -----------